To The Word – Day 29

₁Morena o file Moshe le Arone melawana ye e latelago. ₂Ge motho a na le serurugi letlalong goba mogarogo goba setswata, gomme selo seo sa keka ya ba bolwetši bja letlalo bja go mo tšhilafatša, a tlišwe go moprista Arone, goba go yo mongwe wa baprista ba Baarone. ₃Moprista a lekodišiše sešo seo, gomme ge mehlahla ye e lego go sona e fetogile ye mešweu mme sešo nke se sobeletše letlalong, ke bolwetši bja letlalo bja go mo tšhilafatša. Moprista a bege gore o tšhilafetše. ₄Eupša ge sešo e le se sešweu gomme nke ga se sa sobelela letlalong mme mehlahla le yona e se ya fetoga ye mešweu, moprista a beele motho yoo thoko matšatši a a šupago. ₅A mo hlahlobe gape ka letšatši la bošupa, gomme ge ka moo a bonago ka gona sešo seo se sa swana le pele mme se se sa keka, a beele motho yoo thoko matšatši a mangwe a a šupago. ₆A mo hlahlobe gape ka letšatši la bošupa, mme ge sešo seo se timelela gomme se sa keke, a bege gore o hlwekile; e be e le sešo fela. Motho yoo a hlatswe diaparo tša gagwe, mme e tla ba yo a hlwekilego. ₇Eupša ge sešo se ka keka ka morago ga ge moprista a mo hlahlobile mme a itše o hlwekile, o swanetše go tla go moprista gape. ₈Moprista a mo hlahlobe gape, gomme ge sešo se kekile, moprista a bege gore o tšhilafetše; ke bolwetši bja letlalo bja go mo tšhilafatša.

₉Ge motho a na le bolwetši bja letlalo bja go mo tšhilafatša, a tlišwe go moprista, ₁₀mme yena a mo hlahlobe. Ge go na le serurugi se sešweu letlalong la gagwe seo se fetošago mehlahla gore e be ye mešweu mme se bulegile, ₁₁ke bolwetši bja go se fole bja letlalo bja go mo tšhilafatša. Moprista a re o tšhilafetše, mme a se hlwe a re o mmeela thoko, ka gobane go a bonagala gore o tšhilafetše. ₁₂Ge bolwetši bjoo bja letlalo bo ka phatlalala bja aparela motho yoo go tloga hlogong go fihla leotong, ₁₃moprista a mo hlahlobe gape. Ge a ka hwetša gore gabotsebotse bo aparetše mmele ka moka, a bege gore motho yoo o hlwekile. Ge letlalo la gagwe ka moka le fetogile le lešweu, o hlwekile. ₁₄Fela go tloga ka nako ye sešo se se phulegilego se bonala, o tšhilafetše. ₁₅Moprista a mo hlahlobe gape, gomme ge a ka hwetša sešo se se phulegilego, a re motho yoo o tšhilafetše. Sešo seo se phulegilego se šupa bolwetši bja letlalo bja go mo tšhilafatša, gomme motho yoo o tšhilafetše. ₁₆Eupša ge sešo seo se fola mme se eba se sešweu gape, motho yoo a ye go moprista, ₁₇mme yena a mo hlahlobe gape. Ge sešo seo se fetogile se sešweu, o hlwekile, gomme moprista a re o hlwekile.

₁₈Ge motho a be a tšwile sekaku mme sa fola, ₁₉gomme ka morago gwa bonala serurugi se sešweu goba setswata sa bošweu bja bohubedu moo go bego go le sekaku, a ye go moprista. ₂₀Moprista a mo hlahlobe, gomme ge felo fao go bonala go sobeletše letlalong mme mehlahla ya moo e fetogile ye mešweu, moprista a re motho yoo o tšhilafetše. Ke bolwetši bja letlalo bja go mo tšhilafatša bjo bo thomilego ka sekakung. ₂₁Eupša ge moprista a ka hlahloba felo fao, gomme a hwetša gore mehlahla ya moo ga se ya fetoga ye mešweu, le gore felo fao ga se gwa sobelela letlalong, fela go galogile, moprista a beele motho yoo thoko matšatši a a šupago. ₂₂Ge go ka keka, moprista a re motho yoo o tšhilafetše; o swerwe ke bolwetši. ₂₃Eupša ge sekaku se ka ema felo gotee mme sa se ke sa keka, ke fela lebadi la sekaku sela, gomme moprista a re motho yoo o hlwekile.

₂₄Mabapi le motho yo a swelego, ge ntho yeo e eba ye tšhweu goba ya bošweu bja bohubedu, ₂₅moprista a mo hlahlobe. Ge mehlahla ya setswata e fetogile ye mešweu mme se sobeletše letlalong, ke bolwetši bja letlalo bja go mo tšhilafatša bjo bo thomilego nthong ya mollo, gomme moprista a re motho yoo o tšhilafetše. ₂₆Eupša ge mehlahla ya setswata e se ya fetoga ye mešweu mme felo fao go se gwa sobelela letlalong, fela go galogile, moprista a mmeele thoko matšatši a a šupago. ₂₇Moprista a mo hlahlobe gape ka letšatši la bošupa, gomme ge go keka, ke bolwetši bja letlalo bja go mo tšhilafatša, mme moprista a re motho yoo o tšhilafetše. ₂₈Eupša ge setswata se ka ema felo gotee mme sa se keke, sa galoga, ke go tšwa ga mollo fela. Moprista a re motho yoo o hlwekile, ka gobane ke fela leswao la go swa mola.

