To The Word – Day 40

₁Fela bjale Bileamo o be a šetše a tseba gore Morena o rata gore a šegofatše setšhaba sa Israele, ka gona a se ke a hlwa a ilo phekolwa bjalo ka pele. O ile a retologela lešokeng ₂gomme a bona setšhaba sa Israele se hlomile mešaša, kgoro ka kgoro. Moya wa Modimo wa mo tsena, ₃gomme a hlaba sereto a re:

₁₀Balaka a huna matswele a befetšwe, a re go Bileamo: “Ke go bileditše gore o rogake manaba a ka, eupša bjale ke gararo o ba šegofatša bakeng sa gore o ba rogake. ₁₁Gona sepela ga geno! Ke go holofeditše gore ke tla go putsa, eupša Morena o go thibetše go hwetša moputso woo.”

₁₂Bileamo a mo fetola a re: “Ke boditše batseta bale o ba romilego go nna gore ₁₃le ge o ka mpha silibera le gauta ka moka ya mošate wa gago, nka se kgone go tshela taelo ya Morena ka go dira se sengwe ka bonna. Ke tla bolela fela se Morena a mpotšago gore ke se bolele.”

₁₄Bileamo a re go Balaka: “Bjale ke boela morago go batho ba gešo, fela pele ga ge ke tloga ke go lemoša se setšhaba sa Israele se tlago se dira setšhaba sa gago ka moso.” ₁₅Ke moka a hlaba sereto a re:

₂₀Bileamo a bona Baamaleke ponong, mme a hlaba sereto a re:

_21-22Ponong a bona Bakene, mme a hlaba sereto a re:

₂₃Bileamo a hlaba sereto a re:

₂₅Ke moka Bileamo a tloga a boela ga gabo; Balaka le yena a swara ya gagwe tsela.

₁E ile ya re ge Baisraele ba hlomile mešaša Moeding wa Megohlo, banna ba thoma go robala le basadi ba Bamoaba. ₂Basadi bao ba ba laletša go tla didimong tše ba bego ba di direla modimo wa Moaba. Baisraele ba ja dijo tša mohuta woo mme ba khunamela modimo wa seswantšho, ₃Baale wa Peore. Ka go itlemaganya le modimo yoo ba ile ba galefiša Morena, ₄gomme yena a re go Moshe: “Tšea baetapele ka moka ba Israele mme o nkgodiše ka go ba bolaya letšatši le hlabile; ke moo ke tlago tlogela go galefela setšhaba se.” ₅Moshe a re go baetapele: “Yo mongwe le yo mongwe wa lena o swanetše go bolaya monna wa kgoro ya gabo yo a itlemagantšego le Baale wa Peore.”

₆Yo mongwe wa Baisraele a tsenya mosadi wa Momidiane mošašeng wa gagwe Moshe le setšhaba ka moka ba lebeletše mola ba sa lla mojakong wa Tente ya bodulo bja Morena. ₇Ge Finease, morwa wa Eleasara, setlogolo sa moprista Arone, a bona seo, a emelela a tloga go setšhaba. A ya a tšea lerumo, ₈a latela monna yoo le mosadi yoo ka moo mošašeng, mme a ba phuleletša ka babedi ga bona ka lona. Ka tsela ye bolwetši bja leuba bjoo bo bego bo fetša Baisraele bja emišwa, ₉fela bo be bo šetše bo bolaile batho ba dikete tše masome a mabedi le tše nne.

₁₀Morena a re go Moshe: ₁₁“Ka lebaka la seo Finease a se dirilego ga ke sa galefetše setšhaba sa Israele. Ga se a kgotlelela gore modimo wo mongwe ka ntle ga ka a khunamelwe, mme lebaka ke lona leo ge ke se ka ba fediša mola ke sa befetšwe. ₁₂Ka gona, mmotše gore ke dira kgwerano le yena. ₁₃Yena le ditlogolo tša gagwe ba beetšwe sa ruri go ba baprista, ka gobane ga se a kgotlelela gore modimo wo mongwe ka ntle ga ka o khunamelwe, mme ka go realo o boelantše setšhaba le nna.”

