To The Word – Day 47

₁“Še melao le melawana ye Morena Modimo wa lena a ntaetšego gore ke le fe yona. Le e phetheng nageng ye le batametšego go tsena go yona le go e thopa. ₂Ge le sa phela, lena le ditlogolo tša lena le hlompheng Morena Modimo wa lena mme le phethe melao ya gagwe ye ke le fago yona, gore le tle le dule moo nako ye telele. ₃Theetšang, lena Baisraele! Le phethe melao ye! Ke moo le tlago atlega, la ba setšhaba se segolo mme la dula nageng ya mokhora le monono, ka mo Morena, Modimo wa borakgolokhukhu ba rena, a le tshephišitšego.

₄“Lena Baisraele, gopolang gore Morena Modimo wa rena ke yena Morena a nnoši. ₅Rata Morena Modimo wa gago ka pelo ya gago ka moka, le ka moya wa gago ka moka, le ka maatla a gago ka moka. ₆O se ke wa lebala ditaelo tše ke go fago tšona lehono. ₇O di toutele bana ba gago. O bolele ka tšona ge le le gae le ge le le leetong, ge le khutša le ge le šoma. ₈O di tlemelele matsogong, o di rwale le phatleng e le segopotšo. ₉O di ngwale direpoding tša mejako ya ngwako wa gago, le dikgorong tša gago.

_10-11“Morena Modimo wa lena o enetše borakgolokhukhu ba lena, Abrahama le Isaka le Jakobo, gore o tla le fa naga ya metse ye megolo ye mebotse ye e sego ya agwa ke lena. Mengwako ya gona e tla be e tletše dilo tše botsebotse tše di sego tša bewa ke lena ka go yona, la hwetša le didiba tše di sego tša epša ke lena, le dirapa tša merara le tša mehlware ye e sego ya bjalwa ke lena. Ge Morena a le goroša nageng yeo mme le eba le tšohle tše le di nyakago tša go ja, ₁₂le hlokomeleng gore le se lebale Morena yo a le ntšhitšego Egepeta moo le bego le le makgoba. ₁₃Le boifeng Morena Modimo wa lena, le direleng yena fela, mme le eneng ka leina la gagwe a nnoši. ₁₄Le se ke la khunamela medimo ye mengwe, ke go re medimo ya ditšhaba tše di bapilego le lena. ₁₅Ge le ka khunamela medimo ye mengwe, pefelo ya Morena e tla le tšhuma bjalo ka mollo mme ya le feleletša sa ruri, ka gobane Morena Modimo wa lena yo a nago le lena ga a kgotlelele tirelo ya medimo ye mengwe.

₁₆“Le se ke la leka Morena Modimo wa lena bjalo ka ge le kile la mo leka kua Masa. ₁₇Le hlokomeleng gore le phethe melao le melawana ka moka ye a le filego yona. ₁₈Le direng se Morena a rego se lokile mme ke se sebotse, gomme le tla atlega. Le tla kgona go thopa naga yela e nonnego ye Morena a enetšego borakgolokhukhu ba lena gore o tla le fa yona, ₁₉gomme le tla leleka manaba a lena, bjalo ka ge Morena a boletše.

₂₀“Mabakeng a a tlago ge bana ba lena ba le botšiša ba re: ‘Ke ka lebaka lang Morena Modimo wa rena a le laetše go phetha melao ye ka moka?’ ₂₁le ba fetole le re: ‘Re be re le makgoba a kgoši ya Egepeta, mme Morena a re ntšha moo ka maatla a gagwe a magolo. ₂₂Ka mahlo a rena re bone ge a dira mehlolo mme a dira Baegepeta le kgoši ya bona le bakgomana ba yona ka moka dilo tše di tšhošago. ₂₃O re ntšhitše Egepeta go re tliša mo go tlo re fa naga ye, ka moo a bego a enetše borakgolokhukhu ba rena ka gona. ₂₄Ke moo Morena Modimo wa rena a re laetšego go phetha melao le melawana ye, le go mmoifa. Ge re ka dira bjalo, ka mehla o tla fela a dišitše setšhaba sa rena mme a se dira gore se atlege. ₂₅Ge re ka phetha se sengwe le se sengwe ka potego se Modimo a re laetšego sona, re tla mo kgahla.’ ”