₂₉Ge monna goba mosadi a tšwile sešo hlogong goba seledung, ₃₀moprista a se hlahlobe. Ge e ka ba se sobeletše letlalong mme meriri ya moo go sona ke ye mesehla ye mesesenyane, ke bolwetši bja letlalo bja go mo tšhilafatša, gomme moprista a re motho yoo o tšhilafetše. ₃₁Ge eba ge moprista a mo hlahloba, sešo seo ga se bonale se sobeletše letlalong, le ge go le bjalo go se na meriri ye meso go sona, moprista a mmeele thoko matšatši a a šupago. ₃₂Moprista a se hlahlobe gape ka letšatši la bošupa, gomme ge se sa ka sa keka, go se na meriri ye mesehla go sona mme se sa bonale se sobeletše letlalong, ₃₃motho yoo a kote tikologo ya sešo seo. Moprista a mmeele thoko matšatši a mangwe a a šupago. ₃₄Ka letšatši la bošupa moprista a se hlahlobe gape, gomme ge se se sa keka mme se sa bonale se sobeletše letlalong, a re motho yoo o hlwekile. Motho yoo a hlatswe diaparo tša gagwe, mme o tla be a hlwekile. ₃₅Eupša ge sešo seo se ka keka ka morago ga ge moprista a itše o hlwekile, ₃₆a mo hlahlobe gape. Ge se kekile, moprista a se hlwe a re o nyaka meriri ye mesehla; go molaleng gore motho yoo o tšhilafetše. ₃₇Eupša ge go ya ka mo moprista a bonago ka gona sešo se sa ka sa keka gomme go sona go metše meriri ye meso, sešo seo se a timelela, gomme moprista a re motho yoo o hlwekile.

₃₈Ge monna goba mosadi a ka tšwa ditswata tše tšhweu letlalong, ₃₉moprista a hlahlobe motho yoo. Ge ditswata tšeo e le tše tshehla, e no ba fela dibabo tše di tšwelego letlalong; motho yoo o hlwekile.

_40-41Ge motho a hlobega meriri hlogong ka sephothong goba ka thoko ya phatla, e no ba lefatla fela; seo ga se mo tšhilafatše. ₄₂Eupša ge sešo sa bošweu bja bohubedu se ka tšwa moo lefatleng, ke bolwetši bja letlalo bja go mo tšhilafatša. ₄₃Moprista a mo hlahlobe, gomme ge go na le serurugi sa bošweu bja bohubedu sa go swana le sa bolwetši bja letlalo bja go mo tšhilafatša, ₄₄moprista a re o tšhilafetše, ka lebaka la bolwetši bjoo bo lego hlogong ya gagwe.

₄₅Motho yo a nago le bolwetši bja letlalo bja go mo tšhilafatša, a apare diaparo tša mankgeretla, a tlogele moriri e le mahlafarara, a ipipe go tloga molomong go ya seledung, gomme a goelele a re: “Ke tšhilafetše! Ke tšhilafetše!” ₄₆Ge a sa swerwe ke bolwetši bjoo e tla no ba yo a tšhilafatšego, gomme o swanetše go dula ka ntle ga mešaša, kgole le batho.

₄₇Ge go na le mouta seaparong, e ka ba sa wulu goba sa leokodi, ₄₈goba lešeleng la go logwa ka leokodi goba ka wulu, goba mokgopeng goba selong se se dirilwego ka mokgopa, ₄₉e le se se talanyana goba se se hubetšwana, ke mouta wa go tšhilafatša gomme o swanetše go laetšwa moprista. ₅₀Moprista a hlahlobe selo seo, gomme a se beele thoko matšatši a a šupago. ₅₁A se hlahlobe gape ka letšatši la bošupa, mme ge mouta woo o kekile, selo seo se tšhilafetše. ₅₂Moprista a se tšhume, ka gobane ke mouta wa go tšhilafatša wo o swanetšego go fedišwa ka mollo.

₅₃Eupša ge moprista a ka re a se hlahloba a hwetša mouta wola o se wa keka moo seaparong goba selong seo, ₅₄a laele gore se hlatswiwe gomme se beelwe thoko matšatši a mangwe a a šupago. ₅₅Ka morago ga moo a se hlahlobe gape, gomme ge mouta o se wa fetoga mmala, le ge o se wa keka, se sa tšhilafetše; a se tšhume, le ge se llwe ka ntle goba ka gare. ₅₆Eupša ge e ka re ge moprista a se hlahloba gape a hwetša mouta o tlogile, a gagole seripana sa seaparo goba sa selo mo go nago le mouta. ₅₇Ka morago, ge mouta wola o ka bonala la bobedi mme wa keka gape, mong wa selo seo a se tšhume. ₅₈Ge a ka hlatswa selo seo mme mouta wa timelela, a se hlatswe gape, gomme e tla ba se se hlwekilego.

₅₉Wo ke wona molao mabapi le mouta seaparong, e ka ba sa wulu goba sa leokodi, goba sa lešela la go logwa ka leokodi goba ka wulu, goba selong se se dirilwego ka mokgopa.

