To The Word – Day 35

₁Ka letšatši la pele la kgwedi ya bobedi ngwageng wa bobedi ka morago ga ge setšhaba sa Israele se tlogile Egepeta, Morena a bolela le Moshe ka Tenteng ya bodulo bja gagwe lešokeng la Sinai a re: ₂“Wena le Arone, balang setšhaba sa Israele ka dikgorwana le malapa. Le ngwaleng maina a banna ka moka ₃ba ba nago le mengwaga ye masome a mabedi goba go feta moo bao e kago ba bahlabani. Le ba beeng ka dihlopha. ₄Le kgopeleng ntona ya kgorwana kgorong ye nngwe le ye nngwe go le thuša.” _5-16Banna ba ba ilego ba kgethelwa modiro wo setšhabeng e le mantona a dikgorwana le baetapele dikgorong tša bona šeba:

₁₇Moshe le Arone ba ile ba thušana le banna ba lesome le ba babedi ba ₁₈go bokanya setšhaba ka moka ka letšatši la pele la kgwedi ya bobedi, mme setšhaba ka moka sa ngwadišwa ka dikgorwana le ka malapa. Maina a banna ka moka ba mengwaga ye masome a mabedi goba go feta a ngwalwa mme a balwa, ₁₉bjalo ka ge Morena a be a laetše.

Moshe o ngwadišitše setšhaba lešokeng la Sinai. _20-46Banna ba mengwaga ye masome a mabedi goba go feta ba e bego e ka ba bahlabani ba ile ba ngwadišwa ka maina, go ya ka dikgorwana le malapa, go thoma ka kgoro ya Rubene, morwa yo mogolo wa Jakobo. Palo ya bona e bile ka mokgwa wo:

₄₇Eupša Balefi ba ile ba se ke ba ngwadišwa le dikgoro tše dingwe, ₄₈ka gobane Morena o be a rile go Moshe: ₄₉“Ge o bala Baisraele o se ke wa ngwala le ba kgoro ya Lefi. ₅₀Balefi o ba bee bahlokomedi ba Tente ya bodulo bja ka le ditlabakelo tša yona ka moka. Bona ba e rwale gotee le ditlabakelo tša yona, ba e hlokomele, mme ba hlome mešaša ya bona go e dikologa. ₅₁Ge le huduga, Balefi ba rutlolle Tente gomme ba e hlome gape mo le hlomago mešaša. Motho yo e sego Molefi ge a ka batamela Tente a bolawe. ₅₂Ba bangwe ba Baisraele ba hlome mešaša, ka dihlopha ka dihlopha, monna yo mongwe le yo mongwe le sehlopha sa gabo ka sefoka sa gabo. ₅₃Balefi bona ba hlome mešaša ya bona go dikologa Tente go e leta, gore go se ke gwa ba le yo a e batamelago mme a mpefediša, ka otla setšhaba sa Israele.” ₅₄Ka gona Baisraele ba dira tšohle tše Morena a bego a di laetše Moshe.

₁Morena o file Moshe le Arone ditaelo tše di latelago. ₂Ge Baisraele ba hloma mešaša, monna yo mongwe le yo mongwe a hlome mošaša wa gagwe sekgaong sa gabo le sefokeng sa kgorwana ya gabo. Mešaša e hlongwe go rarela Tente.

_3-9Ka thokong ya bohlabela ba sefoka sa sekgao sa Juda ba hlome mešaša ka dihlopha tša bona, ba na le baetapele ba bona, ka mokgwa wo:

_10-16Ka borwa ba sefoka sa sekgao sa Rubene ba hlome mešaša ka dihlopha tša bona, ba na le baetapele ba bona, ka mokgwa wo:

₁₇Ke moka gare ga dikgao tše pedi tša mathomo le dikgao tše pedi tša mafelelo Balefi ba tloge ba rwele Tente. Dikgao ka moka di tloge ka tatelano ya tšona ya ge di hloma mešaša, se sengwe le se sengwe maemong a sona ka sefoka sa sona.

_18-24Ka bodikela ba sefoka sa sekgao sa Efraime ba hlome mešaša ka dihlopha tša bona, ba na le baetapele ba bona, ka mokgwa wo:

_25-31Ka leboa ba sefoka sa sekgao sa Dane ba hlome mešaša ka dihlopha tša bona, ba na le baetapele ba bona, ka mokgwa wo:

₃₂Baisraele ka moka ba ba ngwadišitšwego dikgaong, sehlopha ka sehlopha, e be e le ba 603 550. ₃₃Fela, bjalo ka ge Morena a be a laetše Moshe, Balefi ba ile ba se ke ba ngwadišwa le Baisraele ba bangwe.

