To The Word – Day 215

₁Nna, Paulose, yo ka thato ya Modimo ke lego moapostola wa Kriste Jesu, le Timotheose, ngwanaborena, re dumediša phuthego ya Modimo ye e lego motseng wa Korinte, le badumedi bohle nageng yohle ya Agaya, re re:

₂Nke Modimo, Tatagorena, le Morena Jesu Kriste ba le gaugele, ba le fe khutšo.

₃A go retwe Modimo, Tatago Morena wa rena, Jesu Kriste, yena Ralešoko, Modimo, Mokgothatši wa ka mehla. ₄O re kgothatša mathateng ohle a rena, gore ka kgothatšo ya gagwe le rena re tle re kgone go kgothatša ba bangwe ge ba le mathateng a mehutahuta. ₅Bjalo ka ge le rena re tlaišwa kudu go etša Kriste ge a ile a tlaišwa, Modimo le yena o re kgothatša kudu ka yena Kriste. ₆Ge re hlokofatšwa, ke gore lena le kgothatšege, le phološwe; ge re kgothatšwa, ke gore le lena le kgothatšege, le fiwe maatla a gore le kgone go meletša ka kgotlelelo mahloko ao le rena re a meletšago. ₇Ke ka lebaka leo go le tshepa ga rena go sa tekatekego; re tseba gore ge le hlokofatšwa bjalo ka rena, le go kgothatšega le kgothatšega bjalo ka rena.

₈Banabešo, ke nyaka go le lemoša mathata a re bilego le ona nageng ya Asia. A be a re imela kudu mo re ilego ra ba ra itlhoboga gore ga re sa tlo phela. ₉Re be re ikwa nke re šetše re ahloletšwe lehu. Fela e be e le gore re se ke ra itshepa, re tshepe Modimo, yena a tsošago bahu. ₁₀Ke yena yo a re phološitšego dikotsing tše dibjalo tša lehu, ebile o sa tlilo no re phološa. Ke yena yo re holofetšego gore o tla re phološa gape, ₁₁ka ge le lena le re thuša ka go re rapelela. Ke gona dithapelo tše tša batho ba bantši ba ba re rapelelago di tlago kwewa ke Modimo, a re šegofatša, mme ba bantši ba re lebogela go yena.

₁₂Rena se re ikgantšhago ka sona ke gore dipelo tša rena di re hlatsela gore boitshwaro bja rena mo lefaseng, gagolo ge re be re le moo go lena, e bile bja go laolwa ke botshepegi le pelo ye e se nago bomenetša ye re e filwego ke Modimo; e bile bja go laolwa ke kgaugelo ya Modimo, e sego bohlale bja batho. _13-14Re le ngwalela fela tše le kago kgona go di bala la di kwešiša. Gomme le ge gonabjale le re kwešiša ka boripana, ke holofela gore ka moso le tla re kwešiša ka botlalo. Ke mo ka Letšatši la Morena wa rena, Jesu, le tlago ikgantšha ka rena, bjalo ka ge le rena re tla be re ikgantšha ka lena.

₁₅Ka kholofelo ye bjalo ke be ke gopotše go tla go lena pele, gore le be le mahlatse gabedi. ₁₆Gobane ke be ke gopotše gore ke fete go lena ge ke eya Matsedonia, le ge ke boa ke fete ke le bona, gomme le nthuše ka tše ke tlago di nyaka ge ke eya nageng ya Judea. ₁₇Kgane ge ke be ke gopotše ka mokgwa woo ke be ke bonala ke swaswa? Na e ka ba ge ke gopola taba ke e gopodišwa ke marato, gore mo go nna “Ee, ee” e swane le “Aowa, aowa”? ₁₈Ka Modimo yo a botegago, se ke le boditšego sona ga se “Ee” ye e swanago le “Aowa”. ₁₉Gobane Morwa wa Modimo, Jesu Kriste, yo le mmegetšwego ke nna le Silase le Timotheose, ga se wa “Ee” ye e swanago le “Aowa”. Yena ke “Ee” ya Modimo; ₂₀gobane ka yena Modimo o re “Ee” go dikholofetšo tšohle tša gagwe. Ke ka lebaka leo le “Amene” ya rena e bolelwago ka yena, gore go retwe Modimo. ₂₁Yo a tiišago botee bja rena le lena go Kriste ke Modimo; ke yena Modimo yo a re kgethilego gore re mo direle; ₂₂ke yena a re swailego, a tsenya Moya wo Mokgethwa ka dipelong tša rena ya ba tiišetšo ya gore re tla hwetša tše a re beetšego tšona.

