To The Word – Day 4

₁Modimo o ile a gopola Noa le diruiwa tšohle le diphoofolo tšohle tša lešoka tše di bego di na le yena ka leselawatleng; a fokiša phefo, mme meetse a thoma go ya fase. ₂Methopo ya lewatle ka fase ga lefase le dithibo tša mafula a legodimo tša tswalelwa. Pula ya khula, ₃mme meetse a ya fase ka gonnyane ka gonnyane matšatši a 150. ₄Ka letšatši la lesome le metšo ye e šupago la kgwedi ya bošupa leselawatle la rokama thabeng ye nngwe molokolokong wa dithaba tša Ararate. ₅Meetse a fela a eya fase, mme ka letšatši la pele la kgwedi ya lesome dintlha tša dithaba tša bonala.

₆Ka morago ga matšatši a masome a mane Noa a bula lefasetere ₇gomme a ntšha legokobu. Lona le ile la se ke la boa, eupša la fofafofa gohle go fihlela meetse a gopela sa ruri. ₈Ge go le bjalo, Noa a roma leeba go yo bona ge e ka ba meetse a ile fase, ₉fela ka ge meetse a be a sa khupeditše lefase ka moka, leeba le ile la hloka moo le ka kotamago gona. Le ile la boela ka leselawatleng, mme Noa a obeletša letsogo a le swara a le tsenya ka gare ga lona. ₁₀A letela gape matšatši a mangwe a a šupago, a tsebo roma leeba lela gape. ₁₁Le ile la boela go yena mantšiboa le momile letlakala le lefsa la mohlware. Ka gona Noa a tseba gore meetse a ile fase. ₁₂Ka morago ga fao a letela matšatši a mangwe a a šupago, a tsebo roma leeba lela gapegape; ka lekga le le ile la se ke la boa.

₁₃Ge Noa a na le mengwaga ye 601, ka letšatši la pele la kgwedi ya mathomo, meetse a gopa. Noa a šuthiša tlhaka ya leselawatle, a lebelela ka gohle mme a bona lefase le thoma go oma. ₁₄Ka letšatši la masome a mabedi le metšo ye e šupago la kgwedi ya bobedi ke ge lefase le omile.

₁₅Modimo a re go Noa: ₁₆“Tšwaa ka leselawatleng le mosadi le barwa ba gago le basadi ba bona. ₁₇O ntšhe le dinonyana le diphoofolo le digagabi ka moka gore di tle di ate di tlale lefase ka moka.” ₁₈Ka gona Noa a tšwa ka leselawatleng le mosadi le barwa ba gagwe le basadi ba bona. ₁₉Diphoofolo le digagabi le dinonyana ka moka tša tšwa ka leselawatleng ka dihlophanahlophana go ya ka mehuta ya tšona.

₂₀Noa a agela Morena aletare; a tšea e tee ya mohuta wo mongwe le wo mongwe wa diphoofolo le dinonyana tše di hlwekilego mme a di tšhuma moo aletareng ya ba sehlabelo sa go tšhungwa ka moka. ₂₁Monkgo wa sehlabelo seo wa thabiša Morena mme ka pelong a re: “Nka se tsoge ke rogakile lefase gape ka lebaka la seo motho a se dirago, ke tseba gore go tloga bofseng megopolo ya gagwe ke ye mebe. Nka se tsoge ke fedišitše diphedi ka moka gape. ₂₂Ge lefase le sa le gona go tla ba le nako ya go bjala le nako ya go buna. Ka mehla go tla ba le go tonya le go fiša, selemo le marega, mosegare le bošego.”

₁Modimo a šegofatša Noa le barwa ba gagwe mme a re go bona: “Le beng le bana ba bantši gore ditlogolo tša lena di tle di phele gohle lefaseng. ₂Diphoofolo le dinonyana le digagabi le dihlapi ka moka di tla phela di le boifa. Ka moka di bewa diatleng tša lena. ₃Bjale le ka di ja, la ja le ditala; ke le fa tšona ka moka gore e be dijo tša lena. ₄Selo se tee se le sego la swanela go se ja ke nama ye e nago le madi; ke le iletša yona ka lebaka la gore bophelo bo mading. ₅Yo a bolayago motho ke tla mo otla. Phoofolo efe le efe ye e bolayago motho ke tla e otla. ₆Yo a bolayago motho le yena o tla bolawa ke batho, ka gore motho o dirilwe gore a swane le Modimo.

₇“Fela lena, le be le bana ba bantši gore ditlogolo tša lena di tle di phele gohle lefaseng.”