₃₄Ka gona Baisraele ba dira tšohle tše Morena a bego a di laetše Moshe. Ba hloma mešaša, ba bangwe le ba bangwe ka morago ga sefoka sa bona, gomme ba bangwe le ba bangwe ba tloga le ba kgorwana ya gabobona.

₁Šeba ba lešika la Arone le Moshe ka nako ye Morena a bolela le Moshe thabeng ya Sinai. ₂Arone o be a na le barwa ba bane: Nadaba, yo mogolo go bona, le Abihu le Eleasara le Ithamara. ₃Ba ile ba tlotšwa, ba bewa baprista, ₄eupša Nadaba le Abihu ba ile ba bolawa ge ba tlišetša Morena mollo wo o sego wa dumelelwa lešokeng la Sinai. Ba be ba se na bana, ka gona Eleasara le Ithamara ba be ba dira modiro wa baprista nakong ya ge tatagobona Arone a sa phela.

₅Morena a re go Moshe: ₆“Tliša ba kgoro ya Lefi o ba bee bahlanka ba Arone moprista. ₇Ba dire modiro wo o swanetšego go dirwa Tenteng ya bodulo bja ka, ba phethe le mediro ya Arone le ya setšhaba ka moka. ₈Ba hlokomele ditlabakelo ka moka tša Tente, ba be ba phethe mediro ya Baisraele ka moka. ₉Modiro o nnoši wa Balefi ke go hlankela Arone le barwa ba gagwe. ₁₀Arone le barwa ba gagwe bona o ba bee badiri ba mediro ya baprista; yo mongwe ka ntle le bona yo a ka lekago go dira mediro ya bona a bolawe.”

₁₁Morena a re go Moshe: _12-13“Balefi bjale e swanetše go ba ba ka. Ka letšatši lela ke bolaya maitšibolo ka moka a Baegepeta ke ile ka ikabela mošemane wa leitšibolo wa lapa le lengwe le le lengwe la Moisraele, le leitšibolo la seruiwa se sengwe le se sengwe. Bjale bakeng sa gore bašemane ba Baisraele ba maitšibolo e be ba ka, nna ke ikabetše Balefi; e swanetše go ba ba ka. Ke nna Morena.”

₁₄Lešokeng la Sinai Morena o laetše Moshe ₁₅gore a ngwale Balefi ka dikgorwana le malapa a bona, a ngwale banna ka moka le bašemanyana ba ba nago le kgwedi e tee goba go feta fao, ₁₆gomme Moshe a dira bjalo. _17-20Lefi o bile le barwa ba bararo: Gershone le Kehate le Merari, ba e bilego borakgolokhukhu ba dikgorwana tšeo di tsebjago ka maina a bona. Gershone o bile le barwa ba babedi: Libni le Shimi; Kehate o bile le barwa ba bane: Amramo le Jitsara le Hebrone le Usiele; Merari o bile le barwa ba babedi: Magli le Mushi. Bao e bile borakgolokhukhu ba malapa ao a tsebjago ka maina a bona.

₂₁Kgorwana ya Gershone e be e bopilwe ke lapa la Libni le la Shimi. ₂₂Banna le bašemane ba kgwedi e tee goba go feta fao ba ba ilego ba ngwalwa e be e le ba 7 500. ₂₃Kgorwana ye e be e swanetše go hloma mešaša ka morago ga Tente, ka bodikela; ₂₄Elisafo, morwa wa Laele, e be e le ntona ya kgorwana yeo. ₂₅Ba be ba hlokometše Tente: sepipetši sa yona sa ka gare le sa ka ntle, seširo sa mojako, ₂₆diširo tša kgoro ye e dikologilego Tente le aletare, diširo tša mojako wa kgoro, le dithapo ka moka. Ba be ba hlokometše mediro ka moka ye e amanago le dilo tše.

