To The Word – Day 216

₁Banabešo, re le tsebiša tša kgaugelo ya Modimo ye a e bontšhitšego diphuthego tša Matsedonia. ₂Le ge ba lekilwe gabohloko ka matshwenyego, lethabo la bona e bile le legolo mo e lego gore le ge ba diila ka mokgwa wo e bile bomafakudu. ₃Ke tloga ke rereša ge ke re ba ntšhitše ka mo ba kgonago ka gona, ebile nka no re le go feta ka mo ba kgonago ka gona, e le ka boithaopo. ₄Ba re kgopetše kudu ba re rapela gore re ba dumelele go tsenya seatla modirong wa go thuša badumedi ba Judea ka dimpho. ₅Ba dira go feta ka mo rena re bego re gopotše gore ba tla dira. Ba ikgafela Morena pele, ba kgona ba ikgafela rena, go ya ka thato ya Modimo. ₆Ra ba ra kgothatša Titose gore a feleletše modiro woo wa lerato mo go lena, bjalo ka ge o be o thomilwe ke yena. ₇A e re bjalo ka ge le le dithwadi mo go tšohle tumelong, le polelong, le tsebong, le mafolofolong a a se nago kelo, le go le rateng ga rena, le modirong woo wa lerato, le gona le be dithwadi.

₈Ge ke realo ga se gore ke le beela molao. Ka go le botša mafolofolo a ba bangwe ke dio leka go lekola gore na la lena lerato ke la nnete. ₉Kgaugelo ya Morena wa rena Jesu Kriste le a e tseba; gobane le ge a be a humile, o ile a itiitša ka lebaka la lena, gore le humišwe ka bodiidi bja gagwe.

₁₀Mo tabeng ye ke a le eletša mme le tla holega. Ngwagola e bile lena ba mathomo e sego fela ba go fa, eupša le ba go rata go fa. ₁₁Bjale feleletšang se le se thomilego. Fišegelang go se phetha, go etša ge le ile la fišegela go se thoma, gomme le se dire ka tše bjale le nago le tšona. ₁₂Gobane ge motho a ikemišeditše go fa, Modimo o thabela se a kgonago go se ntšha, e sego se a sa se kgonego.

_13-14Ge ke realo ga se gore ke leka go hlatlola ba bangwe gore go imetšwe lena. Se ke lekago go se dira ke gore go lekanwe, gore ka ge bjale lena le humile, le thuše ba ba hlokago, e tla e re mola go hloka lena bona ba humile ba le thuša. Ka tsela yeo le tla be le direlwa go swana. ₁₅Le Mangwalo a Makgethwa a re: “Yo a topilego kudu ga se a fetiša tekanyo, mme yo a topilego gosenene ga se a hlaetša.”

₁₆A re lebogeng Modimo ge a file Titose mafolofolo a go swana le a rena gore a le thuše. ₁₇Gobane ga se a thabela fela kgopelo ya ka; mafolofolo a go thuša le ona o be a na le a mantši mo a bilego a ithaopile a etla go lena. ₁₈Re mo romile le ngwanaborena yo a hlompšhago diphuthegong ka moka ka lebaka la mošomo wa gagwe wa go bega Ebangedi. ₁₉Ntle le moo o kgethilwe ke diphuthego gore a sepele le rena ge re dira modiro wo wa lerato wo re o direlago go tumiša Morena, le go bontšha gore re nyaka go thuša.

₂₀Re hlokomela gore re se solwe mabapi le dimpho tše dintši tše. ₂₁Maikemišetšo a rena ke go dira se se lokilego, e sego fela pele ga Morena, eupša le pele ga batho.

₂₂Re romile ngwanaborena yo mongwe le bona. Yena re mo lekile ka mekgwa ye mentši, gomme re bone gore ka mehla o na le mafolofolo a go thuša. Gomme ka ge bjale a le tshepile gakaaka, o na le mafolofolo le go feta. ₂₃Ge e le Titose yena ke modirišani wa ka, gomme o šoma le nna go le hola; ge e le bana ba borena bao ba bangwe ba ba sepelago le yena ke baemedi ba diphuthego bao Kriste a tumišwago ka bona. ₂₄Le ba bontšhe lerato, gore diphuthego tšohle di le tsebe gomme di bone gore ge re di kgantšhetša lena ga se ka phošo.

