To The Word – Day 3

₁Adamo a robala le mosadi wa gagwe, mme mosadi a ima. A belega morwa mme a re: “Ka thušo ya Morena ke hweditše morwa.” Ka fao a mo rea leina la Kaine. ₂Ka morago a belega morwa yo mongwe, e lego Abele. Yena e ile ya ba modiši, Kaine ya ba molemi. ₃Ka morago ga lebaka Kaine a išetša Morena kabelo ya go tšwa ka tšhemong ya gagwe. ₄Abele yena a hlaba maitšibolo a mangwe a dihuswane tša gagwe, mme a dira sehlabelo ka ditho tše dingwe tša makhura. Morena a kgahlwa ke Abele le sehlabelo sa gagwe, ₅eupša a se kgahlwe ke Kaine le kabelo ya gagwe. Kaine a befelwa kudu, mme a senya sefahlego. ₆Ke moo Morena a itšego go Kaine: “Ke ka lebaka lang o befetšwe? Ke ka lebaka lang o sentše sefahlego? ₇Ge o ka dira se se lokilego a o ka se thabe? Fela ge o ka dira se se sego sa loka, sebe se go laletše kgauswi se nyaka go go buša, eupša wena o swanetše go se fenya.”

₈Kaine a re go Abele, ngwanabo: “A re sepelele mašemong.” Ge ba le kua mašemong, Kaine a tsogela ngwanabo a mmolaya.

₉Morena a botšiša Kaine a re: “A Abele, ngwaneno, o kae?”

Kaine a mo fetola a re: “Ga ke tsebe. A ke nna mohlokomedi wa ngwanešo?”

₁₀Ke moo Morena a itšego: “O dirile eng? Madi a ngwaneno a ntelela a etšwa mobung. ₁₁Ka gona o rogakilwe, gomme o ka se hlwe o lema mobu wo o nwelego madi a ngwaneno ge o mmolaya. ₁₂Ge o ka lema, mobu o ka se ke wa go hlagišetša selo; wena o tla ba motšhabi le moraladi mo lefaseng.”

₁₃Ke moo Kaine a itšego go Morena: “Kotlo yeo ke ye boima kudu go nna go ka e šikara. ₁₄O nthaka mo nageng ye lehono mme ke tla ba kgole le wena. Ke tla ba motšhabi le moraladi mo lefaseng, mme mang le mang yo a nkhwetšago o tla mpolaya.”

₁₅Fela Morena a mo fetola a re: “Aowa! Ge motho a ka go bolaya, go tla hwa batho ba ba šupago ba meloko yabo go go lefeletša.” Ka gona Morena a swaya Kaine leswao la go tsebiša yo mongwe le yo mongwe yo a gahlanago naye gore a se ke a mmolaya. ₁₆Gomme Kaine a tloga pele ga Morena, a yo phela nageng ye e bitšwago “Thalalong”, ka bohlabela bja Edene.

₁₇Kaine le mosadi wa gagwe ba ba le morwa, mme ba mo rea leina la Enoko. Kaine a aga motse mme a o reela morwa wa gagwe. ₁₈Enoko a ba le morwa mme a mo rea leina la Irade, yo e bilego tatagoMehuyaele; yena ya ba tatagoMethushaele, tatagoLamege. ₁₉Lamege a nyala basadi ba babedi, e lego Ada le Tsila. ₂₀Ada a tswala Jabale, yo e bilego rakgolokhukhu wa bao ba ruago diruiwa mme ba dulago ka mešašeng. ₂₁Ngwanabo e bile Jubale, rakgolokhukhu wa diopedi tša go letša sekgapa le nakana. ₂₂Tsila a tswala Tubale-Kaine, morulatshipi yoo a bego a dira dilo ka moka tša mphiri le tša tshipi. Kgaetšedi ya Tubale-Kaine e be e le Naama.

