To The Word – Day 48

₁“Le rateng Morena Modimo wa lena, gomme ka mehla le phetheng melao le melawana ya gagwe ka moka. ₂Gopolang lehono se le ithutilego sona ka tše Morena a le diretšego tšona. E bile lena, e sego bana ba lena, ba le diretšwego dilo tše. Le bone bogolo bja Morena, le maatla a gagwe, le go tia ga gagwe, ₃le mehlolo ya gagwe. Le bone tše a di dirilego kgoši ya Egepeta le naga ya yona yohle. ₄Le bone ka moo Morena a swieletšego madira a Baegepeta, gotee le dipere tša bona le makoloi a bona a ntwa, ka go di kgamiša meetse ka Lewatleng la Mahlaka ge ba be ba le rakediša. ₅Le tseba tše Morena a le diretšego tšona lešokeng pele ga ge le fihla mo. ₆Le gopola se a se dirilego Datane le Abiramo, barwa ba Eliaba, ba kgoro ya Rubene. Mahlong a setšhaba ka moka lefase le ile la palega la ba metša, gotee le malapa a bona, le mešaša ya bona, le bahlanka ba bona ka moka, le diruiwa tša bona. ₇Ke lena ba le bonego dilo tšeo tše kgolo ka moka tše Morena a di dirilego.”

₈“Le phethe ditaelo tšohle tše ke le fago tšona lehono. Ke moo le tlago kgona go tshelela mošola mme la thopa naga ye le batametšego go tsena go yona. ₉Gomme le tla dula nako ye telele nageng ya mokhora le monono ye Morena a enetšego borakgolokhukhu ba lena gore o tla e fa bona le ditlogolo tša bona. ₁₀Naga ye le batametšego go e thopa ga e swane le naga ya Egepeta moo le tšwago gona. Kua ge le bjetše peu le be le swanetše go šoma ka boima go nošetša mašemo; ₁₁eupša naga ye le batametšego go tsena go yona ke naga ya dithaba le meedi, naga ye e nošetšwago ke pula. ₁₂Morena Modimo wa lena o hlokometše naga ye mme o e šetša ngwaga ka moka.

₁₃“Ka gona, le phethe ka potego ditaelo tše ke le fago tšona lehono, e lego go rata Morena Modimo wa lena, le go mo direla ka dipelo tša lena ka moka le ka moya wa lena ka moka. ₁₄Ge le ka dira bjalo o tla neša pula nageng ya lena ge e nyakega, lehlabula le seruthwane, gore go tle go be le mabele le beine le makhura a mohlware, ₁₅le bjang bja diruiwa tša lena. Le tla ba le dijo tše di lekanego. ₁₆Le hlokomele gore le se ke la arošwa go Morena la obamela medimo ye mengwe la e direla. ₁₇Ge le ka dira bjalo, Morena o tla le galefela. O tla thibela pula, gomme lefase la lena le tla omelela mo e lego gore dibjalo di ka se mele. Gomme le tla hwa ka pela nageng ye botse ye a le fago yona.

₁₈“Le loteng tše ke le laetšego tšona ka dipelong tša lena mme le di boloke. Le di tlemelele matsogong a lena le be le di rwale diphatleng tša lena e le digopotšo. ₁₉Le di rute bana ba lena. Le boleleng ka tšona ge le le gae le ge le le maetong, ge le khutša le ge le šoma. ₂₀Le di ngwaleng direpoding tša mengwako ya lena, le dikgorong tša lena. ₂₁Ke moo lena le bana ba lena le tlago dula nako ye telele nageng yeo Morena Modimo wa lena a enetšego borakgolokhukhu ba lena gore o tla le fa yona. Le tla dula moo go yona ge legodimo le lefase di sa le gona.

₂₂“Le phethe ka potego ditaelo tšohle tše ke le fago tšona: Le rateng Morena Modimo wa lena, le phethe tšohle tše a le laelago tšona, mme le mmotegeleng. ₂₃Ke moo a tlago leleka ditšhaba tšeo ka moka ge le le gare le goroga, gomme le tla thopa naga yeo e lego ya ditšhaba tše kgolo tše maatla go le feta. ₂₄Mobu ka moka wo le sepelago go wona e tla ba wa lena. Naga ya lena e tla tloga lešokeng ka borwa ya fihla thabeng ya Lebanone ka leboa, ya tloga le nokeng ya Yufratese ka bohlabela, ya fihla Lewatleng la Mediteraniene ka bodikela. ₂₅Mo gongwe le mo gongwe mo le yago mo nageng yeo, Morena Modimo wa lena o tla dira gore batho ba le boife, bjalo ka ge a le tshephišitše, gomme ga go yo a kago kgona go le thibela.

