To The Word – Day 68

₁Ka letšatši le lengwe Simsone a ya motseng wa Bafilista wa Gasa, moo a ilego a bona segwebakathobalo mme a yo robala naso. ₂Batho ba Gasa ba lemoga gore Simsone o fao, ka gona ba dikanetša felo moo mme ba mo lalela bošego ka moka kua kgorong ya motse. Ba lala ba homotše bošego ka moka, ka dipelong ba re: “Re tla letela go fihlela ge go esa, gomme ra mmolaya.” ₃Eupša Simsone a robala fela go fihlela bošegogare. Ke moka a tsoga, a swara mamati a kgoro ya motse a a tomola gotee le dikota tša ona le lepheko. A di šikara gomme a di rwala go ba go yo fihla mmotong wo o okametšego Hebrone.

₄Ka morago ga moo Simsone o ile a ratana le mosadi yo mongwe yo a bego a dula moeding wa Soreke; leina la gagwe e be e le Delila. ₅Magoši a mahlano a Bafilista a ya go mosadi yoo a re: “Goketša Simsone a go botše gore ke ka lebaka lang a tiile ka mokgwa wo, le gore re ka mo fenya bjang; re tle re mo tleme re mo fetše maatla. Yo mongwe le yo mongwe wa rena o tla go fa dipapetlana tše makgolo a lesome le motšo o tee tša silibera.”

₆Ka gona Delila a re go Simsone: “Hle, mpotše gore ke eng se se go dirago gore o be le maatla ka mokgwa wo. Ge motho a nyaka go go tlema le go go fetša maatla, a ka dira bjang?”

₇Simsone a mo fetola a re: “Ge ba ka ntlema ka mašika a a šupago a mafsa a mosebe a a sego a oma, ke tla felelwa ke maatla bjalo ka mang le mang.”

₈Ka gona magoši ale a Bafilista a tlišetša Delila mašika a a šupago a mafsa a mosebe a a sego a oma, gomme yena a tlema Simsone ka ona. ₉A bea banna ba bangwe ka phapošing ye nngwe gore ba dule ba mo laletše, mme a goa a re: “Simsone! Bafilista ba go wela godimo!” Fela Simsone a thaoganya mašika ale gabonolo bjalo ka tlhale e kgaogago ge e ekwa mollo. Ka gona ba no fela ba sa tsebe sephiri sa maatla a gagwe.

₁₀Delila a re go Simsone: “Bona, o ntirile setlatla wa se mpotše therešo. Hle, mpotše gore motho a ka go tlema ka eng.”

₁₁Simsone a mo fetola a re: “Ge ba ka ntsirimetša ka dithapo tše mpsha tše di sego tša ka tša šomišwa, ke tla felelwa ke maatla bjalo ka motho yo mongwe le yo mongwe.”

₁₂Ka gona Delila a tšea dithapo tše mpsha gomme a mo tlema. A goa a re: “Simsone! Bafilista ba go wela godimo!” Banna bale ba be ba letetše ka phapošing ye nngwe. Eupša Simsone a thaoganya dithapo tšela matsogong a gagwe bjalo ka tlhale.

₁₃Delila a re go Simsone: “O sa ntira setlatla ga o mpotše therešo. Mpotše gore motho a ka go tlema ka eng.”

Simsone a mo fetola a re: “Ge o ka logelela dintšhuthana tše di šupago tša moriri wa ka selogelong, mme wa di kokotela lebotong ka phatša, ke tla felelwa ke maatla bjalo ka motho mang le mang.”

₁₄Ke moo Delila a mo robaditšego, a tšea dintšhuthana tša moriri wa gagwe tše di šupago, mme a di logelela selogelong. A di kokotela ka phatša mme a goa a re: “Simsone! Bafilista ba go wela godimo!” Eupša o ile a tsoga mme a tomola phatša le selogelo sela.

₁₅Ka gona Delila a re go yena: “O reng o re o a nthata, etšwe o sa nthate? O ntirile setlatla gararo mme le bjale ga se wa mpotša gore ke eng se se go dirago gore o be le maatla ka mokgwa wo.” ₁₆O ile a fela a mmotšiša, letšatši ka letšatši. Simsone a tenwa la go hwa ka ge Delila a fela a mo šetše morago ka taba yeo ₁₇mo e lego gore mafelelong o ile a mmotša therešo a re: “Moriri wa ka ga se wa ka wa kotwa. Ke abetšwe Modimo ka ba Monasire go tloga matswalong a ka. Ge nka kotwa moriri, ke tla lahlegelwa ke maatla mme a mphelela bjalo ka mang le mang.”