₂₇Kgorwana ya Kehate e be e bopša ke lapa la Amramo, la Jitsara, la Hebrone le la Usiele. ₂₈Banna le bašemane ba kgwedi e tee goba go feta bao ba ilego ba ngwalwa e be e le ba 8 600. Sa bona e be e le go hlokomela Tente. ₂₉Kgorwana ye e be e swanetše go hloma mešaša ka lehlakoreng la ka borwa la Tente; ₃₀Elitsafane, morwa wa Usiele, e be e le ntona ya kgorwana yeo. ₃₁Ba be ba hlokometše Polokelo ya Kgwerano, tafola, sehlomamabone, dialetare, dibjana tšeo baprista ba di šomišago ka Felo mo Gokgethwa, le seširo sa mojako wa Felo mo Gokgethwakgethwa. Ba be ba hlokometše mediro ka moka ye e amanago le dilo tše.

₃₂Moetapele wa Balefi e be e le Eleasara, morwa wa moprista Arone. O be a hlokometše bao ba dirago mediro ka Felong mo Gokgethwa.

₃₃Kgorwana ya Merari e be e bopša ke lapa la Magli le la Mushi. ₃₄Banna le bašemane ba kgwedi e tee goba go feta moo bao ba ilego ba ngwalwa e be e le ba 6 200. ₃₅Ntona ya kgorwana yeo e be e le Tsuriele, morwa wa Abihaile. Kgorwana ye e be e swanetše go hloma mešaša ka lehlakoreng la ka leboa la Tente. ₃₆Ba ile ba bewa go hlokomela mahlomo a go thekga Tente, dipalelo tša yona, dikota, mabogato, le thoto ya yona ka moka. Ba be ba hlokometše mediro ka moka ye e amanago le dilo tše. ₃₇Ba be ba hlokometše le dikota, mabogato, dibapola le dithapo tša kgoro.

₃₈Moshe le Arone le barwa ba gagwe ba be ba swanetše go hloma mešaša pele ga Tente ka bohlabela. Ba be ba hlokometše mediro ye e dirwago ka Felong mo Gokgethwa ya setšhaba sa Israele. Yo mongwe ka ntle le bona yo a bego a ka leka go dira mediro yeo o be a swanetše go bolawa. ₃₉Banna le bašemane ka moka ba Balefi ba kgwedi e tee goba go feta bao Moshe a ba ngwadilego ka dikgorwana ka taelo ya Morena e be e le ba 22 000.

₄₀Morena a re go Moshe: “Bala bašemane bohle ba maitšibolo ba Baisraele ba kgwedi e tee goba go feta fao, gomme o ngwale maina a bona. ₄₁Ke ikabetše Balefi sebakeng sa bašemane bohle ba maitšibolo. Ke nna Morena. Ke ikabetše le diruiwa tša Balefi legatong la maitšibolo ka moka a diruiwa tša Baisraele.” ₄₂Moshe a phetha taelo a ngwala bašemane ba maitšibolo ka moka ₄₃ba kgwedi e tee goba go feta, ya ba ba 22 273.

₄₄Morena a re go Moshe: ₄₅“Bjale nkabele Balefi sebakeng sa bašemane ba maitšibolo ba Baisraele, le diruiwa tša Balefi legatong la maitšibolo a diruiwa tša Baisraele. ₄₆Ka ge bašemane ba maitšibolo ba Baisraele ba feta Balefi ka ba 273, o rekolle barwa bao ba fetago palo. _47-48Yo mongwe le yo mongwe o mo lefele ka dipapetlana tše di fetšago seatla tša silibera, tše di etšwego go ya ka boima bja papetlana ya silibera ya ka Felo mo Gokgethwa, mme o neele Arone le barwa ba gagwe tšhelete yeo.” Papetlana ya silibera ya ka Felo mo Gokgethwa ke ya boima bja dikramo tše e ka bago tše lesome. ₄₉Moshe a phetha taelo yeo gomme a tšea ₅₀dipapetlana tše 1 365 tša silibera, ₅₁a di neela Arone le barwa ba gagwe.

₁Morena o boditše Moshe ₂gore a ngwale ba kgorwana ya Balefi ya Kehate ka dihlophana le malapa a bona. ₃A ngwadiše banna ka moka ba mengwaga ye masome a mararo go iša go ba ye masome a mahlano ba ba bego ba swanela go šoma ka Tenteng ya bodulo bja Morena. ₄Modiro wa bona e be e le go hlokomela dilo tše kgethwakgethwa.

₅Morena o file Moshe melawana ye e latelago: Ge mešaša e rutlollwa, Arone le barwa ba gagwe ba tsene ka Tenteng, ba fegolle seširo se se lego pele ga Polokelo ya Kgwerano, gomme ba phuthele Polokelo yeo ka sona. ₆Ba e phuthele ka mokgopa wo boletiana, mme ka godimo ba ale lešela la botala bja legodimo, gomme ba e khwamele mapara a go e rwala.

