To The Word – Day 67

₁Jefta, mohlabani yo bogale wa Gileade, e be e le morwa wa segwebakathobalo. Gileade, tatagwe, ₂o be a na le barwa ba bangwe le mosadi wa gagwe, gomme bona ge ba godile, ba raka Jefta gae. Ba re go yena: “O ka se fiwe bohwa bja tatagorena; o morwa wa mosadi o šele.” ₃Jefta a tšhaba go bomorwarragwe a yo dula nageng ya Tobe. Moo a kalatša dihwirihwiri tše dingwe, gomme tša tšama di hula batho naye.

₄Ka morago ga matšatši Baamone ba yo lwa le Baisraele. ₅Ge go le gare go lwewa, baetapele ba Gileade ba ya go tšea Jefta nageng ya Tobe. ₆Ba re: “Tlaa o be molaodi wa rena ge re elwa le Baamone.”

₇Jefta a ba fetola a re: “Le ile la ntlhoya la ba la nthaka lapeng la tate. Ke ka lebaka lang le etla go nna bjale ge le le bothateng?”

₈Bona ba re go yena: “Re tlile go wena ka gobane re nyaka gore o ye le rena go yo lwa le Baamone, le gore o be mmuši wa batho ka moka ba Gileade.”

₉Jefta a re go bona: “Ge le re ke boele gae go yo lwa le Baamone, gomme Morena a dira gore re ba fenye, ke tla ba mmuši wa lena.”

₁₀Ba mo fetola ba re: “Re a dumela. Morena ke hlatse ya rena.” ₁₁Ka gona Jefta a sepela le baetapele ba Gileade, gomme setšhaba sa mo dira mmuši le moetapele. Jefta, sela a se boditšego baetapele ba Gileade a se boeletša kua Mitsepa pele ga Morena.

₁₂A roma batseta go kgoši ya Baamone gore ba re go yena: “O re bakiša eng? Ke ka lebaka lang o šwahletše naga ya rena?”

₁₃Kgoši ya Baamone ya fetola batseta ba Jefta ya re: “Mola Baisraele ba etšwa Egepeta ba ile ba tšea naga ya ka go tloga nokaneng ya Arnone go fihla nokaneng ya Jaboko le nokeng ya Jordane. Bjale le swanetše go mpušetša naga yeo le sa lwe.”

₁₄Jefta a roma batseta gape go kgoši ya Baamone ₁₅gore ba mo fetole ba re: “Ga se therešo gore Baisraele ba tšere naga ya Bamoaba goba naga ya Baamone. ₁₆Se se diregilego ke gore mohla Baisraele ba tloga Egepeta ba ile ba putla lešoka go yo fihla kgogometšaneng ya Akaba mme ba fihla Kadeshe. ₁₇Ba roma batseta go kgoši ya Edomo gore ba yo kgopela tumelelo ya go putla nageng ya gagwe. Eupša kgoši ya Edomo ya se ke ya ba dumelela. Ba ile ba kgopela le kgoši ya Moaba, fela le yena a se ke a ba dumelela gore ba putle nageng ya gagwe. Ka gona Baisraele ba dula Kadeshe. ₁₈Go tloga moo ba tšwela pele ba putla lešoka, ba rarela naga ya Edomo le ya Moaba go fihlela ge ba fihla ka lehlakoreng la ka bohlabela la Moaba, ka mošola wa nokana ya Arnone. Ba hloma mešaša gona, eupša ba se ke ba tshela nokana ya Arnone ka gobane e be e le mollwane wa Moaba. ₁₉Ke moka Baisraele ba roma batseta go Sihone, kgoši ya Baamore yo a bego a buša a le Heshbone, mme ba mo kgopela tumelelo ya go putla nageng ya gagwe ge ba eya nageng ya bona. ₂₀Eupša Sihone a se ke a dumelela Baisraele ba putla. A rapa madira a gagwe ka moka, a hloma mešaša kua Jahatse, gomme a hlasela Baisraele. ₂₁Eupša Morena Modimo wa Israele a gafela Sihone le madira a gagwe diatleng tša Baisraele. Ka gona Baisraele ba thopa naga ka moka ya Baamore bao ba bego ba dula nageng yeo. ₂₂Ba tšea naga ka moka ya Baamore go tloga nokaneng ya Arnone ka borwa go fihlela go ya Jaboko ka leboa, le go tloga lešokeng ka bohlabela go fihla Jordane ka bodikela. ₂₃Ka gona e bile Morena Modimo wa Israele yo a leleketšego setšhaba sa gagwe, Baisraele, Baamore. Bjale wena o tlile go leka go ithopela yona? ₂₄O ka itotela se modimo wa gago, Kemoshe, a go filego sona. Fela le rena re tlile go itotela se Morena Modimo wa rena a re filego sona. ₂₅A o gopola gore o phala Balaka, morwa wa Tsiporo, kgoši ya Moaba? Ga ke re ga se a ka a fapana le Baisraele? Kgane o kile a lwa le rena? ₂₆Ke mengwaga ye makgolo a mararo Baisraele ba dutše Heshbone le Aroere le metsaneng ya yona, le metseng ka moka ye e lego mabopong a nokana ya Arnone. Ke ka lebaka lang o se wa tšea metse yeo nako ye ka moka? ₂₇Ga se nna ke go fošeditšego. Ke wena o mphošetšago ka go lwa le nna. Morena ke moahlodi. O tla ahlola lehono gore ba phošo ke bafe, Baisraele goba Baamone.” ₂₈Eupša kgoši ya Baamone ya se ke ya ela molaetša wa Jefta hloko.