₁₈Ge Delila a bona gore o mmoditše therešo, a romela molaetša go magoši ale a Bafilista a re: “Nke le boeng la mafelelo. O mpoditše therešo.” Ke moo ba ilego ba tla ba swere tšhelete yela. ₁₉Delila a robaditše Simsone diropeng tša gagwe mme a bitša monna yo mongwe a tla a mo kota dintšhuthana tše di šupago tša moriri. Ke moo Delila a thomilego go mo tlaiša, ka gobane o be a feletšwe ke maatla. ₂₀A goa a re: “Simsone! Bafilista ba go wela godimo!” O ile a tsoga mme a re ka pelong: “Ke tla tlemologa mme ka lokologa go no swana le mehleng.” O be a sa tsebe gore Morena o mo tlogetše. ₂₁Bafilista ba mo swara mme ba mo gonya mahlo. Ba mo iša Gasa, ba mo tlema ka diketane tša mphiri, gomme ba mo šidiša ka mehla tšhilong ya ka kgolegong. ₂₂Fela moriri wa gagwe wa thoma go mela gape.

₂₃Dikgoši tšela tša Bafilista di ile tša kopana go tlo bina monyanya le go direla modimo wa bona, Dagone, sehlabelo se segolo. Ba be ba opela ba re: “Modimo wa rena o gafetše Simsone, lenaba la rena, diatleng tša rena!” _24-25Ba be ba ipshina ba re: “Bitšang Simsone, a tle a re tloše bodutu!” Ge ba ntšhitše Simsone ka kgolegong, ba ile ba mo dira gore a ba tloše bodutu, mme ba mo emiša gare ga dikokwane. Ge batho ba mmona, ba ile ba reta modimo wa bona ba re: “Modimo wa rena o gafetše lenaba la rena diatleng tša rena; ke lona le le sentšego naga ya rena mme le bolailego batho ba bantši ba gaborena!” ₂₆Simsone a re go mošemane yo a bego a mo hlahla ka letsogo: “Anke ke phophole dikokwane tše di swerego moago wo. Ke nyaka go ithekga ka tšona.” ₂₇Moago woo o be o tletše banna le basadi. Magoši a Bafilista ka mahlano a be a le ka moo, gomme le tlhakeng go be go le banna le basadi ba e ka bago ba dikete tše tharo ba bogetše Simsone ge a ba tloša bodutu.

₂₈Ke moo Simsone a rapetšego a re: “Morena, Mong wa ka, hle, nkgopole; hle, Modimo, mphe maatla a ka gape lekga le tee fela, gore ka kotlo e tee ye ke itefeletše go Bafilista ka ge ba nkgontše mahlo ka mabedi.” ₂₉Ka gona Simsone a swara dikokwane tše pedi tša gare tše di swerego moago. A kgorometša ye nngwe ka letsogo la go ja, ye nngwe ka la nngele, ₃₀mme a goa a re: “A ke hwe le Bafilista!” A kgorometša ka maatla a gagwe ka moka, gomme moago wola wa wela dikgoši tšela tše tlhano le batho bohle ba ba bego ba le ka moo. Simsone a bolaya batho ba bantši ge a ehwa go feta ba a ba bolailego bophelong bja gagwe.

₃₁Bomorwarragwe le bohle ba lapa labo ba ile ba theoga ba tlo mo tšea. Ba gomela naye morago gomme ba mmoloka gare ga Tsora le Eshtaolo ka lebitleng la Manoa, tatagwe. E be e bile moetapele wa Baisraele mengwaga ye masome a mabedi.

₁Go kile gwa ba le monna yo mongwe yo leina la gagwe e bego e le Mika. Yena o be a dula nageng ya dithaba ya Efraime. ₂A re go mmagwe: “Nako yela o utsweditšwe dipapetlana tša silibera tše makgolo a lesome le motšo o tee, o ile wa rogaka lehodu la gona. Ke go kwele ge o le rogaka. Tšhelete yela še! Ke nna yo ke bego ke e tšere.”

Mmagwe a re: “A Morena a go šegofatše, morwa wa ka!” ₃O ile a bušetša mmagwe tšhelete yeo, mme mmagwe a re: “Go thibela thogako yela gore e se ke ya wela morwa wa ka, silibera yeo ke e abela Morena gore ka yona go manegwe seswantšho sa kota se se betlilwego. Ka gona, bjale ke go neela dipapetlana tše tša silibera.” ₄Ke moo Mika a di bušeditšego go mmagwe. Mmagwe a tšea tše makgolo a mabedi a di fa morudi wa tshipi, yo a ilego a dira modimo wa seswantšho, a o betla ka kota mme a o manega ka silibera yela. O ile wa bewa ka ngwakong wa Mika.

₅Yo Mika o be a na le lefelo la gagwe la tirelo. O ile a dira medimo ye mengwe ya diswantšho le seaparo se sekgethwa, gomme a bea yo mongwe wa barwa ba gagwe moprista wa gagwe. ₆Go be go se na kgoši mo Israele mehleng yeo; yo mongwe le yo mongwe o be a dira ka moo a ratago ka gona.

₇Ka yona nako yeo go be go na le lesogana la Molefi le le bego le falaletše motseng wa Betlelehema, nageng ya Juda. ₈Le ile la tloga Betlelehema go yo nyaka mo le ka dulago ntshe. Ge le ralala le ile la ba la fihla lapeng la Mika, nageng ya dithaba ya Efraime. ₉Mika a le botšiša a re: “A o tšwa kae?”