₇Ba ale lešela la botala bja legodimo tafoleng ya dinkgwa tšeo di abetšwego Morena, gomme godimo ga yona ba bee meruswi, megopo, digo, le diphafana tša dikabelo tša beine. Dinkgwa tšeo le tšona di be tafoleng. ₈Ba apeše tšeo ka moka ka lešela le lehubedu, ba di pipe ka mokgopa wo boletiana, gomme ba khwamele tafola mapara a go e rwala.

₉Ba tšee lešela la botala bja legodimo ba phuthele sehlomamabone le mabone a sona, ditlao, dibjana tša magala, le meruswi ya makhura a mohlware. ₁₀Ba se phuthele le ditlabakelo tša sona ka moka ka mokgopa wo boletiana, gomme ba se bee leakong la go se rwala.

₁₁Ka morago ga moo ba ale lešela la botala bja legodimo godimo ga aletare ya gauta, ba e pipe ka mokgopa wo boletiana, mme ba e khwamele mapara a go e rwala. ₁₂Ba tšee dibjana ka moka tše di šomišwago ka Felong mo Gokgethwa ba di phuthele ka lešela la botala bja legodimo, ba di pipe ka mokgopa wo boletiana, mme ba di bee godimo ga leako la go di rwala. ₁₃Ba tloše melora aletareng, mme ba apeše aletare ka lešela la bohubedu bja moretele. ₁₄Godimo ga yona ba bee ditlabakelo ka moka tše di šomišwago tirelong go yona: dibjana tša magala, le diforoko tša mašimelo, le digarafo, le meruswi. Ke moka ba e pipe ka mokgopa wo boletiana, gomme ba e khwamele mapara a go e rwala.

₁₅Ge e le nako ya go hlahlamolla mešaša, kgorwana ya Kehate e rwale dilo tše kgethwa, fela e be ka morago ga ge Arone le barwa ba gagwe ba feditše go di phuthela gotee le ditlabakelo tša tšona ka moka. Ba kgorwana ya Kehate ba se ke ba kgwatha dilo tšeo tše kgethwa, gore ba se hwe.

Ye ke mediro ya kgorwana ya Kehate nako ye nngwe le ye nngwe ge Tente e tlošwa.

₁₆Eleasara, morwa wa moprista Arone, a hlokomele Tente ka moka le makhura a mabone, le seorelo sa go nkga bose, le dikabelo tša bupi tša ka mehla, le makhura a tlotšo, le ditlabakelo tša Tente, le se sengwe le se sengwe ka Tenteng se se kgethwafaleditšwego Morena.

₁₇Morena a re go Moshe le Arone: ₁₈“Le se ke la lesa kgorwana ya Kehate e fedišwa go Balefi ₁₉ka lebaka la go batamela dilo tše kgethwakgethwa tše. Gore taba ye e se ke ya direga, Arone le barwa ba gagwe ba tsene ka Tenteng, ba fe monna yo mongwe le yo mongwe modiro wa gagwe, ba mmotše le gore a rwale eng. ₂₀Eupša ge Bakehate ba ka tsena ka Tenteng ba lebelela dilo tše kgethwa le ge e le motsotswana fela, ba tla hwa.”

₂₁Morena o boditše Moshe ₂₂gore a ngwale ba kgorwana ya Balefi ya Gershone ka dihlophana le malapa a bona. ₂₃A ngwadiše banna ka moka ba mengwaga ye masome a mararo go iša go ba ye masome a a fetšago seatla ba ba bego ba swanela go šoma ka Tenteng ya bodulo bja gagwe. ₂₄Ba rwale dilo tše di latelago: ₂₅Tente, sepipetši sa yona sa ka gare le sa ka ntle, sepipetši sa mokgopa wo boletiana godimo ga yona, seširo sa mojako, ₂₆diširo le dithapo tša kgoro ye e dikologilego Tente, aletare, seširo sa mojako wa kgoro, le ditlabakelo ka moka tše di šomišwago go hloma dilo tše. Ba phethe mediro ka moka ya dilo tše ye e swanetšego go dirwa. ₂₇Moshe le Arone ba hlokomele gore Bagershone ba phethe mediro ka moka, mme ba rwale tšohle tše Arone le barwa ba gagwe ba ba šupago tšona. ₂₈Ye ke mediro ya kgorwana ya Gershone ka Tenteng; ba e dire ba hlapeditšwe ke Ithamara, morwa wa moprista Arone.