₁Morena o file Moshe ₂melawana ye mabapi le go hlwekišwa ga motho yo a alafilwego bolwetši bja letlalo bja go mo tšhilafatša. Ka letšatši le a tlago begwa gore o hlwekile, a tlišwe go moprista, ₃gomme moprista a mo ntšhe mešašeng, mme a mo hlahlobe. Ge motho yoo a fodile, ₄moprista a laele gore go tlišwe dinonyana tše pedi tše di phelago tše di hlwekilego, gotee le kotana ya mosedere, le thapo ye khubedu, le motšitlo wa hisopo. ₅Moprista a laele gore ye nngwe ya dinonyana tšeo e bolaelwe ka moruswing wo o swerego meetse a a sa tšogo gewa mothopong. ₆A tšee yela ye nngwe nonyana a e ine gotee le kotana yela ya mosedere le thapo ye khubedu le hisopo ka mading a nonyana yela ya go bolawa. ₇Moprista a foke motho yoo a tlilego go hlwekišwa bolwetšing bja letlalo ka madi ao gašupa, gomme a bege gore o hlwekile. A lese nonyana yela e phelago e fofele nageng. _8-9Motho yoo a hlatswe diaparo tša gagwe, a ipoole moriri le maledu le dintšhi le maboya ka moka mmeleng wa gagwe, a be a hlape mmele; ke mo a tlago ba yo a hlwekilego. A ka tla mešašeng, eupša o swanetše go dula ka ntle ga mošaša wa gagwe matšatši a a šupago. Ka letšatši la bošupa a ipoole gape; a hlatswe diaparo tša gagwe gomme a hlape mmele; ke gona e tlago ba yo a hlwekilego.

₁₀Ka letšatši la seswai a tliše dikgapana tše pedi le kwanyana e tee ya tshadi ya ngwaga o tee tše di se nago bosodi, le bupi bja dikilokramo tše tharo bjo bo hlakantšwego le makhura a mohlware e le kabelo ya bupi, le karolo ya boraro ya litara ya makhura a mohlware. ₁₁Moprista a iše motho yoo le dikabelo tšeo mojakong wa Tente ya bodulo bja Morena. ₁₂Ke moka a tšee kgapana e tee le karolo yela ya boraro ya makhura a mohlware a dire sehlabelo sa tefelo ya dibe. A di abele Morena e le mpho ye e fiwago yena ka tsela ye e itšeng. ₁₃A bolaye kgapana felo mola diruiwa tša dihlabelo tša tshwarelo ya dibe le tša dihlabelo tša go tšhungwa ka moka di bolaelwago gona. O swanetše go dira seo ka gobane sehlabelo sa tefelo ya dibe ke sa go lewa ke moprista, go no swana le sehlabelo sa tshwarelo ya dibe, mme ke se sekgethwakgethwa. ₁₄Moprista a tšee madi a mangwe a kgapana a tlotše lerephu la tsebe ya la go ja, le monwana wo mogolo wa letsogo la go ja, le monwana wo mogolo wa leoto la go ja la motho yo a tlilego go begwa gore o hlwekile. ₁₅Moprista a tšee makhura a mangwe a mohlware a itšhelele ona ka seatleng sa la mpogošo, ₁₆a ine monwana wa la go ja go ona, gomme a foke ka ona gašupa fao pele ga Morena. ₁₇A tšee makhura a mangwe ka seatleng sa gagwe le madi a mangwe a kgapana a tlotše lerephu la tsebe ya la go ja, le monwana wo mogolo wa letsogo la go ja, le monwana wo mogolo wa leoto la go ja la motho yo a tlilego go begwa gore o hlwekile. ₁₈Moprista a tšhele makhura a a šetšego ka seatleng sa gagwe godimo ga hlogo ya motho yoo. E be gona go mo phethela tiro ya poelano moo pele ga Morena.

₁₉Ke moka moprista a dire sehlabelo sa tshwarelo ya dibe, gomme ka mokgwa wo a boelanye mohlwekišwa le Morena. Ka morago ga moo a bolaye seruiwa sa sehlabelo sa go tšhungwa ka moka, ₂₀mme a se tliše le kabelo ya bupi aletareng. Ka tsela ye moprista a boelanye motho yoo le Morena, gomme motho yoo e tla ba yo a hlwekilego.

