To The Word – Day 37

₁Setšhaba se ile sa thoma go ngongoregela Morena ka ga mehlako ya bona. Ge Morena a ekwa dingongorego tšeo, a befelwa gomme a romela mollo setšhabeng, wa tšhuma lehlakore le lengwe la mešaša. ₂Setšhaba sa llela Moshe se nyaka thušo; yena a rapela Morena, gomme mollo woo wa tima. ₃Ka gona felo fao gwa rewa leina la Tabera, ka gore moo mollo wa Morena o ile wa tuka gare ga bona.

₄Go be go na le bafaladi ba bangwe ba ba bego ba sepela le Baisraele. Bona ba be ba duma nama kudu, mme Baisraele le bona ba thoma go ngongorega ba re: “Nke nkabe re ka no hwetša namanyana! ₅Kua Egepeta re be re tlwaetše go ja hlapi re sa ntšhe selo. Gopolang maraka ale le magapu le digwere le dieie le dikonofolo tše re bego re di ja! ₆Eupša bjale maatla a rena a ile. Ga re na sa go ja, ge e se ona manna a re a bonago ka mehla a!”

₇Manna a be a swana le dipewana tše nnyane, mmala wa ona e le wa bošweu bja bodipa. _8-9A be a wela mešašeng bošego gotee le phoka. Mosong wa le le latelago setšhaba se be se eya ka gohle se a kgobela, ba a šila lwaleng goba ba a setla ka mosetlo, ba a bediša, ba dira diphaphatha ka ona. Ka ganong a be a le bjalo ka senkgwa se se apeilwego ka makhura a mohlware.

₁₀Moshe a kwa setšhaba se ngongorega, lapa le lengwe le lengwe le eme mojako wa mošaša wa lona. Morena a ba galefela, mme Moshe a hlomoga pelo, ₁₁a re go Morena: “O reng o ntlišetša matshwenyego a, nna, mohlanka wa gago? Ke go selekile ka eng ge o tla ba wa nthweša morwalo wa setšhaba se ka moka? ₁₂Na ke nna ke ba imilego goba ke ba tswetšego, ge o nkgopela gore ke be bjalo ka mofepi, ke ba kuke ka matsogo bjalo ka masea tseleng ya go ya nageng ye o enetšego borakgolokhukhu ba bona wa re o tla ba fa yona? ₁₃Ke tla hwetša kae nama ye e lekanego batho ba ka moka? Ba dula ba ntelela ba nyaka nama. ₁₄Nna ga ke sa kgona ke nnoši go rwala morwalo wo setšhaba se ka moka se nthwešago wona; o a nkimela! ₁₅Ge o ntira ka mokgwa wo gona go kaone o mpolaye; ge o ntebeletše ka botho gona a ke se hlwe ke bona bošula bjo bja ka.”

₁₆Morena a re go Moshe: “Kgobokanya bagolo ba masome a a šupago bao ba tsebjago e le baetapele ba setšhaba, o ba tliše go nna Tenteng ya bodulo bja ka, mme o ba botše gore ba eme moo ka thoko ga gago. ₁₇Ke tla theoga ka bolela le wena fao, gomme ke tla ba abela moya wo ke go filego wona. Ba tla go rwadiša morwalo wa setšhaba se, gomme o ka se hlwe o o šikere o nnoši. ₁₈Botša setšhaba o re: ‘Itlhwekišetšeng la bosasa; le tla ba le nama ye le tlago e ja. Morena o le kwele ge le belaela le re le duma ge le ka hwetša nama, le ge le re le be le ipshina kua Egepeta. Bjale Morena o tla le fa nama la ja. ₁₉Le ka se e je fela letšatši le tee goba a mabedi goba a mahlano goba a lesome, le ge e le a masome a mabedi, ₂₀eupša le tla e ja kgwedi ka moka go fihlela e le tlapela, e bile e le nkgela, e le ka gobane le hlanogetše Morena yo a lego mo gare ga lena, la mo ngongoregela la re nkabe le sa ka la tloga Egepeta.’ ”

₂₁Moshe a re go Morena: “Bahlabani ba ba nago le nna ke ba dikete tše makgolo a a selelago, gomme o re o tla ba fa nama ye e lekanego kgwedi ka moka? ₂₂Ke dikgomo le dihuswane tše kae tše di kago hlabja tša ba lekana? Kgane dihlapi ka moka tša ka lewatleng di ka ba lekana?”

₂₃Morena a mo fetola a re: “Na go na le se se ka mpalelago? Gonabjale o tla bona ge eba seo ke se boletšego se tla phethega goba se ka se phethege!”