₁Ge e le mabapi le go thuša badumedi ba ba lego Judea, ga se taba ye nka hlwago ke le ngwalela yona. ₂Ke tloga ke tseba gore le ikemišeditše go thuša, ebile ke šetše ke le kgantšhitše go ba Matsedonia ka re: “Badumedi ba Agaya e sa le ba itokišetša ngwagola go thuša.” Mafolofolo a lena a tutueditše ba bantši. ₃Banabešo bao ke ba rometše gore go le kgantšha ga rena mabapi le taba ye e se be ga lefeela, eupša e be gore le itokišeditše go thuša, bjalo ka ge ke boletše. ₄Fela ge batho ba Matsedonia ba ka tla le nna gomme ba hwetša gore ga se la itokiša, nka lewa ke dihlong – ge e le lena gona ga ke sa bolela – ka ge ke be ke holofetše gore le tla be le itokišitše. ₅Ke ka lebaka leo ke bonego go swanetše ge ke kgothatša banabešo bao gore ba nthake pele ba tle go lena go tlo kgoboketša e sa le nako dimpho tšela le holofeditšego go di ntšha. Ke mo e tlago re ge ke etla ka hwetša di lokišitšwe, e le dimpho tše di ntšhitšwego ka go rata, e sego ka go gapeletšwa.

₆Le gopole gore mabjalagosenene o buna gosenene; mabjalakudu le yena o buna kudu. ₇Mongwe le mongwe a ntšhe ka mo a ikemišeditšego ka gona, e se be ka pelaelo goba ka kgapeletšo, gobane Modimo o rata moneathabile. ₈Ebile Modimo o kgona go le fa dilo ka moka ka bontši, gore ka mehla le dule le na le tšohle tše le di nyakago le tlalelwa ke tša go le kgontšha go dira mediro ya go loka. ₉Le Mangwalo a Makgethwa a a bolela a re:

₁₀Gomme Modimo yo a fago batho peu ya go bjala le bogobe bja go ja, le lena o tla le fa peu ye le e hlokago, a e mediša, gomme ka tsela yeo a dira gore go se timane ga lena go le hweletše puno ye ntši. ₁₁O tla le humiša ka mekgwa yohle gore le kgone go fa kudu mabakeng ka moka, gore batho ba leboge Modimo ka lebaka la dimpho tša lena tše ba di hwetšago mo go rena. ₁₂Gape modiro wo le o dirago wo wa go thuša ba bangwe ga se fela wa go fa badumedi tše ba di hlokago, eupša ke wa go dira le gore batho ba bantši ba leboge Modimo kudu. ₁₃Ge batho bao ba bona bohlatse bja ge le efa bangwe dimpho, ba tla tumiša Modimo ka lebaka la ge le theeletša Ebangedi ya Kriste ye le e hlatselago, le bopelokgolo bja lena ge le abelana nabo le batho bohle. ₁₄Ka gona, ba tla le rapelela ka lerato le legolo ge ba bona Modimo a le loketše ka kgaugelo ye e se nago tekanyo. ₁₅A re lebogeng Modimo ka lebaka la mpho ye ya gagwe ye e šitago tlhalošo!

₁Nna Paulose ka nama, yo go thwego ke kwana ge ke le gare ga lena, eupša ke tau ge ke le kgole le lena, ke le kgopela ka boleta le botho bja Kriste. ₂Ke a le rapela, mohla ke etla go lena le se nkgapeletše gore ke be tau go lena, gobane ke bona gore tau yona nka no ba yona go bao ba rego re hlohleletšwa ke tša nama. ₃Gape le ge re phela mo lefaseng, ga se gore ge re elwa re hlohleletšwa ke tša lefase. ₄Dihlabani tše re lwago ka tšona ga se tša lefaseng, ke tša Modimo tše maatla, tše re di filwego go pšhatlaganya dibo ka tšona. Re fenya ba ditshele ka dipolelo, ₅le ba go ikgantšha ba go gana molaetša wa Modimo. Re leka go dira gore batho ba nagane tše di kgahlago Kriste. ₆Ge le šetše le bontšhitše go theeletša Kriste ka mokgwa wo o phethegilego, rena re tla be re itokišeditše go otla mang le mang yo a sa theeletšego.