₈Modimo a re go Noa le barwa ba gagwe: ₉“Bjale ke dira kgwerano ya ka le lena le ditlogolo tša lena ₁₀le diphedi tšohle tša lefase tše di bego di na le lena – dinonyana, le diruiwa, le diphoofolo tšohle tša lešoka – se sengwe le se sengwe seo se tšwilego ka leselawatleng le lena. ₁₁Ke dira kgwerano ya ka le lena ke re: Diphedi ka moka di ka se tsoge di fedišitšwe ka lefula gape; lefula le ka se tsoge le sentše lefase gape. ₁₂Sese sešupo sa kgwerano ye ya neng le neng ye ke e dirago le lena le diphedi ka moka: ₁₃ke molalatladi wa ka wo ke o tsemago marung. E tla ba sešupo sa kgwerano ya ka le lefase. ₁₄Nako le nako ge ke pipa legodimo ka maru mme molalatladi o bonala, ₁₅ke tla gopola kgwerano ya ka le lena le diphoofolo ka moka ya gore lefula le ka se tsoge le fedišitše diphedi ka moka gape. ₁₆Ge molalatladi o le marung ke tla o bona, mme ka gopola kgwerano ya go ya go ile gare ga ka le diphedi ka moka lefaseng. ₁₇Se ke sešupo sa kgwerano ye ke e dirago le diphedi ka moka.”

₁₈Barwa ba Noa bao ba tšwilego ka leselawatleng ke Seme le Hamo le Jafeta. Hamo e be e le tatagoKanana. ₁₉Barwa ba ba bararo ba Noa e bile borakgolokhukhu ba batho ka moka lefaseng.

₂₀Noa, yo e bego e le molemi, e bile yena motho wa mathomo wa go bjala merara. ₂₁Ka morago ga ge a nwele beine o ile a tagwa, mme a ithobalela ka mošašeng wa gagwe a apotše. ₂₂Ge Hamo, tatagoKanana, a bona gore tatagwe ga a tšwara, o ile a tšwa a yo botša bomorwarragwe ka babedi. ₂₃Ke moo Seme le Jafeta ba tšerego kobo mme ba e bea magetleng, ba tsena ka mošašeng ba sepela ka sa morago, gomme ba pipa tatabo ka kobo yela; ba itebelediša thoko gore ba se ke ba mmonela. ₂₄Ge Noa a tšwiwa ke beine mme a ekwa gore morwagwe yo monnyane o mo dirile eng, ₂₅a re:

₂₈Ka morago ga lefula Noa o phetše mengwaga ye 350, ₂₉mme a hlokafala a na le mengwaga ye 950.

₁Šedi ditlogolo tša barwa ba Noa, Seme le Hamo le Jafeta. Ba bararo ba ba bile le barwa ka morago ga lefula.

₂Barwa ba Jafeta šeba: ke Gomere le Magogo le Madai le Jabane le Tubale le Mesheke le Tirase. Bona e bile borakgolokhukhu ba ditšhaba tšeo di reetšwego maina a bona. ₃Ditlogolo tša Gomere e bile setšhaba sa Ashkenase le sa Rifate le sa Togarma. ₄Ditlogolo tša Jabane e bile setšhaba sa Elisha le sa Tarshishe le sa Saeprose le sa Rodose; ₅bona e bile borakgolokhukhu ba ditšhaba tše di dulago go ipata le lebopo le dihlakahlakeng. Bao ka moka ke ditlogolo tša Jafeta, mme ba dula melokong le ditšhabeng tša gabobona le dinageng tše di fapanego; sehlopha se sengwe le se sengwe se bolela polelo ya sona.

₆Barwa ba Hamo šeba: ke Kushe le Egepeta le Libia le Kanana. Bona e bile borakgolokhukhu ba ditšhaba tšeo di reetšwego maina a bona. ₇Ditlogolo tša Kushe e bile setšhaba sa Seba le sa Habila le sa Sabta le sa Rama le sa Sabteka. Ditlogolo tša Rama e bile setšhaba sa Sheba le sa Dedane. ₈Kushe o ile a ba le morwa yoo leina la gagwe e bego e le Nimrode. Yena e bile mogale wa mathomo lefaseng. ₉E be e le motsomi yo mogolo le mahlong a Morena; ke ka lebaka leo batho ba rego: “Bjalo ka Nimrode o motsomi yo mogolo le mahlong a Morena.”

₁₀Mathomong mmušo wa gagwe o be o akaretša Babele le Ereke le Akade. Naga tše ka moka di Babilonia. ₁₁Go tloga nageng yeo o ile a ya Asiria, mme fao a aga metse ya Ninibe le Rehobote-Ire le Kelage ₁₂le Resene – motse wo o lego gare ga Ninibe le motse wo mogolo wa Kelage.