₂₄Ke moka Moshe a tšwa, a botša setšhaba se Morena a se boletšego. A kgetha bagolo ba masome a a šupago setšhabeng mme a ba emiša go dikanetša Tente ya bodulo bja Morena. ₂₅Ya ba Morena o theoga ka leru mme o bolela naye. A abela bagolo bao ba masome a a šupago moya wo a o filego Moshe. Ge moya o ba tsena ba thoma go porofeta, fela ba se ke ba tšea nako ye telele.

₂₆Ba babedi ba bagolo bao ba masome a a šupago, Eldade le Medade, ba be ba šetše mešašeng, ba se ba ya Tenteng. Gona moo mešašeng moya wa tla go bona, gomme ba thoma go porofeta. ₂₇Lesogana le lengwe la tla le kitima go botša Moshe la re: “Eldade le Medade ba a porofeta kua mešašeng!”

₂₈Ke moo Joshua, morwa wa Nunu, yo e bilego mohlanka wa Moshe go tloga ge e sa le lesogana, a rilego go Moshe: “Ba homotše, mong wa ka, Moshe!”

₂₉Moshe a mo fetola a re: “Kgane o tshwenyega ka nna? Nke nkabe Morena a efa setšhaba sa gagwe ka moka moya wa gagwe mme a dira gore bohle ba porofete!” ₃₀Ke moka Moshe le bagolo bao ba masome a a šupago ba Baisraele ba boela mešašeng.

₃₁Ka bjako Morena a fokiša phefo ye e ilego ya tliša dikhwiri di etšwa lewatleng. Phefo yeo ya di wetša mešašeng le tikologong ya yona yohle ya go lekana leeto la letšatši, go fihlela di pharelana fase mo e ka bago metara go ya godimo. ₃₂Ka gona setšhaba sa hlwa se swara dikhwiri letšatši leo ka moka le bošego bja gona, le letšatši le le latelago; mang le mang a swara tše di imelago dikilokramo tše sekete, goba go feta. Ba di anega mo gohle mešašeng gore di ome. ₃₃Ya re ba sa khupile nama, le go e hlahuna ba se ba tšwe ba e hlahuna, Morena a ba galefela, a ba otla ka bolwetši bjo bošoro bja leuba. ₃₄Felo fao go ile gwa rewa leina la “Mabitla a go duma”, ka gobane moo ba be ba bolokile batho bao ba ilego ba duma nama.

₃₅Go tloga moo setšhaba sa hudugela Hatserote, moo ba hlomilego mešaša gona.

₁Moshe o be a nyetše mosadi wa Mokushe, gomme Miriamo le Arone ba mo solela taba yeo. ₂Ba re: “Na Morena o boletše ka Moshe fela? Na ga se a bolela le ka rena?” Morena a kwa se ba se bolelago.

₃Moshe e be e le motho wa go ikokobetša, a ikokobetša go feta batho bohle lefaseng.

₄Ka bjako Morena a re go Moshe le Arone le Miriamo: “Ka bararo ga lena tlang Tenteng ya bodulo bja ka.” Ba ya, ₅gomme Morena a theoga ka thololo ya leru, a ema mojakong wa Tente, a bitša Arone le Miriamo. Ka babedi ga bona ba batamela, ₆gomme Morena a re:

₉Morena o be a ba galefetše; ka gona ya re ge a tloga ₁₀mme le leru le tloga Tenteng, Miriamo a aparelwa ke bolwetši bjo bošoro ba letlalo, mme ya ba yo mošweu bjalo ka lehlwa. Ge Arone a mo lebelela, a bona a aparetšwe ke bolwetši bjoo, ₁₁mme a re go Moshe: “Hle, mong wa ka, se re otle ka kotlo ye ya sebe sa rena sa botlatla. ₁₂Se mo lese a eba bjalo ka lesea la go tswalwa le hwile, le le llwego ka thoko.”

₁₃Ka gona Moshe a llela Morena a re: “Hle, Modimo, mo fodiše!”

₁₄Morena a mo fetola a re: “Ge tatagwe a ka be a mo tshwetše ka mare sefahlego, a o be a ka se fetše matšatši a a šupago a gobogile? Ka gona a a tswalelelwe ka ntle ga mešaša matšatši a a šupago, gomme ka morago ga moo a ka bušetšwa mešašeng.” ₁₅Miriamo a tswalelelwa ka ntle ga mešaša matšatši a a šupago, gomme setšhaba sa se ke sa huduga, sa letela go fihlela ge a tsenywa gape mešašeng. ₁₆Ya ba gona ba tlogago Hatserote, gomme ba ya ba hloma mešaša lešokeng la Parane.