₂₆“Lehono ke le fa sebaka sa gore le kgethe tšhegofatšo goba thogako – ₂₇ke tla le fa tšhegofatšo ge le ka phetha ditaelo tša Morena Modimo wa lena tše ke le fago tšona lehono, ₂₈eupša thogako e tla le tlela ge le ka se phethe ditaelo tše mme la fapoga le khunamela medimo ye mengwe ye le sego la ka la e khunamela. ₂₉Ge Morena a le goroša nageng ye le ilego go e thopa, le bege tšhegofatšo yeo le le thabeng ya Gerisime, mme le bege thogako le le thabeng ya Ebale. ₃₀Dithaba tše pedi tše di ka bodikela bja noka ya Jordane nageng ya Bakanana, bao ba dutšego moeding wa Jordane. Di ka bodikela, kgauswi le mehlare ye mekgethwa ya More ye e bapilego le motse wa Gilgale. ₃₁Le kgauswi le go tshela noka ya Jordane le go thopa naga ye Morena Modimo wa lena a le fago yona. Ge le e thopile mme le dutše go yona, ₃₂le hlokomeleng gore le phethe melao le melawana ka moka ye ke le fago yona lehono.”

₁“Še melao le melawana ye le swanetšego go e phetha ge le sa dutše nageng ye Morena, Modimo wa borakgolokhukhu ba lena, a le fago yona gore le e tšee. ₂Nageng ye le e thopilego le senyeng mafelo ka moka ao go ona baditšhaba ba le ba rakilego ba bego ba khunamela medimo ya bona godimo ga dithaba tše telele, godimo ga meboto, le ka fase ga mehlare ye metala. ₃Le phušoleng dialetare tša bona, le pšhatlaganyeng le dikokwane tša bona tša maswika tša borapedi. Le tšhumeng dikota tša bona tša borapedi, le remeng le medimo ya bona ya diswantšho, gore e tle e se ke ya tsoga e khunametšwe gape mo mafelong ao.

₄“Le se ke la khunamela Morena Modimo wa lena ka tsela ye batho ba ba khunamelago medimo ya bona. ₅Mo nageng ya dikgoro tša lena tšohle Morena o tla kgetha felo moo le swanetšego go tla pele ga gagwe mme la mo direla. ₆Moo le dire dihlabelo tša lena tša go tšhungwa ka moka le dihlabelo tša lena tše dingwe, le neele le karolo ya lesome ya lena, dikabelo tša lena, dimpho tše le ennego go di fa Morena, dikabelo tša lena tša boithaopo, le maitšibolo a dikgomo le a dihuswane tša lena. ₇Moo pele ga Morena Modimo wa lena yo a le šegofaditšego, lena le malapa a lena le tla ja la ipshina ka dilo tše botse tše le di šometšego.

₈“Ge nako yeo e fihla le se ke la dira ka moo le bego le dira ka gona. Go fihlela bjale yo mongwe le yo mongwe o be a dira ka moo a ratago ka gona, ₉ka gobane le be le se la tšwe le goroga nageng ye Morena Modimo wa lena a le fago yona, moo le ka dulago ka khutšo. ₁₀Ge le tshetše noka ya Jordane, le tla dula nageng yeo Morena a le fago yona. O tla dira gore manaba a lena ohle a se sa le tshwenya, mme le tla dula ka khutšo. ₁₁Felo moo Morena a tlago go kgetha gore a khunamelwe gona ke mo le swanetšego go tliša tšohle tše ke le laetšego tšona: dihlabelo tša lena tša go tšhungwa ka moka le dihlabelo tša lena tše dingwe, karolo ya lesome ya lena, le dikabelo tša lena, le dimpho tše dibotsebotse tšela le ennego go di fa Morena. ₁₂Le thabeng moo pele ga gagwe gotee le bana ba lena, bahlanka ba lena, le Balefi ba ba dulago metseng ya lena; le gopoleng gore Balefi ga ba tle go arolelwa naga. ₁₃Le se ke la dira dihlabelo tša lena mo gongwe le mo gongwe moo le ratago; ₁₄le di direng fela mo Morena a tlago go kgetha nageng ya dikgoro tša lena. Ke fao fela mo le swanetšego go dira dihlabelo tša lena tša go tšhungwa ka moka, le go dira dilo ka moka tše ke le laetšego tšona.