₁“Morena Modimo wa lena o tla le goroša nageng ye le yago go dula go yona, gomme a leleka ditšhaba tše ntši ge le tsena go yona. Ge le fihla gona o tla raka ditšhaba tše di šupago tše kgolo tše maatla go le feta: Bahete, Bagirgashe, Baamore, Bakanana, Baperise, Bahibe le Bajebuse. ₂Ge Morena Modimo wa lena a gafela ditšhaba tše diatleng tša lena mme le ba fenya, le ba bolaye ka moka. Le se ke la dira kwano le bona goba la ba kwela bohloko. ₃Le se ke la nyalana le bona, le bana ba lena le ba thibele go nyalana le bana ba bona, ₄ka gobane ba tla aroša bana ba lena go Morena ba direla medimo ye mengwe, mme Morena a le galefela gomme a le feleletša gateetee. ₅Ka gona, le phušoleng dialetare tša bona, le pšhatlaganyeng dikokwane tša bona tša borapedi tša maswika, le remeng dikota tša bona tša borapedi, le tšhumeng le medimo ya bona ya diswantšho. ₆Le direng seo ka gobane le setšhaba se sekgethwa sa Morena Modimo wa lena. O le kgethile gare ga ditšhaba ka moka lefaseng gore le be setšhaba sa gagwe se a se ratago.

₇“Morena ga se a le rata mme a le kgetha ka gobane le be le feta ditšhaba tše dingwe ka bontši; le be le le setšhabana se sennyane lefaseng. ₈Eupša Morena o le ratile mme a nyaka go phetha keno ye a e enetšego borakgolokhukhu ba lena. Ke ka lebaka leo a le ntšhitšego Egepeta ka maatla a gagwe a magolo a le lokolla bokgobeng bja kgoši ya gona. ₉Gopolang gore Morena Modimo wa lena ke yena Modimo a nnoši, le gore o a botega. O tla botegela kgwerano ya gagwe, mme meloko ye sekete ya bao ba mo ratago mme ba phethago ditaelo tša gagwe a e direla ka leratorato la gagwe, ₁₀eupša bao ba mo hloilego a ka se dikadike go ba otla ka go ba bolaya. ₁₁Bjale ge, hlokomelang gore le phethe melao le melawana ye ke le filego yona lehono.”

₁₂“Ge le ka ela ditaelo tše hloko mme la di phetha ka potego, gona Morena Modimo wa lena o tla botegela kgwerano ya gagwe le lena mme a le direla ka leratorato la gagwe, ka moo a enetšego borakgolokhukhu ba lena. ₁₃O tla le rata mme a le šegofatša, gore le tle le ate le be le bana ba bantši; o tla šegofatša mašemo a lena, gore le tle le be le mabele le beine le makhura a mohlware, le gona o tla le šegofatša ka go le fa dikgomo tše ntši le dihuswane. O tla le fa ditšhegofatšo tše ka moka kua nageng ye a enetšego borakgolokhukhu ba lena gore o tla le fa yona. ₁₄Ga go setšhaba se sengwe lefaseng se a tlago se šegofatša ka kudu go swana le lena. Ga go monna goba mosadi mo go lena yo a ka se bego le ngwana, goba seruiwa se se sa tswalego. ₁₅Morena o tla thibela malwetši ka moka go lena. A ka se le wišetše malwetši ale a mašoro le a bonego Egepeta, eupša o tla a wišetša manaba ka moka a lena. ₁₆Setšhaba se sengwe le se sengwe seo Morena Modimo wa lena a se gafelago diatleng tša lena le se feleletše, le se ke la ba kwela bohloko le gatee. Le se ke la khunamela medimo ya bona, ka gobane seo e ka ba go itirela molaba.

