To The Word – Day 71

₁Nna, Paulose, yo ka thato ya Modimo ke lego moapostola wa Kriste Jesu, le Timotheose, ngwanaborena, ₂re dumediša bakgethwa ba motse wa Kolose, bona e lego Bakriste ba ba botegago, re re:

Nke Modimo, Tatagorena, a le gaugele, a le fe khutšo.

₃Ka mehla ge re le rapelela, re leboga Modimo, Tatago Morena wa rena Jesu Kriste, ₄ka ge re kwele tša tumelo ya lena go Kriste Jesu, le tša lerato la lena la ge le rata badumedi bohle. _5-6Mohla molaetša wa nnete, e lego yona Taba ye Botse ya Jesu, o le tlela la mathomo, le ile la kwa ka kholofelo ye o e tlišago. Ka gona, tumelo ya lena le lerato di ithekgile ka se le se holofetšego, se le se lotetšwego legodimong. Ebangedi e bega kgaugelo ya Modimo, gomme e phatlalala le lefase ka moka ka mokgwa wo le go lena e ilego ya phatlalala mohlamonene ge le thoma go kwa tša kgaugelo ya Modimo le bile le thoma go e tseba ka mo e lego ka gona. ₇Seo le se rutilwe ke Ephafrase, mohlankakarena yo re mo ratago, yo a botegelago go direla Kriste ka lebaka la lena. ₈Ke yena a re anegetšego tša lerato le le le filwego ke Moya.

₉Ka lebaka leo, e sa le go tloga mola ra kwago ka lena, ga re lese go le rapelela. Re kgopela Modimo gore a le tlatše tsebo ya thato ya gagwe, ka bohlale bjohle le kwešišo yohle ye e tšwago go Moya wa gagwe. ₁₀Ke mo le tlago kgona go phela ka mo Morena a nyakago ka gona, la dira fela tše di mo kgahlago. Bophelong bja lena la tšweletša tša go loka tša mehuta, la tšwela pele le go tseba Modimo. _11-12La tiišwa ka maatla ohle a go tšwa bogošing bja gagwe bja letago, gore le kgone go kgotlelela tšohle le sa fele pelo. La leboga Tatagorena ka thabo, yena a dirilego gore le lokelwe ke go hwetša kabelo ya bohwa bjo bo lego mmušong wa seetša bjo Modimo a bo beetšego badumedi. ₁₃O re hlakodišitše maatleng a raleswiswi a re iša mmušong wa Morwamoratwe wa gagwe, ₁₄yo a re lokolotšego ka go re swarela dibe.

₁₅Kriste ke seswantšho sa Modimo yo a sa bonalego. Ke yena yo a fetago dihlolwa ka moka; ₁₆gobane dilo tšohle legodimong le lefaseng, tše di bonalago le tše di sa bonalego, di hlodilwe ka yena, le ge e le maatla a semoya, le babuši ba semoya, le magoši a semoya, le balaodi ba semoya. Tšohle di hlodilwe ka yena ebile di hloletšwe yena. ₁₇Yena o bile gona pele ga tšohle, le gona tšohle di kopane go yena. ₁₈Ke yena hlogo ya mmele wa gagwe, e lego kereke; ke yena mohlomi wa yona. Ke yena wa mathomo wa go tsošwa bahung, e le gore dilong tšohle e tle e be yena wa go tšea maemo a mathomo. ₁₉Gobane ke ka mo go ratilego Modimo ge Morwagwe a na le tlhago ye e feletšego ya gagwe. ₂₀Gomme ka yena Modimo o ratile go boelanya tšohle tša mo lefaseng le tša kua legodimong le yena mong, a boelanya tšohle ka lehu la Morwagwe sefapanong.

₂₁Le lena le kile la ba bakgelogi le manaba a Modimo ka lebaka la makgopo a le bego le a dira goba le a nagana. ₂₂Eupša bjale Modimo o le boelantše le yena ka Morwagwe yo a ilego a phela e le motho, a tla a hwa gore le tlišwe go Modimo le le ba bakgethwa, ba ba se nago molato, ba ba se nago bosodi. ₂₃Fela le swanetše go dula le tieletše tumelong le sa šikinyege kholofelong ye le bilego nayo mohla le botšwa Ebangedi. Nna, Paulose, ke mohlanka wa yona Ebangedi ye, yona ye e begelwago batho bohle lefaseng.