₇Taba di a ipola! Ge motho a ipotša gore ke wa Kriste, a inagane gabedi, a tsebe gore le rena re ba Kriste bjalo ka yena. ₈Gobane le ge eba ke kgantšha maatla go feta tekanyo ao Morena a mphilego ona, maatla a go le aga, e sego go le phuma, ga go nteše dihlong. ₉Fela ga ke nyake go bonala nke ke a le tshošetša ka mangwalo a ka. ₁₀Go thwe: “Mangwalo a Paulose a bogale ebile a a hlaba, fela ge a le mo ka nama o boleta le tše a di bolelago di a nyatšega.” ₁₁Motho wa go realo o swanetše a kwešiše gore tše re di ngwalago ka mangwalong re le kgole ga di fapane le tše re tlago di dira ge re le moo go lena.

₁₂Rena ga re na sebete sa go ipala goba go ipapetša le ba ba iponago e le ba bagolo. Bona ke ditlaela, ka gobane ba itekanya ka tekanyo ye ba ipeelago yona, le gona ba ipapetša le bona ka bobona. ₁₃Ge e le rena, re ka se ithete go feta tekanyo, go itheta ga rena go tla ya le mellwane ye Modimo a re beetšego yona, gomme yona e akaretša le modiro wa rena moo go lena. ₁₄Ka gona ga se ra tshela mollwane ka go tla go lena. Gabotse e bile rena ba mathomo ba go tla go lena ka Ebangedi ya Kriste. ₁₅Ka fao ga re ithete ka modiro wo o dirilwego ke ba bangwe, modiro wo o dirilwego ka ntle ga mellwane ye re e beetšwego. Re holofela gore tumelo ya lena e tla gola, mme le maemo a rena moo go lena a phala ale a pele, re ntše re sa tshele mellwane ye re e beetšwego. ₁₆Ra kgona re yo bega Ebangedi dinageng tše di lego ka ntle go tša lena, gomme ra se kgantšhe tše di šetšego di dirilwe ke ba bangwe mafelong a mangwe. ₁₇Gape Mangwalo a Makgethwa a a bolela a re: “Yo a ikgantšhago a ikgantšhe ka tše di dirilwego ke Morena.” ₁₈Gobane yo a swanetšego go amogelwa ga se yo a ithetago, eupša ke yo a retwago ke Morena.

₁Nke nkabe le nkgotlelela, le ge ke bontšha botlaejana. Hle, nkgotleleleng! ₂Ke le fišegela bjalo ka Modimo; ke le swantšha le kgarebe ye e se nago bosodi, ye ke e beeleleditšego monna o tee, yena Kriste ka sebele. ₃Se ke se šiago ke gore le ka senywa megopolo la ba la se sa botegela Kriste gabotse, la etša Efa mola a tla forwa ke noga ka mahlajana a yona. ₄Gobane ge motho yo mongwe a etla a le ruta tša Jesu tše di fapanago le tše le di rutilwego ke rena le mo kgotlelela gabotse. Le amogela moya go yena wo le sa kago la o amogela go rena. Le gona le amogela Ebangedi ye a e begago ye e fapanago le ye le e amogetšego go rena.

₅Gape nna ga ke bone ke phalwa ke baapostola bao ba go ba bommakaipea. ₆Le ge polelo ke sa e kgone, tsebo yona ga ke e hloke; taba ye re le lemošitše yona nakong yohle le ka mekgwa yohle.