₂₃Lamege a re go basadi ba gagwe:

₂₅Adamo le mosadi wa gagwe ba ba le morwa yo mongwe. Efa a re: “Modimo o mphile morwa yo mongwe legatong la Abele yo Kaine a mmolailego.” Ka gona a mo rea leina la Sete. ₂₆Sete a ba le morwa yo a ilego a mo rea leina la Enose. Ke ka yona nako yeo moo batho ba thomilego go šomiša leina le lekgethwa la Morena tirelong.

_1-2Ge Modimo a bopa batho, o ba dirile gore ba swane le yena. O ba bopile ka botona le botshadi, a ba šegofatša mme a ba bitša gore ke “batho”.

Le ke lenaneo la ditlogolo tša Adamo. ₃Ge Adamo a na le mengwaga ye 130, o ile a ba le morwa yo a swanago le yena mme a mo rea leina la Sete. ₄Ka morago ga fao Adamo o phetše mengwaga ye mengwe ye 800. O ile a ba le bana ba bangwe, ₅mme a hlokafala a na le mengwaga ye 930.

₆Ge Sete a na le mengwaga ye 105, o ile a ba le morwa, e lego Enose, ₇mme a phela mengwaga ye mengwe ye 807. O ile a ba le bana ba bangwe, ₈mme a hlokafala a na le mengwaga ye 912.

₉Ge Enose a na le mengwaga ye 90, o ile a ba le morwa, e lego Kenane, ₁₀mme a phela mengwaga ye mengwe ye 815. O ile a ba le bana ba bangwe, ₁₁mme a hlokafala a na le mengwaga ye 905.

₁₂Ge Kenane a na le mengwaga ye 70, o ile a ba le morwa, e lego Mahalalele, ₁₃mme a phela mengwaga ye mengwe ye 840. O bile le bana ba bangwe, ₁₄mme a hlokafala a na le mengwaga ye 910.

₁₅Ge Mahalalele a na le mengwaga ye 65, o ile a ba le morwa, e lego Jerede, ₁₆mme a phela mengwaga ye mengwe ye 830. O bile le bana ba bangwe, ₁₇mme a hlokafala a na le mengwaga ye 895.

₁₈Ge Jerede a na le mengwaga ye 162, o ile a ba le morwa, e lego Enoko, ₁₉mme a phela mengwaga ye mengwe ye 800. O bile le bana ba bangwe, ₂₀mme a hlokafala a na le mengwaga ye 962.

₂₁Ge Enoko a na le mengwaga ye 65, o ile a ba le morwa, e lego Metushelage. ₂₂Ka morago ga moo Enoko a phela a ikopantše le Modimo mengwaga ye 300, mme a ba le bana ba bangwe. ₂₃O phetše mengwaga ye 365. ₂₄O phetše bophelo bja gagwe ka moka a ikopantše le Modimo, mme a timelela ka ge Modimo a ile a mo tšea.

₂₅Ge Metushelage a na le mengwaga ye 187, o ile a ba le morwa, e lego Lamege, ₂₆mme a phela mengwaga ye mengwe ye 782. O bile le bana ba bangwe, ₂₇mme a hlokafala a na le mengwaga ye 969.

₂₈Ge Lamege a na le mengwaga ye 182, o ile a ba le morwa, ₂₉mme a re: “Ngwana yo o tla re bea pelo medirong yohle ya rena ye boima ye re swanetšego go e dira mobung wo Morena a o rogakilego wo.” Ka fao a mo rea leina la Noa. ₃₀Lamege a phela mengwaga ye mengwe ye 595; a ba le bana ba bangwe, ₃₁mme a hlokafala a na le mengwaga ye 777.

₃₂Ka morago ga ge Noa a na le mengwaga ye 500, o ile a ba le barwa ba bararo, e lego Seme le Hamo le Jafeta.