₂₉Ke moo moya wa Morena o ilego wa aparela Jefta. A putla naga ya Gileade le ya Manase mme a gomela motseng wa Mitsepa kua Gileade, gomme a fetela Amone. ₃₀A holofetša Morena a re: “Ge o ka tloga o gafela Baamone diatleng tša ka, ₃₁ke tla go direla sehlabelo sa go tšhungwa ka moka ka motho yo e tlago ba wa pele go tšwa lapeng la ka go tlo nkgahlanetša, ge ke boa ke fentše. E tla ba wa Morena.”

₃₂Ka gona Jefta a tshela noka go yo lwa le Baamone, gomme Morena a gafela Baamone diatleng tša gagwe. ₃₃A hlasela metse ye masome a mabedi go tloga Aroere go ya tikologong ya Minite, le go yo fihla Abele-Keramime. Gwa bolawa batho ba bantši kudu, gomme Baamone ba fenywa ke Baisraele.

₃₄Ge Jefta a boela gae Mitsepa, morwedi wa gagwe a tšwa go tlo mo gahlanetša a bina a letša moropa. E be e le ngwana a nnoši wa gagwe; a se ne morwa goba morwedi yo mongwe. ₃₅Ge a mmona a gagola diaparo tša gagwe ka manyami, a re: “Joo, morwedi wa ka! O nkweša bohloko kudu! Ke ka lebaka lang e swanetše go ba wena yo a ntlišetšago bošula? Ke enetše Morena, gomme nka se kgone go hlanama!”

₃₆Morwedi wa gagwe a re go yena: “Ge o enetše Morena, dira se o boletšego gore o tla ntira sona, ka ge Morena a go lefeleditše go Baamone, manaba a gago.” ₃₇Eupša a kgopela tatagwe a re: “Ntirele selo se tee se: Ntese dikgwedi tše pedi, gore ke sepele le bagwera ba ka re yo ralala dithabeng mme re ilele ge ke swanetše go hwa ke se ka ka ka nyalwa.” ₃₈O ile a mo lokolla gore a sepele mme a ye dikgwedi tše pedi. Yena le bagwera ba gagwe ba namela dithaba mme ba lla ka gobane o be a tlile go hwa a se a nyalwa, le gona a se ne ngwana. ₃₉Ka morago ga dikgwedi tše pedi a boela go tatagwe. Tatagwe a dira se a se enetšego Morena, gomme morwediagwe a hwa a se a ka a robala le monna.

Setlwaedi sa Baisraele ₄₀sa gore makgarebe a fele a etšwa matšatši a mane ngwaga wo mongwe le wo mongwe go yo ilela morwedi wa Jefta wa Gileade se thomile gona moo.