₁₇“Le se ke la ipotša la re setšhaba seo se le feta ka bontši, le gore le ka se kgone go se leleka. ₁₈Le se ke la ba boifa; gopolang seo Morena Modimo wa lena a se dirilego kgoši ya Egepeta le setšhaba sa gagwe ka moka. ₁₉Gopolang dikotlo tšela tše šoro tše le di bonego ka mahlo a lena, le mehlolo le dimakatšo, le maatla a magolo le bonatla bjoo ka bjona Morena Modimo wa lena a le ntšhitšego Egepeta. Ditšhaba tše ka moka tše bjale le di boifago o tla di fediša bjalo ka ge a fedišitše Baegepeta. ₂₀O tla ba a ba tlaletša mme a fediša bao ba tšhabilego mme ba utamilego. ₂₁Le se ke la boifa ditšhaba tše. Morena Modimo wa lena o na le lena; ke Modimo yo mogolo yo a tšhabegago. ₂₂O tla leleka ditšhaba tše bosele ge le tsena. Le se ba fediše ka nako e tee, gore diphoofolo tša naga di se ate mme ya ba kotsi go lena. ₂₃Morena o tla gafela manaba a lena diatleng tša lena, mme a ba tlaletša kudu go fihlela ba fedišwa. ₂₄O tla gafela magoši a bona diatleng tša lena. Le tla a bolaya, gomme a lebalwa. Ga go yo a tlago kgona go le thibela; le tla bolaya yo mongwe le yo mongwe. ₂₅Le tšhumeng medimo ya bona ya diswantšho. Le se ke la duma silibera goba gauta ye medimo yeo e manegilwego ka yona mme la e tšea. Ge le ka dira bjalo, di tla le tlišetša kotlo, ka gobane Morena o hloile dilo tša medimo ya diswantšho. ₂₆Le se ke la tliša modimo wo mongwenyana wa seswantšho mengwakong ya lena; ge le ka o tliša gona le tla ikapeša thogako ye e lego godimo ga yona. Le swanetše go hlaswa medimo yeo ya diswantšho le e šišingwe, ka gobane e rogakilwe ke Morena.”

₁“Le hlokomeleng gore le phethe melao yohle ye ke le laetšego yona lehono gore le tle le phele, le ate, mme le thope naga yeo Morena a e enetšego borakgolokhukhu ba lena. ₂Gopolang ka moo Morena Modimo wa lena a le hlahlilego leetong lela le letelele go putla lešoka mo mengwageng ye ye masome a mane, a le romela mathata go le kokobetša le go le leka, gore a tle a tsebe se se lego ka dipelong tša lena, ge eba le tla phetha ditaelo tša gagwe. ₃O le kokobeditše ka go le bolaiša tlala, mme ka morago a le fa manna gore le je, dijo tše lena le borakgolokhukhu ba lena le bego le sa di tsebe. Seo o se diretše go le ruta gore motho ga a phele ka bogobe fela, eupša o phela ka se sengwe le se sengwe se Modimo a se bolelago. ₄Mengwageng yeo ye masome a mane diaparo tša lena ga se tša ka tša hlagala, goba la ruruga maoto. ₅Lemogang gore Morena Modimo wa lena o a le phošolla mme a le otla ka mokgwa wo tatagobana a godišago bana ba gagwe ka wona. ₆Ka gona, dirang ka mo Morena a le laetšego: Le phetheng melao ya gagwe, gomme le mmoifeng. ₇Morena Modimo wa lena o le goroša nageng ye e nonnego – naga ye e nago le dinoka le methopo le meela ya ka fase ga mobu ye e phulegago meeding le dithabeng; ₈naga ya mabele le garase, diterebe, mago, digarenate, dienywa tše botsebotse tša mohlware, le todi ya dinose. ₉Moo le ka se tsoge le bolailwe ke tlala goba la hloka selo. Matlapa a gona a na le tshipi, le dithabeng tša gona le ka epa mphiri. ₁₀Ge le eja le khora le leboge Morena Modimo wa lena ka lebaka la naga yeo e nonnego ye a le filego yona.”