₁₃Ditlogolo tša Egepeta e bile batho ba Lidia le Anamo le Lehaba le Naftuage ₁₄le Patruse le Kasluage le Kreta, bao go bona go tšwilego Bafilista.

₁₅Barwa ba Kanana šeba: Sidone, wa leitšibolo, le Hete. Bona e bile borakgolokhukhu ba batho bao ba reetšwego maina a bona. ₁₆Kanana gape e bile rakgolokhukhu wa Bajebuse le Baamore le Bagirgashe ₁₇le Bahibe le Baaraki le Basine ₁₈le Baarbade le Batsemare le Bahamate. Dikgoro tše di fapanego tša Bakanana tša ikala. ₁₉Naga ya Bakanana e be e tloga Sidone e leba Gerare go yo fihla Gasa, e leba Sodoma le Gomora le Adma le Tseboime go yo fihla Lesha. ₂₀Tšeo ke ditlogolo tša Hamo tše di dulago melokong le ditšhabeng tša gabotšona le dinageng tša tšona tše di fapanego; sehlopha se sengwe le se sengwe se bolela polelo ya sona.

₂₁Seme, mogolwaJafeta, e bile rakgolokhukhu wa Baheberu ka moka. ₂₂Barwa ba Seme šeba: Elamo le Ashure le Arpakshade le Lude le Aramo. Bona e bile borakgolokhukhu ba ditšhaba tšeo ba reetšwego maina a tšona. ₂₃Ditlogolo tša Aramo e bile setšhaba sa Utse le sa Hule le sa Getere le sa Mashe. ₂₄Arpakshade e bile tatagoShelage, yo e bilego tatagoEbere. ₂₅Ebere o bile le barwa ba babedi: Yo mongwe o ile a bitšwa Pelege, ka gore nakong ya gagwe batho ba lefase ba be ba arogane; yo mongwe yena o ile a bitšwa Jokotane. ₂₆Ditlogolo tša Jokotane e bile setšhaba sa Almodade le sa Shelefo le sa Hatsarmabete le sa Jerage ₂₇le sa Hadoramo le sa Usale le sa Dikla ₂₈le sa Obale le sa Abimaele le sa Sheba ₂₉le sa Ofire le sa Habila le sa Jobabe. Ka moka ga bona ba tšwile go Jokotane. ₃₀Naga yeo ba bego ba dula go yona e be e tloga Mesha e fihla Sefare kua mebotong ya ka bohlabela. ₃₁Tšeo ke ditlogolo tša Seme tše di dulago melokong le ditšhabeng tše di fapanego, le dinageng tše di fapanego. Sehlopha se sengwe le se sengwe se bolela polelo ya sona.

₃₂Ditšhaba tše ka moka ke ditlogolo tša Noa, setšhaba ka setšhaba, go ya ka borakgolokhukhu ba bona bao ba fapanego. Ka morago ga lefula ditšhaba ka moka tša lefase di tšwile barweng ba Noa.

₁Mathomong batho ba lefase lohle ba be ba na le polelo e tee fela, mme ba šomiša mantšu a a swanago. ₂Ge ba falalela thoko ya bohlabela ba ile ba fihla molaleng wo mongwe kua Babilonia, gomme ba dula moo. ₃Ba botšana ba re: “Tlang re bopeng ditena mme re di tšhume di butšwe!” Ka gona ba ba le ditena tša go aga, le letsopa la go di swaraganya. ₄Ke moo ba itšego: “Bjale a re ageng motse wa tora ye e fihlago legodimong, gore re tle re itirele leina mme re se ka ra šwalalanywa le lefase ka moka.”

₅Morena a theoga go tlo bona motse le tora yeo batho bao ba di agilego, ₆mme a re: “Bjale bonang, batho ba ka moka ke batho ba tee gomme ba bolela polelo e tee; se e no ba mathomo a se ba tlilego go se dira. Go se gwa ya kae ba tla be ba kgona go dira se sengwe le se sengwe se ba nyakago go se dira. ₇A re theogeng re yo hlakahlakanya polelo ya bona gore ba se ke ba kwešišana.” ₈Ke moo Morena a ba tšitlantšego gohle lefaseng, mme ba se hlwe ba aga motse wola. ₉Motse woo wa bitšwa Babele, ka gobane moo Morena o hlakahlakantše polelo ya batho ka moka, mme go tloga moo a ba tšitlanyetša gohle lefaseng.

₁₀Ditlogolo tša Seme šedi: Mengwaga ye mebedi ka morago ga lefula, ge Seme a na le mengwaga ye 100, o ile a ba le morwa, Arpakshade. ₁₁Ka morago ga fao a phela mengwaga ye mengwe ye 500, mme a ba le bana ba bangwe.