₁Morena a re go Moshe: ₂“Kgetha moetapele o tee kgorong ye nngwe le ye nngwe, o ba rome e le dihlodi go yo hlola naga ya Kanana ye ke e fago Baisraele.” _3-15Moshe a phetha taelo yeo, a roma baetapele ba ba latelago go tloga lešokeng la Parane:

₁₆Bao ke dihlodi tše Moshe a di romilego go yo hlola naga. O ile a fetola leina la Hosea, morwa wa Nunu, a re ke Joshua.

₁₇Ge Moshe a ba roma, a re go bona: “Sepelang leboa ka karolong ya ka borwa ya naga, mme ka morago le rotogeleng nageng ya dithaba. ₁₈Le boneng gore ke naga ya mohuta mang, ke batho ba bakae ba ba dulago moo, le gore ba tiile bjang. ₁₉Le lebeleleng gabotse gore a naga yeo ke ye botse goba ke ye mpe, le gore a batho ba moo ba dula mešašeng goba metseng ye e ageleditšwego ka merako. ₂₀Le lebeleleng gore na mobu wa ntshe o nonne goba ke wa lehwafa, le ge eba naga yeo e na le dithokgwa. Le beng le sebete le boeng le dikenywa tše dingwe tša naga yeo.” E be e le sehla sa ge diterebe di thoma go butšwa.

₂₁Ka gona banna bao ba ya leboa mme ba bona naga go tloga lešokeng la Tsine ka borwa go ba go fihla Rehobo, kgauswi le sefate sa Hamate ka leboa. ₂₂Pele ba ile ba ya karolong ya ka borwa ya naga mme ba fihla Hebrone, moo go bego go dula ba kgorwana ya Ahimane, ya Sheshai, le ya Talmai, ditlogolo tša setšhaba sa Baanake. Hebrone e rile go agwa gwa feta mengwaga ye e šupago pele ga ge Tsoane e agwa kua Egepeta. ₂₃Ba fihla moeding wa Eshkolo, gomme moo ba rema lekala leo le bego le na le ntšhuhla e tee ya diterebe ye e bego e imela mo e lego gore e ile ya rwalwa ke banna ba babedi ka go e šikara ka kota. Ba ile ba ba ba boa le digarenate le mago. ₂₄Felo fao go ile gwa rewa leina la moedi wa Eshkolo ka lebaka la ntšhuhla ya diterebe yeo Baisraele ba ilego ba e rema moo.

₂₅Ka morago ga ge ba hlotše naga matšatši a masome a mane, ba ile ba boela ₂₆go Moshe le go Arone le go setšhaba ka moka sa Israele kua Kadeshe, lešokeng la Parane. Ba ile ba bega seo ba se bonego, mme ba ba laetša dikenywa tše ba tlilego natšo. ₂₇Ba botša Moshe ba re: “Re lekotše naga ye o bego o re romile gore re yo e bona; ke naga ya mokhora le monono, gomme dikenywa tša yona šedi. ₂₈Eupša batho ba ba dulago moo ke batho ba maatla, le metse ya bona ke ye megolo kudu ye e ageleditšwego gabotse ka merako. Godimo ga moo re bone ditlogolo tša ditšitširipa tša Baanake fao. ₂₉Baamaleke ba dula ka karolong ya ka borwa ya naga; Bahete le Bajebuse le Baamore ba dula kua dinageng tša dithaba; Bakanana ba dula go ipata le Lewatle la Mediteraniene le go ipata le noka ya Jordane.”

₃₀Kalebe o ile a homotša batho bao ba ilego ba thoma go ngongoregela Moshe a re: “A re napeng re ye re thope naga ya bona, ka gobane e ka se re palele.”

₃₁Eupša banna bale ba go yo hlola naga le yena ba re: “Aowa, re ka se kgone go lwa le ditšhaba tšela, ka gobane di re feta ka maatla.” ₃₂Ka gona ba napa ba botša Baisraele maaka ka ga naga yeo ba tšogo e lekola ba re: “Naga ya gona ga e robale. Batho ba re ba bonego moo go yona ke ba bateleletelele. ₃₃Re bone le ditšitširipa fao, ditlogolo tša Anake. Re ile ra ipona re le ba bannyane bjalo ka ditšie, gomme le bona ba re bona re le bjalo.”

₁Bošego ka moka setšhaba sa goelela se lla. ₂Ba ngongoregela Moshe le Arone ba re: “Go kaone ge re ka be re ikhwetše kua Egepeta goba gona mo lešokeng! ₃Morena o reng a re iša nageng yeo? Re tla bolawa ntweng, gomme basadi le bana ba rena ba thopša. A go ka se be kaone go boela Egepeta?” ₄Ka gona ba botšana ba re: “A re kgetheng moetapele, re boeleng Egepeta!”