₁Banna ba kgoro ya Efraime ba ile ba rapa dira; ba tshela noka ya Jordane ba fihla Tsafone, gomme ba re go Jefta: “Ke ka lebaka lang o tshetše mollwane wa lwa le Baamone ntle le go re bitša gore re ye le wena? Re tla go tšhumelela ka mo ngwakong wa gago!”

₂Eupša Jefta a re go bona: “Nna le setšhaba sa ka re ile ra fapana kudu le Baamone. Ke ile ka le bitša, eupša la se ke la tla go mphološa diatleng tša bona. ₃Ge ke bona le sa tle, ka ipea kotsing ya lehu ka tshela mollwane go yo lwa le bona, gomme Morena a ba gafela diatleng tša ka. Bjale le reng le etla go lwa le nna?” ₄Ke moo Jefta a kgobokantšego banna ka moka ba Gileade, a lwa le banna ba kgoro ya Efraime mme a ba fenya. Baefraime ba be ba ile ba re: “Lena Bagileade le le dulago gare ga Baefraime le Bamanase, ke lena batšhabi kgorong ya Efraime!” ₅Gore Baefraime ba se ke ba tšhaba, Bagileade ba ile ba thopa madibogo a Jordane. Ge Moefraime yo a bego a leka go tšhaba a kgopela tumelelo ya go tshela, banna ba Gileade ba be ba mmotšiša ba re: “A o Moefraime?” Ge a be a ka re: “Aowa,” ₆ba be ba mmotša ba re: “Nke o re ‘Shibolete’.” Fela yena o be a re “Sibolete”, ka gobane o be a sa kgone go bitša lentšu leo gabotse. Ke moo ba bego ba mo swara ba mmolaye fao go le lengwe la madibogo a Jordane. Mehleng yeo go ile gwa bolawa Baefraime ba dikete tše masome a mane le tše pedi.

₇Jefta o ile a eta Baisraele pele mengwaga ye e selelago. Ka morago ga moo a hwa, gomme a bolokwa motseng wa gabo kua Gileade.

₈Ge Jefta a hwile, Ibetsane wa Betlelehema o ile a eta Baisraele pele. ₉O be a na le barwa ba masome a mararo le barwedi ba masome a mararo. Barwedi ba gagwe o ile a ba nyadiša banna bao e sego ba kgorwana ya gagwe, gomme a yo tšea basetsana ba masome a mararo dikgorwaneng tše dingwe gore ba tle ba nyalwe ke barwa bao ba gagwe. Ibetsane o ile a eta Baisraele pele mengwaga ye e šupago. ₁₀Ka morago ga moo a hwa, gomme a bolokwa Betlelehema.

₁₁Ge a hwile, Elone wa kgoro ya Sebulone a eta Baisraele pele mengwaga ye lesome. ₁₂Ka morago ga mo a hwa, gomme a bolokwa kua Ayalone, nageng ya Sebulone.

₁₃Ge Elone a hwile, Abdone, morwa wa Hilele wa Piratone, a eta Baisraele pele. ₁₄O be a na le barwa ba masome a mane le ditlogolo tše masome a mararo bao ba bego ba sepela ka dipokolo tše masome a a šupago. Abdone o ile a eta Baisraele pele mengwaga ye seswai. ₁₅Ka morago ga moo a hwa, gomme a bolokwa Piratone, nageng ya Efraime ya dithaba ya Baamaleke.

₁Baisraele ba ile ba dira sebe gape pele ga Morena, gomme yena a dira gore Bafilista ba ba buše mengwaga ye masome a mane.

₂Mehleng yeo go be go na le monna yo a bitšwago Manoa, wa motse wa Tsora. E be e le wa kgoro ya Dane. Mosadi wa gagwe e be e le moopa. ₃Morongwa wa Morena a iponagatša go yena gomme a re: “Ga se wa ka wa belega, eupša o tla ima mme wa ba le morwa. ₄O itlhokomele o se ke wa nwa beine goba bjala, goba wa ja sejo se se iletšwago, ₅ka gobane o tla ima, wa tla wa belega ngwana wa mošemane. A se ke a kotwa moriri, ka gobane go tloga matswalong a gagwe o tla abelwa Morena ya ba Monasire. O tla thoma go phološa Baisraele go Bafilista.”