₁₅“Morena o tla le šegofatša gomme la ba le diruiwa tša go hlaba, la ja nama mo gongwe le mo gongwe mo le dutšego gona. Le ka ja tše ntši ka moo Morena a le fago ka gona. Ka moka ga lena, ba ba hlwekilego le ba ba sego ba hlweka, le ka di ja, ka wona mokgwa woo le bego le tla ja nama ya tshephe goba ya kgama. ₁₆Eupša le se ke la ja bobete bja tšona; le bo tšholleleng fase bjalo ka meetse. ₁₇Mafelong ao le dulago go ona le se ke la ja se le se abetšego Morena, e ka ba karolo ya lesome ya mabele a lena, goba ya beine ya lena, goba ya makhura a lena a mohlware, goba maitšibolo a dikgomo le a dihuswane tša lena, goba dimpho tše le ennego go di fa Morena, goba dimpho tša lena tša boithaopo, goba dikabelo tše dingwe. ₁₈Lena le bana ba lena, gotee le bahlanka ba lena le Balefi ba ba dulago metseng ya lena, le jeleng dikabelo tše pele ga Morena Modimo wa lena fela, lefelong la tirelo le Morena a tlago le kgetha. Gomme moo le thabele tšohle le di dirilego. ₁₉Le hlokomele gore le se ke la lahla Balefi ge le sa dula nageng ya lena.

₂₀“Ge Morena Modimo wa lena a katološa naga ya lena bjalo ka ge a le holofeditše, le ka jela nama mo gongwe le mo gongwe mo le nyakago go e jela gona. ₂₁Ge lefelo leo la tirelo le le kgole le lena, gona nako ye nngwe le ye nngwe ge le nyaka, le ka hlaba dikgomo goba dihuswane tše Morena a le filego tšona mme la ja nama gae, ka moo ke le boditšego ka gona. ₂₂Yo mongwe le yo mongwe yo a hlwekilego goba yo a sego a hlweka a ka ja nama yeo, ka moo a bego a tla ja nama ya tshephe goba ya kgama. ₂₃Se le swanetšego go se hlokomela ke gore le se ke la ja nama ye e sa nago le madi, ka gobane bophelo bo mading, mme le se ke la ja bophelo bjo bo lego nameng. ₂₄Le se ke la ja bobete; le bo tšholleleng fase bjalo ka meetse. ₂₅Ge le ka phetha taelo ye Morena o tla thaba gomme tšohle di tla le atla, lena le ditlogolo tša lena. ₂₆Dikabelo tša lena tše kgethwa le dimpho tše le ennego go di fa Morena le di išeng felo ga tirelo moo Morena a tlago go kgetha. ₂₇Moo le direng dihlabelo tša go tšhungwa ka moka godimo ga aletare ya Morena. Le direng le dihlabelo tšela le jago nama ya tšona, mme la tšhollela madi aletareng. ₂₈Le botegeleng go phetha tšohle tše ke le laetšego tšona, gomme tšohle di tla le atla, lena le ditlogolo tša lena go ya go ile, ka gobane le tla be le dira se se lokilego, se se kgahlago Morena Modimo wa lena.”

₂₉“Morena Modimo wa lena o tla fediša ditšhaba tše le yago go di hlasela la di amoga naga, gomme le tla e thopa la dula go yona. ₃₀Ka morago ga ge Morena a fedišitše ditšhaba tšeo, le hlokomele gore le se ke la latela ditlwaedi tša bona tša sedumedi, ka gobane seo e ka ba go itanya ka molaba. Le se ke la nyakišiša gore ba be ba khunamela medimo ya bona bjang gore le lena le tle le khunamele ka wona mokgwa woo. ₃₁Le se ke la khunamela Morena Modimo wa lena ka mo ba khunamelago medimo ya bona, ka gobane ge ba khunamela medimo yeo ya bona ba dira dilo tšohle tša bohlola tše Morena a di hloilego. Ba bile ba dira bana ba bona dihlabelo mellong godimo ga dialetare tša bona.