₂₉Morena o boditše Moshe gore a ngwale kgorwana ya Balefi ya Merari ka dihlophana le malapa a bona. ₃₀A ngwadiše banna ka moka ba mengwaga ye masome a mararo go iša go ba ye masome a a fetšago seatla ba ba swanelago go šoma ka Tenteng ya bodulo bja gagwe. ₃₁Ba hlokomele go rwala mahlomo a go thekga, le dipalelo, le dikota tša Tente le mabogato a yona, ₃₂le dikota tša kgoro le mabogato a tšona, le dibapola le dithapo tša kgoro ya go rarela Tente, le ditlabakelo ka moka tše di šomišwago go di hloma. Monna yo mongwe le yo mongwe a botšwe se a swanetšego go se rwala. ₃₃Ye ke mediro ya kgorwana ya Merari mošomong wa bona ka Tenteng; ba e dire ba hlapeditšwe ke Ithamara, morwa wa moprista Arone.

_34-48Ka go phetha taelo ya Morena, Moshe le Arone le baetapele ba setšhaba ba ile ba bala ba dikgorwana tše tharo tša Lefi, e lego ya Kehate, ya Gershone, le ya Merari, ka dihlophana le malapa a bona. Ba ngwala banna ka moka ba mengwaga ye masome a mararo go iša go ba ye masome a mahlano ba ba swanelago go šoma ka Tenteng ya bodulo bja Morena, ba ba ngwala ka mokgwa wo:

₁Morena a re go Moshe: ₂“Laela Baisraele gore yo mongwe le yo mongwe yo a nago le bolwetši bja letlalo bja go mo tšhilafatša, goba yo a tšwago seela mmeleng, goba yo a tšhilafetšego ka gobane a kgwathile setopo, a ntšhwe mešašeng. ₃E ka ba monna goba mosadi yo a tšhilafetšego, ba ntšhwe gore ba tle ba se ke ba kgotlela mešaša moo ke dulago ntshe gare ga setšhaba sa ka.” ₄Baisraele ba ile ba phetha taelo ye, gomme ba ba ntšha ka moka mešašeng.

₅Morena o file Moshe ₆melawana ye e latelago ya Baisraele. Ge motho a ka se botegele Morena a phošetša yo mongwe, ₇a ipolele sebe sa gagwe, a be a lefe motho yo a mo phošeditšego, a tlaleletše ka karolo ya bohlano ya tefo yeo. ₈Eupša ge motho yoo a hwile gomme a se na moloko wa kgauswi yoo tefo e ka fiwago yena, e fiwe Morena e be ya baprista. Tefo ye e tlaleletša kgapa ya sehlabelo sa go mmoelanya le Morena se se dirilwego ka yona. ₉Gape kabelo ye nngwe le ye nngwe yeo Baisraele ba e fago Morena ka tsela ye e itšeng ke ya moprista yoo e neelwago go yena. ₁₀Moprista yo mongwe le yo mongwe a ipolokele dikabelo tše a neelwago tšona.

₁₁Morena o laetše Moshe ₁₂gore a fe Baisraele melawana ye e latelago. Ge monna a ka belaela gore mosadi wa gagwe ga a mmotegele, ₁₃o ikgotletše ka go robala le monna yo mongwe, fela a se be le therešo ya taba yeo ka ge mosadi a e dirile sephiri – go se na hlatse, a bile a se a swarwa – ₁₄goba ge monna a ka belaela mosadi wa gagwe, le ge e le gore mosadi ga a na molato, ₁₅gona monna yoo a iše mosadi wa gagwe go moprista. A ye le kabelo ye e nyakegago, e lego bupi bja kilokramo e tee bja garase, eupša a se ke a e tšhela makhura a mohlware goba seorelo, ka gobane ke kabelo ya bupi ye e tšwago go monna wa pelaelo ye e direlwago go utolla therešo.