₂₃Nna ke bitša Modimo gore e be hlatse ya ka, yena a tsebago pelo ya ka, gore lebaka la gore ke se tle moo Korinte e be e le gore ke se le lakaletše. ₂₄Ga re leke go le laolela tše le swanetšego go di dumela, gobane tumelong gona le tiile. Se re se dirago ke go thušana le lena go le okeletša boiketlo.

₁Ka gona, ke feditše le pelo gore nka se sa tla go lena ka taba tša go le nyamiša. ₂Gobane ge nka nyamiša lena, ke tla hlwa ke sa thabišwa ke bomang, ntle le lena ke tla bego ke le nyamišitše? ₃Ke ka lebaka le ke ilego ka le ngwalela lengwalo lela – ke be ke sa nyake gore e re ge ke etla go lena ke tle ke nyamišwe ke bao ba swanetšego go nthabiša. Gape nna ke dumela gore ge ke thabile, le lena ka moka le a thaba. ₄Ke le ngwaletše ke tshwenyegile kudu, ke hlokofetše kudu, ke bile ke ediša meokgo; ge ke le ngwalela ke be ke se ka ikemišetša go le kweša bohloko, eupša ke be ke nyaka go le lemoša ka moo ke le ratago ka gona.

₅Ge motho a dirile se se nyamišago ga se a nyamiša nna, ke ra ge ke sa nyake go hlwa ke dikadika, o nyamišitše lena ka moka. ₆Go lekane ge a kgadilwe ke ba bantši ba lena ka mokgwa woo. ₇Bjale upšang le mo swarele, le mo kgothatše gore a se nyame mo a kago ba a fenyetšwa saruri ke manyami. ₈Ka gona ke a le rapela, le mmontšhe gore le mo rata e le ruri. ₉Mola ke le ngwalela lengwalo ke be ke dio nyaka go bona ge eba le a mpotegela, le ge eba le phetha tšohle tše ke le laelago tšona. ₁₀Ge le swarela motho phošo ya gagwe, le nna ke a mo swarela. Gobane ge ke swarela motho – ge eba tshwarelo e nyakega – ke mo swarela go ya ka thato ya Kriste, e le ka lebaka la lena, ₁₁gore Sathane a se ikhole ka rena, gobane maanomabe a gagwe re a a tseba.

₁₂Ge ke fihla Troase go bega Taba ye Botse ya Kriste, ke hweditše Morena a nkgoretše ditsela. ₁₃Fela ka se we pelo ge ke sa hwetše Titose, ngwanaborena. Ka gona ka laela batho ba moo mme ka fetela Matsedonia.

₁₄Fela a re lebogeng Modimo! Gobane ka mehla Modimo o re dira ba tee le Kriste yo a fentšego. Ka rena Modimo o dira gore go tsebja ga gagwe mo gohle go phatlalale bjalo ka monko. ₁₅Gape rena re etša seorelo se se nkgago bose se se tšhumelwago Modimo ke Kriste, se se phatlalalelago go bao ba phologago le bao ba lahlegago. ₁₆Go bao ba lahlegago se bjalo ka lefetla le le bolayago, kganthe go bao ba phologago ke monko wo o phedišago. Bjale ke mang yo a ka kgonago taba tša mohuta wo? ₁₇Rena ga re etše ba bantši ba ba gwebago ka molaetša wa Modimo; eupša ka ge re romilwe ke Modimo re bolela re se na bomenetša mo pele ga gagwe, re le bahlanka ba Kriste.