₅Ke moo Moshe le Arone ba itahletšego fase ka difahlego pele ga setšhaba ka moka. ₆Gomme Joshua, morwa wa Nunu, le Kalebe, morwa wa Jefune, ba babedi ba dihlodi tšela, ba gagola diaparo tša bona ka manyami, ₇mme ba re go setšhaba ka moka: “Naga ye re tšogo e hlola ke naga ye botse kudu. ₈Ge eba re kgahla Morena, o tla re iša go yona gomme a re fa naga yeo ya mokhora le monono. ₉Le se ke la tsogela Morena maatla, le gona le se ke la boifa batho ba ba dulago moo. Re tla ba fenya gabonolo. Medimo ye e bego e ba šireleditše e ba furaletše, eupša rena Morena o na le rena; ka gona le se ke la boifa.” ₁₀Setšhaba ka moka se be se šetše se nyaka go ba bolaya ka maswika, eupša ka bjako batho ba bona seetša se se fahlago sa letago la Morena Tenteng.

₁₁Morena a re go Moshe: “Setšhaba se se tla nnyatša go fihlela neng? Se tla gana go ntshepha go fihlela neng le ge ke dirile mehlolo ye mekaa gare ga bona? ₁₂Ke tla ba bolaya ka bolwetši bja leuba ka ba fediša, eupša wena ke tla go dira tatagosetšhaba se segolo sa maatla go feta se!”

₁₃Fela Moshe a re go Morena: “O ntšhitše setšhaba se Egepeta ka maatla a gago. Ge Baegepeta ba ekwa se o se dirilego setšhaba sa gago, ₁₄ba tla botša batho ba ba dulago mo nageng ye. Batho ba ba šetše ba kwele gore wena, Morena, o na le rena, le gore o bonala pepeneneng ge leru la gago le ema ka godimo ga rena, le gore o sepela pele ga rena ka thololo ya leru mosegare, le ka thololo ya mollo bošego. ₁₅Bjale ge o ka bolaya setšhaba sa gago ka moka, ditšhaba tše di kwelego go tuma ga gago di tla re ₁₆o bolaile setšhaba sa gago lešokeng, ka gobane o be o palelwa ke go se goroša nageng ye o se holofeditšego yona ka keno. ₁₇Bjale ge, Mong wa ka, ke a go rapela, re laetše maatla a gago mme o dire se o re holofeditšego sona mola o re: ₁₈‘Nna, Morena, ga ke befelwe ka pela, ebile ke na le potego le lerato le legolo, mme ke lebalela batho dibe le dikarogo tša bona. Le ge go le bjalo nka se lese go otla bana le ditlogolwana go iša molokong wa boraro le wa bone ka lebaka la dibe tša batswadi ba bona.’ ₁₉Ka gona ke a go rapela, Morena, lebalela setšhaba se sebe sa sona go ya ka potego le lerato la gago le legolo, bjalo ka ge o dutše o se lebalela mola se tlogago Egepeta.”

₂₀Morena a mo fetola a re: “Ke tla ba lebalela, bjalo ka ge o nkgopela. ₂₁Eupša ke ikana ke le Modimo yo a phelago, yo bogoši bja ka bo tletšego lefase, gore _22-23ga go le o tee wa setšhaba se yo a tlago tsena nageng yeo. Ba bone seetša se se fahlago sa letago la ka, le mehlolo ye ke e dirilego kua Egepeta le mo lešokeng, eupša ba ntekile leboelela gomme ba ganne go ntheetša. Ruri, ga go le o tee wa bao ba nnyaditšego yo a tlago tsena nageng ye ke e holofeditšego borakgolokhukhu ba bona ka keno. ₂₄Fela ka gobane mohlanka wa ka, Kalebe, yena ga a swane le bona, mme o ntatela ka pelo ya gagwe ka moka, ke tla mo fihliša nageng ye a tšwago go e lekola, gomme ditlogolo tša gagwe di tla tšea naga yeo ya ba ya tšona, ₂₅naga yeo meeding ya yona bjale go dulago Baamaleke le Bakanana. Le boeleng morago ka moswane mme le tsene lešokeng go ya kgogometšaneng ya Akaba.”