Lesogana leo la mo fetola la re: “Ke nna Molefi yo a tšwago Betlelehema, nageng ya Juda. Ke nyaka mo nka dulago gona.”

₁₀Mika a re: “Dula mo ga ka. Baa moeletši le moprista wa ka, gomme ke tla go fa dipapetlana tša silibera tše lesome ka ngwaga, le diaparo le dijo.” ₁₁Lesogana leo la Molefi la dumela go dula ka ga Mika gomme la ba bjalo ka morwa wa gagwe. ₁₂Mika a mmea moprista wa gagwe, mme yena a dula ka lapeng la Mika. ₁₃Mika a re: “Bjale ka gore moprista wa ka ke Molefi, ke tseba gore Morena o tla ntšhegofatša.”

₁Mehleng yeo go be go se na kgoši mo Israele. Ba kgoro ya Dane ba be ba sa inyakela naga ye ba ka dulago go yona, ka gobane ba be ba se ba tšwa ba arolelwa naga gare ga dikgoro tša Israele. ₂Ka gona batho ba Dane ba kgetha banna ba bahlano ba bogale malapeng ka moka a kgoro yeo, gomme ba ba roma go tloga motseng wa Tsora le wa Eshtaolo ba ba laela gore ba yo lekola naga. Ge ba fihla nageng ya dithaba ya Efraime ba lala lapeng la Mika. ₃Ge ba sa le moo ba lemoga mmolelo wa lesogana lela la Molefi, gomme ba ya go lona ba le botšiša ba re: “A o dirang fa? Ke mang yo a go tlišitšego mo?”

₄Yena a ba fetola a re: “Ke kwane le Mika, mme o nthwetše gore ke be moprista wa gagwe.”

₅Bona ba re go yena: “Hle, botšiša Morena ge eba re tla atlega leetong la rena.”

₆Moprista a ba fetola a re: “Le se ke la tshwenyega ka selo. Morena o le hlokometše mo leetong le.”

₇Ka gona banna bale ba bahlano ba tloga ba ya motseng wa Laishe. Ba bona ka moo batho ba moo ba phelago ba bolokegile ka gona, go swana le Basidone. Ba be ba sa gonone selo le gona ba se ne borumolane; gare ga bona go se seganka se se gatelelago motho ka se sengwenyana. Ba be ba dula kgolekgole le Basidone gomme ba sa dirišane le batho ba bangwe. ₈Ge banna bale ba bahlano ba boela Tsora le Eshtaolo, banna ba gabobona ba ile ba ba botšiša gore ba bone bjang. ₉Bona ba ba fetola ba re: “A re yeng re yo hlasela Laishe! Re bone naga yeo, gomme ke ye botse kudu. Le reng le dikadika? Itlhaganeleng! A re tseneng nageng yeo mme re e thopeng! ₁₀Ge le fihla kua le tla bona gore batho ba gona ba dutše ba iketlile. Ke naga ye kgolo ye e sa hlokego selo, mme Modimo o le gafetše yona.”

₁₁Ka gona banna ba makgolo a a selelago ba kgoro ya Dane ba tloga Tsora le Eshtaolo ba itlhametše ntwa. ₁₂Ba rotoga mme ba hloma mešaša ka bohlabela bja Kiriate-Jearime kua Juda. Ke ka lebaka leo felo fao go sa bitšwago mešašeng ya Dane. ₁₃Go tloga moo ba tšwela pele mme ba fihla kgauswi le lapa la Mika, nageng ya dithaba ya Efraime.

₁₄Ke moka banna bale ba bahlano ba ba bego ba kile ba tla go hlola naga ya go dikologa Laishe, ba re go banna ba gabobona: “Afa le a tseba gore ka ngwakong wo mongwe gona mo go na le modimo wa seswantšho wa kota wo o manegilwego ka silibera, le medimo ye mengwe ya diswantšho, le seaparo se sekgethwa? Bjale ge, le a tseba se le swanetšego go se dira.” ₁₅Ka gona ba phamogela lapeng la Mika, ngwakong wo go wona go bego go dula lesogana lela la Molefi, mme ba le dumediša. ₁₆Madira ale a makgolo a a selelago a Dane ona a be a eme kua kgorong a itlhametše ntwa. ₁₇Dihlodi tšela di fetšago seatla tša leba ka ngwakong mme tša tšea modimo wola wa seswantšho wa kota wo o manegilwego ka silibera, le medimo ye mengwe ya diswantšho, le seaparo se sekgethwa, mola moprista a eme kua kgorong le banna bale ba makgolo a a selelago ba ba itlhamilego.

₁₈Ge banna bale ba tsena ka ngwakong wa Mika mme ba tšea dilo tšela tša gagwe tše kgethwa, moprista a ba botšiša a re: “A le dirang?”