₁Na ge re realo ke gore re sa thomile go itlhatsela? Kgane le rena go nyakega gore, bjalo ka batho ba bangwe, re be le lengwalo la bohlatse la go tla go lena goba la go tšwa go lena? ₂Gape lengwalo la rena ke lena ka noši, gomme le ngwadilwe dipelong tša rena gore le tsebje mme le balwe ke bohle. ₃Go pepeneneng gore ke lena lengwalo le le ngwadilwego ke Kriste ka boyena mme a le romela ka rena. Ga se la ngwalwa ka enke, le ngwadilwe ka Moya wa Modimo yo a phelago; ga se la ngwalwa matlapeng, le ngwadilwe dipelong tša batho.

₄Re realo ka gobane re tshepile Modimo ka Kriste. ₅Ga se gore rena ka borena re ka kgona go ikgopelela selo mo nkego se tšwa go rena. Gobane go kgona ga rena go tšwa go Modimo; ₆ke yena a re kgontšhitšego go ba badiredi ba kgwerano ye mpsha ye e sego ya molao wo o ngwadilwego, eupša e lego ya semoya. Gape molao wo o ngwadilwego o a bolaya, kganthe Moya wo Mokgethwa wona o a phediša.

₇Melao e be e tlokilwe ka ditlhaka matlapeng, gomme mohla e begwa letago la Modimo le ile la bonagala, Baisraele ba ba ba šitwa ke go tsepelela Moshe sefahlegong ka lebaka la go taga ga sefahlego sa gagwe, etšwe go taga moo e be e le mo go felago. Bjale ge melao ya Moshe ye e tlišago lehu e tlile ka letago le legolo, ₈na modiro wa Moya wo Mokgethwa wona o ka napa wa se be le letago la go feta leo? ₉Ge modiro wo o išago tahlegong o be o taga ka tsela ye, na modiro wo o lokafatšago wona o ka napa wa se tage le go feta? ₁₀Letago lela la pele ga se selo ge le bapetšwa le la gonabjale. ₁₁Gobane ge sa go fela se ile sa taga, na sa go se fele sona se ka napa sa se tage le go feta?

₁₂Ka ge re na le kholofelo ye, re bolela ka sebete. ₁₃Rena ga re etše Moshe yo a ilego a ikhurumetša sefahlego ka seširo gore Baisraele ba se ke ba bona letago leo ge le fifala mme le timelela. ₁₄Ba be ba sa kgone go kwešiša; gomme le lehono megopolo ya bona e sa apešwa ke seširo seo ge ba bala dipuku tša kgwerano ye tala. Seširo seo se apolwa fela ke Kriste. ₁₅Le lehono ge ba bala melao ya Moshe, seširo seo se ba apeša megopolo. ₁₆Fela mabapi le Moshe Mangwalo a Makgethwa a re: “Nako le nako ge a retologela go Morena seširo seo se a apoga.” ₁₇Bjale, mo temaneng ye “Morena” ke Moya; gomme mo go lego Moya wa Morena go na le tokologo. ₁₈Ka gona, rena ka moka re bonagatša letago la Morena bjalo ka seipone re se ra ikhurumetša difahlego; gomme re a fetošwa ra swana naye le go feta pele ka letago. Seo se dirwa ke Morena, yo e lego yena Moya.

₁Modimo o re babaletše a re fa modiro wo, ka gona ga re nyame. ₂Mediro ya sephiring ya dihlong re e phayela thoko; ga re dire tša bofora goba ra phereketša lentšu la Modimo. Re tšweletša nnete pepeneneng re lebeletšwe ke Modimo, ra itlhatsela go mang le mang. ₃Ge eba Taba ye Botse ye re e begago e sa širegile, e širegetše fela bao ba timelago. ₄Ke ba ba sa dumelego, bao modimo wa lefase le o ba šitišago go kwešiša. O ba šitiša go bona seetša se se ba bonegelago sa go tšwa go Taba ye Botse ya letago la Kriste, yo e lego yena seswantšho sa Modimo. ₅Gobane ga re ipege rena beng; re bega Jesu Kriste gore ke yena Morena, le gore rena re bahlanka ba lena ka lebaka la Jesu. ₆Gape Modimo yo a rilego: “Seetša a se bonege mo leswiswing!” ke yena Modimo yo a bonegetšego dipelo tša rena, gore a re tsebiše letago la Modimo le le tagago sefahlegong sa Kriste.