₆Ke moo mosadi yoo a ilego go monna wa gagwe a re go yena: “Go be go tlile monna wa Modimo mo go nna, mme a boifiša bjalo ka Morongwa wa Modimo. Ga se ka mmotšiša gore o tšwa kae, le gona ga se a mpotša leina la gagwe. ₇Fela se a mpoditšego sona ke gore ke tla ima ka ba le ngwana wa mošemane. O mpoditše le gore ke se ke ka nwa beine goba bjala, goba ka ja sejo se se iletšwago, ka gobane mošemane yoo o tla abelwa Modimo ya ba Monasire bophelo bja gagwe ka moka.”

₈Ke moo Manoa a rapetšego Morena a re: “Hle, Mong wa ka, dira gore monna yola wa Modimo yo o bego o mo romile a tle gape go rena mme a re botše gore re swanetše go dira eng ka mošemanyana yoo ge a tswetšwe.”

₉Modimo o ile a dira se Manoa a se kgopetšego, mme Morongwa wa Modimo a boela go mosadi yola ge a sa dutše kua mašemong. Manoa, monna wa gagwe, o be a se na le yena, ₁₀ka gona mosadi a kganyelela go yena mme a re: “Bona! Monna yola a bego a tlile go nna letšatši lela o iponagaditše go nna gape.”

₁₁Manoa a ema mme a latela mosadi wa gagwe. A ya go monna yoo mme a mmotšiša a re: “A ke wena monna yola a boletšego le mosadi wa ka?”

Monna yoo a mo fetola a re: “Ee.”

₁₂Ke moo Manoa a mmotšišitšego a re: “Ge se o se boletšego se phethegile, mošemanyana yoo o swanetše go dira eng? A o swanetše go phela bjang?”

₁₃Morongwa a mo fetola a re: “Mosadi wa gago o swanetše go hlokomela gore a dire tšohle tše ke mmoditšego tšona. ₁₄A se ke a ja selo se se tšwago morareng; a se ke a nwa beine goba bjala, goba a ja sejo se se iletšwago. O swanetše go dira tšohle tše ke mmoditšego tšona.”

_15-16Manoa o be a sa tsebe gore monna yoo ke Morongwa wa Morena, ka gona a re go yena: “Hle, o se ke wa sepela gonabjale. A re go apeele putšane.”

Eupša Morongwa wa Morena a re: “Le ge nka dula, nka se je dijo tša gago. Fela ge o nyaka go dira sehlabelo sa go tšhungwa ka moka, se tšhumele Morena.”

₁₇Manoa a mo fetola a re: “Re botše leina la gago, gore re tle re kgone go go hlompha ge seo o se boletšego se phethegile.”

₁₈Morongwa wa Morena a mmotšiša a re: “Ke ka lebaka lang o nyaka go tseba leina la ka? Ke leina le le makatšago.”

₁₉Ka gona Manoa a tšea putšane le kabelo ya bupi a di tšhuma aletareng ya matlapa, a di tšhumela Morena yo a dirago dimakatšo. _20-21Ge kgabo e laumela godimo e etšwa aletareng, Manoa le mosadi wa gagwe ba bona Morongwa wa Morena a rotogela legodimong a le moo kgabong ya mollo. Ke gona Manoa a lemogilego gore monna yola ke Morongwa wa Morena, mme yena le mosadi wa gagwe ba itahlela fase ka difahlego. Ba ile ba se hlwe ba bona Morongwa yoo wa Morena gape.

₂₂Manoa a re go mosadi wa gagwe: “Ka kgonthe re tlile go hwa, ka gobane re bone Modimo!”

₂₃Eupša mosadi a mo fetola a re: “Ge Morena a be a nyaka go re bolaya, a ka be a se a amogela sehlabelo le kabelo ya rena; a ka be a se a re laetša dilo tše ka moka goba a re botša dilo tše a re boditšego tšona bjale.”

₂₄Mosadi yoo o ile a belega ngwana wa mošemane gomme a mo rea leina la Simsone. Lesoganyana la gola gomme Morena a le šegofatša. ₂₅Moya wa Morena wa thoma go mo tutuetša ge a le mešašeng ya Dane gare ga Tsora le Eshtaolo.