₃₂“Tšohle tše ke le laetšego tšona le di phethe ka potego; le se ke la di oketša goba la di fokotša.

₁“Moprofeta goba mohlatholledi wa ditoro a ka le tshephiša mohlolo goba semaka, ₂gore a le aroše le khunamele medimo ye le sego la ka la e khunamela, le e direle. Le ge seo a le tshephišago sona se ka direga, ₃le se ke la mo šetša. Morena Modimo wa lena o šomiša yena go le leka, go bona ge eba le rata Morena ka dipelo tša lena ka moka le ka moya wa lena ka moka. ₄Le lateleng Morena mme le mmoifeng. Le mo theetšeng gomme le phetheng ditaelo tša gagwe; le mo direleng mme le mmotegeleng. ₅Moprofeta goba mohlatholledi wa ditoro yo a le botšago gore le tsogele Morena maatla, Morena yo a le phološitšego Egepeta moo le bego le le makgoba, yena le mmolaye. Motho wa mohuta woo ke yo mobe, gomme o leka go le aroša bophelong bjo Morena Modimo wa lena a le laetšego gore le bo phele. O swanetše go bolawa, gore le ikhutše bobe bjo.

₆“Ge morwarrago wa setsiba goba wa letswele, goba morwago, goba morwediago, goba mosadi wa gago, yena moratiwa wa gago, goba mogwerago wa go wa le go tsoga a ka go hlohleletša ka sephiring gore o khunamele medimo ye mengwe ye wena le borakgolokhukhu ba gago le se la kago la e khunamela, ₇medimo ya ditšhaba tše di dulago kgauswi le lena, goba ya tše di dulago kgole le lena, ₈o se ke wa dumela goba wa mo theetša. O se ke wa mo gaugela goba wa mo kwela bohloko, le gona o se ke wa mo šireletša. ₉O mmolaye tho. O be wa pele go mmolaya ka maswika, mme ba bangwe le bona ba mmolaye ka maswika. ₁₀Le mo kgatleng ka maswika go fihlela a ehwa. O lekile go le aroša go Morena Modimo wa lena yo a le phološitšego Egepeta moo le bego le le makgoba. ₁₁Ke moo Baisraele ka moka ba tlago di kwa, ba boifa, mme gwa se sa ba le yo a dirago taba ye mpe ya mohuta woo.

₁₂“Ge le ka re le dutše metseng ye Morena Modimo wa lena a le fago yona, la kwa ₁₃gore dihwirihwiri tše dingwe tša go tšwa setšhabeng sa lena di arošitše batho ba motse wa gabobona gore ba khunamele medimo ye le sego la ka la e khunamela, ₁₄le nyakišišeng gabotsebotse, gomme ge e le gore ke therešo gore bokgopo bjoo bo diregile, ₁₅gona le bolayeng batho ka moka motseng woo gotee le dikgomo tša bona ka moka. Le senyetšeng motse woo sa ruri. ₁₆Le kgobokanyeng lebaleng la motse dithoto ka moka tša batho ba ba dulago moo. Gomme le tšhume motse le tšohle tše di lego go wona e le kabelo ya Morena Modimo wa lena. Motse o swanetše go tlogelwa e le marope go ya go ile, mme o se ke wa tsoga o tsošološitšwe. ₁₇Le se ke la ipolokela selo sefe le sefe se se gafetšwego go senywa, gore Morena a se hlwe a le galefetše o šoro, eupša a le gaugele. O tla le kwela bohloko mme a le atiša, ka moo a enetšego borakgolokhukhu ba lena, ₁₈ge le ka phetha ditaelo tša gagwe ka moka tše ke le fago tšona lehono, mme la dira se a se nyakago.”

₁“Ke lena setšhaba sa Morena Modimo wa lena. Ka gona, ge le ilela bahu, le se ke la iphatša goba la ipoola meriri ya ka godimo ga phatla. ₂Le setšhaba se sekgethwa sa Morena Modimo wa lena; o le kgethile gore le be setšhaba se e lego sa gagwe gare ga ditšhaba ka moka tša lefase.”