₂₆Morena a re go Moshe le Arone: ₂₇“Setšhaba se sebe se se tla fela se nngongoregela go fihlela neng? Ke tennwe ke dingongorego tše! ₂₈Bjale ba botše o re: ‘Ke ikana ke le Modimo yo a phelago gore ke tla le dira tšona tše ke kwelego le di bolela. Ke realo, nna, Morena. ₂₉Le tla hwa gomme ditopo tša lena di tla šwalalana le lešoka le. Ka ge le nngongoregetše ga go le o tee wa lena yo a nago le mengwaga ye masome a mabedi goba go feta yo a tlago tsena nageng yela. ₃₀Ke enne ka re ke tla le dudiša nageng yela, fela le o tee wa lena a ka se dule moo, ge e se Kalebe le Joshua. ₃₁Le boletše gore bana ba lena ba tla thopša, eupša nna ke tla ba goroša nageng yeo le e gannego, gomme e tla ba ya bona. ₃₂Fela lena le tla hwela mo lešokeng le. ₃₃Bana ba lena ba tla ralala le lešoka bjalo ka badiši mengwaga ye masome a mane, ba tlaišega ka lebaka la go se botege ga lena, go fihlela ge wa mafelelo wa lena a ehwa. ₃₄Bjalo ka ge le ile la hlola naga matšatši a masome a mane, le tla otlelwa sebe sa lena mengwaga ye masome a mane, letšatši ka le tee le emela ngwaga. Le tla tseba gore go lwa le nna go ra eng! ₃₅Ke ena gore ke tla le otla ka mokgwa wo, lena setšhaba se sebe le kgobokanetšego go lwa le nna. Ka moka ga lena le tlilo hwela gona mo lešokeng le. Ke realo, nna, Morena.’ ”

_36-37Banna bao Moshe a ilego a ba roma go yo lekola naga ba ile ba boa mme ba bolela maaka ao a ilego a dira gore batho ba ngongoregele Morena. Ka gona Morena a ba otla ka bolwetši, gomme ba hwa. ₃₈Go dihlodi tšela tše lesome le tše pedi go ile gwa šala Joshua le Kalebe fela.

₃₉Ge Moshe a botša Baisraele ka moka seo Morena a se boletšego, ba ile ba lla gabohloko. ₄₀Mosong wa letšatši le le latelago ba tsogela go namelela dithabeng go yo šwahlela naga yeo, ba re: “Bjale re itokišeditše go ya nageng ye Morena a re holofeditšego yona. Re a dumela gore re dirile sebe.”

₄₁Eupša Moshe a re: “Bjale le reng le tshela taelo ya Morena? Le ka se ke la atlega! ₄₂Le se ke la ya. Morena ga a na le lena, mme manaba a lena a tla le fenya. ₄₃Ge le lebana le Baamaleke le Bakanana le tla bolawa ntweng; Morena a ka se be le lena ka gore le ganne go mo latela.”

₄₄Le ge go le bjalo ba no fela ba ngangabetše, ba rotogela nageng ya dithaba, le ge Polokelo ya Kgwerano ya Morena e se ya tšwa mešašeng, le yena Moshe a se a tšwa. ₄₅Ka gona Baamaleke le Bakanana bao ba bego ba dula moo ba fologa dithaba ba ba fenya, gomme ba ba rakediša go fihla Horma.

₁Morena o file Moshe ₂melawana ye e latelago ye Baisraele ba swanetšego go e phetha nageng ye a bego a ile go ba fa yona. ₃Ge le direla Morena sehlabelo ka kgomo goba ka sehuswane e le sehlabelo sa go tšhungwa ka moka, goba sehlabelo sa go phethagatša keno, goba sehlabelo sa boithaopo, goba sehlabelo sa menyanya ya lena ye e beilwego, sa monkgo wa go tsefela Morena, ₄gona yo a se dirago a se tliše le kabelo ya bupi bja kilokramo e tee bo hlakantšwe le litara ya makhura a mohlware. ₅Ge motho a dira sehlabelo sa go tšhungwa ka moka goba sehlabelo se sengwe ka kgapana, a tliše le litara ya beine e le kabelo ya seno. ₆Ge motho a dira sehlabelo ka kgapa, a tliše bupi bja dikilokramo tše pedi bo hlakantšwe le makhura a mohlware a litara ya 1,25 e le kabelo ya bupi, ₇gotee le litara e tee ya beine le seripa sa yona e le kabelo ya seno. Monkgo wa sehlabelo se o tsefela Morena. ₈Ge go direlwa Morena sehlabelo sa go tšhungwa ka moka ka poo, goba go dirwa sehlabelo sa go phethagatša keno goba sa kagišano, ₉le bupi bja dikilokramo tše tharo bo hlakantšwe le litara tše pedi tša makhura a mohlware bo tlišwe e be kabelo ya bupi, ₁₀gotee le litara tše pedi tša beine e be kabelo ya seno. Monkgo wa sehlabelo se o tsefela Morena.