₁₂Ge Arpakshade a na le mengwaga ye 35 o ile a ba le morwa, Shelage; ₁₃ka morago ga fao a phela mengwaga ye mengwe ye 403, mme a ba le bana ba bangwe.

₁₄Ge Shelage a na le mengwaga ye 30 o ile a ba le morwa, Ebere; ₁₅ka morago ga fao a phela mengwaga ye mengwe ye 403, mme a ba le bana ba bangwe.

₁₆Ge Ebere a na le mengwaga ye 34 o ile a ba le morwa, Pelege; ₁₇ka morago ga fao a phela mengwaga ye mengwe ye 430, mme a ba le bana ba bangwe.

₁₈Ge Pelege a na le mengwaga ye 30 o ile a ba le morwa, Regu; ₁₉ka morago ga fao a phela mengwaga ye mengwe ye 209, mme a ba le bana ba bangwe.

₂₀Ge Regu a na le mengwaga ye 32 o ile a ba le morwa, Seruge; ₂₁ka morago ga fao a phela mengwaga ye mengwe ye 207, mme a ba le bana ba bangwe.

₂₂Ge Seruge a na le mengwaga ye 30 o ile a ba le morwa, Nahoro; ₂₃ka morago ga fao a phela mengwaga ye mengwe ye 200, mme a ba le bana ba bangwe.

₂₄Ge Nahoro a na le mengwaga ye 29 o ile a ba le morwa, Terage; ₂₅ka morago ga fao a phela mengwaga ye mengwe ye 119, mme a ba le bana ba bangwe.

₂₆Ge Terage a na le mengwaga ye 70, o ile a ba tatagoAbramo le Nahoro le Harane.

₂₇Šedi ditlogolo tša Terage yo e bilego tatagoAbramo le Nahoro le Harane: Harane e bile tatagoLote, ₂₈mme Harane a hwela motseng wa gabo wa Ure kua Babilonia tatagwe a sa phela. ₂₉Abramo a nyala Sarai, mme Nahoro a nyala Milka, morwedi wa Harane. Morwedi yo mongwe wa Harane e be e le Jiska. ₃₀Sarai o be a sa belege.

₃₁Terage o ile a tloga motseng wa Ure, kua Babilonia, a na le Abramo, morwagwe, le Lote, setlogolo sa gagwe, morwa wa Harane, le ngwetši ya gagwe, Sarai, mosadi wa Abramo, a leba Kanana. Ba fihla Harane mme ba itulela gona. ₃₂Terage o ile a hwela moo a na le mengwaga ye 205.

₁Ka morago ga moo Jesu a tshelela ka mošola wa letsha la Galilea, le ba bangwe ba rego ke la Tiberiase. ₂A latelwa ke lešaba le lentši la batho, ka gore ba be ba mmone a dira mehlolo ya go fodiša balwetši. ₃Jesu a namela thaba, a fihla a dula gona le barutiwa ba gagwe. ₄Ke ge monyanya wa Bajuda wa Paseka o šetše o le kgauswi. ₅Jesu ge a gadima ka gohle a bona gore lešaba le le tlago go yena ke le lentši, gomme a botšiša Filipi a re: “Dinkgwa tša go khoriša batho ba re tla di reka kae?” ₆Ge a realo o be a dio mo leka, gobane yena o be a šetše a tseba se a tlago se dira.

₇Filipi ge a mo fetola a re: “Dinkgwa tša dipapetlana tša silibera tše makgolo a mabedi di ka se ba lekane le ge e le gore yo mongwe le yo mongwe a ka dio fiwa nthathana.”

₈Yo mongwe wa barutiwa ba gagwe, e lego Andrease, ngwanaboSimone Petrose, a re: ₉“Go na le mošemane yo mongwe mo yo a nago le dinkgwa tše tlhano tša garase le dihlapi tše pedi. Fela tšeo di ka holang ge batho ba le kaaka?”

₁₀Jesu a re: “Dudišang batho fase.” Felo moo go be go na le bjang bjo bontši. Ka gona batho ba dula fase. Banna ba ba bego ba le moo e be e ka ba ba dikete tše tlhano. ₁₁Jesu a tšea dinkgwa tšeo, a leboga Modimo, a laela gore di abelwe ba ba dutšego moo. Le dihlapi a ba abela tšona ka mokgwa woo, gomme batho ba ja ka mo ba nyakago ka gona. ₁₂Ya re ge ba khoše a laela barutiwa ba gagwe a re: “Kgoboketšang marathana a a šetšego, gore go se lahlege selo.” ₁₃Ba a kgoboketša, gomme ba tlatša diroto tše lesome le metšo ye mebedi ka marathana ao a dinkgwa tšela tša garase, a go šadišwa ke ba ba llego.