₇Ga se nke ka le lefiša selo mola ke le begela Taba ye Botse ya Modimo; ke ile ka ikokobetša gore go godišwe lena. Kgane ke be ke foša? ₈Mola ke le šomela bjalo ke be ke lefša ke diphuthego tše dingwe. Ke setšha ke be ke di hlakola. ₉Mola ke dula le lena ke hloka, le gona ga se nke ka imetša motho, gobane tšohle tše ke bego ke di hloka ke ile ka di fiwa ke badumedikanna ba go tšwa Matsedonia. Ke mo ke ilego ka ithiba, mme ke tla no fela ke ithiba gore ke se le imetše ka selo. ₁₀Ke ikana ka therešo ya Kriste ye e lego mo go nna gore mo gohle dinageng tša Agaya ga go yo a kago nthibela ge ke kgantšha taba tše. ₁₁Ka lebaka lang? Kgane ke ka lebaka la gore ga ke le rate? Modimo yena o a tseba gore ke a le rata.

₁₂Se ke se dirago bjale ke tla no fela ke se dira, gore ba ba nyakago lebaka la go kgantšha le go bolela gore ba dira tša go swana le tše di dirwago ke nna ba le hloke. ₁₃Gobane batho bao ke baapostola ba maaka, ke badiri ba boradia ba ba itirago tše nkego ke baapostola ba Kriste. ₁₄Fela ga go makatše, gobane Sathane ka boyena o tle a itire tše nkego ke morongwa wa seetša. ₁₅Ka gona, ga se semaka ge bahlanka ba gagwe ba itira tše nkego ke bahlanka ba toka. Mafelelong ba tla dirwa se se swanelago mediro ya bona.

₁₆Ke a boeletša ke re: Go se be le yo a mponago botlaela. Fela le ge e le gore le mpona bjalo, le upše le amogele botlaela bja ka, gore le nna ke ithete gosenene. ₁₇Tše ke di bolelago tše ga se tše ke di laetšwego ke Morena. Tabeng ye ya go itheta ke bolela tša botlaela. ₁₈Eupša ka ge ba bantši ba itheta ka tša nama, le nna ke nyaka go itheta bjalo. ₁₉Gobane lena ba bohlale, le kgotlelela ditlaela gabotse. ₂₀Etse le kgotlelela yo a le dirago bahlanka, goba yo a le hlalefetšago, goba yo a le radiago, goba yo a le nyatšago, goba yo a le fapholago sefahlegong. ₂₁Ke bolela ka dihlong ge ke re dilo tšeo re be re se na sebete sa go di dira.

Fela ge eba go na le yo a kago beta pelo a itheta – ke bolela tša botlaela – gona le nna ke tla beta pelo ka itheta. ₂₂Ge ba re re Baheberu, le nna ke re ke Moheberu. Ge ba re re Baisraele, le nna ke realo. Ge ba re re ditlogolo tša Abrahama, le nna ke re ke sona. ₂₃Ge ba re re bahlanka ba Kriste – ke bolela tša bogafi – nka re ke a ba phala. Ke ba phadile ka go šoma gaboima, ka go ya kgolegong gantši, ka go otlwa ka tshelane kudu, ka go ba kotsing ya lehu gantši. ₂₄Ke gahlano ke otlwa ke Bajuda kotlo ye e tlwaelegilego ya dithupa tša masome a mararo le tše senyane, ₂₅ke gararo ke bethwa ka patla, ke gatee ke bethwa ka maswika, ke gararo ke robegelwa ke leselawatle, gomme nkile ka fetša bošego le mosegare ka garegare ga lewatle. ₂₆Mo maetong a ka a mantši ke bile kotsing ya dikgogola, kotsing ya bahlakodi, kotsing ya setšhaba sa gešo, kotsing ya baditšhaba, kotsing ka metseng, kotsing lešokeng, kotsing lewatleng, le kotsing badumeding ba maaka. ₂₇Ke itapišitše ka go šoma kudu, ke gantši ke lala ke sa robale, ke ehlwa ka tlala le lenyora; ke gantši ke hloka dijo; ke be ke bolawa ke phefo, ke hlaelelwa ka diaparo. ₂₈Ntle le tše dingwe tše ke sa di balego, ka mehla ke imelwa ke go balabala ka diphuthego ka moka. ₂₉Ge yo mongwe a fokola, le nna ke fokola naye; ge yo mongwe a dirišwa sebe, le nna ke a galefa.