₁Ge batho ba thomile go ikala le lefase ka moka mme barwedi ba belegwa, ₂dibopiwa tše dingwe tša legodimo tša bona gore basetsana bao ke ba babotse. Ka fao tša itšeela basadi bao di ba kganyogago. ₃Ke moo Morena a itšego: “Nka se dumelele batho gore ba phelele sa ruri; ke bafeti. Go tloga bjale ba ka se hlwe ba phela go feta mengwaga ye 120.” ₄Mehleng yeo, ešita le ka morago ga fao, go be go le ditšitširipa lefaseng tšeo di hlolegilego ge dibopiwa tša legodimo di robala le barwedi ba batho. Ke bona bagale ba bagolo le banna ba go tuma ba bagologolo.

₅Ge Morena a bona gore batho ke ba babe kudu, le gore ka mehla megopolo ya bona ke ye mebe kudu, ₆o ile a nyama ge a kile a ba dira mme a ba bea lefaseng. O ile a tlala boitsholo ₇moo a ilego a ba a re: “Ke tla tloša batho ka moka ba ke ba dirilego, ka tloša le diphoofolo le digagabi le dinonyana, ka gore ke nyama ge ke di dirile.” ₈Fela Morena a thabišwa ke Noa.

_9-10Tše ke ditaba tša Noa. O be a na le barwa ba bararo, e lego Seme le Hamo le Jafeta. Noa o be a se na diphošo, mme e le motho a nnoši yo a lokilego gare ga batho ba mehleng yeo. O be a phela a ikopantše le Modimo, ₁₁mola yo mongwe le yo mongwe e le yo mobe pele ga Modimo, mme polayano e phatlalaletše mo gohle. ₁₂Modimo a lebelela lefase mme a bona e le le lebe, ka gobane batho ka moka ba be ba phela bophelo bjo bobe.

₁₃Ke moo Modimo a rilego go Noa: “Ke ikemišeditše go fediša batho ka moka. Ke tlilo ba fediša ka moka ka gobane lefase le tletše mediro ya bona ye mebe. ₁₄Ipetlele leselawatle ka dikota tše di tiilego; o dire diphapoši ka go lona mme o le manege ka moti ka ntle le ka gare. ₁₅Botelele bja lona e be dimetara tše 138, bophara e be dimetara tše 23, mme bogodimo e be dimetara tše 14. ₁₆O direle leselawatle tlhaka, gomme o šadiše lešoba la disentimetara tše 46 kgathe ga tlhaka le mahlakore. O le dire mabato a mararo, mme ka lehlakoreng o tsenye lemati. ₁₇Ke tlilo romela lefula lefaseng go fediša se sengwe le se sengwe se se phelago. Se sengwe le se sengwe lefaseng se tla hwa, ₁₈eupša nna ke tla dira kgwerano le wena. O tsene ka leselawatleng le mosadi wa gago le barwa ba gago le basadi ba bona. _19-20Ka leselawatleng o tsene le tona le tshadi ya mohuta wo mongwe le wo mongwe wa dinonyana le wa diphoofolo le wa digagabi, gore di tle di phele. ₂₁O tšee le dijo tša mehuta ka moka tša lena le tša tšona.” ₂₂Noa a dira tšohle tše Morena a mo laetšego tšona.

₁Morena a re go Noa: “Tsena ka leselawatleng le ba lapa la gago ka moka; ke bone gore ke wena o nnoši lefaseng ka moka yo o dirago se se lokilego. ₂Go mohuta wo mongwe le wo mongwe wa diphoofolo tše di hlwekilego o tšee tše di šupago tše tona le tše di šupago tša ditshadi, mme go mohuta wo mongwe le wo mongwe wa tše di sego tša hlweka o tšee e tee ye tona le e tee ya tshadi. ₃Le go mohuta wo mongwe le wo mongwe wa dinonyana o tšee tše di šupago tše tona le tše di šupago tša ditshadi. O dire ka tsela yeo gore mohuta wo mongwe le wo mongwe wa diphoofolo le dinonyana o phele mme o tle o atafale gape lefaseng. ₄Matšatši a a šupago go tloga bjale ke tlile go neša pula ye e tlago tšea matšatši a masome a mane le mašego a ona, gore e fediše dilo ka moka tše di phelago tše ke di dirilego.” ₅Noa a dira tšohle tše Morena a mo laetšego tšona.