₁₁“Le hlokomeleng gore le se ke la lebala Morena Modimo wa lena; le se ke la lesa go phetha melao ya gagwe ka moka ye ke le filego yona lehono. ₁₂Ge le eja le khora mme le agile mengwako ye mebotse le dula ka go yona, ₁₃ge dikgomo tša lena le dihuswane, le silibera le gauta, le tšohle tše e lego tša lena di atile, ₁₄le bone gore le se ikgodiše mme la lebala Morena Modimo wa lena yo a le ntšhitšego Egepeta moo le bego le le makgoba. ₁₅O le hlahlile go putla lešoka lela le legologolo la go tšhoša moo go bego go le dinoga tša go bolaya le diphepheng. Moo nageng ya go omelela ya go hloka meetse o le phuletše meetse leswikeng le lethatathata. ₁₆Lešokeng a le fa manna gore le je, dijo tše borakgolokhukhu ba lena ba bego ba sa di tsebe. A le romela mathata go le kokobetša le go le leka, gore mafelelong a tle a le direle tše botse. ₁₇Ka gona, le se ke la tsoga le gopotše gore le ikhumišitše ka maatla a lena le go tia ga lena. ₁₈Le gopoleng gore ke Morena Modimo wa lena yo a le fago maatla a go itirela lehumo. O dira seo ka gobane o botegetše kgwerano ye a e dirilego le borakgolokhukhu ba lena ka keno, mme o sa botegetše kgwerano yeo le lehono. ₁₉Le se ke la tsoga le lebetše Morena Modimo wa lena, goba la retologela go medimo ye mengwe go e obamela le go e direla. Ge le ka dira seo, gona ke a le sebotša lehono gore ka kgonthe le tla fedišwa. ₂₀Ge le sa theetše Morena, gona le tla fedišwa go no swana le ditšhaba tšela a tlago di fediša ge le tsena.”

₁“Theetšang, lena Baisraele! Lehono le tla tshela noka ya Jordane la thopa naga ya ditšhaba tše kgolo gape tše maatla go le feta. Metse ya tšona ke ye megolo, ya merako ye e fihlago legodimong. ₂Batho ba gona ke Baanake, ke ba batelele, ba ditšitširipa, gomme le a tseba ebile le kwele gore ga go yo a ka lwago le bona. ₃Eupša lehono le tla bona gore Morena Modimo wa lena ke yena a tlago sepela pele ga lena a le bjalo ka mollo wo o laumago. O tla ba fenya ge le le gare le tsena, gore le tle le ba leleke mme le ba fediše ka bjako, ka moo a le holofeditšego ka gona.

₄“Ka morago ga ge Morena Modimo wa lena a le leleketše bona, le se ke la ipotša la re o le gorošitše mo go tlo thopa naga ye ka gobane e be e le swanetše. Aowa, Morena o tla le lelekela batho ba ka gobane ke ba babe. ₅Ga se ka lebaka la gore le lokile mme le dira se se lokilego ge Morena a le lesa le thopa naga ya bona. O tla ba leleka ka gobane ke ba babe, le ka gobane o ikemišeditše go phetha se a se enetšego borakgolokhukhu ba lena, Abrahama le Isaka le Jakobo. ₆Le tsebe gabotse gore Morena ga a le fe naga ye e nonnego ye ka lebaka la gore e a le swanela. Gabotse lena le setšhaba sa melala ye methata.