₁₄Batho ge ba bona mohlolo woo wa go dirwa ke Jesu ba re: “Ka nnete yo ke yena Moprofeta yo go boletšwego gore o tla tla lefaseng!” ₁₅Jesu ge a bona gore ba tla tla ba mo goga gore ba yo mmea kgoši, a ba ngwegela, a namelela godingwana thabeng a nnoši.

₁₆Mantšiboa barutiwa ba Jesu ba theogela letsheng, ₁₇ba fihla ba namela leselawatle, ba boela ka mošola wa letsha, ba leba Kapernaume. Leswiswi la ba la swara Jesu a sešo a tla go bona. ₁₈Phefo ye kgolo le yona ke ge e foka e tšubotla lewatle. ₁₉E rile ge ba sepetše ka leselawatle sekgala se e ka bago dikilometara tše tlhano go iša go tše di selelago, ba bona Jesu a sepela godimo ga meetse, a batamela leselawatle leo la bona, gomme ba tšhoga. ₂₀Jesu a re go bona: “Le se ke la tšhoga – ke nna!” ₂₁Ba be ba rata go mo nametša leselawatle, gomme ka bjako ke ge leselawatle leo le fihlile lebopong felo mo ba bego ba eya gona.

₂₂Ka tšatši le le latelago lešaba le le bego le šetše ka mošono wa letsha, la lemoga gore ga se gwa ka gwa ba le leselawatle le lengwe moo ntle le lela barutiwa ba Jesu ba le nametšego, gomme ba be ba tseba gore Jesu yena ga se a namela nabo, bona ba tlogile ba nnoši. ₂₃Go ile gwa tla maselawatle a mangwe a go tšwa motseng wa Tiberiase, kgauswi le felo mola lešaba le bego le khorišitšwe dinkgwa gona ge Morena a seno leboga Modimo. ₂₄Lešaba ge le lemoga gore Jesu ga a gona, le bona barutiwa ba gagwe ga ba gona, la namela maselawatle ao la ya Kapernaume le mo nyaka.

₂₅Batho ba rile go hwetša Jesu ka mošola wa letsha, ba mmotšiša ba re: “Moruti, na mo o tlile neng?”

₂₆Jesu a ba fetola ka go re: “Ruri, ruri, ke le botša gore ga le nnyake ka gobane le bone mehlolo, eupša le nnyaka ka gobane le ile la ja dinkgwa la khora. ₂₇Le se ke la gaba dijo tše di felago, le upše le gabe tša go fa motho bophelo bjo ba sa felego. Gape ke tšona tše Morwamotho a tlago le fa tšona, ka gobane Modimo Tate o bontšhitše gore o a mo kgahla.”

₂₈Ke mo ba mmotšišitšego ba re: “Re direng ge re rata go phetha tše Modimo a di nyakago?”

₂₉Jesu a ba fetola ka go re: “Se Modimo a nyakago gore le se dire ke gore le dumele go nna yo a nthomilego.”

₃₀Bona ba re: “O tla dira mohlolo mang wo e tlago re ge re o bone ra go dumela? Ke eng se o tlago se dira? ₃₁Etse borakgolokhukhu ba rena bona ba be ba eja manna kua lešokeng, bjalo ka ge Mangwalo a Makgethwa a bolela a re: ‘O ba file senkgwa se se tšwago legodimong gore ba je.’ ”

₃₂Jesu a re go bona: “Ruri, ruri, ke le botša gore ga se Moshe yo a le filego senkgwa se se tšwago legodimong; senkgwa sa mmannete se se tšwago legodimong le se fiwa ke Tate. ₃₃Gobane senkgwa se le se fiwago ke Modimo ke yena Motheogalegodimong, yo a fago batho ba lefase bophelo bjo bo sa felego.”

₃₄Bona ba mo kgopela ba re: “Morena, re fe senkgwa seo ka mehla.”

₃₅Jesu a re: “Ke nna senkgwa seo sa go fa motho bophelo bjo bo sa felego. Yo a tlago go nna a ka se tsoge a swerwe ke tlala; yo a dumelago go nna a ka se tsoge a nyorilwe. ₃₆Fela ke le boditše ka re le ge le mpone ga le ntumele. ₃₇Mang le mang yo Tate a mphago yena o tla go nna, gomme yo a tlago go nna, nna nka se mo rake, ₃₈ka gobane ga se ka theoga kua legodimong go tlo phetha thato ya ka, ke tletše go phetha ya yo a nthomilego. ₃₉Gomme thato ya yo a nthomilego ke gore ke se lahle le o tee wa bao a mphilego bona, bohle ke ba tsoše bahung ka tšatši la mafelelo. ₄₀Se Tate a se nyakago ke gore mang le mang yo a bonago Morwagwe mme a dumela go yena, a be le bophelo bjo bo sa felego, gomme nna ke tla mo tsoša ka tšatši la mafelelo.”