₆Noa o be a na le mengwaga ye 600 ge lefula le etla lefaseng. ₇Yena le mosadi wa gagwe le barwa ba gagwe le basadi ba bona ba tsena ka leselawatleng go phonyokga lefula. ₈Tona le tshadi ya mohuta wo mongwe le wo mongwe wa diphoofolo le wa dinonyana le wa digagabi, mohuta wo o hlwekilego le wo o sego wa hlweka, ₉tša tsena ka leselawatleng le Noa, ka moo Modimo a laetšego ka gona. ₁₀Ka morago ga matšatši a a šupago lefula la tla.

₁₁Ge Noa a na le mengwaga ye 600, ka letšatši la lesome le metšo ye e šupago la kgwedi ya bobedi, methopo ka moka ya lewatle le legolo ka fase ga lefase ya thiboga, mme dithibo ka moka tša mafula a legodimo tša bulega, ₁₂gomme pula ya tšhologela lefaseng matšatši a masome a mane le mašego a ona. ₁₃Ka lona letšatši leo Noa le mosadi wa gagwe ba tsena ka leselawatleng le barwa ba bona ba bararo, e lego Seme le Hamo le Jafeta, le basadi ba bona. ₁₄Ba tsena le diphoofolo tša mehuta yohle tša lešoka, le diruiwa tša mehuta yohle, le digagabi tša mehuta yohle, le dinonyana tša mehuta yohle. ₁₅Tona le tshadi ya mohuta wo mongwe le wo mongwe wa diphedi tša tsena ka leselawatleng le Noa ₁₆ka moo Modimo a laetšego ka gona. Ka morago ga fao Morena a tswalelela Noa ka gare.

₁₇Lefula la tšea matšatši a masome a mane, mme meetse ya ba a mantši moo e lego gore leselawatle le ile la phaphamala. ₁₈Meetse a fela a oketšega kudu mme leselawatle la itshepelela godimo ga ona. ₁₉A fela a oketšega kudu a ba a khupetša dithaba tša godimodimo; ₂₀a fela a rotoga go fihlela a eba dimetara tše di šupago ka godimo ga dintlhohlo tša dithaba. ₂₁Selo se sengwe le se sengwe se se phelago mo lefaseng sa hwa – dinonyana, le diruiwa, le diphoofolo tša lešoka, le digagabi, le batho. ₂₂Tšohle tše di bušago moya lefaseng tša hwa. ₂₃Morena a fediša diphedi tšohle tša lefase – batho le diphoofolo le digagabi le dinonyana. Bao ba ilego ba šala e bile fela Noa le bao ba bego ba na le yena ka leselawatleng. ₂₄Meetse ga se a ka a thoma go phohlela, gwa ba gwa feta matšatši a 150.

₁Bafarisei ba ile ba kwa gore Jesu o fetiša Johanese ka barutiwa le ka go ba kolobetša, ₂etšwe nnete e le gore yena Jesu go kolobetša ga a kolobetše, go kolobetša barutiwa ba gagwe. ₃Ka fao, ge Jesu a ekwa taba yeo, a tloga moo nageng ya Judea a boela Galilea. ₄O be a swanetše go putla nageng ya Samaria.

₅Moo nageng ya Samaria a fihla motseng wo mongwe wo ba rego ke Sigare, wo o lego kgauswi le tšhemo ye Jakobo a bego a e file Josefa, morwagwe. ₆Gona moo go be go na le sediba sa Jakobo. Jesu a re go kwa a lapišitšwe ke leeto a itulela fase moo sedibeng. E be e ka ba nako ya mosegare wo mogolo.

₇Gwa tla mosadi yo mongwe wa Mosamaria go ga meetse, gomme Jesu a mo kgopela a re: “Nke o nkgele ke nwe.” ₈Ke ge barutiwa ba gagwe ba sa ile motseng go reka dijo.