₁₉Bona ba re: “Homola! Se hlwe o bolela! Sepela le rena o be moeletši le moprista wa rena. A ga o nyake go ba moprista wa kgoro ka moka ya Israele go ena le gore o be moprista wa lapa la monna o tee?” ₂₀Seo se ile sa thabiša moprista, ka gona a tšea dilo tšela tše kgethwa a sepela nabo.

₂₁Ba ile ba retologa ba sepela, bana le diruiwa le tšohle tša bona di etile pele. ₂₂Ba be ba šetše ba le kgole le lapa leo ge Mika a bitša baagišani ba gagwe gore ba ye ntweng le yena. Ba ile ba swara banna bale ba Dane tseleng ₂₃gomme ba ba hlabela lešata. Banna ba Dane ba retologa ba botšiša Mika ba re: “A molato ke eng? Ke ka lebaka lang o rapile lekoko le lekaaka le?”

₂₄Mika a ba fetola a re: “A le rang ge le re: ‘Molato ke eng?’ Le tšere moprista wa ka le medimo ye ke e dirilego mme la sepela! A nna ke šaletšwe ke eng?”

₂₅Banna ba Dane ba re: “Go kaone o ikhomolele; go sego bjalo gona o tla ferehla banna ba mme ba go bolaya gotee le ba lapa la gago.” ₂₆Ge ba seno realo ba sepela. Mika a bona gore ba mo feta ka maatla, ka gona a retologa a ipoelela gae.

_27-28Ka morago ga ge banna ba Dane ba tšere moprista le dilo tšela tše kgethwa tše Mika a di dirilego, ba ya ba hlasela Laishe, motse wola wa batho ba go se gonone selo ba go se be le borumolane, wo o bego o le molaleng wo go wona go bego go le Bethe-Rehobo. Ba bolaya badudi ba moo mme ba tšhuma motse woo. Gwa se ke gwa ba le yo a ba hlakodišago, ka gobane Laishe e be e le kgole le Sidone mme batho ba gona ba sa dirišane le batho ba bangwe. Banna ba Dane ba ile ba aga motse woo ka lefsa, mme ba dula go wona. ₂₉Ba fetoša leina la wona la Laishe ba re ke Dane, ba o reela rakgolokhukhu wa bona, Dane, morwa wa Jakobo. ₃₀Banna ba Dane ba hloma modimo wola wa seswantšho gore ba o khunamele, gomme Jonathane, morwa wa Gershome, setlogolo sa Moshe, ya ba moprista wa kgoro ya Dane, mme ditlogolo tša gagwe ya ba baprista ba bona go fihlela batho bao ba išwa bothopša. ₃₁Modimo wola wa seswantšho wa Mika o ile wa no fela o le moo nako ka moka ya ge Tente ye Modimo a bego a khunamelwa go yona e sa le Shilo.

₁Mehleng yeo, pele ga ge nageng ya Israele go eba le kgoši, go be go na le Molefi yo mongwe yo a bego a falaletše kua kgole nageng ya dithaba ya Efraime. O ile a tšea mosetsana kua Betlelehema, nageng ya Juda, gore e be motlabo wa gagwe, ₂fela mosetsana a mo ngala, a boela lapeng la tatagwe kua Betlelehema, mme a dula gona dikgwedi tše nne. ₃Ke moka monna yoo a mo latela go yo mo goketša gore a boele go yena. O ile a tšea mohlanka wa gagwe le dipokolo tše pedi. Mosetsana yoo a tsenya Molefi yola ka ngwakong, gomme ge tatagomosetsana a bona monna yoo, a mo amogela ka lethabo. ₄A phegelela gore a dule, gomme a dula le bona matšatši a mararo. Molefi yo le mosetsana ba be ba eja, ba enwa, ba robala fao. ₅Mosong wa letšatši la bone ba tsoga e sa le bošego mme ba itokišetša go sepela. Fela tatagomosetsana a re go Molefi: “Jaa dijonyana pele. Di tla go lapološa. Ka morago ga moo le ka itshepelela.”

₆Ka gona banna bao ba babedi ba dula fase ba ja, ba nwa mmogo. Ke moo tatagomosetsana a itšego go Molefi: “Hle, robala mo o lale o iketlile.”

₇Molefi a ema a re ke a sepela, eupša tatagomosetsana a mo tutuetša gore a dule, ka gona a robala moo gape. ₈Ya re e sa le bošego mosong wa letšatši la bohlano Molefi a thoma gore ke a itokišetša go sepela, fela tatagomosetsana a re: “Hle, jaa dijo. Ema go fihlela ka merithi.” Ka gona banna bao ba babedi ba ja mmogo.

₉Ge monna yola le motlabo wa gagwe le mohlanka wa gagwe ba thoma gape gore ba a tloga, tatagomosetsana a re: “Bona, letšatši le šetše le ile bjale; lala mo. Leswiswi le tla swara gonabjale; dula mo o iketle. Ka moswane o ka tsogela tseleng wa boela gae.”