₂₄Bjale ke thabetše ge ke hlokofatšwa ka lebaka la lena, gobane ka go hlokofatšwa mmeleng ke tlaleletša mo go hlaetšego mola Kriste a hlokofaletšwa kereke, yona e lego mmele wa gagwe. ₂₅Nna ke dirilwe mohlanka wa kereke ke Modimo yo a mphilego wona modiro wo gore ke o direle go le hola. Ke modiro wa go bega molaetša wa gagwe ka botlalo, ₂₆wona o lego sephiri se a bego a se utetše meloko ye e fetilego go tloga kgale, eupša bjale o se utolletše bakgethwa ba gagwe. ₂₇Maikemišetšo a Modimo e bile go utollela bakgethwa ba gagwe sephiri se se makatšago se a bego a tlilo se utollela baditšhaba. Sephiri sa gona ke gore Kriste o ka mo gare ga lena; ka yena le holofela gore le tla hwetša kabelo letagong la Modimo. ₂₈Ke yena yo re mmegago ka go eletša batho bohle re ba ruta ka bohlale bjohle gore re ba tliše go Modimo e le ba ba budulego, e le selo se tee le Kriste. ₂₉Gore ke tle ke kgone seo ke ikokoropa ke katana, ke šomiša maatla a magolo ao Kriste a mphago ona, ao a šomago mo go nna.

₁Ke rata ge le tseba ka mo le ntlhobaetšago ka gona, lena le ba Laodisea le bohle ba ba sa ntsebego. ₂E le ge ke gabile gore le kgothatšege mme le be ba tee ka lerato, le be le tshepo ye e tletšego ye e tlišwago ke kwešišo. Ke ka mo le tlago tseba sephiri sa Modimo, e lego Kriste ka noši. ₃Ke yena yo go yena go fihlilwego mahumo ohle a bohlale le tsebo.

₄Ge ke realo ke direla gore le se forwe ke motho ka leleme le boreledi. ₅Gobane le ge ka setopo ke se na le lena, ka moya gona ke na le lena, gomme ke thaba ge ke bona ditirelo tša lena di sepetšwa ka bothakga, gomme le lena le tiile mo tumelong ya lena go Kriste.

₆Ka ge le amogetše Kriste Jesu gore e be Morena wa lena, le phele le le ba tee le yena. ₇Le dule le tieletše go yena, lena ba ba agilego godimo ga gagwe, gomme le tie tumelong ya lena, ka mo le rutilwego ka gona. Le mo leboge kudu.

₈Le itlhokomele gore go se be le yo a kago le lahletša ka mahlajana a gagwe le maradia a a se nago mohola a a tšwago setšong sa batho le meoyeng ye e bušago lefase, a a sa tšwego go Kriste. ₉Gobane mo go Kriste, mo tlhagong ya gagwe ya botho, go phela bomodimo ka botlalo, ₁₀gomme lena le filwe bophelo bjo bo feletšego, le le ba tee le yena. Ke yena a okametšego magoši ohle a semoya le balaodi bohle ba semoya.

₁₁Le bolotše le le ba tee le Kriste, e sego lebollo le le dirwago nameng, eupša la Kriste, lona e lego go lokollwa mmeleng wo o bolago. ₁₂Gobane kolobetšo ya lena e be e šupa go bolokwa ga lena le Kriste, le go tsošwa ga lena le yena ka go dumela ga lena maatleng a Modimo yo a mo tsošitšego bahung. ₁₃Le be le le ba ba hwilego moyeng ka lebaka la dibe tša lena le ka lebaka la gore le be le le baditšhaba. Eupša Modimo o le phedišitše le Kriste ka go re swarela dibe tša rena ka moka; ₁₄o fedišitše lengwalo la melato ya rena le le bego le laetša gore re swanetše go lefa bokae, gomme a le tloša ka go le kokotela sefapanong. ₁₅Ke gona sefapanong se mo Modimo a ilego a amoga magoši a semoya le balaodi ba semoya maatla a bona a go buša; a ba dira dibogwane ka go ba gapa a ba fentše.