₉Mosadi yoo a mo fetola a re: “O ka re o le Mojuda, nna ke le mosadi wa Mosamaria, wa nkgopela meetse a go nwa?” Gape Bajuda ga ba sepelelane le Basamaria.

₁₀Jesu a mo fetola a re: “Ge o ka be o tseba mpho ye Modimo a e fago batho, le gore yo a go kgopelago meetse yo ke mang, ke wena o ka bego o kgopela yena mme a go fa meetse a a phedišago.”

₁₁Mosadi yoo a re: “Morena, etse le sego sa go ga ga o naso, sediba le sona se a iša, bjale meetse ao a go phediša o ka a hwetša kae? ₁₂Kgane o feta Jakobo, rakgolokhukhu wa rena, yo a re filego sediba se, le yena a nwa go sona le bana ba gagwe le diruiwa tša gagwe?”

₁₃Jesu a mo fetola ka go re: “Mang le mang yo a nwago meetse a o nyorwa gape, ₁₄fela yo a nwago meetse a nna ke mo fago ona a ka se tsoge a nyorilwe gape. Meetse a ke tlago mo fa ona e tla ba mothopo mo go yena wa go seloga meetse a go mo fa bophelo bjo bo sa felego.”

₁₅Mosadi yoo a re: “Morena, nke o mphe meetse a gona gore ke se sa nyorwa ka swanela go tla mo go ga meetse.”

₁₆Jesu a re go yena: “Sepela o yo bitša monna wa gago, le tle mo.”

₁₇Yena a re: “Ga ke na monna.”

Jesu a re: “O a rereša ge o re ga o na monna, ₁₈gobane banna ba o bilego le bona ke ba bahlano, gomme yo o dulago naye gonabjale yena ga se monna wa gago. Moo gona o mpoditše nnete.”

₁₉Mosadi yoo a mo fetola a re: “Morena, ke a bona gore o moprofeta. ₂₀Borakgolokhukhu ba rena ba be ba rapela Modimo mo thabeng ye, eupša lena le re felo mo go swanetšego go rapelwa gona ke Jerusalema.”

₂₁Jesu a re go yena: “Mmagobatho, nkgolwe ge ke re nako e etla yeo ka yona le ka se sa rapelago Tate mo thabeng ye goba Jerusalema. ₂₂Gape lena le rapela yo le sa mo tsebego, mola rena re rapela yo re mo tsebago, gobane Mophološi o tla tla ka Bajuda. ₂₃Fela nako e etla, ebile e šetše e fihlile, yeo ka yona Moya wa Modimo o kgontšhago barapedi ba mmannete go rapela Tate ka mo go mo lebanego, gobane Tate o nyaka gore ba ba mo rapelago ba mo rapele bjalo. ₂₄Gape Modimo ke Moya, gomme ba ba mo rapelago ba swanetše go mo rapela ka maatla a Moya le ka mo go mo lebanego.”

₂₅Mosadi yoo a re go yena: “Ke a tseba gore Mesia, yo a bitšwago Kriste, o etla. Yena o tla re go tla, a re botša tšohle.”

₂₆Jesu a mo fetola a re: “Ke nnaena yo a bolelago le wena yo.”

₂₇Ka yona nako yeo ke ge go fihla barutiwa ba gagwe, gomme ba tlabega ge ba mo hwetša a bolela le mosadi. Fela gwa se be le yo a botšišago mosadi yoo a re: “O nyakang?” goba yo a botšišago Jesu a re: “O reng o bolela le yena?”

₂₈Mosadi yola a tlogela motšega wa gagwe moo, a boela motseng, a fihla a botša batho ba gona a re: ₂₉“A re yeng le yo bona motho yo a mpoditšego tšohle tše ke ilego ka di dira. Afa ga se yena Mesia?” ₃₀Ke moka ba tšwa motseng ba ya go Jesu.

₃₁Ge mosadi yola a sa ile barutiwa ba ile ba šala ba phegeletše Jesu ba re: “Moruti, eja!”