₃₀Ge eba go itheta go swanetše, nna ke tla itheta ka tše di bontšhago bofokodi bja ka. ₃₁Modimo, yena Tatago Morena Jesu Kriste, yo a tumišwago go ya go ile, o a tseba gore ga ke bolele maaka. ₃₂Mola ke le Damaskose, mmušiši wa Kgoši Aretase o ile a ntalela ka baleti lesorong la motse gore ba ntshware. ₃₃Eupša ka mo tšwa ka diatleng ka go theošwa ka šešegwana lešobaneng la morako.

₁Go itheta go ntshwanetše, le ge go sa nkhole selo. Gomme bjale ke nyaka go bolela ka dipono le ditshenolo tše di tšwago go Morena. ₂Go na le monnatsoko yo ke mo tsebago wa Mokriste, yo mengwaga ye lesome le ye mene ye e fetilego a kilego a phamolelwa legodimong la boraro. Ga ke tsebe ge eba seo se diregile ka nnete goba e be e dio ba pono, go tseba Modimo. _3-4Ke re nna ke tseba ge monna yo a ile a phamolelwa Paradeising – se ke sa se tsebego ke ge eba seo se diregile ka nnete goba e be e dio ba pono, go tseba Modimo – gomme a fihla a kwa ditaba tše motho a sa kgonego go di bolela, le gona a sa dumelelwego go di bolela. ₅Tša monna yo ke tšona tše ke nyakago go di kgantšha, ga ke nyake go kgantšha tša ka, ge e se ona mafokodi a ka. ₆Le ge nkabe nka nyaka go kgantšha, e be e ka se be botlaela, ka gobane ke be ke tla be ke bolela nnete. Fela ke a itshwara, gore go se be le yo a ntšeelago godimo go feta tše a di bonago ke di dira, goba a di kwago ke di bolela.

₇Fela gore ke tle ke se ikgogomoše ka tše di makatšago kudu tše ke ilego ka di utollelwa, ke ile ka kgontlhetšwa phatša nameng, phatša ye e bego e itirile moromiwa wa Sathane wa go ntlaiša gore ke fele ke ikokobetša. ₈Ka rapela Morena gararo ke mo kgopela gore a ntlhomole phatša yeo. ₉Yena a mphetola ka go re: “Kgaugelo ya ka e go lekane, gobane maatla a ka a tiile kudu mo go ba ba fokolago.” Ka gona ke kgahlwa kudu ke go itheta ka mafokodi a ka, gore maatla a Kriste a tle a dule mo go nna. ₁₀Ke ka lebaka leo ke kgotsofatšwago ke go rwala mafokodi le mahlapa le mathata le dihlomaro le ditlaišego ka lebaka la Kriste. Gobane ge ke fokola ke mo ke nago le maatla.

₁₁Ke fetogile setlaela ka go itheta ke gapeletšwa ke lena. Gape ke lena le bego le swanetše go ntlhatsela. Gobane le ge ke se selo, ga go se se ntlhaelelago sa baapostola bao ba go ba bommakaipea. ₁₂Dišupo tša gore ke moapostola, e lego mehlolo le dimaka le ditiro tše maatla, ke di dirile moo go lena ka bopelotelele. ₁₃Ke eng se se diretšwego diphuthego tše dingwe mme lena la se hlaetšwa, ge e se gore lena ga se ka le kgopela go nthuša ka tšhelete ka le imetša? Le ntshwarele tšhitelo yeo, ge!

₁₄Bjale ke lekga la boraro ke itokišetša go tla moo go lena. Nka se le tshwenye ka selo ge ke etla, gobane se ke se nyakago ke lena, e sego tšhelete ya lena. Gape ga se bana ba ba swanetšego go nyakela batswadi tše ba di hlokago. Eupša ke batswadi ba ba swanetšego go nyakela bana ba bona. ₁₅Nna nka thabela go ntšha tšohle tše ke nago le tšona le go intšha go ipheleletša, nnamong, gore ke le hole. Na ge ke le rata gakaaka, lena le ka nama la nthata mohlaetšana?