₃“Le se ke la ja selo se Morena a begilego gore ke makgapa. ₄Diphoofolo tše le ka di jago: kgomo, nku, pudi, ₅kgama, tshephe, tholo, phala, phalafala, phuthi le letlabo – ₆diphoofolo tše di nago le ditlhako tša mapharo gape di otlago. ₇Eupša go diphoofolo tše di otlago goba di nago ditlhako tša mapharo le ile kamela le mmutla le pela. Tšona le di tšee gore ga tša hlweka; di a otla eupša ga di ne ditlhako tša mapharo. ₈Le ile kolobe, ka gobane le ge e na le ditlhako tša mapharo, ga e otle, mme le e tšee gore ga se ya hlweka. Le se ke la ja ye nngwe ya diphoofolo tše, goba la kgwatha ditoto tša tšona.

₉“Diphedi tšohle tša ka meetseng tše di nago le mafegwana le magapi le ka di ja, ₁₀eupša tšohle tše di se nago mafegwana le magapi le se ke la di ja; le di tšee gore ga se tša hlweka.

₁₁“Le ka ja nonyana ye nngwe le ye nngwe ye e hlwekilego. _12-18Tše le sego la swanela go di ja ke lenong, ntšhu, leaka ka mehuta ya lona, pekwa ka mehuta ya yona, legokobu ka mehuta ya lona, mpšhe, leribiši ka mehuta ya lona, segotšane ka mehuta ya sona, kokolohute, mogole, mašianoke ka mehuta ya yona, kukuku le mmankgaganyane.

₁₉“Diphedinyana ka moka tše di nago le mafego ga tša hlweka; le se ke la di ja. ₂₀Le ka ja sephedinyana se sengwe le se sengwe se se hlwekilego.

₂₁“Le se ke la ja phoofolo ye e ikhwetšego ka boyona. Le ka e fa bafaladi ba ba dulago gare ga lena ba e ja, goba le ka e rekišetša bafaladi ba bangwe. Eupša lena le setšhaba se sekgethwa sa Morena Modimo wa lena.

“Le se ke la apea kwanyana goba putšanyane ka maswi a mmagoyona.”

₂₂“Le beeleng karolo ya lesome thoko – ya lesome ya tšeo mašemo a lena a di ntšhago ngwaga ka ngwaga. ₂₃Gomme le yeng lefelong leo Morena Modimo wa lena a le kgethilego gore a khunamelwe go lona; mme moo pele ga gagwe le je dikarolo tša lesome tša mabele, tša beine, tša makhura a mohlware, le maitšibolo a dikgomo le a dinku tša lena. Le direng se, gore le tle le ithute go boifa Morena Modimo wa lena ka mehla. ₂₄Ge le dula kgole mo e lego gore le šitwa ke go rwala dikarolo tša lesome tša tšeo Morena a le šegofaditšego ka tšona la di iša lefelong la tirelo, ₂₅gona le rekiše ditšweletšwa tšeo tša lena, mme le tšeeng tšhelete ya gona le yeng nayo lefelong leo la tirelo. ₂₆Ka yona le rekeng se le se nyakago, e ka ba nama ya kgomo, ya sehuswane, beine, goba bjala, mme lena le ba malapa a lena le di jeng moo pele ga Morena Modimo wa lena, le thabeng.

₂₇“Le se ke la lahla Balefi bao ba dulago metseng ya lena; ga ba na naga ye e lego ya bona. ₂₈Mafelelong a ngwaga wo mongwe le wo mongwe wa boraro le tlišeng dikarolo tša lesome tša dibjalo tša lena ka moka mme le di bolokeng metseng ya lena. ₂₉Dijo tšeo ke tša Balefi, ka ge ba se ne naga, le bafaladi le ditšhuana le bahlologadi ba ba dulago metseng ya lena. Ba swanetše ba tle ba tšee tše ba di hlokago. Ge le dira bjalo, Morena Modimo wa lena o tla le šegofatša go tšohle tše le di dirago.”