₇“Le se ke la tsoga le lebetše ka moo le befedišitšego Morena kua lešokeng. Go tloga ka letšatši lela le tloga Egepeta go fihlela ka letšatši le le fihla mo, le mo tsogetše maatla. ₈Le gona kua thabeng ya Sinai le befedišitše Morena – la mmefediša mo e lego gore o be a ka le fediša. ₉Ke ile ka namela thaba go yo amogela matlapa ao go ona go bego go ngwadilwe kgwerano ye Morena a e dirilego le lena. Ka dula moo matšatši a masome a mane le mašego a ona ke sa je, ke sa nwe. ₁₀Ke moka Morena a mpha matlapa a mabedi ao go ona a bego a ngwadile ka seatla sa gagwe tše a le boditšego tšona a le gare ga mollo ka letšatši lela le bego le bokane kua thabeng. ₁₁Ka morago ga matšatši ao a masome a mane le mašego a ona Morena a mpha matlapa a mabedi ao go ona a bego a ngwadile kgwerano.

₁₂“Ke moka Morena a re go nna: ‘Theoga thaba ka pelapela, ka gobane setšhaba sa gago se o se ntšhitšego Egepeta se senyegile mme se dirile tše mpe. Ba šetše ba fapogile go tšeo ke ba laetšego tšona, mme ba itiretše modimo wa seswantšho.’

₁₃“Morena a ba a re go nna: ‘Ke tseba ka mo setšhaba se se nago le melala ye methata ka gona. ₁₄O se ke wa nthibela. Ke ikemišeditše go ba fediša gore go se sa ba le yo a ba gopolago. Ke gona ke tlago go dira tatagosetšhaba se segolo se maatla go ba feta.’

₁₅“Ka fao ke ile ka retologa ka theoga thaba, ke swere matlapa ale a mabedi ale go ona go bego go ngwadilwe kgwerano. Thaba e be e tuka mollo. ₁₆Ke ile ka bona gore le akgofišitše la phamoga tseleng ye Morena Modimo wa lena a le filego yona, le gore le mo fošeditše ka go itirela modimo wa seswantšho wa powana ka tshipi ye e tološitšwego. ₁₇Ka gona ka lahlela matlapa ale fase moo mahlong a lena mme a pšhatlega. ₁₈Ka buša ka itahlela fase ka sefahlego pele ga Morena ka fetša matšatši a masome a mane le mašego a ona ke sa je, ke sa nwe. Seo ke be ke se dira ka gobane le fošeditše Morena mme le mmefedišitše. ₁₉Ke be ke boifa pefelo ya Morena ye šoro, ka gobane o be a tuka bogale mo e lego gore o be a ka le fediša; fela gapegape Morena o ile a ntheetša. ₂₀Morena o ile a befelelwa le Arone mo e lego gore o be a ka mmolaya, ka gona ka rapelela Arone ka yona nako yeo. ₂₁Ke ile ka tšea selo seo le bego le dirile sebe ka sona – powana yeo ya tshipi – ka se lahlela mollong. Ke ile ka e pšhatlaganya, ka e šila ya ba lerole, ka tšhela lerole leo ka moeleng wo o bego o theoga thabeng.

₂₂“Le ile la befediša Morena Modimo wa lena le mola le le kua Tabera le Masa, le kua Kibrote-Taaba. ₂₃Le mola a le romile go tloga Kadeshe-Barnea a le laetše gore le yo thopa naga ye a bego a le fa yona, le ile la mo tsogela maatla; ga se la ka la mo tshepha goba la mo theetša. ₂₄E sa le go tloga mola ka le tsebago, le tsogetše Morena maatla.