₂₁Ge motho yoo a diila mme a se ne sa gagwe, a tliše kgapana e tee e le sehlabelo sa tefelo ya dibe, mpho ye e fiwago Morena ka tsela ye e itšeng, gore a tle a boelanywe le Morena. A tliše bupi bja kilokramo e tee bjo bo hlakantšwego le makhura a mohlware e le kabelo ya bupi, le karolo ya boraro ya litara ya makhura a mohlware. ₂₂A tliše le mekuru ye mebedi goba maeba a mabedi, le lengwe e be la sehlabelo sa tshwarelo ya dibe, le lengwe e be la sehlabelo sa go tšhungwa ka moka. ₂₃Ka letšatši la seswai la go hlwekišwa ga gagwe a a tliše go moprista mojakong wa Tente ya bodulo bja Morena moo Morena a lego gona. ₂₄Moprista a tšee kgapana yeo le makhura a mohlware mme a di abele Morena e le mpho ye e fiwago yena ka tsela ye e itšeng. ₂₅A bolaye kgapana yeo, gomme a tšee madi a mangwe a yona a tlotše lerephu la la go ja la tsebe ya motho yoo, le monwana wo mogolo wa letsogo la gagwe la go ja, le monwana wo mogolo wa leoto la gagwe la go ja. ₂₆Moprista a itšhelele makhura a mangwe ka seatleng sa a mpogošo, ₂₇gomme ka monwana wa letsogo la gagwe la go ja a foke ka ona gašupa moo pele ga Morena. ₂₈A tšee makhuranyana a mangwe ka seatleng sa gagwe a a tlotše mola a tloditšego madi: lerephung la la go ja la tsebe ya motho yoo, le monwaneng wo mogolo wa letsogo la gagwe la go ja, le monwaneng wo mogolo wa leoto la gagwe la go ja. ₂₉A tšhele makhura a a šetšego ka seatleng sa gagwe godimo ga hlogo ya motho yoo, mme ka tsela ye a mo phethele tiro ya poelano moo pele ga Morena. _30-31Ka morago a dire sehlabelo sa tshwarelo ya dibe ka mokuru o tee goba leeba le tee, gomme ka le lengwe a dire sehlabelo sa go tšhungwa ka moka gotee le kabelo ya bupi. Ka tsela ye moprista a boelanye mohlwekišwa le Morena. ₃₂Wo ke molao wo o swanetšego go phethwa ke motho yo a nago le bolwetši bja letlalo bja go mo tšhilafatša, eupša a se ne dilo tša mehleng tše di nyakegago tša go hlwekišwa ga gagwe.

₃₃Morena o file Moshe le Arone ₃₄melawana ye e latelago mabapi le mengwako ye a ka e tšhelago mouta wa go tšhilafatša. Melawana ye e be e swanetše go phethwa ka morago ga ge setšhaba sa Israele se tsene nageng ya Kanana, yeo Morena a bego a ile go ba fa yona. ₃₅Mang le mang yo a bonago se se swanago le mouta ka ngwakong wa gagwe a botše moprista ka sona. ₃₆Moprista a laele gore se sengwe le se sengwe se tlošwe ngwakong pele ga ge a tsena go tlo lekola selo seo; go sego bjalo se sengwe le se sengwe ngwakong se tla tšhilafala. Ke moka a tsene ka ngwakong ₃₇mme a lekole selo seo. Ge go le makonko a botalanyana bja lehlare goba a bohubetšwana a a bonalago a eja leboto, ₃₈a tšwe ngwakong mme a o tswalele matšatši a a šupago. ₃₉Ka letšatši la bošupa a boe mme a o lekole gape. Ge selo seo se keketše mabotong a ngwako, ₄₀a laele gore maswika ao selo seo se hwetšwago go ona a tlošwe, a lahlelwe lefelong le lengwe le le tšhilafaletšego tirelo ka ntle ga motse. ₄₁Ka morago ga moo a laele gore maboto ka moka a gopše ka gare mme thogorogo ye e tšwago moo e tšhollelwe lefelong le le tšhilafaletšego tirelo ka ntle ga motse. ₄₂Go šomišwe matlapa a mangwe go ema ale a go tlošwa legato, mme go šomišwe mobu wo mofsa go ritela maboto ao gape.

₄₃Ge selo seo se ka rotoga gape ka ngwakong ka morago ga ge matlapa ale a tlošitšwe mme ngwako o gopilwe o ritetšwe gape, ₄₄moprista a ye go lekola. Ge se kekile, ke mouta wa go tšhilafatša mme ngwako o tšhilafetše. ₄₅O swanetše go phušolwa, gomme matlapa a wona le dikota tša wona le mobu ka moka wo o bego o o ritetše di swanetše go thothelwa ka ntle ga motse felo mo go tšhilafaletšego tirelo. ₄₆Mang le mang yo a ka tsenago ka ngwakong woo mola o sa tswaletšwe o tla be a tšhilafetše go fihlela mantšiboa. ₄₇Yo a ka robalago goba a jela ka ngwakong woo o swanetše go hlatswa diaparo tša gagwe.

₄₈Ge e ka re ge moprista a tlile go lekola, a hwetša mouta o se wa rotoga gape ka morago ga ge ngwako o ritetšwe, a bege gore ngwako woo o hlwekile, ka gobane mouta o tlošitšwe. ₄₉Go hlwekiša ngwako a tšee dinonyana tše pedi, le kotana ya mosedere, le thapo ye khubedu, le motšitlo wa hisopo. ₅₀A bolaele ye nngwe ya dinonyana tšela ka moruswing wo o swerego meetse a a sa tšogo gewa mothopong. ₅₁Ka morago ga moo a tšee kotana ya mosedere, le hisopo, le thapo ye khubedu, le nonyana yela e phelago, a di ine ka mading a nonyana yela e bolailwego, le ka meetseng ale, mme a foke ngwako woo gašupa. ₅₂Ka tsela ye a hlwekiše ngwako ka madi a nonyana, le ka meetse ale, le ka nonyana ye e phelago, le ka kotana ya mosedere, le ka hisopo, le ka thapo ye khubedu. ₅₃Ke moka a lese nonyana yela e phelago e fofele nageng e tloge motseng. Ka tsela ye a phethele ngwako woo tiro ya poelano, gomme ngwako e tla ba wo o hlwekilego.