_10-11Eupša monna yola o be a sa nyake go robala moo gape, ka gona yena le motlabo wa gagwe ba wela tsela le mohlanka wa bona le dipokolo tša bona tše pedi tše di saleditšwego. E be e šetše e le mantšiboa ge ba fihla kgauswi le motse wa Jebuse, ke go re Jerusalema, ka gona mohlanka a re go mong wa gagwe: “Hle, a re phamogeng re robaleng mo motseng wo wa Bajebuse.”

_12-13Eupša mong wa gagwe a re: “Re ka se phamogele motseng woo badudi ba wona e sego Baisraele. A re feteng re yeng pejana re yo robala Gibea goba Rama.” ₁₄Ka gona ba sepela ba feta Jebuse ba tšwela pele le leeto la bona. Letšatši le be le dikela ge ba fihla Gibea nageng ya kgoro ya Benjamene. ₁₅Ba ile ba aroga tsela go yo robala moo. Ba tsena motseng mme ba dula lepatlelong la motse, eupša gwa se be le yo a ba biletšago lapeng la gagwe gore ba robale gona.

₁₆Ge ba sa le moo gwa rotoga mokgalabje yo mongwe yo a bego a tšo hlwa mašemong. Motho yoo ka setlogo e be e le wa naga ya dithaba ya Efraime, fela bjale a falaletše mo Gibea. Batho ba bangwe moo e be e le ba kgoro ya Benjamene. ₁₇Mokgalabje yoo o ile a bona mosepedi yola moo kgorong ya motse gomme a mmotšiša a re: “A o tšwa kae? O ya kae?”

₁₈Molefi yoo a mo fetola a re: “Re be re ile kua Betlelehema, nageng ya Juda, mme bjale re tseleng ya go ya gae kua kgole nageng ya dithaba ya Efraime. Ga go yo a re filego marobalo lapeng la gagwe, ₁₉le ge re itshwaretše ditlhaka le bjang bja dipokolo tša rena; re swere le senkgwa le beine tše di lekanego nna le motlabo wa ka le mohlanka wa ka. Re na le tšohle tše re di nyakago.”

₂₀Mokgalabje yoo a re: “A re yeng lapeng la ka. Ke tla le fa se le ka se hlokago; le se lale mo lepatlelong la motse.” ₂₁Ka gona a ba iša ga gagwe, a fepa dipokolo tša bona. Ba re go hlapa maoto ba ja, ba nwa.

₂₂Ba rile ba sa iketlile gwa tšwelela banna ba dihlola, ba dikanetša ngwako, gomme ba thoma go opaopa lemating. Ba re go mokgalabje yola: “Ntšha monna yola a tlilego nago mo gae. Re nyaka go mo robala!”

₂₃Fela mokgalabje yola a tšwela ntle gomme a re go bona: “Aowa, banna ba gešo! Hle, se direng taba ya bohlola ka mokgwa wo! Monna yo ke moeng wa ka. ₂₄Bonang mo! Motlabo wa gagwe šo, le morwedi wa ka yo a sego a ka a robala le monna šo. Ereng ke le ntšhetše bona gonabjale, le robale bona, mme le direng ka bona se le se ratago. Fela monna yo le se ke la mo dira taba yeo ya bohlola.” ₂₅Eupša banna bao ba se ke ba mo theetša. Ka gona Molefi a swara motlabo yola wa gagwe a mo ntšhetša ntle go bona. Ba mo kata, ba dira ka yena se ba se ratago bošego ka moka, mme ba mo lesa ge go esa.

₂₆Ka mahube mosadi yola a tla a wela lemating la ngwako wa mokgalabje yola, ka moo monna wa gagwe a bego a le ka gona. O be a sa le moo ge letšatši le hlaba. ₂₇Ge monna wa gagwe a tsoga mosong woo mme a bula lemati gore a wele tsela, a hwetša motlabo yola wa gagwe a rapaletše pele ga ngwako, diatla tša gagwe di obeletše lemati. ₂₈A re: “Tsoga, re sepele.” Eupša gwa hlokega karabo. Ka gona a tšea mohu yoo a mo nametša pokolo gomme a swara leeto la gagwe la go ya gae. ₂₉Ge a fihla, a tsena ka ngwakong, a tšea thipa. A tšea setopo sela sa motlabo wa gagwe a se ripaganya diripa tše lesome le tše pedi, gomme a romela seripa kgorong ye nngwe le ye nngwe ya Israele. ₃₀Yo mongwe le yo mongwe yo a di bonego o ile a re: “Ga se ra ka ra kwa taba ya mohuta wo! Ga se gwa ka gwa direga taba ye e swanago le ye go tloga mola Baisraele ba tlogago Egepeta. Naganang ka taba ye, le bolele se re ka se dirago.”

₁Baisraele ka moka, go tloga Dane go fihla Beresheba, le go tloga nageng ya Gileade, ba ile ba emaema. Ba bokana pele ga Morena kua Mitsepa ka pelo e tee. ₂Baetapele ba dikgoro ka moka tša Israele ba be ba le gona moo kgobokanong ye ya setšhaba sa Modimo, gomme go be go na le bahlabani ba go sepela ka maoto ba dikete tše makgolo a mane. ₃Babenjamene ba kwa gore Baisraele ba bangwe ba bokane kua Mitsepa.