₁“Mafelelong a ngwaga wo mongwe le wo mongwe wa bošupa le phumoleng melato ya bao le ba adimilego tšhelete. ₂Go dirwe ka mokgwa wo: Yo a adimilego Moisraele wa gabo tšhelete a phumole molato woo; a se ke a leka go tšea tšhelete yeo, ka gobane Morena ka boyena o begile gore molato woo o phumotšwe. ₃Le ka gapeletša bafaladi go buša tše le ba adimilego tšona, eupša ba gabolena bona le ba lese le tše le ba adimilego tšona.

₄“Morena Modimo wa lena o tla le šegofatša nageng ye a le fago yona. Go ka se be le o tee wa batho ba gabolena yo a tlago diila ₅ge le ka mo theeletša, la phetha ka tlhokomelo tšohle tše ke le laelago tšona lehono. ₆Morena o tla le šegofatša, bjalo ka ge a le holofeditše. Le tla adima ditšhaba tše ntši tšhelete, eupša lena le ka se adingwe; le tla laola ditšhaba tše ntši, fela lena ga go setšhaba se se tlago le laola.

₇“Ge Moisraele wa gabolena motseng wo mongwe nageng ye Morena Modimo wa lena a le fago yona a hloka, gona le se ke la thatafatša dipelo la mo tima. ₈Le lokologeng mme le mo adime ka moo a hlokago ka gona. ₉Le se ke la gana go mo adima se sengwe e le fela ka gobane ngwaga wa go phumolwa ga melato o batametše. Le se ke la ba le kgopolo yeo ye mpe. Ge le ka gana go mo adima, o tla lla ka lena go Morena, gomme la rwešwa molato. ₁₀Le mo feng ka tokologo le ka go hloka bojato, mme Morena o tla le šegofatša go tšohle tše le di dirago. ₁₁Ka mehla go tla ba le Baisraele ba ba ba diilago, ba hlokago, ka gona ke le laela gore le beng le botho go bona.”

₁₂“Ge Moisraele wa gabolena, monna goba mosadi, a ithekišitše go wena gore e be lekgoba, o mo lokolle ka morago ga ge a go diretše mengwaga ye e selelago. Ge ngwaga wa bošupa o fihla, o mo lese a sepele a lokologile. ₁₃Ge o mo lokolla o se ke wa mo lesa a sepela a se a khuparela selo. ₁₄O mo fe tše ntši go tšeo Morena a go šegofaditšego ka tšona – dihuswane, le mabele le beine. ₁₅O gopole gore le be le le makgoba kua Egepeta gomme Morena Modimo wa lena a le lokolla, ke ka moo lehono ke go layago ka mokgwa wo.

₁₆“Fela ge lekgoba la gago le sa nyake go tloga, le go rata, wena le ba lapa la gago, mme a iketlile ka lapeng la gago, ₁₇gona o mo iše lemating la ngwako wa gago mme moo o mo phule tsebe ka tšhwana e tsenelele lemating; ke gona e tlago ba lekgoba la gago la bophelo ka moka. Le lekgoba la gago la mosadi o le dire ka wona mokgwa woo. ₁₈O se ke wa tsota ge o lokolla lekgoba; o sa nyakang ka gore o go diretše mengwaga ye e šupago o mo lefa seripa sa mogolo wa mohlanka yo a thwetšwego? Le direng bjalo, gomme Morena Modimo wa lena o tla le šegofatša go tšohle tše le di dirago.”

₁₉“Le hlaoleleng Morena Modimo wa lena maitšibolo ka moka a matona a dikgomo le a dihuswane; le se ke la šomiša dikgomo tšeo, goba la kota dihuswane tšeo. ₂₀Ngwaga wo mongwe le wo mongwe lena le ba malapa a lena le di hlabeng, le di jeng pele ga Morena felong ga tirelo. ₂₁Eupša ge diruiwa tšeo di ka ba le bosodi, ge di golofetše, goba di foufetše, goba di na le bosodi bjo bongwe bjo bogolo, le se ke la direla Morena Modimo wa lena dihlabelo ka tšona. ₂₂Le ka ja diruiwa tše bjalo gae. Ka moka ga lena, ba ba hlwekilego le ba ba sego ba hlweka, le ka di ja, go no swana le ge le eja tshephe goba kgama. ₂₃Eupša bobete bja tšona le se ke la bo ja; le bo tšholleleng fase bjalo ka meetse.”