₅₄Ye ke melao mabapi le malwetši a letlalo a go tšhilafatša, _55-56le dirurugi goba dikaku goba ditswata, le mouta diaparong le nywakong. ₅₇Melao ye e laetša ge selo se tšhilafetše goba se hlwekile.

₁Morena o file Moshe le Arone melawana ye e latelago ₂ya setšhaba sa Israele. Ge monna a ka tšwa seela bopeleng, seela seo se tšhilafetše ₃ge se etšwa motšhaotšhele goba se bo thibile. ₄Malao a mangwe le a mangwe ao a robalago go ona, goba selo se sengwe le se sengwe se a dulago go sona se tšhilafetše. ₅Yo a ka kgwathago malao a gagwe ₆goba a dula godimo ga selo seo monna yoo a bego a dutše go sona, o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. ₇Yo a ka kgwathago monna yo a tšwago seela o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. ₈Ge monna yo a tšwago seela a ka tshwela yo mongwe yo a hlwekilego ka mare, motho yoo o swanetše go hlatswa diaparo tša gagwe, a hlape le mmele, gomme o tla ba a tšhilafetše go fihlela mantšiboa. ₉Sala yeo motho yo a tšwago seela a ka dulago go yona e tšhilafetše. ₁₀Yo a ka kgwathago se sengwe se motho yoo a bego a dutše go sona o tla be a tšhilafetše go fihlela mantšiboa. Yo a ka rwalago se sengwe se motho yoo a bego a dutše go sona, o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. ₁₁Ge motho yo a tšwago seela a ka kgwatha yo mongwe a se a hlapa diatla pele, motho yoo o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. ₁₂Moruswi wo motho yoo a ka o kgwathago o swanetše go pšhatlwa, le sebjana se sengwe le se sengwe sa kota se motho yoo a ka se kgwathago se swanetše go hlatswiwa.

₁₃Ge monna yoo a alafilwe go tšwa seela moo ga gagwe, a letele matšatši a a šupago mme a tsebo hlatswa diaparo tša gagwe, a hlape le mmele ka meetse a a sa tšogo gewa mothopong, mme e tla ba yo a hlwekilego. ₁₄Ka letšatši la seswai a tšee mekuru ye mebedi goba maeba a mabedi a ye mojakong wa Tente ya bodulo bja Morena, mme a a neele moprista. ₁₅Moprista a dire sehlabelo sa tshwarelo ya dibe ka le tee la ona, gomme ka le lengwe a dire sehlabelo sa go tšhungwa ka moka. Ka tsela ye a phethele monna yoo tiro ya poelano moo pele ga Morena.

₁₆Ge monna a bile le go tšwa matšhedi, o swanetše go hlapa mmele ka moka, gomme o tla no ba a tšhilafetše go fihlela mantšiboa. ₁₇Selo sefe le sefe se se dirilwego ka lešela goba ka mokgopa se se ka tšhelwago ke matšhedi ao se swanetše go hlatswiwa, gomme se tla no ba se tšhilafetše go fihlela mantšiboa. ₁₈Ge monna a ka robala le mosadi, ka babedi ga bona ba swanetše go hlapa mmele, gomme ba tla no ba ba tšhilafetše go fihlela mantšiboa.

₁₉Ge mosadi a bone kgwedi o tla be a tšhilafetše matšatši a a šupago. Yo mongwe le yo mongwe yo a ka mo kgwathago o tla be a tšhilafetše go fihlela mantšiboa. ₂₀Selo sefe le sefe se mosadi yoo a ka dulago go sona goba a robala go sona nakong ya ge a bone kgwedi se tla be se tšhilafetše. _21-23Yo a ka kgwathago malao a gagwe, goba selo se a bego a dutše go sona, goba selo se se lego godimo ga tšona, o swanetše go hlatswa diaparo tša gagwe, a hlape le mmele, gomme o tla fela a tšhilafetše go fihlela mantšiboa. ₂₄Ge monna a ka mo robala ge a bone kgwedi, o kgotletšwe ke go tšhilafala ga gagwe mme o tla no ba a tšhilafetše matšatši a a šupago, gomme malao ao a ka robalago go ona a tla be a tšhilafetše.

₂₅Ge mosadi a ka tšwa madi matšatši a mmalwa ka ntle le matšatši a gagwe a go bona kgwedi, goba ge go tšwa madi moo go ka fetiša matšatši a gagwe a ka mehla a go bona kgwedi, o tla no ba a tšhilafetše ge go tšwa madi moo go sa tšwela pele, bjalo ka ge a tšhilafetše ge a bone kgwedi. ₂₆Malao ao a ka robalago go ona le selo se sengwe le se sengwe se a ka dulago go sona ka nako yeo se tšhilafetše. ₂₇Yo a ka di kgwathago o tšhilafetše, gomme o swanetše go hlatswa diaparo tša gagwe, a hlape le mmele; o tla no ba a tšhilafetše go fihlela mantšiboa. ₂₈Ge a se sa tšwa madi o swanetše go letela matšatši a a šupago, gomme ke moo a tlago hlweka. ₂₉Ka letšatši la seswai a tšee mekuru ye mebedi goba maeba a mabedi a a iše go moprista mojakong wa Tente ya bodulo bja Morena. ₃₀Moprista a dire sehlabelo sa tshwarelo ya dibe ka le tee la ona, mme ka le lengwe a dire sehlabelo sa go tšhungwa ka moka, ka tsela ye a phethele mosadi yoo tiro ya poelano moo pele ga Morena.