₁₁Go dirwe ka mokgwa woo ge e le sehlabelo sa poo goba kgapa goba kwanyana goba kgapana. ₁₂Ge go dirwa sehlabelo ka diruiwa tša go feta e tee, kabelo ya go sepela le sehlabelo seo e swanetše go oketšwa go ya ka palo ya diruiwa. ₁₃Moisraele yo mongwe le yo mongwe o swanetše go dira seo ge a dira sehlabelo sa monkgo wo o tsefelago Morena. ₁₄Gomme ge go na le mofaladi yo a dulago gare ga lena, a dutše lebakanyana fela goba a duletše sa ruri, mme a dira sehlabelo sa monkgo wo o tsefelago Morena, le yena o swanetše go phetha yona melawana ye. ₁₅Dinakong tšohle tše di tlago tšona ditaelo tšeo di sa le tlemile, mme le bona bafaladi ba ba dulago gare ga lena di tla fela di ba tlemile. Lena le bona le a swana pele ga Morena; ₁₆melao le melawana ye e swanago e ama lena le bona.

₁₇Morena o file Moshe ₁₈melawana ye e latelago ye Baisraele ba swanetšego go e phetha nageng ye a bego a ile go ba fa yona. ₁₉Ge go lewa dijo tša naga yeo, tše dingwe tša tšona di abelwe Morena e le kabelo ye e fiwago yena ka tsela ye e itšeng. ₂₀Ngwaga wo mongwe le wo mongwe ge le seno buna, senkgwa sa mathomo se se dirilwego ka mabele a mafsa se abelwe Morena e le kabelo ye e fiwago yena ka tsela ye e itšeng. Sona se abje ka wona mokgwa woo go abjago kabelo ye e fiwago Morena ka tsela ye e itšeng ye le e ntšhago mabeleng a le a folago. ₂₁Ka dinako tšohle tše di tlago kabelo yeo e abelwe Morena e etšwa dinkgweng tša mathomo tše di apewago ge go bunnwe.

₂₂Fela ge ba ka tšhoga ba tshetše molawana wo mongwe wo Morena a o filego Moshe, ₂₃goba ge ka moso ba ka se dire tšohle tše Morena a ba laetšego tšona ka Moshe – ₂₄ge phošo yeo e dirilwe ka lebaka la go se tsebe ga setšhaba – ba dire sehlabelo sa go tšhungwa ka moka ka poo sa monkgo wo o tsefelago Morena, gotee le kabelo ye e swanetšego ya bupi le ya seno. Ba dire le sehlabelo sa tshwarelo ya dibe ka phooko. ₂₅Moprista a boelanye setšhaba le Modimo ka ge ba dirile phošo, mme ba tla lebalelwa, ka gore phošo yeo e be e se ya maikemišetšo, gomme ba diretše Morena sehlabelo sa tshwarelo ya dibe tša bona. ₂₆Setšhaba ka moka sa Israele le bafaladi ba ba dulago gare ga bona ba tla lebalelwa, ka gore yo mongwe le yo mongwe o be a angwa ke phošo yeo.

₂₇Ge motho a ka tšhoga a dirile sebe, a dire sehlabelo sa tshwarelo ya dibe ka pudi ya tshadi ya ngwaga o tee. ₂₈Moprista a mo phethele tiro ya poelano pele ga Morena ka ge a dirile sebe, gomme o tla lebalelwa. ₂₉Wona molawana wo o ama yo mongwe le yo mongwe yo a ka dirago sebe e se ka boomo, le ge e le Moisraele, goba e le mofaladi yo a dulago le bona.

₃₀Eupša motho yo a ka dirago sebe ka boomo, e le Moisraele goba e le mofaladi, o nyatša Morena, gomme a kgaolwe setšhabeng sa gabo, ₃₁ka gobane o ganne se Morena a se boletšego gomme o tshetše taelo ya gagwe ka boomo. O tla otlwa ka lebaka la sebe sa gagwe.

₃₂Mola Baisraele ba sa le lešokeng ba kile ba hwetša motho a rwalela dikgong ka Sabatha. ₃₃Ba mo iša go Moshe le Arone le go setšhaba ka moka, ₃₄mme a dišwa, ka gobane go be go sa tsebje gabotse gore ba dire eng ka yena. ₃₅Ke moo Morena a itšego go Moshe: “Motho yoo o swanetše go bolawa thoo; setšhaba ka moka se mmolaye ka maswika ka ntle ga mešaša.” ₃₆Ka gona setšhaba ka moka sa mo ntšhetša ka ntle ga mešaša gomme sa mmolaya ka maswika, ka moo Morena a laetšego ka gona.