₂₅“Ka gona ke ile ka hlwa ke itahletše fase ka sefahlego pele ga Morena matšatši ao a masome a mane le mašego a ona, ka gobane o be a itše o tla le feleletša. ₂₆Ka rapela ka re: ‘Morena, Mong wa ka, hle, se fediše setšhaba se e tlogago e le sa gago, setšhaba se o se phološitšego mme wa se ntšha Egepeta ka maatla a gago a magolo le go tia. ₂₇Gopola bahlanka ba gago, Abrahama le Isaka le Jakobo, gomme o se ke wa šetša bonganga le bokgopo le sebe sela sa setšhaba se. ₂₈Go sego bjalo, Baegepeta ba tla re o paletšwe ke go goroša setšhaba sa gago nageng ye o ilego wa ba tshephiša yona. Ba tla re o ntšhitše setšhaba sa gago wa se iša lešokeng go yo se bolaya, ka gobane o be o se hloile. ₂₉Gabotsebotse se ke setšhaba se e tlogago e le sa gago, se o se ntšhitšego Egepeta ka maatla a gago a magolo le go tia.’ ”

₁“Morena a re go nna: ‘Betla matlapa a mabedi a go swana le ale a pele; o betle le polokelo ya kota. O tle go nna thabeng, ₂mme ke tla ngwala matlapa ao melao ye ke bego ke e ngwadile matlapeng ale wa go a pšhatla, gomme o a bee ka moo polokelong.’

₃“Ka gona ke ile ka betla polokelo ya dikota tša mogohlo, ka betla le matlapa a mabedi a go swana le ale a pele, gomme ka a tšea ka namela thaba. ₄Gomme Morena a ngwala matlapa ao ona mantšu ale a bego a a ngwadile pele, Melao ye Lesome yeo a le filego yona ge a be a bolela a le gare ga mollo ka letšatši lela le bego le bokane kua thabeng. Morena o ile a mpha matlapa ao, ₅gomme ka retologa ka theoga thaba. Ka moo Morena a laetšego ka gona ka a bea ka polokelong yela ke e dirilego, mme go tloga ka nako yeo go fihlela le bjale a sa le ka moo.”

₆Baisraele ba ile ba tloga didibeng tše e bego e le tša Jaakane, gomme ba ya Mosere. Moo Arone o ile a hlokafala gomme a bolokwa, mme Eleasara, morwa wa gagwe, a mo tšea legato ya ba moprista. ₇Go tloga moo ba ya Hore-Gidgade mme ka morago ba fetela Jotobatha, felo mo go bego go na le meetse a mantši. ₈Kua thabeng Morena o ile a bea banna ba kgoro ya Lefi gore ba rwale Polokelo ya Kgwerano go mo hlankela e le baprista, le gore ba šegofatše ka leina la gagwe. Gomme le bjale ba sa dira dilo tše. ₉Ke ka lebaka leo kgoro ya Lefi e sego ya ka ya fiwa naga bjalo ka ge dikgoro tše dingwe di ile tša e fiwa; seo ba se amogetšego e bile boprista bja Morena, ka moo Morena Modimo wa lena a ba tshephišitšego ka gona.

₁₀“Ke dutše thabeng matšatši a masome a mane le mašego a ona, bjalo ka mola pele. Morena a ntheetša gape, mme a dumela gore a ka se le bolaye. ₁₁A mpotša gore ke tle ke le ete pele, gore le tle le thope naga ye a enetšego borakgolokhukhu ba lena gore o tla le fa yona.”