₃₁Morena o boditše Moshe gore a laye setšhaba sa Israele mabapi le dilo tše di ka ba tšhilafatšago, gore ba se ke ba tla ba kgotlela Tente ya bodulo bja gagwe ye e lego gare ga bona. Ge ba ka ikgotlela, ba tla bolawa.

₃₂Ye ke melao mabapi le monna yo a tšwago seela goba yo a tšwago matšhedi, ₃₃le mosadi yo a bonego kgwedi, goba monna yo a ka robalago mosadi yo a tšhilafetšego.

₁Ka morago ga lehu la barwa ba babedi ba Arone bale ba go bolawa ge ba tlišetša Morena mollo wo o sego wa dumelelwa. ₂Morena a re go Moshe: “Botša Arone, morwarrago, gore a se ke a no tsena neng le neng ka Felo mo Gokgethwakgethwa ka morago ga seširo se se lego pele ga sekhurumelo sa Polokelo ya Kgwerano, ka gobane fao ke moo ke bonalago ke le gare ga leru ka godimo ga sekhurumelo. Ge a ka se theeletše o tla hwa. ₃A ka tsena ka Felo mo Gokgethwakgethwa fela ge a tlišitše powana ya sehlabelo sa tshwarelo ya dibe le kgapa ya sehlabelo sa go tšhungwa ka moka.

₄“Pele ga ge Arone a tsena ka Felo mo Gokgethwakgethwa, a hlape mmele gomme a apare diaparo tše dikgethwa tša lešela: hempe, le diaparo tša ka gare, le lepanta la bodiredi, le tuku ya hlogo.

₅“Setšhaba sa Israele se fe Arone diphooko tše pedi tša sehlabelo sa tshwarelo ya dibe, le kgapa ya sehlabelo sa go tšhungwa ka moka. ₆A dire sehlabelo ka poo yeo go ipoelanya le nna, le go boelanya lapa la gagwe le nna. ₇Ka morago a tšee dipudi tšela tše pedi a di tliše pele ga ka mojakong wa Tente ya bodulo bja ka. ₈Moo a dire matengwa a šomiša maswika a mabedi, le lengwe e be la ka, le lengwe e be la Asasele. ₉Arone a hlabe pudi ye e kgethetšwego nna ka matengwa, mme a dire sehlabelo sa tshwarelo ya dibe ka yona. ₁₀Pudi ye e kgethetšwego Asasele e tlišwe go nna e sa phela gomme e rakelwe lešokeng go Asasele. Ka mokgwa wo go phethwe tiro ya poelano ka pudi.

₁₁“Ge Arone a hlaba poo go dira sehlabelo sa tshwarelo ya dibe tša gagwe go ipoelanya le nna le go boelanya lapa la gagwe le nna, ₁₂a tšee sebjana se se tletšego magala a a tšwago pele ga ka aletareng, le magoswi a mabedi a seorelo sa mathume, mme a di tliše Felo mo Gokgethwakgethwa. ₁₃Moo pele ga ka a tšhele seorelo mollong, gomme muši wa seorelo seo o tla khupetša sekhurumelo sa Polokelo ya Kgwerano gore a se ke a se bona mme a hwa. ₁₄A tšee madi a mangwe a poo mme ka monwana a fokele sekhurumelo ka pele ka ona, a mangwe a a fokele gašupa ka pele ga sekhurumelo.

₁₅“Ka morago ga moo a bolaye pudi ya sehlabelo sa tshwarelo ya dibe tša setšhaba, a tliše madi a yona ka Felo mo Gokgethwakgethwa, a fokele sekhurumelo ka ona, mme ka morago a a fokele le pele ga sekhurumelo, bjalo ka ge a dirile ka madi a poo. ₁₆Ka tsela ye a phethele Felo mo Gokgethwakgethwa tiro ya poelano ka lebaka la go tšhilafala ga setšhaba sa Israele le ka lebaka la dibe tša bona tšohle. Tente ya bodulo bja ka le yona a e phethele tiro ya poelano bjalo, ka gobane e gare ga setšhaba se se tšhilafetšego. ₁₇Go tloga ka nako ye Arone a tsenago ka Felo mo Gokgethwakgethwa go yo phetha tiro ya poelano go fihlela ge a etšwa, go se ke gwa ba le motho ka Tenteng. Ge a iphethetše tiro yeo, a phethetše le lapa la gagwe le setšhaba ka moka, ₁₈a tšwe a ye aletareng ya dihlabelo ye e lego pele ga ka, gomme a e direle tiro ya poelano. A tšee madi a mangwe a poo le a mangwe a pudi a a tlotše gohle dinakaneng tša dikhutlo tša aletare. ₁₉Ka a mangwe a fokele aletare gašupa ka monwana. Ka tsela ye a e hlwekiše dibeng tša setšhaba sa Israele mme a e dire ye kgethwa.”