₄₁Bajuda ba ngongorega ka yena, ka ge a rile: “Ke nna senkgwa se se theogilego legodimong.” ₄₂Ba nama ba re: “Na ga se yena Jesu, morwa wa Josefa, yo re tsebago tatagwe le mmagwe? Bjale o ra go reng ge a re o theogile legodimong?”

₄₃Jesu a re: “Tlogelang go dulela go ngongorega. ₄₄Gape ga go motho yo a ka tlago go nna a sa gogwe ke Tate yo a nthomilego, gomme ke nna ke tlago mo tsoša bahung ka tšatši la mafelelo. ₄₅Yo mongwe wa baprofeta o ngwadile go re: ‘Bohle ba tla be ba rutilwe ke Modimo.’ Ka gona, mang le mang yo a kwago Tate mme a ithuta go yena, o tla go nna. ₄₆Go realo ga se go re go na le yo a kilego a bona Tate; nna ke tšwago go Modimo, ke nna fela yo ke bonego Tate. ₄₇Ruri, ruri, ke le botša gore yo a dumelago o šetše a na le bophelo bjo bo sa felego. ₄₈Ke nna senkgwa sa go fa motho bophelo bjo bo sa felego. ₄₉Borakgolokhukhu ba lena ba be ba eja manna kua lešokeng, le ge go le bjalo ba ile ba hwa. ₅₀Senkgwa se se theogilego legodimong gore ge motho a se ja a se sa hwa sese: ₅₁Ke nna sona senkgwa seo sa go phediša, se se theogilego legodimong. Ge motho a eja senkgwa se o tla phela go ya go ile. Senkgwa se ke tlago mo fa sona ke nama ya ka ye ke e fago batho ba lefase, gore ba phelele sa ruri.”

₅₂Ge a realo Bajuda ba galefa gomme ba thoma go ngangišana ba re: “Na motho yo a ka napa a re fa nama ya gagwe ra e ja?”

₅₃Jesu a re go bona: “Ruri, ruri, ke le botša gore ge le sa je nama ya ka, nna Morwamotho, la nwa le madi a ka, gona le ka se phelele sa ruri. ₅₄Yo a jago nama ya ka le gona a nwago madi a ka, yena o šetše a na le bophelo bjo bo sa felego, gomme ka tšatši la mafelelo ke tla mo tsoša bahung. ₅₅Gape nna nama ya ka ke sejo sa mmannete, le madi a ka ke seno sa mmannete. ₅₆Yo a jago nama ya ka, a nwago le madi a ka, o dula ka go nna, le nna ke dula ka go yena. ₅₇Yo a ntšago o tla phedišwa ke nna, bjalo ka ge le nna ke phedišwa ke Tate, Mophedi yo a nthomilego. ₅₈Ke nna sona senkgwa se se theogilego legodimong. Ga se swane le sela borakgolokhukhu ba lena ba bego ba re le ge ba se ja ba no hwa. Yo a jago senkgwa se yena o tla phelela sa ruri.”

₅₉Ditaba tše Jesu o di boletše mola a ruta batho ka sinagogeng kua Kapernaume.

₆₀Barutiwa ba bantši ba gagwe ge ba ekwa a realo ba re: “Owe! Taba ye a e bolelago ye ke ye thata! Ke mang yo a ka e theeletšago?”

₆₁Jesu a tseba ka boyena gore taba ye e a ba ngongoregiša, gomme a ba botšiša a re: “Na taba ye ke e boletšego ye e a le kgopiša? ₆₂Ge le ka bona Morwamotho a rotogela kua a bego a le gona pele, gona le tla reng? ₆₃Gape Moya wa Modimo ke wona wo o phedišago; motho yena ga a kgone. Mantšu a ke le boditšego ona a a tšwa go yena Moya, gomme a a phediša. ₆₄Eupša ba bangwe ba lena ga ba dumele.” Gape go tloga mathomong Jesu o be a tseba gore ba ba sa tlego go dumela ke bomang, le gore yo a tlago mo eka yena ke mang. ₆₅A iša pele a re: “Ke ka lebaka leo ke le boditšego gore ga go yo a ka kgonago go tla go nna a sa kgontšhwe ke Tate.”

₆₆Ka lebaka la polelo yeo ya gagwe barutiwa ba gagwe ba bantši ba ile ba napa ba boa ka sa morago, ba se sa sepela naye. ₆₇Ke ge a botšiša barutiwa bale ba gagwe ba lesome le ba babedi a re: “Kgane le lena le nyaka go tloga?”