₃₇Morena o laetše Moshe ₃₈gore a botše Baisraele a re: “Le logeleleng mašaphu merumong ya diaparo tša lena, gomme le rokelele thapo ya botala bja legodimo lešaphung le lengwe le le lengwe. Le direng seo le mabakeng ka moka a a tlago. ₃₉Mašaphu ao e tla ba digopotšo, gomme nako ye nngwe le ye nngwe ge le a bona le gopoleng ditaelo tša ka ka moka, mme le di phetheng; ke moo le ka se ntlhanogelego la latela ditumo le dikganyogo tša lena. ₄₀A tla le gopotša go phetha ditaelo tša ka ka moka, mme le tla ba ba ka ka botlalo. ₄₁Ke nna Morena Modimo wa lena yo ke le ntšhitšego Egepeta gore ke tle ke be Modimo wa lena. Ke nna Morena Modimo wa lena.”

₁Nna, Paulose, yo Modimo ka go rata ga gagwe a nkgethilego ka ba moapostola wa Kriste Jesu, le Sostenese, ngwanaborena, ₂re dumediša phuthego ya Modimo ye e lego motseng wa Korinte, ya ba e lego ba gagwe ka go ba ba tee le Kriste Jesu, ba ba bileditšego go ba bakgethwa ba Modimo, gotee le bohle ba ba khunamelago Morena wa rena, Jesu Kriste, gohle, yo e lego yena Morena wa bona le rena, re re:

₃Nke Modimo, Tatagorena, le Morena Jesu Kriste ba le gaugele, ba le fe khutšo.

₄Ka mehla ke le lebogela go Modimo ka lebaka la tše dibotse tše a le filego tšona ka Kriste Jesu. ₅Le humišitšwe ka yena dilong ka moka, e lego tša go tseba molaetša wa Jesu Kriste gabotse le go o bega ka botlalo. ₆Molaetša woo le tloga le o dumetše ₇mo e lego gore ge le sa letetše go utollwa ga Morena wa rena, Jesu Kriste, ga go mpho le e tee ye le e hlokago. ₈Ke yena a tlago le tiiša tumelong go fihlela mafelelong, gore mohla yena Morena wa rena, Jesu Kriste, a boa e be ga le na bosodi. ₉Modimo o a tshepega, yena yo a le bileditšego go ba ba tee le Morwagwe, Jesu Kriste, Morena wa rena.

₁₀Banabešo, ke le rapela ka Morena wa rena, Jesu Kriste, gore ka moka ga lena le kwaneng, gore le se tšwe dihlophana. Le be ba pelo e tee le monagano o tee le maikemišetšo a tee. ₁₁Gobane, banabešo, ke kwele ka ba ga Kleo gore le na le diphapano. ₁₂Ke ra tša ge motho wa lena a re nna ke wa Paulose, yo mongwe a re nna ke wa Apolose; mongwe a re nna ke latela Kefase, mongwe a re nna ke latela Kriste. ₁₃Na Kriste o ntšhitšwe dikgawanakgawana? Kgane ke Paulose yo a le bapoletšwego sefapanong? Goba le kolobeditšwe gore le be ba Paulose?

₁₄Nna ke leboga Modimo ge ke se ka ka ka kolobetša motho mo go lena, ge e se Krispose le Gayose. ₁₅Ka gona ga go na yo a ka rego o kolobeditšwe gore e be wa ka. ₁₆Ee, bjale ke a gopola, ke kolobeditše le Stefanase le ba lapa la gagwe; ga ke gopole ke kolobeditše yo mongwe. ₁₇Kriste ga se a nthoma gore ke yo kolobetša. O nthomile gore ke yo bega Taba ye Botse ya Modimo, e sego ka polelo ya batho ba bohlale. Ge nkabe nka dira bjalo, lehu la Kriste sefapanong e be e tla ba lefeela.

₁₈Gobane ba ba tšeago ka tsela ye e išago tahlegong ba bona molaetša wa lehu la Kriste sefapanong e le bošilo; kganthe rena re phološwago re bona e le maatla a Modimo. ₁₉Gobane Mangwalo a Makgethwa a re:

₂₁Gobane Modimo, ka bohlale bja gagwe, o dirile gore batho ba lefase ba se kgone go mo tseba ka bja bona bohlale. O ratile gore a phološe bao ba dumelago ka molaetša wo re o gašago wo go thwego ke bošilo. ₂₂Bajuda ba nyaka mehlolo, kganthe Bagerike bona ba tsoma bohlale. ₂₃Ge e le rena re bega taba ya Jesu yo a ilego a bapolwa sefapanong, e lego wona molaetša wo o ganwago ke Bajuda, mola bao e sego Bajuda bona ba re ke bošilo; ₂₄kganthe go bao Modimo a ba biditšego, ba Bajuda le ba e sego Bajuda, molaetša wo ke Kriste yo e lego maatla a Modimo le bohlale bja gagwe. ₂₅Gobane se se bonalago nke ke bošilo bja Modimo ke se bohlale go phala bohlale bja batho; le se se bonalago nke ke bofokodi bja Modimo se tiile go phala go tia ga batho.