₃₂Yena a ba fetola ka go re: “Ke na le tša go ja tše lena le sa di tsebego.”

₃₃Barutiwa ba gagwe ba botšišana ba re: “Kgane go bile le yo a ilego a mo tlišetša dijo?”

₃₄Jesu a re go bona: “Nna dijo tša ka ke go phetha thato ya yo a nthomilego, le go feleletša modiro wo a rilego ke o dire. ₃₅Ga ke re polelo e re: ‘Kgwedi go šetše tše nne, ya ba go a bunwa’? Fela nna ke re go lena: Ntšhang mahlo dinameng, le lebelele mašemo: a šetše a re sehlee, a loketše go bunwa! ₃₆Mmuni o šetše a fiwa moputso wa gagwe, a kgobela puno, e lego batho ba ba tlago ba le bophelo bjo bo sa felego. Ka gona yo a bjalago le yo a bunago ba tla thakgala mmogo. _37-38Go na le polelo ye e rego: ‘Go bjala yo, gwa buna yola.’ Nna ke le romile go yo buna se le se la kago la itapiša ka sona, go itapišitše ba bangwe, gomme lena la holega ka mošomo wa bona. Ya ba gona go bonagalago gore polelo yeo e a rereša.”

₃₉Basamaria ba bantši ba motse woo ba ile ba dumela go Jesu ka ge mosadi yola a be a ba boditše a re: “O mpoditše tšohle tše ke ilego ka di dira.” ₄₀Ke ka lebaka leo Basamaria ba rilego go fihla go yena ba mo phegelela gore a dule le bona, gomme a dula moo matšatši a mabedi.

₄₁Ba bantši le go feta ba dumela ka go kwa tše a di bolelago, ₄₂gomme ba re go mosadi yola: “Bjale ga re sa dumela ka lebaka la tše di boletšwego ke wena, eupša ke ka lebaka la ge rena beng re mo kwele, gomme re lemogile gore ka nnete ke yena Mophološi wa lefase.”

₄₃Ge go seno feta matšatši ao a mabedi, Jesu a tloga a ya Galilea. ₄₄Gape yena mong o be a kile a bolela a re: “Moprofeta ga a ke a hlomphiwa ga gabo.” ₄₅Ge a fihla Galilea batho ba gona bona ba ile ba mo kganela, ka gobane ba be ba bone tšohle tše a di dirilego Monyanyeng wa Paseka kua Jerusalema, ka ge le bona ba be ba ile.

₄₆A buša a ya Kana gona Galilea mola a bego a ile a fetoša meetse beine. Motseng wa Kapernaume go be go na le mohlankedi yo mongwe wa mmušo yo a bego a lwalelwa ke morwa. ₄₇Yena o rile go kwa gore Jesu o tlile moo Galilea a etšwa Judea, a ya go yena a mo kgopela gore a ye Kapernaume go mo fodišetša morwa yo a bego a le makgatheng. ₄₈Jesu a mo fetola a re: “Etse ge le sa bone matete le mehlolo ga le ke le dumela.”

₄₉Mohlankedi yoo a mo fetola a re: “Morena, hle, a re ye ngwanaka a sešo a hlokafala.”

₅₀Jesu a re go yena: “Sepela, morwago o tla phela!”

Monna yoo a kgolwa se a se botšwago ke Jesu, gomme a sepela. ₅₁A re a sa ya gae a gahlanetšwa ke bahlanka ba gagwe, ba mmotša ba re: “Morwago o phetše!”

₅₂A ba botšiša gore o thomile neng go ba kaone, gomme bona ba re: “O thomile go se sa fiša maabane ka nako ya pele mosegare.” ₅₃Tatagongwana a lemoga gore ke yona nako yela Jesu a rilego go yena: “Morwago o tla phela.” Ka gona yena le bohle ba lapa la gagwe ba dumela.

₅₄Mohlolo wo ke wa bobedi wo Jesu a ilego a o dira ge a seno boela Galilea a etšwa Judea.