₆₈Gwa fetola Simone Petrose a re: “Ra tloga ra ya go mang, Morena? Gape wena o bolela tša go fa motho bophelo bjo bo sa felego. ₆₉Gomme rena re tloga re dumela ebile re tšea gore ke wena Mokgethwa wa Modimo.”

₇₀Jesu a fetola a re: “Ga ke re ke le kgethile le le ba lesome le ba babedi? Fela yo mongwe wa lena ke diabolose!” ₇₁Etse o be a era Judase, morwa wa Simone Iskariote, gobane ke yena yo a bego a tlilo mo eka, le ge e be e le yo mongwe wa ba lesome le ba babedi.

₁Ka morago ga moo Jesu a fela a šika le naga ya Galilea; o be a sa rate go sepela le naga ya Judea, ka gobane baetapele ba Bajuda ba moo ba be ba nyaka go mmolaya. ₂Ke ge go batametše monyanya wa Bajuda wo ba rego ke wa Mešaša; ₃ka gona bana ba boJesu ba re go yena: “Tloga mo o ye Judea, gore barutiwa ba gago ba ba lego kua le bona ba tle ba bone tše o di dirago. ₄Gobane ge motho a nyaka go tsebega ga a fihle tše a di dirago. Le wena ka gore šemo o dira dilo tše, dira gore bohle mo lefaseng ba go tsebe.” ₅Gape le bona banababo ba be ba sa dumele go yena.

₆Jesu a re go bona: “Mo go nna ga sešo ya ba nako. Gape lena nako ye nngwe le ye nngwe e le loketše. ₇Batho ba mono lefaseng ba ka se le hloye, fela nna ba ntlhoile, ka gobane ke hlwa ke ba botša gore mediro ya bona ke ye mebe. ₈Lena eyang monyanyeng. Nna ga ke ye, ka gobane go nna ga sešo ya ba nako.” ₉A re go realo a šala Galilea.

₁₀E rile ge banababo ba seno ya monyanyeng, le yena a šala a eya, e sego ka go bonwa pepeneneng, eupša ka go iphihla. ₁₁Kua monyanyeng baetapele ba Bajuda ba be ba mo nyaka, ba botšiša ba re: “O kae yena?”

₁₂Go dumaduma ka yena go be go napile go atile mo lešabeng. Ba bangwe ba re: “O lokile,” mola bangwe ba re: “Aowa, o timetša batho.” ₁₃Fela gwa se be le yo a mmolelago phatlalatša, ka gobane ba be ba tšhaba baetapele ba Bajuda.

₁₄E rile mola monyanya o šetše o le gare, Jesu a ya Tempeleng mme a thoma go ruta batho. ₁₅Baetapele ba Bajuda ba tlabega ba re: “Na motho yo tsebo ye kaaka o e tšere kae etšwe a se a rutega?”

₁₆Jesu a ba fetola ka go re: “Tše ke di rutago batho ga se tša ka, ke tša go tšwa go yo a nthomilego. ₁₇Ge motho a rata go phetha tše di nyakwago ke Modimo, o tla lemoga ge eba tše ke di rutago batho ke tša go tšwa go Modimo, goba ke ipolelela tša ka. ₁₈Motho yo a ipolelelago tša gagwe o rata gore go tumišwe yena. Yo a ratago gore go tumišwe yo a mo romilego ke yena wa go rereša, gomme yena ga a na bomenetša. ₁₉Ga ke re Moshe o le file melao ya gagwe? Eupša ga go le o tee wa lena yo a e phethago. Le reng le nyaka go mpolaya?”

₂₀Lešaba la mo fetola la re: “O tsenwe ke modemone, wena! Ke mang yo a nyakago go go bolaya?”

₂₁Jesu a ba fetola a re: “Ke dirile taba e tee fela, gomme ka moka la kgopišega. ₂₂Moshe o le laetše gore le bolotše barwa ba lena, mokagona yeo e se taelo ya Moshe, e le ya borakgolokhukhu ba lena, gomme le bolotša motho le ka tšatši la Sabatha. ₂₃Bjale ge go bolotšwa le ka tšatši la Sabatha gore taelo yeo ya Moshe yona e se tshelwe, nna le reng le nkgalefela ge ke fodišitše motho mmele ka moka ka tšatši la Sabatha? ₂₄Le se ke la ahlola ka tebelelo ya mahlo; ahlolang ka toka.”