₁₂“Bjale, lena Baisraele, theetšang se Morena Modimo wa lena a se nyakago go lena: Ga go se sengwe gape se Morena a se nyakago ge e se go mmoifa, le go dira tšohle tše a di laelago. Le mo rate mme le mo direle ka dipelo tša lena ka moka le ka moya wa lena ka moka, ₁₃gomme le phetheng melao ya gagwe yohle. Ke le fa yona lehono gore e tle e le thuše. ₁₄Le ona magodimo a godimodimo ke a Morena; lefase le lona ke la gagwe le tšohle tše di lego go lona. ₁₅Eupša Morena o be a rata borakgolokhukhu ba lena mo e lego gore o kgethile lena gare ga ditšhaba ka moka, mme le sa le setšhaba sa gagwe se a se kgethilego. ₁₆Ka gona, go tloga bjale le theeletšeng Morena mme le se ke la hlwa le eba le melala ye methata. ₁₇Morena Modimo wa lena o ka godimo ga medimo ka moka le ka godimo ga maatla ka moka. Ke yo mogolo yo maatla le yo a boifegago. Ga a kgetholle motho, le gona ga a amogele letsogolekobong. ₁₈O hlokomela gore ditšhuana le bahlologadi ba swarwe gabotse; o rata bafaladi mme o ba fa dijo le diaparo. ₁₉Ka gona, le rate bafaladi bao, ka gobane lena beng le kile la ba bafaladi kua Egepeta. ₂₀Le boife Morena Modimo wa lena, mme le direle yena a nnoši. Le mmotegeleng, mme le ene ka leina la gagwe fela. ₂₁Mo tumišeng; ke Modimo wa lena, mme le bone ka mahlo a lena dilo tše kgolo tše di makatšago tše a le diretšego tšona. ₂₂Ge borakgolokhukhu ba lena ba eya Egepeta, e be e le ba masome a a šupago fela. Eupša bjale Morena Modimo wa lena o le atišitše la ba bjalo ka dinaledi tša legodimo.”

₁Mehleng ya ge Jesu a le seleteng sela sa Metse ye Lesome lešaba le lengwe le legolo le ile la tla la kgobokana. Ge ba se na se ba ka se jago, Jesu a bitša barutiwa ba gagwe a re go bona: ₂“Lešaba le ke le kwela bohloko, gobane e šetše e le matšatši a mararo ba na le nna, mme bjale ga ba sa na dijo. ₃Ge nka ba gomišetša magaeng a bona ba swerwe ke tlala ba tla šarelwa tseleng, gobane ba bangwe ba bona ba tšwa kgole.”

₄Barutiwa ba gagwe ba mo fetola ba re: “Dijo tša go khoriša lešaba le motho a ka di hwetša kae mo lešokeng?”

₅Jesu a ba botšiša a re: “Le na le dinkgwa tše kae?”

Bona ba re: “Ke tše di šupago.”

₆A laela lešaba gore le dule fase; a tšea dinkgwa tšela tše di šupago, a leboga Modimo, a di ngwathaganya, a di fa barutiwa ba gagwe gore ba di abele batho, mme ba di aba. ₇Ba be ba bile ba na le dihlatswana di se kae. Ge a seno di šegofatša, a laela barutiwa ba gagwe gore le tšona ba di abe. ₈Batho ba ja ba khora; barutiwa ba topa marathana a a šetšego, mme a tlala diroto tše di šupago. ₉Batho ba ba llego e be e ka ba ba dikete tše nne. Ya ba gona Jesu a ba gomišetšago magaeng a bona. ₁₀Yena a akgofa a tsena ka leselawatleng le barutiwa ba gagwe, a ya nageng ya Dalmanuta.

₁₁Bafarisei ba bangwe ba tla ba phegišana le yena ba mo leka; ba re a ba bontšhe mohlolo wa go laetša gore ka nnete o romilwe ke Modimo. ₁₂Jesu a ehuga a re: “Moloko wo o nyakelang mohlolo? Ruri, ke le botša gore o ka se bontšhwe mohlolo.”

₁₃A ba tlogela, a boela ka leselawatleng, a selela ka mošola wa letsha.

₁₄Barutiwa ba be ba lebetše go tšea mphago wo o lekanego wa dinkgwa ge ba tloga, mme ba swere senkgwa se tee fela ka leselawatleng. ₁₅Jesu a ba laya a re: “Le itote, le hlokomele komelo ya Bafarisei le ya Heroda.”

₁₆Ba thoma go botšana ba re: “Etse o realo ka gobane re se na dinkgwa.”