₇Eupša rena re swerego lehumo le re swana le dibjana tša letsopa, e le gona gore go bonagale gore maatla a magolo a go feta ohle ke a Modimo, ga se a rena. ₈Re tlaišwa ka mekgwa yohle, fela ga re palelwe; re mo kgakanegong, fela ga re itlhoboge; ₉re a hlomarwa, fela Modimo ga a re tlogele; re digelwa fase, fela ga re feleletšwe. ₁₀Ka mehla re dula re le kotsing ya go bolawa ra etša Jesu, fela re sa phela, go laetša gore Jesu o a phela. ₁₁Gomme rena re phelago re dula re le kotsing ya lehu ka lebaka la Jesu, eupša re sa phela, go laetša gore Jesu o a phela. ₁₂Seo se ra gore lehu ka go rena le a katana, mola ka go lena go katana bophelo.

₁₃Mangwalo a Makgethwa a re: “Ke dumetše, ka gona ke boletše.” Gomme le rena re ya ka wona moya woo wa go dumela, re a dumela, ka gona re a bolela. ₁₄Re a tseba gore Modimo yo a tsošitšego Morena Jesu bahung, le rena o tla re tsoša bjalo ka ge a tsošitše Jesu, a re iša le lena mo yena a lego gona. ₁₅Tšohle tše di dirwa ka lebaka la lena; gomme ge Modimo a dutše a gaugela batho ka bontši, bona ba tla mo leboga ba mo tumiša.

₁₆Ke ka lebaka la tšona taba tše ge re sa lape. Le ge mebele ya rena e hlagala, re tielela pelong letšatši ka letšatši. ₁₇Gomme ditlaišego tše dinyenyane tša lebakanyana tše re di kwago tše, di tla re tlišetša letago la go ya go ile, le le fetago dilo tšohle. ₁₈Gobane re lebeletše tše di sa bonwego, e sego tše di bonwago. Gape tše di bonwago ke tša lebakanyana fela, kganthe tše di sa bonwego tšona ke tša go ya go ile.

₁Gobane re a tseba gore ge mošašana wo re dulago ka go wona mo lefaseng o hlahlamolwa, Modimo o re fa moago wa go dula kua legodimong, legae la go ya go ile le le sego la agwa ka diatla. ₂Ke ka lona lebaka leo re tsetlago, re dumago kudu go apešwa mmele wa rena wa letago wo o tšwago legodimong, ₃gore re se tlo hwetšwa re hlobotše, re hwetšwe re apere. ₄Ge re sa dula ka mošašaneng wo wa lefaseng, re tsetla re ekwa re gateletšwe; e se gore re nyaka go apolwa mmele wo wa lefaseng, eupša e le gore re nyaka go apešwa wa legodimong, gore go hwa ga rena go tle go metšwe ke go phelela sa ruri. ₅Yo a re lokišeditšego go fetoga mo ke Modimo, a re fa Moya wa gagwe wo Mokgethwa e le tiišetšo ya gore taba yeo e tla phethega.

₆Ka gona re dula re tiile maatla, re tseba gore ge ga gaborena e sa le mo mmeleng wa rena re tla no dula re le kgole le Morena. ₇Gape re phela re dumela go Morena, e sego re mmona. ₈Re dula re tiile maatla, gomme re duma kudu ge nkabe re ka huduga mo mmeleng ra yo dula le Morena. ₉Eupša re duma kudu ge nkabe re ka mo kgahla gohle mo re lego gona, e ka ba ge re sa dula mo lefaseng, goba re ile legodimong. ₁₀Gobane bohle re tla swanela go yo tšwelela pele ga Kriste gore a re ahlole, gore mongwe le mongwe a fiwe se se mo swanelago go ya ka tše a di dirilego ge a sa phela mo lefaseng, e ka ba tše dibotse goba tše dimpe.