₂₅Ba bangwe ba Jerusalema ba re: “Na motho yo ga se yena yo ba nyakago go mmolaya? ₂₆Gape šo o bolela phatlalatša, gomme ga ba mo dire selo! Kgane e ka be e le gore baetapele ba kgolwa ge e le yena Mesia? ₂₇Fela yo re a tseba gore o tšwa kae. Kganthe Mesia yena mohla a etla ga go yo a tlago tseba mo a tšwago gona.”

₂₈Jesu ge a le gare a ruta batho Tempeleng, a bolelela godimo a re: “Go ntseba le a ntseba, le mo ke tšwago gona le a go tseba. Fela ga se ka itliša, ke romilwe ke yo a tshepegago, gomme yena ga le mo tsebe. ₂₉Nna ke a mo tseba, ka gobane ke tšwa go yena ebile ke romilwe ke yena.”

₃₀Ba bangwe ge ba mo kwa ba nama ba nyaka go mo swara, eupša gwa se be le yo a mo kgomago, ka gobane e be e sešo ya ba nako ya gore a swarwe. ₃₁Fela ba bantši mo lešabeng ba be ba dumela go yena ba re: “Na Mesia mohla a etla o tla dira mehlolo ye mentši go feta ye e dirilwego ke yo?”

₃₂Bafarisei ba kwa lešaba le dumaduma ka Jesu, ka fao bona gotee le baprista ba bagolo ba roma bahlanka ba bona gore ba yo mo swara. ₃₃Jesu a re: “Ke sa tlilo ba le lena sebakanyana, ka kgona ke boela go yo a nthomilego. ₃₄Le tla nnyaka, fela la se nkhwetše, ka gobane mo ke tlago be ke le gona lena le ka se kgone go fihla.”

₃₅Baetapele ba Bajuda ba botšišana ba re: “Motho yo o ya kae mo rena re ka se kego ra mo hwetša? Kgane o tla ya kua go ba ba falaletšego Bagerikeng a yo ruta Bagerike? ₃₆O ra go reng ge a re re tla mo nyaka ra se mo hwetše, ka gobane mo a tlago ba a le gona rena re ka se kgone go fihla?”

₃₇Ka tšatši la mafelelo la monyanya, e lego lona le legologolo, Jesu a ema a bolelela godimo a re: “Ge motho a nyorilwe a tle go nna a nwe! ₃₈Mabapi le yo a dumelago go nna Mangwalo a Makgethwa a re: ‘Go yena go tla tšwa meela ya meetse a a phedišago.’ ” ₃₉Gape ge a realo o be a era Moya wo Mokgethwa wo bao ba dumelago go yena ba bego ba tlilo o amogela. Ka nako yeo ke ge bao ba dumelago go yena ba sešo ba fiwa Moya wo Mokgethwa, ka ge Jesu a be a sešo a tsoga bahung le go rotogela legodimong.

₄₀Ba bangwe mo lešabeng ge ba ekwa tše a di bolelago ba re: “Ruri, motho yo ke yena Moprofeta.”

₄₁Ba bangwe ba re: “Ke yena Mesia.”

Bangwe ba re: “Na Mesia a ka napa a tšwa Galilea? ₄₂Ga ke re Mangwalo a Makgethwa a re Mesia o tla tšwa lelokong la Dafida, o tla tswalwa Betlelehema, motseng wo Dafida a bego a dula go wona?” ₄₃Ya nama ya ba gore lešaba ga le molomo o tee ka Jesu. ₄₄Ba bangwe ba nyaka go mo swara, fela gwa se be le yo a mo kgomago.

₄₅Bahlanka bale ba bego ba ile go swara Jesu ge ba boa baprista ba bagolo le Bafarisei ba ba botšiša ba re: “Le reng le se la tla naye?”

₄₆Batho bao ba ba fetola ba re: “Jo, motho wa go bolela ka mokgwa wola ga se a ka a ba gona!”

₄₇Bafarisei ba ba botšiša ba re: “Na le lena o le forile? ₄₈Goba kgane go na le yo mongwenyana wa baetapele goba wa Bafarisei yo a dumetšego go yena? ₄₉Ga a gona, ge e se mogofe wo wa dihlobogwa wa go se tsebe melao ya Moshe!”

₅₀Yo mongwe wa Bafarisei ba ba bego ba le moo e be e le Nikodemose yola a bego a kile a ya go Jesu. Yena a re go bangwekayena: ₅₁“Go ya ka molao wa rena ga se ra swanela go bona motho molato a sešo a sekišwa, go sešo gwa tsebja se a se dirilego.”

₅₂Ba mo fetola ba re: “Kgane le wena o tšwa Galilea? Nke o badišiše Mangwalo a Makgethwa gomme o tla lemoga gore Galilea ga go moprofeta yo a kago tšwa gona.”

[ ₅₃Ke moka bohle ba ya magae,