Baisraele ba re: “Re laodišetšeng tša tiragalo ye mpe ye.” ₄Molefi yola motlabo wa gagwe a bolailwego a re: “Nna le motlabo wa ka re ile ra fihla Gibea, nageng ya Benjamene, ra lala gona. ₅Bošego banna ba Gibea ba tla ba ntlhasela, gomme ba dikanetša ngwako. Ba be ba ikemišeditše go mpolaya; bakeng sa go mpolaya ba kata motlabo wa ka, mme a hwa. ₆Ke ile ka tšea setopo sa gagwe, ka se ripaganya, gomme ka romela seripa kgorong ye nngwe le ye nngwe ya Israele. Batho bao ba dirile taba ye mpe ya bohlola mo nageng ya Israele. ₇Bjale ge bohle le kgobokane mo lena Baisraele, rerišanang ka taba ye le kwane.”

₈Setšhaba ka moka sa emelela mmogo sa re: “Go se be le o tee wa rena yo a yago gae, e ka ba mošašeng goba ka ngwakong. ₉Sese se re tlago se dira motse wa Gibea: Re tla dira matengwa a go kgetha batho ba ba tlago hlasela Gibea. ₁₀Monna o tee go ba lesome mo nageng ya Israele o tla swarela madira dijo, mme ba bangwe bona ba tla ya ba otla Gibea ka lebaka la taba ye mpe ye ba e dirilego mo Israele.” ₁₁Ka gona banna ka moka ba Israele ba bokana ka morero o tee – go hlasela motse woo.

₁₂Dikgoro tša Baisraele tša roma batseta nageng ka moka ya kgoro ya Benjamene gore ba re go bona: “Ke molato mang wo le o obilego wo? ₁₃Bjale ge, re gafeleng dihlola tšeo tša Gibea gore re tle re di bolaye mme re tloše bobe bjo mo Israele.” Eupša Babenjamene ba se ke ba theetša Baisraelekabona. ₁₄Ba ile ba tšwa metseng yohle ya Benjamene ba tla Gibea go tlo lwa le dikgoro tše dingwe ka moka tša Israele. _15-16Tšatšing leo ba rapa bahlabani ba dikete tše masome a mabedi a metšo ye e selelago metseng ya bona. Ntle le bao, baagi ba Gibea ba kgobokanya banna ba ba kgethilwego ba makgolo a a šupago bao ba bego ba šomiša matsogo a nngele. Yo mongwe le yo mongwe wa bona o be a kgona go foša leswika ka seragamabje a itia kgomo lenaka gomme a ka se tsoge a le phošitše. ₁₇Baisraele ba bangwe bona ba rapa bahlabani ba ba hlahlilwego ba dikete tše makgolo a mane.

₁₈Baisraele ba ile ba ya felo ga tirelo kua Bethele, gomme fao ba botšiša Modimo ba re: “A ke kgoro efe ye e swanetšego go hlasela Babenjamene pele?”

Morena a ba fetola a re: “Ke kgoro ya Juda.”

₁₉Ka gona Baisraele ba tšwa dira mosong wa le le latelago, gomme ba hloma mešaša kgauswi le motse wa Gibea. ₂₀Ge ba yo hlasela madira a Benjamene, ba ile ba beakanya bahlabani gabotse go lebana le motse. ₂₁Madira a Benjamene a tšwa motseng, mme tšatši leo ba bolaya bahlabani ba Baisraele ba dikete tše masome a mabedi a metšo ye mebedi. _22-23Ke moo Baisraele ba ilego felo ga tirelo mme ba lla pele ga Morena go fihlela mantšiboa. Ba mmotšiša ba re: “A re swanetše go yo lwa le bomorwarragorena Babenjamene gape?”

Morena a ba fetola a re: “Ee.”

Ka gona madira a Baisraele a ba le mafolofolo, gomme ba bea bahlabani ba bona gabotse gona mola ba bego ba ba beile maabane a ntshe. ₂₄Ba yo hlasela madira a Babenjamene lekga la bobedi. ₂₅Le ka lekga le Babenjamene ba tšwa Gibea gomme tšatši leo ba bolaya bahlabani ba Baisraele ba ba hlahlilwego ba dikete tše lesome le tše seswai. ₂₆Ke moo Baisraele – setšhaba ka moka – ba ilego Bethele, mme ba fihla ba lla. Ba dula moo pele ga Morena ba ikonne dijo go fihlela mantšiboa. Ba dira dihlabelo tša kagišano le tša go tšhungwa ka moka pele ga Morena. _27-28Polokelo ya Kgwerano ya Modimo e be e dula moo Bethele mehleng yeo, gomme e hlokometšwe ke Finease, morwa wa Eleasara, Eleasara morwa wa Arone. Setšhaba se ile sa botšiša Morena sa re: “Na re tšwe dira gape re yo lwa le bomorwarragorena, Babenjamene, goba re lese?”