₁₆Moprista a batametše mosadi yoo aletareng pele ga Morena. ₁₇A tšhele meetse a makgethwa ka moruswing, a tšee lerole lebatong la Tente ya bodulo bja Morena, mme a le tšhele ka moo meetseng. ₁₈Ke moka a hlahlamolle moriri wa mosadi, gomme a bee kabelo ya bupi ka diatleng tša gagwe. Ka diatla moprista a sware moruswi wola wa meetse a go galaka a go tliša thogako. ₁₉A eniše mosadi yoo ka go re go yena: “Ge o se wa otswa, meetse a a thogako a ka se go dire selo. ₂₀Eupša ge o otswitše, ₂₁gona a Morena a go dire morogakwa le molahlwa bathong beno. A go dire moopa, a go kokomoše le dimpa. ₂₂A meetse a a thogako a tsene ka mpeng ya gago a e kokomoše, a be a go dire moopa.”

Mosadi a fetole a re: “Ke a dumela; a Morena a dire bjalo.”

₂₃Moprista a ngwale thogako yeo, ebe o hlatswa mangwalo ao ka meetseng ale a go galaka. ₂₄Pele ga ge a noša mosadi yoo meetse ao a kago mo hlolela bohloko bjo bogolo, ₂₅moprista a tšee kabelo ya bupi diatleng tša gagwe, a e abele Morena ka tsela ye e itšeng, mme a e tliše aletareng. ₂₆A ntšhe legoswi la yona go laetša gore yohle e abetšwe Morena, mme a le tšhume aletareng, a kgone a noša mosadi yoo meetse ao. ₂₇Ge a otswitše, meetse ao a tla mo hlolela bohloko bjo bogolo, gomme o tla kokomoga dimpa, a ba a ba moopa. E tla ba morogakwa bathong babo. ₂₈Eupša ge a se ne molato a ka se mo dire selo, mme o tla kgona go ba le bana.

_29-30Wo ke molao wa ge monna a na le lehufa mme a belaela mosadi wa gagwe gore o otswitše. Mosadi yoo a emišwe pele ga Morena, mme moprista a phethe tiro ye. ₃₁Monna a ka se be le molato, eupša mosadi yoo, ge eba o na le molato, o tla otlwa.

₁Nna, mogolo, ke ngwalela wena, morategi Gayose, ke go ratago ka mmannete.

₂Morategi, nke tšohle di ka go lokela le gona wa phela gabotse, bjalo ka ge ke tseba gore go iketla gona o sa iketlile. ₃Ke ile ka thaba bjang ge ba bangwe badumedikarena ba fihla ba mpotša ka mo o botegetšego nnete ka gona, gobane nnete yona o phela ka yona. ₄Ga go se se nkgahlago go phala ge ke ekwa gore bana ba ka ba phela ka nnete.

₅Morategi, o botegile mo go tšohle tše o di direlago badumedikawena, ešita le ba e lego bašele. ₆Ba hlatsetše lerato la gago mo phuthegong ya mono. O tla be o dirile gabotse ge o ka ba thuša ka mo go kgahlago Modimo leetong la bona. ₇Gobane ba swere leeto le la bona la go hlankela Kriste ba sa tšee selo go baditšhaba. ₈Rena re swanetše go thuša batho ba babjalo, gore e be gona go kgatha tema ga rena ge re phatlalatša therešo.

₉Ke ngwaletše phuthego lengwalo la seripana mabapi le Diotrefese yoo wa go rata boetapele, fela yena o di tšeiša phefo. ₁₀Ka lebaka leo, ge nka tla ke tla botša phuthego tše a di dirago: o re bolela gampe, o a re phara. Gomme ge tšeo di sa mo kgotsofatše, o gana le go amogela badumedikarena, mme le bao ba nyakago go ba amogela yena o a ba thibela, a be a ba rake phuthegong.

₁₁Morategi, wena o se ke wa ekiša bakgopo, o ekiše baloki. Gape yo a dirago tša go loka ke wa Modimo; yo a dirago tše mpe ga se a ka a bona Modimo.

₁₂Ge e le Demetriose yena, bohle ba a mo reta, le boitshwaro bja gagwe bja Sekriste bo bontšha gore go retwa go a mo swanela. Le rena re a hlatsela, gomme le wena o a tseba gore se re se bolelago ke therešo.

₁₃Ke be ke sa na le ditaba tše dintši tše ke bego nka go ngwalela tšona, eupša ga ke rate go go botša tšona ka lengwalo. ₁₄Ke holofela gore ke tla tla ke go bona kgauswinyana, gomme ke tla go botša tšona ka molomo.

₁₅Khutšo ya Modimo e be le wena.

Bagwera ba gago ba re o dumele. O dumediše bagwera ba rena ka o tee ka o tee.