₁Ka letšatši le lengwe Simsone a theogela Timna, moo a ilego a bona mosetsana yo mongwe wa Mofilista. ₂O ile a boela gae gomme a re go tatagwe le mmagwe: “Go na le mosetsana yo mongwe wa Mofilista kua Timna yo ke mo kganyogilego. Sepelang le yo nkgopelela yena; ke nyaka go mo nyala.”

₃Eupša tatagwe le mmagwe ba mmotšiša ba re: “Ke ka lebaka lang o ka ya wa nyala mosadi kua Bafilisteng o tseba ba sa bolle? A ga o kgone go hwetša ngwanenyana mo kgorwaneng ya gaborena, gare ga setšhaba sa gaborena?”

Fela Simsone a re go tatagwe: “Ke yena yo ke nyakago gore o nkgopelele yena. O a nkgahla.”

₄Batswadi ba gagwe ba be ba sa tsebe gore Simsone o tutuetšwa ke Morena gore a dire taba yeo, ka gobane Morena o be a nyaka lebaka la go lwa le Bafilista. Ka nako yeo Bafilista ba be ba buša Baisraele.

₅Ka gona Simsone a theogela Timna a na le tatagwe le mmagwe. Ge ba sepela ba putla dirapa tša merara fao, gwa rotoga tau ya lerojana e rora e etla go mo hlasela. ₆Ka bjako moya wa Morena wa tiiša Simsone, gomme a gagoganya tau yela ka diatla a se a swara selo, mo nkego ke putšane. Eupša a se ke a botša batswadi ba gagwe seo a se dirilego.

₇Ke moka a ya a bolela le mosetsana yola, gomme mosetsana a mo kgahlela pele. ₈Ka morago ga matšatši a se makae Simsone a boela go yo mo nyala. Tseleng a phamogela ka thoko go yo bona tau yela a e bolailego, gomme a makala ge a hwetša motšhitšhi wa dinose le mamapo ka gare ga setoto sela. ₉A rafela dinose tšeo diatleng gomme a tšama a eja. A ya go tatagwe le mmagwe a ba fa mamapo a mangwe. Ba a a ja, fela Simsone a se ke a ba botša gore o rafile mamapo ao ka setotong sa tau.

₁₀Tatagwe a ya ga bokgarebe, gomme Simsone a dira monyanya moo. Seo e be e le setlwaedi sa thaka ya tshogana. ₁₁Ge Bafilista ba mmona, ba tliša masogana a masome a mararo go tlo dula le yena. ₁₂Simsone a re go bona: “A ke le hlabeleng nyepo. Ke tla fa yo mongwe le yo mongwe wa lena seaparo le diaparo tša botšhepi ge le ka kgona go nnyepollela yona pele ga ge matšatši a a šupago a monyanya a feta. ₁₃Ge le ka se kgone, gona yo mongwe le yo mongwe wa lena o swanetše go mpha diaparo tšeo.”

Bona ba re: “Re hlabele nyepo ya gago, re e kwe.”

₁₄Simsone a re: “Thai!

₁₅Ka letšatši la bone ba re go mosadi wa Simsone: “Goketša monna wa gago gore a re nyepollele nyepo yeo. Ge o ka se dire bjalo re tla go tšhuma ka mollo le ngwako wa tatago. Le re laleditše gore le tle le re hule. A ga go bjalo?”

₁₆Ka gona mosadi wa Simsone a ya go yena a lla a re: “Ga o nthate! O ntlhoile! O hlabetše masogana a gešo nyepo gomme nna ga se wa nnyepollela yona!”

Simsone a re: “Bona, le tate le mme ga se ka ba nyepollela yona. Ke ka lebaka lang ke swanetše go e nyepollela wena?” ₁₇Mosadi a lla moo pele ga gagwe matšatši ao a šupago a monyanya. Fela ka letšatši la bošupa Simsone a mo nyepollela nyepo yeo ka gobane o be a mo phegeletše kudu. Mosadi yola a ya a botša Bafilista. ₁₈Ka gona, ka letšatši la bošupa, pele ga ge Simsone a tsena ka phapošing ya malao, banna ba motse woo ba re go yena:

₁Ka morago ga matšatši Simsone a yo bona mosadi wa gagwe nakong ya ge go bunwa korong, mme a mo išetša le putšane. A re go tatago mosadi wa gagwe: “Ke nyaka go yo bona mosadi wa ka ka phapošing ya gagwe.”