₁Jesu a tšwela pele a re: “Ruri, ke le botša gore go na le ba bangwe mo ba ba ka se kego ba hwa ba sešo ba bona Modimo a etla ka letago.”

₂Ka morago ga matšatši a a selelago Jesu a tloga le Petrose le Jakobose le Johanese, a ba iša thabeng ye telele, mme fao ba ba noši; a fetoga sebopego pele ga bona. ₃Diaparo tša gagwe tša taga bošweu bja go re pšoo! Tša re twaa ka mo go bego go se mohlatswi yo a ka di šweufatšago ka gona mo lefaseng. ₄Barutiwa bao ba bararo ba bona Eliya le Moshe ba bolela le Jesu. ₅Petrose a re go Jesu: “Moruti, ke mo gobotse bjang ge re le fa! A re hlomeng mešaša ye meraro, wo mongwe e be wa gago, mongwe e be wa Moshe, mongwe e be wa Eliya.” ₆Gape o be a sa tsebe se a se bolelago, ka ge ba be ba tšhogile kudu.

₇Gwa tla leru la ba pipetša, mme gwa kwagala lentšu le etšwa lerung leo le re: “Yo ke yena Morwa wa ka yo ke mo ratago; le mo theeletšeng!” ₈Ba lealea eupša ba se bone motho, ba bona fela Jesu a šetše le bona.

₉Ge ba theoga thabeng Jesu a ba laya a re ba se ke ba botša motho tše ba di bonego, go fihlela ge Morwamotho a tsogile bahung.

₁₀Taelo ye ba ile ba e phetha, eupša ba fela ba botšišana ba re: “Go ‘tsoga bahung’ mo ke go reng?” ₁₁Ba botšiša Jesu ba re: “Ke ka lebaka lang boramangwalo ba re pele go swanetše go tla Eliya?”

₁₂Yena a ba fetola a re: “Ke nnete, pele go tla tla Eliya gore a bušetše dilo sekeng sa tšona. Eupša ke ka lebaka lang Mangwalo a Makgethwa ona a re Morwamotho o tla tlaišwa kudu a ba a lahlwa? ₁₃Fela ke le botša gore Eliya yena o šetše a ile a tla, gomme ba dira ka yena se ba se ratago, bjalo ka ge Mangwalo a Makgethwa a bolela ka yena.”

₁₄Ge ba fihla go barutiwa ba bangwe, ba bona lešaba le legolo le ba dikaneditše, le boramangwalo ba phegišana le bona. ₁₅Ge lešaba leo le bona Jesu a fihla le sa nagane, la tlabega, mme ba mo kitimela ba yo mo dumediša. ₁₆Jesu a botšiša barutiwa ba gagwe a re: “Le phegišana le bona ka eng?”

₁₇A fetolwa ke monna yo mongwe yo a bego a le gare ga lešaba a re: “Moruti, ke tlišitše morwa wa ka go wena, gobane o tsenwe ke moya wo mobe mme o mo dirile semumu. ₁₈Mo o mo swarago gona o a mo utlautla, wa mo akga, wa mo dira gore a tsikitlanye meno, a be a omelele. Ke ile ka kgopela barutiwa ba gago gore ba o ntšhe, fela ba palelwa.”

₁₉Jesu a mo fetola a re: “Aowii, lena moloko wa go hloka tumelo! Ke se le felele pelo go fihlela neng? Ke le kgotlelele go iša kae? Mo tlišeng mo go nna.” ₂₀Ba mo tliša go Jesu.

Ge moya wola wo mobe o bona Jesu, wa akgofa wa akga mošemane, mme a wela fase a pshikologa, a etšwa mapshilo ka molomo. ₂₁Jesu a botšiša tatagwe a re: “E šetše e le lebaka le lekaakang a le ka mokgwa wo?”

Tatagwe a re: “Ke go tloga bobjaneng bja gagwe. ₂₂Ke gantši moya wo mobe o mo lahlela ka mollong le ka meetseng, o nyaka go mmolaya. Ge o kgona, re šokele, o re thuše!”

₂₃Jesu a mo fetola a re: “O re ‘ge o kgona’? Gape tšohle di a kgonega go yo a nago le tumelo.”

₂₄Ka pelapela tatagongwana a goeletša a re: “Tumelo yona ke nayo, eupša ga ya lekana. Nthuše, o nkokeletše yona.”