₁Ka morago ga moo Jesu a ya Jerusalema, monyanyeng wo mongwe wa Bajuda. ₂Moo Jerusalema go na le bodiba kgauswi le kgoro ye ba rego ke Lesoro la Dinku, bodiba bja gona ka Seheberu ba re ke Bethesda, gomme go dikologa bodiba bjo go na le mathudi a mahlano. ₃Gona moo go be go robatšwa balwetši ba bantši – difofu le digole le barephaditho.

₅Go be go na le monna yo mongwe gona moo yo a bego a feditše mengwaga ye masome a mararo le metšo ye seswai a lwala. ₆Jesu a re go mmona a robetše moo a tseba gore o lwetše nako ye telele, ka gona a mmotšiša a re: “Na o nyaka go fola?”

₇Molwetši yoo a mo fetola a re: “Morena, ga ke na motho yo a ka ntsentšhago ka bodibeng ge meetse a bilogile. Ge ke sa re ke yo tsena, mongwe o nthaka pele.”

₈Jesu a re go yena: “Emelela, o tšee legogwa la gago o sepele.” ₉Monna yoo a nama a fola, a tšea legogwa la gagwe a sepela.

Tšatši la gona e be e le Sabatha, ₁₀ka gona baetapele ba Bajuda ba botša monna yoo wa go fodišwa ba re: “Lehono ke Sabatha, gomme ga o dumelelwe go rwala legogwa.”

₁₁Yena a re: “Monna yo a mphodišitšego ke yena a mpoditšego gore ke tšee legogwa le la ka ke sepele.”

₁₂Bona ba mmotšiša ba re: “Ke mang yena monna yoo wa go go botša gore o tšee legogwa la gago o sepele?”

₁₃Fela monna yoo wa go fodišwa o be a sa tsebe gore yo a mo fodišitšego ke mang, ka ge Jesu a be a ngwegetše lešaba le le bego le le moo.

₁₄Ka morago ga lebakanyana Jesu a tla a mo hwetša Tempeleng, gomme a re go yena: “Ga ke re šemo o fodile; o se sa dira dibe, ka gore o ka tla wa welwa ke madimabe a go feta ale.”

₁₅Ke moka monna yoo a tloga a yo botša baetapele bale ba Bajuda gore motho yo a mo fodišitšego ke Jesu. ₁₆Bona ba napa ba thoma go hlomara Jesu, ka ge a fodišitše motho ka tšatši la Sabatha. ₁₇Jesu a re go bona: “Tate o dula a šoma, gomme le nna ke a šoma.”

₁₈Ge a realo baetapele ba Bajuda ba mo falela le go feta ba nyaka go mmolaya, ba re o rile go tshela molao wa Sabatha a ba a bolela gore Modimo ke Tatagwe, gomme ka go realo ya ba ge a itekanya le Modimo.

₁₉Jesu ge a ba fetola a re: “Ruri, ruri, ke le botša gore Morwa wa Modimo a ka se kgone go dira selo ka boyena; o dira fela se a bonago Tate a se dira. Tše Tate a di dirago ke tše le nna, Morwagwe, ke di dirago. ₂₀Gobane Tate o rata nna, Morwagwe, gomme o mpontšha tšohle tše a di dirago. Ebile o sa tlilo mpontšha tše dikgolo le go feta, gomme le tla tlabega. ₂₁Bjalo ka ge Tate a tsoša bahu a ba phediša, le nna, Morwagwe, ke phediša bao ke ratago go ba phediša. ₂₂Le gona Tate ga a ahlole motho. Maatla ka moka a go ahlola o a file nna, Morwagwe, ₂₃gore bohle ba ntlhomphe, nna, Morwagwe, ka mokgwa wo ba hlomphago Tate ka wona. Yo a sa hlomphego nna, Morwa wa Modimo, ga a hlomphe Tate yo a nthomilego.