₁₆Le ge go ka ba bjalo, motho yo mongwe yena a ka no re ke be ke le radia, ke le thea ka maaka. ₁₇Kgane ke ile ka le hlalefetša ka yo mongwe wa ba ke ilego ka ba roma go lena? ₁₈Ke ile ka rapeletša Titose gore a tle, ka mo roma le modumedi yo mongwe. Na Titose o le hlalefeditše? Kgane nna le yena re be re se na maikemišetšo a tee goba re sa gate ka mošito o tee?

₁₉Mohlomongwe lena le hloma nke nako ye ka moka re leka go ikemelela mo go lena. Aowa, re bolela mo pele ga Modimo re le Bakriste. Gomme lena, barategi, tšohle tše re di dirago re di direla go le aga mo go tša tumelo. ₂₀Ke dio šia gore mohla ke etla moo ke tla le hwetša le se ka mo ke ratago le eba ka gona, le lena la nkhwetša ke se ka mo le ratago ke eba ka gona. Ke šia gore ke tla hwetša diphapano, le mona, le dikgalefo, le mahufa, le ditshenyamaina, le lesebo, le boikgogomošo, le mpherefere. ₂₁Ke šia gore mohla ke etla go lena gape Modimo wa ka o tla nkokobetša mo pele ga lena, gomme ke tla nyamišwa ke ba bantši ba ba kilego ba dira dibe, fela ba se itsholele bootswa le bokgeke le bofebe bjo ba bo dirilego.

₁Bjale e tlilo ba la boraro ke le etela. Mangwalo a Makgethwa a re: “Go latofatšwa ga motho go tiišetšwa ka bohlatse bja batho ba babedi le ge e le ba bararo.” ₂Ke ile ka lemoša bao pele ba bego ba dira dibe mmogo le ba bangwe ka moka, gomme le gonabjale ke ba lemoša ke se na le bona, go no swana le mola ke ba lemoša ke na le bona mola ke ba etetše la bobedi, ke re ge ke etla gape ga go yo a tlago phonyokga kotlo. ₃Seo e tla be e le bohlatse bjo le bo nyakago bja gore Kriste o bolela ka nna. Gape yena ge a šoma gare ga lena ga se mofokodi, eupša ke yo maatla. ₄Gobane le ge a bolailwe sefapanong e le mofokodi, ke ka maatla a Modimo ge bjale a phela. Gomme le rena re fokola re le batee le yena, fela ge re le kgala re tla be re na le yena ka maatla a Modimo.

₅Itekoleng, le itebeledišiše, le bone ge eba le phela ka tumelo ya lena. Na ga le tsebe gore Kriste o phela ka dipelong tša lena? Ge eba ga le tsebe gona le paletšwe. ₆Ke tshepa gore le tla lemoga gore rena ga re ba go palelwa. ₇Re rapela Modimo gore le se dire se sempe, e sego gore rena re bonale re nepile, eupša gore lena le dire tše di lokilego, le ge rena re bonala re palelwa. ₈Gobane therešo re ka se kgone go lwa le yona, se re kago se kgona ke go e lwela. ₉Rena re thabela ge go fokola rena mme lena le tiile. Ke ka lebaka leo re rapelago gore le be ba ba feletšego. ₁₀Ka gona ke le ngwalela lengwalo le ke le kgole le lena. Ke direla gore ge ke fihla moo ke se ke ka swanela go ba le sekgapho le lena ge ke šomiša maatla ao ke a neilwego ke Morena – ona maatla a go le aga, e sego a go le kgereša.

₁₁Banabešo, ke fetša ka go re le dumele. Le be baloki ka botlalo, le eletšege, le phele ka go kwana, le se ke la dula le fapana, gomme Modimo wa lerato le khutšo o tla ba le lena.

₁₂Le dumedišaneng ka go atlana, gona go bontšhago go ratana ga badumedi.

Badumedi bohle ba a le dumediša.

₁₃Kgaugelo ya Morena Jesu Kriste, le lerato la Modimo, le kopano le Moya wo Mokgethwa di be le lena ka moka.