₁₆Ka gona, le se ke la dumela go solwa ke motho mabapi le tše le di jago le tše le di nwago, goba mabapi le matšatši a menyanya goba Monyanya wa Lebalana goba Sabatha. ₁₇Dilo tša mohuta wo ke diswantšho fela tša tše di sa tlilogo tla; bonnetennete bja taba ke Kriste. ₁₈Le se ke la dumela go amogwa se e lego sa lena ke motho yo a kgantšhago boikokobetšo bjo e sego bjona, le go khunamela barongwa, a re o bona dipono etšwe a sa bone selo, a no ikgogomoša ntle le lebaka ka lebaka la menagano ya gagwe ya botho, ₁₉gomme a sa itshwarelele ka Kriste, yena e lego hlogo ya mmele. Ge mmele wohle o laolwa ke Kriste, e ba wo o fepegilego, wo o swaraganego ka makopano le mešifa, gomme o gola ka mo Modimo a nyakago ka gona.

₂₀Ka ge le hwile le Kriste, gomme le lokolotšwe meoyeng ye e bušago legohle, le reng le phela bjalo ka ge nke le ba lefase le? Le reng le latela melawana ye e rego ₂₁“O se sware se,” “O se je seo,” “O se kgome se”? ₂₂Etse tše ka moka di ama dijo tše di felago ge di lewa. E dio ba melao le dithuto tša go bewa ke batho. ₂₃Melao ya mohuta wo e bonala nke e beilwe ka bohlale, mola e dio ba borapedi bja maitirelo, le boikokobetšo bjo e sego bjona, le go itlhokofatša mmeleng, kganthe gabotse ga e na mohola mo go laoleng ga ditumo tša nama.

₁Ka ge bjale le tsošitšwe bahung le Kriste, nyakang tša legodimong, moo Kriste a dutšego madulong a bogoši kgauswi le Modimo. ₂Naganang tša legodimong, e sego tša mo lefaseng, ₃gobane le hwile, gomme bophelo bja lena bo fihlilwe le Kriste go Modimo. ₄Bophelo bja lena ke Kriste, gomme mohla a etla ka borena le lena le tla ba naye le na le letago la gagwe.

₅Bjale ge, tlogelang ditumo tša lena tša nama bjalo ka bofebe, bootswa, ditumo tše mpe, le megabaru, yona e lego go khunamela medingwana. ₆Tše dibjalo ke tšona tše di tlišetšago ba go se theeletše Modimo kgalefo ya gagwe. ₇Pele le be le phela ka ditumo tše dibjalo, di le laola mo bophelong.

₈Eupša bjale le swanetše go lahla dilo tše ka moka, e lego pefelo, kgalefo, lehloyo le lesebo. Dipolelo tša dihlong di se tšwe melomong ya lena. ₉Le se aketšane, gobane tlhago ya lena ya kgale le e apotše gotee le ditiro tša yona, ₁₀gomme la apara ye mpsha ye Modimo, Mmopi wa yona, a dulago a e mpshafatša gore e swane le yena, gore le tle le mo tsebe ka botlalo. ₁₁Ge go le bjalo, ga go sa kgethologanywa Mojuda le yo e sego Mojuda, yo a bolotšego le yo a sego a bolla, ga go sa na yo a sego a hlabologa le motala, lekgoba le molokologi, yo a lego gona ke Kriste yo e lego tšohle mo go bohle.

₁₂Ke lena ba ba kgethilwego ke Modimo, ba le lego ba bakgethwa ba a le ratago. Ka gona, le apare kwelobohloko le botho le boikokobetšo le boleta le bopelotelele. ₁₃Le se felelaneng pelo, gomme ge le fošetšane le swarelaneng. Le swarelaneng go etša ge Morena le yena a le swaretše. ₁₄Godimo ga tšeo ka moka le be le lerato, lona le le tlemaganyago ka mo go phethilego. ₁₅Mererong ya lena le hlahlwe ke khutšo ye le e fiwago ke Kriste, gobane Modimo o le bileditše gona khutšong ye gore le be mmele o tee; gomme le leboge. ₁₆Molaetša wa Kriste o dule ka dipelong tša lena o feletše. Le rutaneng, le eletšaneng ka bohlale bjohle. Le opeleleng Modimo dipesalome le difela le dikopelo tša semoya ka dipelo tša lena le mo leboga. ₁₇Tšohle tše le di bolelago le tše le di dirago le di dire le le balatedi ba Morena Jesu le le gare le leboga Modimo, Tatagorena, ka yena.