₂₄“Ruri, ruri, ke le botša gore yo a theeletšago tše ke di bolelago mme a dumela go yo a nthomilego, o šetše a na le bophelo bjo bo sa felego. A ka se tšwewe, ka gore o šetše a tlogetše tsela ya go ya lehung, o swere ya go ya bophelong bjo bo sa felego. ₂₅Ruri, ruri, ke le botša gore nako e etla, ebile nka re e tlile, ya gore bahu ba kwe lentšu la Morwa wa Modimo, gomme ba ba le theeletšago ba tla phela. ₂₆Bjalo ka ge Tate a na le maatla a go phediša, ka wona mokgwa wo mobjalo o file le Morwagwe ona maatla a go phediša. ₂₇O mo file le a go ahlola, ka ge e le yena Morwamotho. ₂₈Le se makale ge ke realo; nako e etla ya gore bahu ka moka ba kwe lentšu la gagwe ₂₉gomme ba tšwe ka mabitleng a bona: bao ba bego ba dira tše di lokilego ba tsogele go phelela sa ruri, gomme bao ba bego ba dira tše kgopo ba tsogele go lahlwa.”

₃₀“Ka bonna ga go se ke kgonago go se dira. Ke ahlola fela ka mo ke botšwago ke Modimo, ka gona ke ahlola ka toka, ka gobane ga ke gabe go dira se se ratwago ke nna, ke gaba go dira se se ratwago ke yo a nthomilego.

₃₁“Ge nkabe e le nna fela yo ke itlhatselago, bohlatse bja ka bo ka be bo sa amogelege. ₃₂Eupša go na le yo mongwe yo a ntlhatselago, gomme ke a tseba gore bohlatse bjo a bo bolelago ka nna ke bja nnete. ₃₃Ke Johanese yo le kilego la roma batseta ba lena go yena, gomme yena a hlatsela therešo. ₃₄Ga se gore ke ikanya motho gore a ntlhatsele; ke dio boledišwa ke ge ke nyaka gore le phološwe. ₃₅Johanese e be e le lebone le le tukago le bonega, gomme lena la kgahlwa kudu ke seetša sa gagwe sebakanyana. ₃₆Eupša nna bohlatse bjo ke nago le bjona bo feta bjola bja Johanese, gobane mediro ye ke lego gare ke e dira, ye ke laetšwego ke Tate gore ke e phethe, e a ntlhatsela, gomme e tiišetša gore ke romilwe ke Tate. ₃₇Tate yo a nthomilego le yena o a ntlhatsela. Lentšu la gagwe ga se la ka la le kwa, le yena ka sebele ga se la ka la mmona, ₃₈le tše a di bolelago ga le di sware ka dipelo gobane ga le dumele yo a mo romilego. ₃₉Le badišiša Mangwalo a Makgethwa ka gobane le holofela gore mo go ona le tla hwetša bophelo bjo bo sa felego, gomme ona Mangwalo a a Makgethwa ke ona a ntlhatselago. ₄₀Le ge go le bjalo ga le nyake go tla go nna gore le be le bophelo bjo bo sa felego.

₄₁“Ga se gore ke nyaka go tumišwa ke batho. ₄₂Gape ke a tseba gore le batho ba mohuta mang, ebile ke a tseba gore Modimo yena ga le mo rate. ₄₃Nna ke tlile ke romilwe ke Tate, fela ga le nkamogele; eupša mohla go ka tlago yo a itlelago, yena le tla mo amogela. ₄₄Le rata go tumišwa ke batho, ga le gabe go tumišwa ke yo e lego Modimo a nnoši; bjale nna le ka ntumela bjang? ₄₅Fela le se ke la gopola gore ke nna ke tlago le bega go Tate. Moshe, yo le mmotilego, ke yena a tlago le bega. ₄₆Gape ge le ka be le dumela Moshe, le nna le ka be le ntumela, gobane o ngwadile ka nna. ₄₇Fela ka ge tše a di ngwadilego le sa di dumele, tše di bolelwago ke nna tšona le ka di dumela bjang?”