Eupša yena a se ke a mo dumelela gore a tsene ka moo. ₂A re go Simsone: “Ke ile ka gopola gore ga o sa mo nyaka le gatee, ka gona ka mo fa mogwera wa gago. Fela ngwanabo yo monnyane ke yo mobotse go mo feta. O ka tšea yena sebakeng sa yola.”

₃Simsone a re: “Bjale gona nka se be le molato wa se ke tlago se dira Bafilista!” ₄Ka gona a ya a swara diphukubje tše makgolo a mararo, a di tlemaganya mesela ka dipedi ka dipedi, mme moo mahutong a tlemelela dithutse. ₅A tšhuma dithutse tšeo mme a lesa diphukubje tša tšhabela mašemong a Bafilista a korong. Ka tsela ye a se ke a tšhuma fela korong ye e bego e bunnwe, eupša a tšhuma le ye e bego e sa le lehlakeng, gotee le dirapa tša merara le tša mehlware. ₆Ge Bafilista ba botšiša gore ke mang yo a dirilego taba yeo, ba kwa gore e dirilwe ke Simsone ka gobane ratswalagwe, monna wa Timna, o neetše mogwera wa Simsone mosadi yola wa Simsone. Ka gona Bafilista ba ya ba tšhuma mosadi yoo a hwa, ba ba ba tšhuma le ngwako wa tatagwe.

₇Simsone a re go bona: “Ea, le dira ka mokgwa wo! Ke ena gore nka se lese go le otla go fihlela ke lefeleditše batho bao ka lena!” ₈A ba hlasela ka bogale mme a bolaya ba bantši ba bona. Ke moo a tlogilego a yo itulela ka mphatšeng legageng kua Ethamo.

₉Bafilista ba tla ba hloma mešaša Juda, gomme ba itokišetša go hlasela motse wa Lehi. ₁₀Banna ba Juda ba ba botšiša ba re: “Ke ka lebaka lang le nyaka go re hlasela?”

Bona ba ba fetola ba re: “Re tlile go swara Simsone gore re mo dire se a re dirilego sona.” ₁₁Ka gona banna ba dikete tše tharo ba Juda ba ya mphatšeng kua Ethamo gomme ba re go Simsone: “A ga o tsebe gore Bafilista ba a re buša? O re dirile eng?”

Simsone a ba fetola a re: “Ke ba dirile se ba ntirilego sona.”

₁₂Banna bao ba re: “Re tlile mo go tlo go tlema, gore re tle re go gafele diatleng tša bona.”

Simsone a re: “Nkeneleng gore lena ka bolena le ka se mpolaye.”

₁₃Bona ba re: “Go lokile, re tlilo go tlema fela mme ra go gafela go bona. Re ka se go bolaye le gatee.” Ka gona ba mo tlema ka dithapo tše pedi tše mpsha mme ba boa naye mphatšeng.

₁₄Ge a fihla Lehi, Bafilista ba tla ba kganyelela go yena ba mo goelela. Ka bjako maatla a Morena a mo tiiša, gomme a thaola dithapo tšela di bego di mo tlemile diatla le matsogo mo nkego o thaola tlhale ye e swelego. ₁₅Ke moo a bonego mohlagare wa pokolo ye e sa tšogo hwa. A inama a o topa, gomme a bolaya banna ba sekete ka wona. ₁₆Ka fao Simsone a opela a re:

₁₈Gomme Simsone a swarwa ke lenyora kudu, ka gona a llela Morena a re: “Ke wena o dirilego gore nna, mohlanka wa gago, ke fenye batho ba ka mokgwa wo mogolo wo; a bjale ke tlile go hwa ka lenyora mme ka thopša ke Bafilista ba ba go se bolle?” ₁₉Ka fao Morena a pharola sekhese sa moo Lehi mme sa tšwa meetse. Simsone a a nwa mme a thoma go ikwa a le kaone kudu. Ka gona mothopo woo wa rewa leina la Hakore; le bjale o sa le gona moo Lehi.

₂₀Simsone o etile Baisraele pele mengwaga ye masome a mabedi mehleng ya ge Bafilista ba buša naga.