₂₆Banabešo, nke le naganeng ka se le bego le le sona mola Modimo a le bitša. Ge go iwa ka tebelelo ya batho, ga se ba bakae mo gare ga lena ba e bego e le dihlalefi, goba ba na le maatla, goba e le ba madi a bogoši setšhabeng. ₂₇Modimo o kgethile bao go thwego ke mašilo gore a leše dihlalefi dihlong, a kgetha bao go thwego ke bafokodi gore a leše ba maatla dihlong. ₂₈O kgethile babotlana le banyatšegi le ba go thwego ga se selo gore a fediše ba go thwego ke ba mohola. ₂₉Ka gona, ga go yo a ka ikgantšhago pele ga Modimo. ₃₀Gomme ke yena Modimo yo a le dirilego ba tee le Kriste Jesu, le gona o mo dirile bohlale bja rena. Ka yena re a lokafatšwa; re ba setšhaba se se kgethilwego ke Modimo gomme ra lokollwa sebeng. ₃₁Ke ka lebaka leo Mangwalo a Makgethwa a rego: “Yo a ikgantšhago a ikgantšhe ka tše di dirilwego ke Morena.”

₁Banabešo, mola ke le etetše go tlo tsebagatša leano la Modimo le le bego le sešo la tsebja, ga se ka ipontšha ke le seboledi goba sehlalefi. ₂Ke ile ka fetša le pelo gore ge ke na le lena ke tla bolela fela ka tša Jesu Kriste, gagolo tša ge e bile mmapolwa sefapanong. ₃Ka gona, mola ke tlile moo go lena ke be ke fokola ke bile ke thothomela ka letšhogo, ₄gomme le thuto ya ka le molaetša ke be ke sa le botše tšona ka bothakga bja seboledi le bohlale bja batho, eupša ke be ke le botša tšona ka bohlatse bjo bo bontšhago maatla a Moya wa Modimo. ₅Ka gona, tumelo yeo ya lena ga se ya go ikanya bohlale bja batho, eupša ke ya go bota maatla a Modimo.

₆Bohlale bjona ke a bo bega, ke bo begela ba ba kwešišago tša moya. Fela ga se bohlale bja batho ba mehleng yeno goba bja babuši ba lona – babuši ba ba lobago maatla a bona a go buša. ₇Bohlale bjo ke bo bolelago ke bohlale bja Modimo bjo bo sa tsebjego, bjo bo fihletšwego batho, eupša bjo a bego a re lotetše bjona le pele ga ge a hlola lefase, gore re tle re be le yena letagong. ₈Ga go mmuši wa mehleng yeno yo a tsebilego bohlale bjo. Ge ba ka be ba bo tsebile, ba ka be ba ile ba se bapole Morena wa letago sefapanong. ₉Eupša go bjalo ka ge Mangwalo a Makgethwa a bolela a re:

₁₀Eupša rena Modimo o re utolletše tšona ka Moya wa gagwe, gobane wona Moya o fetleka tšohle, ešita le yona merero ye e sa tsebjego ya Modimo. ₁₁Gobane ke mang yo a tsebago tša motho, ge e se yena mong? Ka mokgwa wo mobjalo, tša Modimo le tšona ga go motho yo a di tsebago, ge e se wona Moya wa Modimo. ₁₂Rena ga se ra fiwa moya wa go buša batho ba lefase; re filwe Moya wa go tšwa go Modimo gore re tle re tsebe tše re di filwego ke Modimo ka kgaugelo ya gagwe.

₁₃Gomme tšona re di bolela e sego ka polelo ye e rutwago ka bohlale bja batho, eupša ka polelo ye e rutwago ke Moya, re hlalošetša bao ba laolwago ke Moya wa Modimo ditaba tša moya. ₁₄Yo a sa laolwego ke Moya wa Modimo ga a amogele tša Moya. Go yena ke bošilo, gomme ga a kgone go di kwešiša, ka gobane di lebelelwa fela ka leihlo la Moya. ₁₅Eupša yo a laolwago ke Moya wa Modimo o kwešiša tšohle, etšwe yena a sa kwešišwe ke motho. ₁₆Gape le Mangwalo o Makgethwa a re:

Eupša rena re nagana bjalo ka Kriste.