₁₄Leina la Moisraele yo a bolailwego le mosadi wa Momidiane e be e le Simri, morwa wa Salu, hlogo ya lapa le lengwe kgorong ya Simeone. ₁₅Leina la mosadi yoo e be e le Kosbi. Tsure, tatagwe, e be e le kgoši ya sehlopha se sengwe sa dikgorwana tša Bamidiane.

₁₆Morena a laela Moshe a re: ₁₇“Hlasela Bamidiane, o ba fediše ₁₈ka lebaka la bobe bjo ba le dirilego bjona ge ba le hlalefetša kua Peore, le ka lebaka la Kosbi yo a bolailwego nako yela ya bolwetši bja leuba gona moo.”

₁Ka morago ga bolwetši bjoo bja leuba Morena a re go Moshe le Eleasara, morwa wa Arone: ₂“Balang setšhaba ka moka sa Israele ka malapa a sona, banna bohle ba ba nago le mengwaga ye masome a mabedi goba go feta fao ba e kago ba bahlabani.” _3-4Moshe le Eleasara ba phetha taelo yeo, mme ba kgobokanya banna ka moka ba mengwaga yeo. Ba kgobokana melaleng ya Moaba, mošola wa noka ya Jordane go lebana le Jeriko.

Baisraele ba ba tšwilego Egepeta šeba:

₅Kgoro ya Rubene, leitšibolo la Jakobo: dikgorwana tša Enoko, Palu, ₆Hetserone le Karmi. ₇Dikgorwana tše di be di na le banna ba 43 730. ₈Ditlogolo tša Palu e bile Eliaba ₉le barwa ba gagwe, Nemuele, Datane le Abiramo. Ba ke Datane le Abiramo bale ba go kgethwa ke setšhaba. Ba ile ba tšea kgang le Moshe le Arone, gomme ba ikopanya le lekoko la Korage ge le tsogela Morena maatla. ₁₀Lefase le ile la palega gomme la ba metša, mme ba hwa le Korage le lekoko la gagwe mola mollo o fediša banna ba 250; e ile ya ba seeletši go setšhaba. ₁₁Eupša barwa ba Korage ga se ba ka ba bolawa.

₁₂Kgoro ya Simeone: dikgorwana tša Nemuele, Jamine, Jakine, ₁₃Serage le Shaulo. ₁₄Dikgorwana tše di be di na le banna ba 22 200.

₁₅Kgoro ya Gade: dikgorwana tša Tsifione, Hagi, Shuni, ₁₆Osni, Eri, ₁₇Arode le Areli. ₁₈Dikgorwana tše di be di na le banna ba 40 500.

_19-21Kgoro ya Juda: dikgorwana tša Shela, Peretse, Serage, Hetserone le Hamule. Barwa ba Juda ba babedi, Ere le Onane, ba hwetše nageng ya Kanana. ₂₂Dikgorwana tše di be di na le banna ba 76 500.

₂₃Kgoro ya Isakara: dikgorwana tša Tola, Puba, ₂₄Jashube le Shimrone. ₂₅Dikgorwana tše di be di na le banna ba 64 300.

₂₆Kgoro ya Sebulone: dikgorwana tša Serede, Elone le Jagliele. ₂₇Dikgorwana tše di be di na le banna ba 60 500.

₂₈Dikgoro tša Josefa, yo e bilego tatagobarwa ba babedi, Manase le Efraime.

₂₉Kgoro ya Manase: Makire, morwa wa Manase, e bile tatagoGileade, gomme dikgorwana tše di latelago di tšwile go Gileade: ₃₀dikgorwana tša Jesere, Heleke, ₃₁Asriele, Shekeme, ₃₂Shemida le Hefere. ₃₃Tselofohade, morwa wa Hefere, o ile a se ke a ba le barwa, a ba le barwedi fela; maina a bona e be e le Magla, Noa, Hogla, Milka le Tirtsa. ₃₄Dikgorwana tše di be di na le banna ba 52 700.

₃₅Kgoro ya Efraime: dikgorwana tša Shutelage, Bekere le Tahane. ₃₆Kgorwana ya Erane e be e tšwile go Shutelage. ₃₇Dikgorwana tše di be di na le banna ba 32 500.

Tšeo ke dikgorwana tše di tšwilego go Josefa.

₃₈Kgoro ya Benjamene: dikgorwana tša Bela, Ashbele, Ahiramo, ₃₉Shefufane le Hufamo. ₄₀Dikgorwana tša Arde le Naamane di be di tšwile go Bela. ₄₁Dikgorwana tše di be di na le banna ba 45 600.