₂₅Jesu ge a bona lešaba le mo phalalela, a kgalema moya wola wo mobe a re: “Wena moya wa semumu wa setholo, ke go laela gore o tšwe go ngwana yo mme o se sa mo tsena!”

₂₆Moya wa goa, wa akgaakga ngwana kudu, wa napa wa tšwa, mme yena a ba bjalo ka ge nke o hwile, mo ba bantši ba ilego ba ba ba re ga a sa phela. ₂₇Jesu a mo swara ka seatla a mo emiša, mme a ema.

₂₈E rile ge Jesu a tsene ka ngwakong, barutiwa ba gagwe ba mmotšiša ka sephiring ba re: “Ke ka lebaka lang rena re paletšwe ke go leleka moya wola?”

₂₉Jesu a ba fetola a re: “Moya wa mohuta wo o ka se lelekwe ka selo, ge e se ka thapelo.”

₃₀Ge Jesu le barutiwa ba gagwe ba tloga moo ba ile ba ralala le Galilea. O be a sa rate gore go tsebe motho mo a lego gona, ₃₁ka gobane o be a sa botša barutiwa ba gagwe a re: “Morwamotho o tla gafelwa diatleng tša batho, mme ba tla mmolaya. Eupša ka letšatši la boraro o tla tsoga bahung.”

₃₂Ba ile ba se kwešiše taba ye, fela ba šia go mmotšiša.

₃₃Ba fihla motseng wa Kapernaume, mme ya re ge Jesu a le ka gae a ba botšiša a re: “Le be le phegišana ka eng mo tseleng?”

₃₄Ba homola, ka gobane mo tseleng ba be ba tšere kgang ya go re yo mogolo ke ofe. ₃₅Jesu a dula fase, a bitša barutiwa ba gagwe ba lesome le metšo ye mebedi, mme a re go bona: “Yo a ratago go ba yo mogolo, a itire yo monyenyane go bohle mme e be mohlanka wa bohle.” ₃₆A tšea ngwana, a mmea gare ga bona, a mo gokara, a re go bona: ₃₇“Yo a amogelago ngwana wa go etša yo ka ge e le se ke le laetšego sona, o amogela nna. Le yo a amogelago nna, ga a amogele nna fela, eupša o amogela le yo a nthomilego.”

₃₈Johanese a re go Jesu: “Moruti, re bone motho yo mongwe a leleka bademone ka go bolela leina la gago, mme ra mo iletša, ka ge e se wa rena.”

₃₉Jesu a re: “Le se ke la mo iletša, gobane ga go motho yo a ka rego go dira mohlolo ka go bolela leina la ka a kgona go nkgoboša. ₄₀Gobane yo a sa lwego le rena o ema le rena. ₄₁Yo a ka le fago sego sa meetse ka ge le le ba ka, ruri, ke le botša gore le gatee a ka se hlokišwe moputso.”

₄₂“Ge motho a ka kgeloša yo mongwe wa ba bannyane ba, go ka ba kaone ge a ka tlemelelwa lwala molaleng, mme a lahlelwa ka lewatleng. ₄₃Ge letsogo la gago le go diriša dibe o le ripe. Go kaone go tlo ya legodimong o se ne letsogo, go na le gore o be le matsogo ka mabedi, eupša o ye heleng, mollong wo o sa timego. ₄₅Le leoto la gago ge le go diriša dibe o le ripe. Go kaone go tlo ya legodimong o se ne leoto, go na le gore o be le maoto ka mabedi, fela o tle o lahlelwe ka heleng. ₄₇Le leihlo la gago ge le go diriša dibe o le gonye. Go kaone gore o tle o ye legodimong o le moihlwe, go na le gore o be le mahlo ka mabedi, fela o tle o lahlelwe ka heleng, ₄₈moo ‘diboko tše di ba jago di sa hwego, le mollo wo o ba tšhumago o sa timego.’

₄₉“Bohle ba tla hlwekišwa ka mollo wa matshwenyego mo lefaseng.

₅₀“Letswai ke selo se se lokilego, fela ge le ka tapa, le ka le tswailoša bjang?

“Le lena ebang ba ba lokilego bjalo ka letswai, mme le phedišane ka khutšo.”