₁₁Ka ge re lemoga gore go boifa Modimo ke eng, re leka go kgodiša batho gore re a rereša. Yo a re tsebago ka botlalo ke Modimo, gomme le lena ke holofela gore le ntseba gabotsebotse. ₁₂Ga se gore re leka gape go ithetiša lena; se re lekago go se dira ke go le hlalošetša tše re di dirago gore le tle le ikgantšhe ka rena, le kgone go fetola ba ba kgantšhago tše di bonwago ka mahlo, e sego tše di lego ka pelong ya motho. ₁₃Gomme ge eba mola re tsenwe ke Moya re be bonala re gafa, re be re gafela Modimo. Ge re tšea gabotse, go holega lena. ₁₄Re laolwa ke lerato la Kriste ka ge re lemogile gore motho o tee o hwetše batho ka moka, gomme seo se ra gore batho ka moka ba hwile naye. ₁₅O hwetše batho bohle, gore bao ba sa phelago ba se sa iphelela, ba upše ba phelele yena yo a rilego go ba hwela a ba a tsoga bahung ka lebaka la bona.

₁₆Ka gona bjale ga re sa gopolela motho go ya ka mo batho ba mo gopolelago ka gona. Le yena Kriste ge eba re be re mo gopolela bjalo, bjale ga re sa mo gopolela ka mokgwa woo. ₁₇Ka lebaka leo, ge motho e le wa Kriste e ba sebopiwa se sefsa; tša kgale di fetile, go tlile tše difsa. ₁₈Tšeo ka moka di dirwa ke Modimo, yo a re boelantšego le yena ka Jesu Kriste, le rena a re fa modiro wa go boelanya ba bangwe le yena. ₁₉Molaetša wa rena ke wa gore Modimo o boelanya batho ba lefase le yena ka Kriste. Ga a ba balele dibe tša bona, le gona o re laetše go botša batho ka mo a ba boelanyago le yena ka gona.

₂₀Bjale ge, ke rena baemedi ba Kriste, gomme re bolela mo nkego ke Modimo yo a kgopelago ka rena. Re kgopela legatong la Kriste re re: Ipoelanyeng le Modimo! ₂₁Kriste o be a se na sebe, eupša Modimo a mo rweša dibe tša rena, gore re tle re lokafatšwe ke yena ka go dirwa ba tee le Kriste.

₁Ka ge re le ba go dirišana le Modimo re a le kgopela gore le se be ba le amogeletšego kgaugelo ya gagwe lefeela. ₂Gobane yena Modimo o re:

₃Ga re šitiše motho ka selo, ka gobane re nyaka gore bodiredi bja rena bo hloke bosodi. ₄Mo go tšohle tše re di dirago re ipontšha re le bahlanka ba Modimo ka go kgotlelela kudu matshwenyego, le mehlako, le mahlomola, ₅le go bethwa, le go golegwa, le go hlaselwa meferefereng, le go šomišwa kudu, le go hlobaela, le tlala. ₆Re ipontšha re le bahlanka ba Modimo ka go ila bobe, le ka tsebo, le ka bopelotelele, le ka botho, le ka maatla a Moya wo Mokgethwa, le ka lerato la nnete, ₇le ka molaetša wa therešo, le ka maatla a Modimo. Toka ke sona sehlabani sa rena sa go hlasela le sa go itšhireletša. ₈Re a hlompšha ebile re a hlomphollwa; re a rogwa ebile re a retwa; re tšewa gore re a fora etšwe re rereša; ₉re bjalo ka ba ba sa tsebjego, le ge re tsebja ke bohle; re etša ba ba hwilego etšwe re a phela. Re bjalo ka ba ba otlwago mme re sa bolawe; ₁₀re swana le ba ba nyamišwago, etšwe re dula re thabile; re swana le badiidi, etšwe re humiša ba bantši; e ka re ga re na selo, etšwe re na le dilo ka moka.

₁₁Lena Bakorinte, re boletše le lena re ahlame; re le utolletše tšohle tša ka pelong. ₁₂Ga se rena re le tswaleletšego dipelo tša rena, eupša ke lena le re tswaleletšego tša lena dipelo. ₁₃Ke bolela le lena mo nkego le bana ba ka; re direleng se re le diretšego sona: re utolleleng tša ka dipelong tša lena!