Morena a ba fetola a re: “Tšwaang dira. Ka moswane ke tla ba gafela diatleng tša lena.”

₂₉Ka gona Baisraele ba bea balaledi go dikologa Gibea. ₃₀Ka lekga le la boraro, ge ba etla go lwa le Babenjamene, ba bea bahlabani ba bona go lebana le Gibea, bjalo ka makgeng a pele. ₃₁Babenjamene ba tšwa go tlo lwa, gomme ba išwa kgole le motse. Bjalo ka maloba ba ile ba thoma go bolaya Baisraele ba bangwe molaleng, tseleng ya go ya Bethele le tseleng ya go ya Gibea. Ba bolaya Baisraele ba e ka bago ba masome a mararo. ₃₂Babenjamene ba re: “Re ba fentše bjalo ka maloba.”

Baisraele ba be ba kwane gore ba katakate gore ba ba tloše motseng ba ba iše kua ditseleng. ₃₃Ka gona, ge bontši bja madira a Baisraele bo gomela morago mme bo ipopa gape kua Baale-Tamare, banna bale ba bego ba dikaneditše Gibea ba rutlologa mo ba bego ba laletše ntshe mola molaleng wa motse. ₃₄Banna ba dikete tše lesome bao ba hlaotšwego go Baisraele ka moka ba hlasela Gibea, gomme ntwa ya ba ye šoro. Babenjamene ba be ba sa lemoge gore ba batametše go fedišwa. ₃₅Morena a gafela Babenjamene diatleng tša Baisraele. Tšatšing leo Baisraele ba bolaya manaba a dikete tše masome a mabedi le tše tlhano le lekgolo, ₃₆gomme Babenjamene ba lemoga gore ba fentšwe.

Bontši bja madira a Baisraele bo ile bja boela morago ka gobane bo be bo tshephile banna ba ba bego ba laletše go dikologa Gibea. ₃₇Banna bao ba ile ba kganyelela Gibea ka bjako; ba bolaya yo mongwe le yo mongwe fao. ₃₈Bontši bja madira a Baisraele le banna bale ba bego ba laletše ba be ba kwane ka sešupo. Ge ba bona leru le legolo la muši le kuelela motseng, ₃₉Baisraele bale ba bego ba le kua go lwewago gona ba be ba swanetše go retologa. Ka nako yeo Babenjamene ba be ba šetše ba bolaile Baisraele bale ba masome a mararo. Ka pelong ba be ba re: “Ruri, re tloga re ba fentše bjalo ka maloba.” ₄₀Gwa napa gwa bonagala sešupo sela; leru la muši la thoma go kuelelela godimo le etšwa motseng. Babenjamene ba lebelela morago, gomme ba makala ge ba bona motse ka moka o lauma kgabo ya mollo. ₄₁Ke mo Baisraele ba retologilego, gomme Babenjamene ba thoma go tlalelwa ka gobane ba ile ba lemoga gore ba kgauswi le go fedišwa. ₄₂Ba tšhaba Baisraele ba leba lešokeng, eupša ba se ke ba phologa. Ba gakanega gare ga bontši bja madira le banna bale ba bego ba etšwa motseng, gomme ba fedišwa. ₄₃Baisraele ba dikanetša manaba a bona, gomme ba ba rakediša go tloga moo ba bego ba khuditše gona go ba go yo fihla ka bohlabela bja Gibea, ba tšama ba ba bolaya. ₄₄Go ile gwa bolawa bahlabani ba Babenjamene ba dikete tše lesome le tše seswai, bohle e le bahlabani ba bagale. ₄₅Ba bangwe ba retologa ba tšhabela lešokeng kua letlapeng la Rimone. Ditseleng tše kgolo go ile gwa bolawa ba dikete tše tlhano ba bona. Baisraele ba rakediša ba ba šetšego go yo fihla Gidomo, ba bolaya ba dikete tše pedi. ₄₆Babenjamene ba ba bolailwego mohlang woo e bile ba dikete tše masome a mabedi le tše tlhano, ka moka ga bona e le bahlabani ba bogale.

₄₇Fela banna ba makgolo a a selelago ba ile ba kgona go tšhabela lešokeng letlapeng la Rimone, gomme ba dula moo dikgwedi tše nne. ₄₈Baisraele ba boa ba hlasela Babenjamene bale ba bangwe, gomme ba bolaya se sengwe le se sengwe se ba se hwetšago – batho, gotee le diruiwa. Ba tšhuma motse wo mongwe le wo mongwe moo tikologong yeo.

₁Mola Baisraele ba be ba bokane kua Mitsepa ba ile ba enela Morena ba re: “Ga go le o tee wa rena yo a tlago dumelela Mobenjamene go nyala morwedi wa gagwe.” ₂Setšhaba sa Israele sa ya Bethele gomme sa dula fao pele ga Modimo go fihlela mantšiboa. Ba hlaboša mantšu ba lla gabohloko ba re: ₃“Morena Modimo wa Israele, ke ka lebaka lang taba ye e diregile, ge kgoro ya Benjamene e nyaka go timelela mo Israele?”