₂₀“Ge Arone a feditše go phethela Felo mo Gokgethwakgethwa tiro ya poelano le Tente ya bodulo bja ka le aletare, a tliše go nna pudi yela e phelago. ₂₁A bee diatla tša gagwe ka dipedi godimo ga hlogo ya pudi yeo, mme a bolele moo go yona melato ka moka le dibe ka moka tša setšhaba sa Israele, mme ka go dira bjalo a di fetišetše hlogong ya pudi yeo. Ka morago pudi e rakelwe lešokeng ke monna yo a laetšwego go e raka. ₂₂Pudi e tla rwala dibe tša setšhaba ka moka ya di iša nageng ya leganata.

₂₃“Ka morago Arone a tsene ka Tenteng, a apole diaparo tša baprista tše a bego a di apere ge a tsena ka Felo mo Gokgethwakgethwa, gomme a di tlogele moo. ₂₄A hlape mmele lefelong le lekgethwa, gomme a apare diaparo tša gagwe. Ka morago ga moo a tšwe, gomme a dire sehlabelo sa go tšhungwa ka moka go ipoelanya le nna le go boelanya setšhaba le nna. ₂₅A tšhume makhura a seruiwa sa sehlabelo sa tshwarelo ya dibe aletareng. ₂₆Monna yola a raketšego pudi lešokeng go Asasele a hlatswe diaparo tša gagwe, a hlape le mmele pele ga ge a boela ka mešašeng. ₂₇Poo ya sehlabelo sa tshwarelo ya dibe le pudi ya sehlabelo sa tshwarelo ya dibe tšeo madi a tšona a tlišitšwego ka Felo mo Gokgethwakgethwa go dira poelano, di thothelwe ka ntle ga mešaša, di tšhungwe. Mokgopa le nama le mošwang le tšohle di tšhungwe. ₂₈Yo a di tšhumilego a hlatswe diaparo tša gagwe, a hlape le mmele pele ga ge a boela ka mešašeng.”

₂₉“Melawana ye e latelago e swanetše go phethwa mabakeng ka moka a a tlago. Ka letšatši la lesome la kgwedi ya bošupa Baisraele le bafaladi bao ba dulago gare ga bona ba swanetše go ikokobetša ka go ikona dijo, gomme ba se ke ba dira modiro. ₃₀Ka letšatši leo go dirwe tiro ya poelano go ba hlwekiša dibeng tšohle tša bona, gore ba tle ba hlweke pele ga ka. ₃₁Letšatši leo e swanetše go ba letšatši le lekgethwakgethwa leo ka lona ba ikokobetšago ka go ikona dijo, mme ba se ke ba dira modiro. Melawana ye e phethwe mabakeng ka moka a a tlago. ₃₂Moprista yo Mogolo, yo a tloditšwego mme a beilwego moprista go latela tatagwe, a phethe tiro ya poelano. A apare diaparo tša lešela tše dikgethwa ₃₃gomme a phethele Felo mo Gokgethwakgethwa, le Tente ya bodulo bja ka, le aletare, le baprista, le setšhaba ka moka tiro ya poelano. ₃₄Melawana ye e phethwe mabakeng ka moka a a tlago. Tiro ye e phethagatšwe gatee ka ngwaga go boelanya setšhaba sa Israele le nna ka lebaka la dibe tšohle tše ba di dirilego.”

Arone a dira bjalo ka ge Morena a laetše Moshe.

₁Melkitsedeke yo e be e le kgoši ya Saleme, ebile e le moprista wa Modimo Yogodimodimo. E kile ya re ge Abrahama a boa ntweng yeo go yona a bego a fentše dikgoši, Melkitsedeke a mo gahlanetša, a mo šegofatša, ₂gomme Abrahama a mo loba ka karolo ya lesome ya tšohle tše a bego a di thopile. Taba ya mathomo ye re ka e bolelago, Melkitsedeke ke go re “Kgoši ya Toka”, e be ebile e le kgoši ya Saleme, ke go re “Kgoši ya Khutšo”. ₃Ga go tsebje tatagwe le mmagwe goba borakgolokhukhu ba gagwe; matswalo a gagwe le lehu la gagwe le tšona ga di tsebje, eupša ke moprista wa go ya go ile, bjalo ka Morwa wa Modimo.

₄Bjale ge, bonang gore e be e le yo mogolo bjang mo Abrahama, rakgolokhukhu wa rena a ilego a mo loba ka karolo ya lesome ya tše a bego a di thopilwe ntweng. ₅Le ditlogolo tša Lefi tšeo e lego baprista di laelwa ke molao wa Moshe go ntšhiša setšhaba sa Israele, e lego batho ba gabobona, karolo ya lesome, etšwe batho bao ba gabobona le bona e le ditlogolo tša Abrahama. ₆Melkitsedeke, le ge e be e se setlogolo sa Lefi, o ntšhišitše Abrahama karolo ya lesome mme a mo šegofatša, yena yo a bego a filwe dikholofetšo tša Modimo. ₇Etse go pepeneng gore mošegofatši o feta mošegofatšwa. ₈Ge e le baprista ba ba amogelago karolo ya lesome ke batho ba ba hwago, kganthe mabapi le Melkitsedeke karolo ya lesome e amogelwa ke yo Mangwalo a Makgethwa a rego ke yo a sa hwego. ₉Le gona re ka no re mola Abrahama a ntšha karolo ya lesome, Lefi, yo ditlogolo tša gagwe di amogelago karolo ya lesome, le yena ke setšha a ntšhitše. ₁₀Gobane ke setšha a be a be a le gona ka madi a rakgolokhukhu wa gagwe, Abrahama, yola wa go gahlanetšwa ke Melkitsedeke.