₁₄Le se ke la gogišana le bahlokatumelo, gobane toka e ka sepedišana bjang le go se loke? Kgane seetša le leswiswi tšona di ka dudišana? ₁₅Gomme Kriste yena a ka kwana bjang le Beliale? Modumedi yena a ka kwana ka eng le mohlokatumelo? ₁₆Tempele ya Modimo e ka kwana bjang le medingwana ya baditšhaba? Gape rena ke rena tempele ya Modimo, bjalo ka ge Modimo ka boyena a boletše a re:

₁Barategi, tšeo di holofeditšwe rena. Ka gona, a re itlhwekišeng go tšohle tše di re tšhilafatšago mmeleng le moyeng, gomme re kataneleng go ba ba bakgethwakgethwa ba go boifa Modimo.

₂Re bontšheng gore le a re rata. Ga se ra fošetša motho, ga se ra kgopiša motho, ebile ga se ra hlalefetša motho. ₃Ga se gore ge ke realo ke bea motho molato, gobane, bjalo ka ge ke šetše ke boletše, re le rata mo e lego gore rena le lena re ka se aroganywe ke selo, ešita lehu goba se sengwenyana sa gonabjale. ₄Ke bolela le lena ke sa šie le gatee; ke tloga ke ikgantšha ka lena! Matshwenyegong a rena ohle ke tia maatla ke thabile kudu.

₅Le ge re seno fihla Matsedonia ga se ra ka ra ehuga. Re be re dula re dikaneditšwe ke matshwenyego le diphapano le go boifa. ₆Eupša Modimo yo a tiišago ba ba nolegilego moko a re tiiša ka go tla ga Titose. ₇E sego ka go tla ga gagwe fela, eupša le ka mo le ilego la mo tiiša ka gona. A re anegela ka mo le ntlholosetšego ka gona, le ka mo le swabišitšwego ke se se diregilego, le ka mo le fišegelago go nthekga ka gona. Ke ka lebaka leo bjale ke thabilego ka mokgwa wo.

₈Gobane le ge ke ile ka le nyamiša ka lengwalo lela ka go le ngwalela lona, ga ke itshole. Go le nyamiša gona ke a bona gore ke ile ka le nyamiša, le ge e bile ga lebakanyana fela, gomme le ge nkabe ke ile ka itshola bjale ga ke sa itshola, ₉ke thabile, ke sa thabele ge ke ile ka le nyamiša, eupša ke thabela ge manyami a lena a le sokolotše. Le be le nyamile ka mo go nyakago Modimo, ka gona go le nyamiša ga rena ga se gwa senya selo. ₁₀Gape go nyama ka mo go nyakago Modimo go tliša tshokologo ye e išago motho phologong – gomme ke manyami a a sa sodišego. Ge e le manyami a lefase ona a iša motho lehung. ₁₁Bonang gore go nyama ga lena ka mo go nyakago Modimo go le diretšeng: go le dirile gore le nagantšhiše taba ye ka hloko; go feta moo go le fišegedišitše go bontšha go hloka molato ga lena, le go selekega ga lena, le go boifa ga lena, le phišego ya lena, le borapedi bja lena, le maikemišetšo a lena a go kgala phošo. Le bontšhitše gore ga le na molato mo tabeng ye.

₁₂Bjale ge, le ge ke ile ka le ngwalela lengwalo lela, e be e se ka lebaka la yo a fošitšego goba yo a fošeditšwego. Ke be ke le ngwalela lona go le bontšha mo pele ga Modimo ka mo le re ratago gagolo ka gona. ₁₃Ke sona se se ilego sa nkgothatša.

Ya se be fela go kgothatšega; go kgothatšega mo ga ka gwa oketšwa ke go kgahlwa ke lethabo la Titose la mola lena ka moka le mo kgothatša. ₁₄Gape nkile ka mo kgantšhetša lena, gomme ga se la ntshwabiša. Re dula re le botša therešo, gomme tše ke di kgantšheditšego Titose di bonagetše gore ke therešo. ₁₅Gomme ge a gopola ka mo bohle le bego le ikemišeditše go phetha ditaelo tša gagwe, le ka mo le bego le mo amogela ka poifo le tšhabo ka gona, go le rata ga gagwe go tia go eya pele. ₁₆Bjale ke thaba kudu ka gore nka no ikanya lena dilong ka moka.