₄Ka le le latelago setšhaba sa tsogela go aga aletare moo, sa dira dihlabelo tša kagišano le tša go tšhungwa ka moka. ₅Ba botšišana ba re: “Mo go dikgoro ka moka tša Israele ke ofe yo a ilego a se ye kopanong pele ga Morena kua Mitsepa?” Ba be ba enne ba tiišitše gore yo a bego a se a ya Mitsepa o tla bolawa. ₆Setšhaba sa Israele se ile sa šokela bomorwarragosona Babenjamene, gomme sa re: “Lehono Baisraele ba lahlegetšwe ke ye nngwe ya dikgoro tša bona. ₇Re tla dira eng gore banna ba Benjamene ba ba šetšego re ba hweletše basadi? Ke rena re enetšego Morena gore re ka se ba fe barwedi ba rena.”

₈Ge ba botšišana ge eba go na le yo mongwe wa dikgoro tša Israele yo a ilego a se ke a ya kopanong yela ya kua Mitsepa, ba ile ba lemoga gore ga go le o tee wa Jabeshe kua Gileade yo a bego a ile; ₉ge go bitšwa madira ka maina ga go le o tee wa Jabeshe yo a ilego a araba. ₁₀Ka gona kopano yeo ya roma banna ba dikete tše lesome le tše pedi ba bogale ba yona mme ya ba laela ya re: “Sepelang le yo bolaya badudi bohle ba kua Jabeshe, gammogo le basadi le bana. ₁₁Le bolayeng banna le bašemane ka moka, le mosadi yo mongwe le yo mongwe yo a kilego a robala le monna.” ₁₂Gare ga batho ba Jabeshe ba ile ba hwetša makgarebe a makgolo a mane a a sego a ka a robala le banna, ka gona ba ba tliša mešašeng kua Shilo, motse wo o lego nageng ya Kanana.

₁₃Ke moka kopano ya roma batseta go Babenjamene ba ba bego ba le letlapeng la Rimone, gomme ba ba begela gore ba fediša ntwa. ₁₄Babenjamene ba ile ba boa, gomme Baisraele ba bangwe ba ba fa basetsana bale ba Jabeshe bao ba bego ba se ba ba bolaya. Eupša ba be ba sa ba lekane.

₁₅Setšhaba sa šokela Babenjamene ka gobane Morena o be a sentše seboka sa dikgoro tša Israele. ₁₆Ka gona baetapele ba kopano yeo ba re: “Basadi ka moka kgorong ya Benjamene ba bolailwe. Re ka dirang go hweletša banna ba ba šetšego basadi? ₁₇Baisraele ga se ba swanela go lahlegelwa ke ye nngwe ya dikgoro tša bona tše lesome le tše pedi. Re swanetše go loga maano a gore kgoro ya Benjamene e fele e phela, ₁₈eupša re ka se ba dumelele gore ba nyale barwedi ba rena, ka gobane re rogakile yo mongwe le yo mongwe wa rena yo a dumelelago Mobenjamene go nyala yo mongwe wa barwedi ba gagwe.”

₁₉Ke moka ba re: “Bonang, ngwaga ka ngwaga go na le monyanya wa Morena kua Shilo.”

Shilo e ka leboa la Bethele, ka borwa bja Lebona, ka bohlabela bja tsela ye e lego gare ga Bethele le Shekeme.

₂₀Ba ile ba re go Babenjamene: “Sepelang le yo lalela kua dirapeng tša merara ₂₁mme le ntšhe mahlo dinameng. Ge basetsana ba Shilo ba etšwa go tlo bina nakong ya monyanya, le tsupologeng dirapeng tša merara. Yo mongwe le yo mongwe wa lena a ithopele mosadi go basetsana bao, gomme a boele naye nageng ya Benjamene. ₂₂Ge botatagobona goba dikgaetšedi tša bona ba ka tla go lena ba belaela, le re go bona: ‘Hle, re leseng re duleng nabo, ka gobane ga se ra ba tšea go lena ntweng gore e be basadi ba rena. Gomme ka ge le se la re fa bona, ga le na le molato wa go tshela keno yela ya lena.’ ”

₂₃Babenjamene ba dira bjalo; yo mongwe le yo mongwe wa bona a ikgethela mosadi go basetsana ba ba bego ba bina kua Shilo gomme a mo tšhabiša. Ke gona ba boetšego nageng ya bona, ba tsošološa metse ya bona, mme ba dula moo. ₂₄Ka yona nako yeo Baisraele ba bangwe le bona ba tloga, gomme monna yo mongwe le yo mongwe a ipoelela kgorong ya gabo, le lapeng la gagwe, karolong ye a e abetšwego ya naga.

₂₅Go be go se kgoši mo Israele mehleng yeo. Yo mongwe le yo mongwe o be a dira boithatelo.