₄₂Kgoro ya Dane: kgorwana ya Shuhamo ₄₃ye e bego e na le banna ba 64 400.

₄₄Kgoro ya Asere: dikgorwana tša Jimna, Jishbi le Beria. ₄₅Dikgorwana tša Hebere le Malkiele di be di tšwile go Beria. ₄₆Asere o bile le morwedi yo leina la gagwe e bego e le Serage. ₄₇Dikgorwana tše di be di na le banna ba 53 400.

₄₈Kgoro ya Naftali: dikgorwana tša Jagtsiele, Guni, ₄₉Jetsere le Shileme. ₅₀Dikgorwana tše di be di na le banna ba 45 400.

₅₁Banna ka moka ba Israele e be e le ba 601 730.

₅₂Morena a re go Moshe: ₅₃“Arola naga ka dikgoro, go ya ka bontši bja batho ba tšona. _54-56O arole naga ka go dira matengwa, gomme kgoro ye e nago le batho ba bantši o e fe karolo ye kgolo, mme kgoro ya batho ba bannyane o e fe karolo ye nnyane.”

₅₇Kgoro ya Lefi e be e bopilwe ke dikgorwana tša Gershone, Kehate le Merari. ₅₈Ditlogolo tša bona di be di akaretša dihlophana tša Libni, Hebrone, Magli, Mushi le Korage. Kehate e bile tatagoAmramo, ₅₉yo a bego a nyetše morwedi wa Lefi, Jogobede, yo a tswetšwego Egepeta. O belegetše Amramo barwa ba babedi, Arone le Moshe, le morwedi, Miriamo. ₆₀Arone o bile le barwa ba bane, Nadaba, Abihu, Eleasara le Ithamara. ₆₁Nadaba le Abihu ba ile ba hwa mola ba tlišetša Morena mollo wo o sego wa dumelelwa. ₆₂Balefi ba be ba na le banna le bašemane ba 23 000 ba ba nago le kgwedi e tee goba go feta fao. Ba ile ba se ngwalwe le Baisraele ba bangwe ka gore ba ile ba se ke ba fiwa karolo ya naga mo go Baisraele.

₆₃Dikgorwana tše ka moka di ile tša ngwalwa ke Moshe le Eleasara ge ba bala Baisraele melaleng ya Moaba mošola wa noka ya Jordane go lebana le Jeriko. ₆₄Gare ga bona go be go se gwa šala le monna o tee wa bale ba go balwa ge Moshe le Arone ba ngwala setšhaba la mathomo lešokeng la Sinai. ₆₅Morena o be a boletše gore ka kgonthe bohle ba tla hwela lešokeng, gomme ka moka ba ile ba hwela moo ntle le Kalebe, morwa wa Jefune, le Joshua, morwa wa Nunu.

₁Magla, Noa, Hogla, Milka le Tirtsa e be e le barwedi ba Tselofohade, morwa wa Hefere, Hefere morwa wa Gileade, Gileade morwa wa Makire, Makire wa kgoro ya Manase, Manase morwa wa Josefa. ₂Ba ile ba ya ba ema pele ga Moshe le moprista Eleasara le baetapele le setšhaba ka moka mojakong wa Tente ya bodulo bja Morena, gomme ba re: ₃“Tatagorena o hlokafaletše lešokeng a se ne morwa. O be a se lekokong la Korage lela la go tsogela Morena maatla; o hwile ka lebaka la sa gagwe sebe. ₄Ke go reng ge leina la tatagorena le timelela kgorwaneng ya gabo e le fela ka gore a se a ka a ba le barwa? Re feng naga gare ga meloko ya botatagorena.”

₅Moshe a ala taba ya bona pele ga Morena, ₆gomme Morena a re go yena: ₇“Se barwedi ba Tselofohade ba se kgopelago se lokile; ba fe naga gare ga meloko ya botatagobona. Bohwa bja gagwe a bo fetele go bona. ₈Botša setšhaba sa Israele gore ge monna a ka hwa a se ne morwa, morwedi wa gagwe a tšee bohwa bja gagwe. ₉Ge a se ne morwedi, bomorwarragwe ba swanetše go tšea bohwa bjoo. ₁₀Ge a se na le bomorwarragwe, boramogolwagwe goba borangwanagwe ba swanetše go tšea bohwa bjoo. ₁₁Ge a se ne boramogolwagwe goba borangwanagwe, gona moloko wabo wa kgauswikgauswi ka madi a tšee bohwa bjoo e be bja gagwe. Setšhaba sa Israele se phethe taelo ye e le molao, bjalo ka ge nna, Morena, ke go laetše.”

₁₂Morena a re go Moshe: “Namela thaba ya Abarime, o lebeledišiše naga ye ke e fago Baisraele. ₁₃Ka morago ga ge o e bone, o tla hwa bjalo ka ge Arone, morwarrago, a hwile, ₁₄ka gobane bobedi bja lena le tshetše taelo ya ka lešokeng la Tsine. Ge setšhaba ka moka se nngongoregela kua Meriba, le ganne go ntumelela go laetša maatla a ka a makgethwa pele ga bona.”

Meriba ke felo mola ga meetse kua Kadeshe, lešokeng la Tsine.

₁₅Moshe a rapela a re: ₁₆“Morena Modimo, wena Mothopo wa bophelo ka moka, ke a go rapela, beela setšhaba se monna ₁₇yo a tlago kgona go se eta pele mme a se laola ntweng, gore setšhaba se sa gago se se ke sa tla sa swana le dinku tše di se nago modiši.”

₁₈Morena a re go Moshe: “Tšea Joshua, morwa wa Nunu, monna wa bokgoni, mme o mmee diatla hlogong. ₁₉O mo emiše pele ga moprista Eleasara le setšhaba ka moka, gomme moo pele ga bona o bege gore ke yo a tlago tšea legato la gago. ₂₀O mo arolele bogolo bja gago, gore setšhaba ka moka sa Israele se tle se mo theeletše. ₂₁A bote moprista Eleasara, yo a tlago tseba thato ya ka ka go šomiša Urime le Tumime. Ka tsela ye Eleasara o tla hlahla Joshua le setšhaba ka moka sa Israele ditabeng tša bona ka moka.” ₂₂Moshe a dira ka moo Morena a mo laetšego ka gona. A emiša Joshua pele ga moprista Eleasara le setšhaba ka moka. ₂₃Gomme bjalo ka ge Morena a be a laetše, a bea Joshua diatla hlogong, mme a bega gore ke yo a tlago tšea legato la gagwe.

₁Bjale mabapi le taba tšela le nngwaletšego tšona ke re: Monna o dira gabotse ge a sa nyale. ₂Eupša ka ge bofebe bo iphile maatla ka mokgwa wo, monna yo mongwe le yo mongwe a a be le mosadi yo e lego wa gagwe, le mosadi yo mongwe le yo mongwe a be le monna yo e lego wa gagwe. ₃Monna a fe mosadi wa gagwe ditshwanelo tša go sepetša madi a mmele, le mosadi a fe monna wa gagwe ditshwanelo tša go sepetša madi a mmele. ₄Mosadi ga a laole mmele wa gagwe, o laolwa ke monna; le monna ga a laole mmele wa gagwe, o laolwa ke mosadi. ₅Le se ke la timana thobalo, ka ntle le ge le kwane ga sebakanyana gore le iphe nako ya go rapela, eupša ka morago le boelane, gore Sathane a se tlo le diriša sebe ka ge le sa kgone go itshwara.

₆Ge ke realo ga ke le beele molao, ke dio le eletša. ₇Gabotse ke duma ge bohle le ka be le etša nna; fela yo mongwe le yo mongwe o na le mpho ye a e filwego ke Modimo ka kgaugelo ya gagwe – mongwe o na le ye, mongwe o na le yela.

₈Ge e le bao ba sego ba nyala le bahlologadi, go bona ke re go ka ba kaone ge ba ka dula ba se ba nyala ba etša nna. ₉Eupša ge ba sa kgone go itshwara, a ba nyale; gobane go kaone go nyala go na le go fišwa ke tumo.

₁₀Ge e le ba ba nyetšego bona ke ba swaretše molao wa go tšwa go Morena, e sego go nna: Mosadi a se ke a hlala monna wa gagwe; ₁₁eupša ge a ka hlala, a dule a se a nyalwa, goba a boelane le monna wa gagwe; le monna a se ke a hlala mosadi wa gagwe.

₁₂Ba bangwe ba botšwa ke nna, e sego Morena, ke re: Ge monna wa modumedi a nyetše mosadi yo e sego modumedi mme mosadi yoo a dumela go no dula naye, monna yoo a se ke a mo hlala. ₁₃Le mosadi ge a nyetšwe ke monna yo e sego modumedi mme monna yoo a dumela go no dula naye, mosadi yoo a se ke a mo hlala. ₁₄Gobane monna yo e sego modumedi o kgethwafatšwa ke go nyala mosadi yoo wa gagwe wa modumedi; le mosadi yo e sego modumedi o kgethwafatšwa ke go nyalwa ke monna yoo wa gagwe wa modumedi. Gape ge go ka be go se bjalo bana ba bona ba ka be ba swana le bana ba baditšhaba; eupša bjale ba kgethwafetše. ₁₅Fela ge yo e sego modumedi a nyaka go hlala, a a hlale. Ge go bile bjalo, monna goba mosadi wa modumedi ga a sa tlemilwe ke lenyalo leo. Modimo o le biditše gore le phele le sa lwe. ₁₆Wena mosadi wa modumedi, o tseba bjang gore o ka phološa monna wa gago? Le wena monna wa modumedi, o tseba bjang gore o ka phološa mosadi wa gago?

₁₇Motho o swanetše go phela bophelo bjo a bo abetšwego ke Morena, a dule a le seo a bego a le sona mola Modimo a mmitša. Ke sona se ke se rutago diphuthego ka moka. ₁₈Ge motho a biditšwe ke Modimo a bolotše, a se ke a leka go fihla leswao la lebollo. Ge a biditšwe e le lešoboro, a se ke a nyaka go bolla. ₁₉Gobane go bolla le go se bolle ga se selo; tabakgolo ke go phetha melao ya Modimo. ₂₀Motho a a dule a le maemong ao a bego a le mo go ona mola a bitšwa ke Modimo. ₂₁Ge o biditšwe o le lekgoba, o se tshwenyege; eupša ge o ka kgona go lokologa bokgobeng, o se ganelele. ₂₂Gobane lekgoba le le biditšwego ke Morena, ke molokologi wa Morena; le molokologi yo a biditšwego ke Morena, ke lekgoba la Kriste. ₂₃Modimo o le rekile, gomme bjale le ba gagwe, ka gona le se ke la ba makgoba a batho. ₂₄Banabešo, yo mongwe le yo mongwe a a dule a direla Modimo maemong ao a bego a le mo go ona mola Modimo a mmitša.

₂₅Bjale, mabapi le taba ye ya ba ba sego ba nyala, ga ke na molao wa go tšwa go Morena, ke dio le eletša ka ge ka kgaugelo ya Morena ke le motho yo a tshepegago.

₂₆Ge ke lemoga mathata a mehleng yeno ke bona go le kaone gore motho a itulele seemong se a lego mo go sona. ₂₇Ge o na le mosadi, o se leke go mo hlala; ge o se naye, o se nyake go nyala. ₂₈Fela le ge o ka nyala ga se gore o tla be o dira sebe; le mosadi yo a se nago monna, ge a ka nyalwa o tla be a sa dire sebe. E no ba gore ke rata go le phephiša mathata a le tlago ba le ona ge le nyetše.

₂₉Se ke le botšago sona, banabešo, ke gore ga re sa na nako ye ntši, gomme go tloga bjale ba ba nago le basadi ba itshware bjalo ka ge nke ga ba nabo; ₃₀ba ba llago ba be bjalo ka ge nke ga ba lle; ba ba thabilego ba itshware bjalo ka ge nke ga se ba thaba; ba ba rekilego selo ba be bjalo ka ge nke ga ba na le sona; ₃₁ge le šoma ka dilo tša lefase le bonale le se ba di le swareletšego. Gobane lefase le, ka mo le bonalago ka gona, le a fela.

₃₂Ke rata ge le sa dule le balabala. Monna yo a sego a nyala o kgothalela tša Morena, ka mo a ka mo kgahlago ka gona. ₃₃Yo a nyetšego yena o kgothalela tša lefase, ka mo a ka kgahlago mosadi wa gagwe ka gona, ₃₄gomme o pelopedi. Mosadi yo a sego a nyalwa le kgarebe ba kgothalela tša Morena, gore ba tle ba kgethwafale mmeleng le moyeng. Yo a nyetšwego yena o kgothalela tša lefase, ka mo a ka kgahlago monna wa gagwe.

₃₅Ke realo e le ge ke rata go le hola, e sego go le beela mellwane. Ke rata ge le phela ka mo go lebanego, le ikgafela go hlankela Morena ka dipelo tša lena ka moka.

₃₆Ge motho a bona gore ga a dire gabotse ge a lesa morwedi wa gagwe a fetwa ke lebaka la bokgarebe a se a nyalwa, a a phethe thato ya gagwe. Ga a dire sebe ge a mo nyadiša. ₃₇Eupša ge motho a feditše le pelo ka boyena a se na se se mo gapeletšago go se nyadiše morwedi wa gagwe, a kgona go itshwara mme a ikemišeditše go se mo nyadiše, o tla be a dira gabotse go se mo nyadiše. ₃₈Ka gona, yo a nyadišago lekgarebe la gagwe o dira gabotse, fela yo a sa le nyadišego o sa mo phala.

₃₉Mosadi yo a nyetšwego o tlemagane le monna wa gagwe ge monna yoo a sa phela, eupša ge a ka hwa, gona mosadi o lokologile go ka nyalwa ke monna yo mongwe yo a mo ratago, segolo e be modumedi. ₄₀Eupša ge a ka itulela a le bjalo, a ka iketla le go feta. Ke ka mo nna ke bonago ka gona, gomme ke a kgolwa le nna ke na le Moya wa Modimo.

₁Bjale ke tla tabeng tšela le nngwaletšego tšona mabapi le nama ya sedimo. Re a tseba gore bohle re na le tsebo ya taba ye, fela tsebonyana ya mohuta woo e fa motho makoko, kganthe lerato lona le a mo aga. ₂Ge motho a gopola gore o tseba selo, nnete ke gore ga a se tsebe ka mo go mo swanetšego. ₃Eupša ge motho a rata Modimo o tsebja ke yena.

₄Ka fao mabapi le go ja nama ya sedimo ke re: Re a tseba gore mo gohle lefaseng modimo wa seswantšho ga se selo; re tseba le ge go se na Modimo wo mongwe ntle le yena Modimo fela. ₅Le ge eba go na le dilo tše di bitšwago “medimo”, e ka ba legodimong goba lefaseng, bjalo ka ge ka nnete “medimo” ya mohuta woo e le ye mentši le “barena” ba gona ba se kaaka, ₆rena Modimo wa rena ke o tee, yena Tate, Mohlodi wa dilo ka moka, yo re mo phelelago; le Morena ke o tee, yena Jesu Kriste, yo Modimo a hlodilego tšohle ka yena, yo re phelago ka yena.

₇Fela ga se mang le mang yo a tsebago taba ye. Ba bangwe, ka ge ba tlwaetše medimo ya diswantšho, le gonabjale ba sa bona dinama tšeo e le sedimo; tumelo ya bona ga sešo ya tia gabotse, gomme ge ba eja nama ya sedimo ba bona nke ba itšhilafatša moyeng. ₈Fela go Modimo ga re batametšwe ke dijo, gobane ge re sa je ga re lobe selo, le ge re eja ga re holege ka selo. ₉Le ge go le bjalo, le hlokomele gore bolokologi bja lena bja go ja nama ya sedimo bo se wetše sebeng bao ba fokolago tumelong. ₁₀Gobane ge yo a fokolago tumelong a ka bona wena o nago le tsebo ya taba ye o eja ka tempeleng ya modimo wa seswantšho, na a ka se hlohleletšwe ke seo go ja nama ya sedimo? ₁₁Ka gona, modumedi yoo wa go fokola tumelong, yo Kriste a mo hwetšego, o tla lahlega ka lebaka la tsebo yeo ya gago. ₁₂Ka tsela yeo, ka go fošetša modumedikawena le go fokotša tumelo ya gagwe ye e sešogo ya tia gabotse, o tla be o fošetša Kriste. ₁₃Ka gona, ge eba ka se ke se jago ke diriša modumedikanna sebe, gona nka se sa tsoga ke jele nama, gore ke se ke ka diriša modumedikanna sebe.