₁₈Lena basadi, ikokobetšeng go banna ba lena, gobane seo ke sona se se swanetšego badumedi ba Morena.

₁₉Lena banna, ratang basadi ba lena gomme le se ba gakalele.

₂₀Lena bana, le hlompheng batswadi ba lena mo go tšohle, gobane seo ke sona se se kgahlago Modimo.

₂₁Lena botatagobana, le se tshwenye bana ba lena, gore ba se nolege moko.

₂₂Lena makgoba, le theeletšeng beng ba lena ba mo lefaseng dilong ka moka, le sa direle gore ba le bone mme ba le rete; eupša le ba theeletše ka botshepegi ka ge le boifa Morena.

₂₃Sengwe le sengwe se le se dirago le se dire ka pelo ka moka, mo nkego ga le se direle motho, le se direla Morena, ₂₄le tseba gore moputso wo le tlago o fiwa ke Modimo ke wo a o beetšego ba e lego ba gagwe. Gobane gabotse Morena yo le mo hlankelago ke Kriste. ₂₅Mokgopo o tla boelwa ke bokgopo bjo a bo dirilego, ka gobane Modimo o ahlola batho a sa kgetholle.

₁Lena beng ba makgoba, le swareng makgoba a lena ka toka le ka tshwanelo, le tseba gore le lena le na le mong wa lena legodimong.

₂Phafogelang go rapela le kgothetše le leboga Modimo. ₃Le rena le re rapeleleng, gore Modimo a re fe sebaka se sebotse sa go bega molaetša wa gagwe mabapi le sephiri sa Kriste. Gobane ke sona se nna ke se golegetšwego. ₄Nthapeleleng, gore ke utolle sephiri se gabotse, bjalo ka ge go ntebane.

₅Le hlalefele go phedišana gabotse le bao e sego badumedi, gomme sebaka se sengwe le se sengwe se le se hwetšago le se šomišetše go ba bontšha gore lena le badumedi. ₆Ka mehla tše le di bolelago e be tše di kgahlišago, tše di nago le letswai, le gona le kgone go fetola mang le mang ka mo go swanetšego.

₇Tigikose, ngwanaborena yo re mo ratago, modiri le mohlankakarena wa go botegela modiro wa Morena, o tla le anegela tšohle ka nna. ₈Ke ka lebaka leo ke mo romago go lena, gore a tle a le tsebiše ka mo bohle re phelago ka gona, mme a le thobe dipelo. ₉O tla be a na le Onesimose, modumedikarena yo a botegago le yo re mo ratago, yo e lego mophuthego wa lena. Ba tla le anegela tšohle tše di diregago mo.

₁₀Aristargose yo e lego mogolegwakanna o re le dumele, le Markose, motswala wa Barnabase, yo le šetšego le laetšwe gore ge a ka tla moo ga gabolena le mo amogele, le yena o re le dumele. ₁₁Jesu, yo a tsebjago le ka la Justose, le yena o a le dumediša. Bao ke bona fela basokologi ba Bajuda ba ba thušanago le nna modirong wa go bega molaetša wa Modimo, gomme ba nthekgile e le ruri.

₁₂Le dumedišwa ke Ephafrase, yo mongwe gape mophuthego wa gabolena, yo e lego mohlanka wa Kriste Jesu. O dula a le rapelela a kgothetše a kgopela Modimo gore a le tiiše tumelong le be badumedi ba ba budulego, ba ba sa tekatekego, le ba ba phethago thato ya Modimo ka botlalo. ₁₃Nna ke hlatsela gore o itapiša kudu ka lebaka la lena le bale ba kua Laodisea le Hierapolise. ₁₄Lukase, ngaka ya rena ye re e ratago, le Demase ba re le dumele.

₁₅Le dumediše badumedi ba ba lego kua Laodisea, le dumediše le Nimfa mmogo le phuthego ye e tsenelago ka lapeng la gagwe. ₁₆Ge le seno bala lengwalo leo, le dire gore le balwe le phuthegong ya Laodisea. Gomme le lena le bale la go tšwa Laodisea. ₁₇Le botše Argipose le re: “O hlokomele gore o phethe modiro wo o o filwego ke Morena.”

₁₈Ka seatla sa ka ke ngwala go re: Paulose o re le dumele. Le gopole gore ke sebofša.

Modimo a le gaugele.