₁₇Jesu, ka go tseba se ba se bolelago, a ba botšiša a re: “Le reng le bolela ka go se be le dinkgwa ga lena? Na ga sešo la kwešiša goba la hlaologanya? Kgane le mašilo? ₁₈A ga le bone le ge le na le mahlo bjale? A ga le kwe le ge le na le ditsebe? Kgane ga le sa gopola ₁₉tša mohla wola ke ngwathaganyetša ba dikete tše tlhano dinkgwa tše tlhano? Le ile la tlatša diroto tše kae ka marathana a go šala?”

Ba mo fetola ba re: “Tše lesome le metšo ye mebedi.”

₂₀“Mohla wola ke ngwathaganyetša ba dikete tše nne dinkgwa tše di šupago, gona le ile la tlatša diroto tše kae ka marathana a go šala?”

Ba mo fetola ba re: “Tše di šupago.”

₂₁A ba botšiša a re: “Bjale le reng le sa kwešiše?”

₂₂Ba re go fihla Betsaida batho ba bangwe ba tliša monna wa sefofu go yena, ba mo kgopela gore a mo kgwathe. ₂₃Jesu a mo swara ka seatla, a mo ntšhetša ka ntle ga motse, a mo tshwela ka mare ka mahlong, a mmea diatla, a mmotšiša a re: “A o a bona?”

₂₄Monna yola a lebelela a re: “Ee, ke bona batho nke ke dihlare di sepela.”

₂₅Jesu a buša a mmea diatla, fela bjale ya ba mo mahlong, gomme sefofu ge se lebeledišiša, sa bona se foletše ruri se bona gabotse. ₂₆Jesu a re a boele gae, a mo laya a re: “O se ke wa boela motseng.”

₂₇Jesu a tloga le barutiwa ba gagwe, ba ya metsaneng ya kgauswi le Kesarea-Filipi. Mo tseleng a ba botšiša a re: “Na batho ba re ke nna mang?”

₂₈Ba mo fetola ba re: “Ba bangwe ba re o Johanese Mokolobetši, bangwe ba re o Eliya, mola bangwe ba re o yo mongwe wa baprofeta.”

₂₉A ba botšiša a re: “Lena le re ke nna mang?”

Gwa fetola Petrose a re: “Ke wena Mesia!”

₃₀Jesu a ba laya a re: “Le se ke la botša motho ka nna.”

₃₁Jesu a thoma go hlalošetša barutiwa ba gagwe gore Morwamotho o swanetše go tlaišwa kudu le go lahlwa ke bagolo ba setšhaba, le baprista ba bagolo, le boramangwalo, le go bolawa, eupša ka tšatši la boraro a tsoga bahung. ₃₂Taba ye ge a e bolela o be a sa potapote. Gomme Petrose a mmiletša thoko, a mo kgala. ₃₃Jesu a retologa, a lebelela barutiwa ba gagwe, a kgalema Petrose a re: “Tloga ka morago ga ka, Sathane, ka gobane ga o nagane tša Modimo, o nagana tša batho!”

₃₄Ke moka Jesu a bitša lešaba le barutiwa ba gagwe a re go bona: “Ge motho a rata go ba molatedi wa ka, a ikone, a ikemišetše go tlaišwa bjalo ka nna, mme a ntatele. ₃₅Gobane yo a ipabalelago o tla lahlega, eupša yo a itatolago ka lebaka la ka le ka lebaka la Taba ye Botse ya mmušo wa Modimo, o tla phelela sa ruri. ₃₆Etse motho go tla mo holang go rua lefase lohle, eupša a loba sebaka sa go hwetša bophelo bjo bo sa felego? ₃₇Goba ke eng se motho a ka rekago bophelo bjo bo sa felego ka sona? ₃₈Ge motho a se na sebete sa go bolela gore ke morutiwa wa ka, goba a sa begele moloko wo mobe wo wa go se botegele Modimo tše ke di rutago batho, gona Morwamotho le yena a ka se be le sebete sa go bolela gore motho yoo ke morutiwa wa gagwe, mohla a etla ka letago la Tatagwe le barongwa ba bakgethwa.”