₁₁Setšhaba sa Israele ge se fiwa melao ya Moshe e be e le go ya ka melao ya boprista bja Balefi. Gomme ge eba motho o be a kgona go se be le bosodi go ya ka boprista bja Balefi, na go ka be go ile gwa nyakega gore go tle moprista wa mohuta wo mongwe, wa go bewa bjalo ka Melkitsedeke, e sego Arone? ₁₂Gobane ge boprista bo fetolwa, le molao o swanetše go fetolwa. ₁₃Morena wa rena, yena yo go bolelwago ka yena mo tabeng tše, e be e le wa kgoro e šele, gomme ga go yo mongwe wa kgoro ya gabo yo a kilego a dira dihlabelo aletareng. ₁₄Go tsebega gabotse gore yena e be e le wa kgoro ya Juda, gomme Moshe ga se a ka a bolela ka kgoro ye ge a be a bolela ka baprista.

₁₅Taba ye re bego re bolela ka yona ye bjale e bonala gabotse, gagolo ge re elelwa gore go tlile moprista yo mongwe, yena e le wa boprista bja go swana le bja Melkitsedeke. ₁₆Ga se a bewa moprista ka go tswalelwa bopristeng, eupša o beilwe ka maatla a bophelo bja gagwe bjo bo sa felego. ₁₇Gobane Mangwalo a Makgethwa a re: “O tla ba moprista wa go ya go ile wa boprista bja go swana le bja Melkitsedeke.” ₁₈Ka gona, molao wola wa kgale o phumotšwe, ka gobane o be o fokola mme o se na mohola. ₁₉Molao wola wa Moshe o be o sa kgone go lokafatša selo. Eupša bjale re filwe se sekaone se re se holofelago sa go re batametša go Modimo.

₂₀Jesu o beilwe moprista ka keno ya Modimo. Balefi bona ba be ba bewa baprista ka ntle le keno ye. ₂₁Eupša Jesu yena o beilwe moprista ka keno mola Modimo a mmotša a re:

₂₃Ntle le moo, baprista bale ba Balefi e bile ba bantši ka ge ba be ba ehwa, gomme ba sa kgone go tšwela pele le modiro wa bona. ₂₄Ge e le Jesu, boprista bja gagwe ga bo fetele go yo mongwe, ka gobane yena o phelela sa ruri. ₂₅Ke ka lebaka leo bao ba tlago go Modimo ka yena a kgonago go ba phološetša sa ruri, gobane o phela go ya go ile, gore a ba rapelele go Modimo.

₂₆Moprista yo Mogolo yo a ka re kgonago ke yo e lego yo mokgethwa, yo a se nago sebe goba bosodi, yo a arogantšwego le badiradibe, gape a rotošeditšwego ka godimodimo ga leratadima. ₂₇Ga se a swanela, bjalo ka Baprista bale ba bangwe ba bagolo, gore ka mehla a dire dihlabelo tša go tloša dibe tša gagwe, a be a dire le tša go tloša dibe tša setšhaba. O dirile sehlabelo se tee gatee a se direla sa ruri mola yena mong a itira sehlabelo. ₂₈Molao wa Mošhe o bea batho Baprista ba Bagolo, etšwe ba na le mafokodi; eupša ka morago ga ge molao o šetše o beilwe, Modimo o dirile Morwagwe yo a lokafaleditšwego sa ruri Moprista yo Mogolo ka keno.

₁Tabataba mo go tše re di bolelago ke ya gore re na le Moprista yo Mogolo yo mobjalo, yo a dutšego madulong a bogoši kgauswi le setulo sa Modimo Kgoši legodimong. ₂Ke yena modiredi wa ka Felo mo Gokgethwa ka tenteng ya mmakgonthe ye e hlomilwego ke Modimo, e sego batho.

₃Moprista yo mongwe le yo mongwe yo Mogolo o beelwa go neela dimpho le dihlabelo; le wa rena Moprista yo Mogolo o swanetše go ba le se a se neelago. ₄Ge a ka be a le mo lefaseng, e ka be e ka se be moprista, ka ge go na le baprista ba go neela dimpho tše di laelwago ke molao wa Bajuda. ₅Modiro wa baprista wo ba o dirago ke seswantšho fela le moriti wa tša kua legodimong. Ke ka lebaka leo Moshe, mola a šetše a nyaka go hloma Tente, Modimo a ilego a mo laya a re: “O hlokomele gore o dira tšohle go ya ka leano le ke go laeditšego lona kua thabeng.” ₆Bjalo ka ge boprista bja Jesu bo tloga bo feta bja bale, le kgwerano ye a lego Mmoelanyi wa batho le Modimo ka yona, ye e holofetšago tše dikaone, ke ye e fetago yela.

₇Ge kgwerano yela ya mathomo e ka be e be e se na bosodi, go ka be go se gwa nyakega ya bobedi. ₈Gape Modimo o kgalema setšhaba sa gagwe ge a re: