To The Word – Day 73

₁Go be go na le monna yo mongwe yo leina la gagwe e bego e le Elkana, a etšwa nageng ya dithaba ya Efraime. E be e le wa kgoro ya Efraime, gomme a dula motseng wa Rama. E be e le morwa wa Jerohamo, Jerohamo morwa wa Elihu, gomme e le wa lapa la Tohu, seripa sa kgorwana ya Tsufe. ₂Elkana o be a na le basadi ba babedi, Hanna le Penina. Penina o be a na le bana, eupša Hanna a se na le ngwana. ₃Ngwaga wo mongwe le wo mongwe Elkana o be a tloga Rama a yo khunamela Morena Ramaatlaohle, le go mo direla dihlabelo kua Shilo, moo Hofni le Finease, barwa ba babedi ba Eli, e bego e le baprista ba Morena. ₄Nako ye nngwe le ye nngwe ge Elkana a dira sehlabelo, o be a efa Penina karolo e tee ya nama, mme yo mongwe le yo mongwe wa bana ba gagwe le yena a fiwa ya gagwe karolo. ₅Gomme le ge a be a rata Hanna kudu o be a mo fa karolo e tee fela, ka gobane Morena o be a mo hlokišitše bana. ₆Penina, mogaditšong wa gagwe, o be a mo kweša bohloko kudu gore a mo nyamiše, ka gobane Morena o be a mo dirile moopa. ₇Taba yeo e ile ya hlaga ngwaga ka ngwaga; nako ye nngwe le ye nngwe ge ba ile ngwakong wa Morena, Penina o be a šulafatša Hanna kudu mo e lego gore o be a lla mme a gana go ja dijo. ₈Elkana, monna wa gagwe, o be a mmotšiša a re: “Hanna, o llela eng? Ke ka lebaka lang o sa je? O reng o dula o nyamile? A go wena nna ga ke phale barwa ba motho ba lesome?”

_9-10Ka letšatši le lengwe, ge ba feditše go ja ka ngwakong wa Morena kua Shilo, Hanna a emelela. O be a nyamile kudu, mme a lla gabohloko ge a rapela Morena. Ka yona nako yeo moprista Eli o be a dutše setulong sa gagwe mojako. ₁₁Hanna a ena a re: “Morena Ramaatlaohle, ntebelele, nna, mohlanka wa gago! Bona bothata bja ka mme o nkgopole! Hle, se ntebale! Ge o ka mpha ngwana wa mošemane, ke tshephiša gore ke tla mo abela wena bophelo bja gagwe ka moka, le gore a ka se tsoge a kotilwe moriri.”

₁₂Hanna o ile a rapela Morena nako ye telele, gomme Eli a lebeletše molomo wa gagwe. ₁₃O be a rapela ka setu; melomo ya gagwe e be e benyabenya, eupša a sa ntšhe lentšu. Ka gona Eli a gopola gore o tagilwe, ₁₄gomme a re go yena: “Nke o tlogele botagwa bjoo bja gago! Sepela o yo fodiša hlogo!”

₁₅Mosadi a mo fetola a re: “Aowa, ga se ka tagwa, mong wa ka. Ga se ka nwa! Ke no ba fela mosadi yo a nyamilego, gomme ke be ke tšhollela matshwenyego a ka go Morena. ₁₆O se ke wa ntshema mosadi wa lefeela. Ke be ke rapela ka mokgwa woo gobane ke bothateng mme ke nyamile kudu.”

₁₇Eli a re: “Itshepelele ka khutšo, mme Modimo wa Israele a go fe se o se kgopetšego.”

₁₈Mosadi a mo fetola a re: “Nke o fele o nkgopola ka botho.” Gomme a tloga, a ja dijo, mme a se hlwe a nyamile.

₁₉Mosong wa le le latelago Elkana le ba lapa la gagwe ba tsoga e sa le bošego, mme ge ba seno khunamela Morena, ba boela Rama. Elkana a robala le mosadi wa gagwe, Hanna, gomme Morena a kwa thapelo ya Hanna. ₂₀Ka gona a ima, mme a belega ngwana wa mošemane. A mo rea leina la Samuele, mme a le hlatholla a re: “Ke mo kgopetše go Morena.”

₂₁Nako e ile ya fihla gape ya gore Elkana le ba lapa la gagwe ba ye Shilo, mme ba yo direla Morena sehlabelo sa ngwaga ka ngwaga, le go phetha keno ya gagwe. ₂₂Eupša ka lekga leo Hanna a se ke a ya. O ile a botša monna wa gagwe a re: “Ge ngwana a se no tshwa letswele, ke tla mo iša ngwakong wa Morena moo a tlago dula bophelo bja gagwe ka moka.”

₂₃Elkana a mo fetola a re: “Go lokile, dira se o bonago se swanetše; šala mo gae go fihlela o mo tshweša. Gomme Morena a dire gore keno ya gago e phethege.” Ka gona Hanna a šala gae a fepa ngwana wa gagwe.

₂₄O rile go mo tshweša letswele a mo iša Shilo, a ya le powana ya mengwaga ye meraro, serotwana sa dikilokramo tše lesome tša bupi, le lekuka la beine. A tšea Samuele, le ge e be e sa le yo monnyane, a mo iša ngwakong wa Morena kua Shilo. ₂₅Ba re go hlaba powana yeo, ba iša ngwana yoo go Eli. ₂₆Hanna a re go yena: “Mong wa ka, afa o sa nkgopola gore ke nna mosadi yola a kilego a ema fa kgauswi le wena a rapela Morena. ₂₇Ke be ke mo kgopela yena ngwana yo, gomme o mphile se ke bego ke se kgopela. ₂₈Ka gona nna ke mo abela Morena. Bophelo bja gagwe ka moka e tla ba wa Morena.”

Ya ba ba khunamela Morena fao.

₁Hanna a rapela a re:

₁₁Ya ba Elkana o ipoelela gae Rama, eupša mošemanyana Samuele a šala Shilo mme a hlankela Morena a hlokometšwe ke moprista Eli.

₁₂Barwa ba Eli e be e le batho ba babe. Ba be ba sa re selo ka Morena ₁₃goba ka melao mabapi le tše di nyakwago ke baprista setšhabeng. E be e re ge motho a direla Modimo sehlabelo, mohlanka wa moprista a tle ka lešimelo la ntlha tše tharo. E re nama e sa apeilwe, ₁₄a sobeletše lešimelo ka pitšeng, goba ka moruswing, goba ka lekopelong, goba ka paneng, gomme se lešimelo le boago naso e be sa moprista. Baprista ba be ba dira ka mokgwa woo Moisraeleng yo mongwe le yo mongwe yo a bego a etla Shilo go tlo dira sehlabelo. ₁₅Le pele ga ge makhura a tšhungwa, mohlanka wa moprista o be a etla go modirasehlabelo a re: “Mphe nama ye moprista a tlago e beša; ga a nyake ge o mo fa nama ye e apeilwego, o nyaka nama ye tala.”

₁₆Ge motho yoo a be a ka mo fetola a re: “A go tšhungwe makhura pele, ke gona o kago tšea se o se nyakago,” mohlanka wa moprista o be a re: “Aowa! Mphe yona gonabjale! Ge o sa mphe, ke tla e tšea ka kgang!”

₁₇Sebe se sa barwa ba Eli e be e le se sešorošoro mahlong a Morena, ka gobane ba be ba sa hlomphe dihlabelo tša Morena.

₁₈Mošemanyana Samuele yena o ile a tšwela pele le go hlankela Morena, a apara seaparo se sekgethwa sa lešela. ₁₉Ngwaga ka ngwaga mmagwe o be a mo rokela seaparwana mme a mo išetša sona ge a eya le monna wa gagwe go yo dira sehlabelo sa ngwaga wo mongwe le wo mongwe. ₂₀Ke moo Eli a bego a šegofatša Elkana le mosadi wa gagwe, mme a re go Elkana: “A Morena a go fe bana ba bangwe ka mosadi yo go ema legatong la yo o mo abetšego yena.”

Ka morago ga moo ba be ba boela gae.

₂₁Morena o ile a šegofatša Hanna, gomme a ba le barwa ba bangwe ba bararo le barwedi ba babedi. Mošemanyana Samuele a gola a hlankela Morena.

₂₂Eli bjale o be a tšofetše kudu. O be a fela a ekwa tšohle tše barwa ba gagwe ba di dirago Baisraele, le gore ba be ba robala le basadi ba ba bego ba šoma mojakong wa Tente ya bodulo bja Morena. ₂₃Ka gona a re go bona: “Ke ka lebaka lang le dira dilo tše? Yo mongwe le yo mongwe o mpotša ka tše mpe tše le di dirago. ₂₄Aowa, barwa ba ka! Taba ye ke kwago setšhaba sa Morena se e bolela ga e botse. ₂₅Ge motho a ka phošetša yo mongwe, Modimo a ka mmolelela; fela ke mang yo a ka bolelelago motho yo a phošetšago Morena?”

Eupša ba be ba sa theetše tatagobona, ka gobane Morena o be a ikemišeditše go ba bolaya.

₂₆Mošemanyana Samuele yena a fela a gola mme a ratwa ke Morena le ke batho.

₂₇Moprofeta yo mongwe a tla go Eli a mmotša gore Morena o re: “A ga ke re ke ikutolletše rakgolokhukhu wa gago, Arone, le lapa la gagwe mola e be e le makgoba a kgoši ya Egepeta? ₂₈Dikgorong ka moka tša Israele ka kgetha lapa la gagwe go ba baprista ba ka, go ntlhankela aletareng, go tšhuma seorelo, le go apara seaparo se sekgethwa pele ga ka. Gomme ka ba fa tokelo ya go itšeela karolo ya dihlabelo le ya dikabelo tše di tšhungwago aletareng. ₂₉Ke ka lebaka lang bjale le na le megabaru dihlabelong le dikabelong tše ke di nyakago setšhabeng sa ka? Ke ka lebaka lang wena o hlompha barwa ba gago go feta nna ka go ba lesa ba inontšha ka ditho tše kaonekaone tša dihlabelo le dikabelo ka moka tše setšhaba sa ka se nkabelago tšona? ₃₀Nna, Morena Modimo wa Israele, ke boletše mehleng ye e fetilego gore ba lapa la gago le ba kgorwana ya geno ba tla ntlhankela e le baprista nakong tšohle. Eupša bjale ke re ba ka se hlwe ba ntlhankela. Ke tla hlompha bao ba ntlhomphago, ba ba nnyatšago ka ba nyatša. ₃₁Bona, nako e etla yeo ka yona ke tlago bolaya masogana ka moka a lapa leno, le a kgorwana yeno, gore go se ke gwa ba le monna lapeng leno yo a tlago phela a ba a tšofala. ₃₂O tla tshwenyega mme wa hufegela tšohle tše ke tlago šegofatša batho ba bangwe ba Israele ka tšona, fela ga go le o tee wa lapa leno yo a tlago tsoga a phetše a ba a tšofala. ₃₃Le ge go le bjalo, ke tla phediša o tee wa ditlogolo tša gago, mme o tla ntlhankela e le moprista. Eupša ke tla mo foufatša a ba a ota go fihlela a ehwa, gomme ditlogolo tša gago tše dingwe tšona di tla bolawa e sa le bannatia. ₃₄Se se tlago hlagela barwa ba gago ka babedi, Hofni le Finease, e tla ba sona sešupo go wena – ka bobedi ba tla hwa ka letšatši le tee. ₃₅Ke tla kgetha moprista yo a tlago mpotegela mme a dira tšohle tše ke nyakago a di dira. Ke tla mo fa ditlogolo tša go botega tše ka nako tšohle di tlago ntlhankela pele ga kgoši ye ke e kgethilego. ₃₆Yo mongwe le yo mongwe wa ditlogolo tša gago yo a tlago phologa o tla tlemega go ya go moprista yoo go mo kgopela tšheletiana le dijonyana, a kgopela le gore a tsenywe sehlopheng se sengwe sa baprista, gore a tle a fiwe sejonyana.”

₁Mehleng yeo, ge mošemane Samuele a hlankela Morena a hlokometšwe ke Eli, melaetša ya Morena e be e se ye mekae, le dipono tše di tšwago go yena di bonwa ka sewelo. ₂Bošego bjo bongwe Eli, yo bjale a bego a šetše a foufala, o be a robetše ka phapošing ya gagwe; ₃Samuele o be a robetše ka sekgethweng, mo go bego go le Polokelo ya Kgwerano. Pele ga ge letšatši le hlaba, mola mabone a sehlomamabone a sa tuka, ₄Morena a bitša Samuele. Yena a araba a re: “Tama!” ₅gomme a kganyelela go Eli a re: “O mpiditše, mme ke nna yo.”

Eupša Eli a mo fetola a re: “Ga se ka go bitša; boela malaong a gago.” Ka gona Samuele a boela malaong.

_6-7Morena a bitša Samuele gape. Mošemane o be a sa tsebe gore ke Morena, ka gobane Morena o be a se a ka a mmolediša. Ka gona a tsoga, a ya go Eli mme a re: “O mpiditše, mme ke nna yo.”

Eupša Eli a mo fetola a re: “Ngwanaka, ga se ka go bitša; boela malaong.”

₈Morena a bitša Samuele la boraro; yena a tsoga, a ya go Eli mme a re: “O mpiditše, mme ke nna yo.”

Ke moo Eli a lemogilego gore ke Morena yo a bitšago mošemane, ₉ka gona a re go yena: “Boela malaong, gomme ge o ka bitšwa, o re: ‘Bolela, Morena, mohlanka wa gago o theeditše.’ ” Ka gona Samuele a boela malaong.

₁₀Morena a tla a ema fao, mme a bitša bjalo ka pele a re: “Samuele! Samuele!”

Samuele a mo fetola a re: “Bolela; mohlanka wa gago o theeditše.”

₁₁Morena a re go yena: “Bona, ke tlile go dira taba ye e šiišago setšhabeng sa Israele ye motho yo a e kwago a tlago gakgamala. ₁₂Ka letšatši leo ke tla phetha tšohle tše ke itšego ke tla di dira lapa la Eli; ke tla di thoma ka ba ka di phetha. ₁₃Ke šetše ke mmoditše gore ke tlile go otla lapa la gagwe go ya go ile ka gobane barwa ba gagwe ba mpoletše gampe. Eli o tsebile gore ba dira taba yeo, eupša a se ke a ba kgala. ₁₄Ka gona ke enela lapa la gagwe gore ga go sehlabelo goba kabelo ye e tlago tsoga e kgonne go ba boelanya le nna ka lebaka la sebe se.”

₁₅Samuele a robala go fihlela ge go esa; ke moka a tsoga, a bula mejako ya ngwako wa Morena. O be a boifa go botša Eli pono yeo. ₁₆Eli a mmitša a re: “Samuele, ngwanaka!”

Samuele a araba a re: “Tama!”

₁₇Eli a mmotšiša a re: “Morena o go boditše eng? O se ke wa nkutela selo. Modimo o tla go otla o šorošoro ge o ka se mpotše se sengwe le se sengwe se a se boletšego.” ₁₈Ka gona Samuele a mmotša se sengwe le se sengwe, a se ke a uta selo. Eli a re: “Ke yena Morena; a a dire se a bonago se lokile.”

₁₉Samuele a gola, Morena a ba le yena mme a dira gore tšohle tše Samuele a di bolelago di phethege. ₂₀Ka fao setšhaba ka moka sa Israele, go tloga Dane go yo fihla Beresheba, sa tseba gore ka kgonthe Samuele ke moprofeta wa Morena. ₂₁Morena a no fela a iponagatša Shilo, ka gobane ke gona moo Shilo mo a ilego a iponagatša go Samuele mme a bolela naye.

₁Ge Samuele a bolela, se a se bolelago se be se ama Baisraele ka moka.

Mehleng yeo Bafilista ba ile ba rapa dira go yo lwa le Baisraele, ka gona Baisraele ba tšwa ba yo lwa le bona. Baisraele ba hloma mešaša ya bona kua Ebenesere, mme Bafilista ba hloma ya bona Afeke. ₂Bafilista ba ipopa dihlophahlopha gore ba hlasele Baisraele, gomme ka morago ga ntwa ye šoro ba ba fenya mme ba bolaya banna ba e ka bago ba dikete tše nne moo go bego go lwelwa gona. ₃Ge mašaledi a boa mešašeng, baetapele ba Israele ba re: “Ke ka lebaka lang Morena a lesitše Bafilista ba re fenya lehono? A re yeng re yo tšea Polokelo ya Kgwerano ya Morena kua Shilo, gore a tle a ye le rena gomme a re phološe manabeng a rena.” ₄Ka gona ba roma batseta kua Shilo gore ba yo tšea Polokelo ya Kgwerano ya Morena, yeo e emelago setulo sa bogoši sa Morena Ramaatlaohle gape e letilwego ke bakerubi. Gomme barwa bale ba babedi ba Eli, Hofni le Finease, ba tla le Polokelo ya Kgwerano.

₅Ge Polokelo ya Kgwerano e fihla mešašeng, Baisraele ba ile ba goa kudu ka lethabo, lefase la ba la šišinyega. ₆Bafilista ba kwa legoa leo gomme ba re: “Theetšang legoa lela kua mešašeng ya Baheberu! A e ka ba le šupa eng?” Ge ba ekwa gore Polokelo ya Kgwerano ya Morena e tlile mešašeng ya Baheberu, ₇ba ile ba boifa gomme ba re: “Medimo e tlile mešašeng ya bona! Ke moka re hwile! Ga se ra ka ra hlagelwa ke taba ya mohuta wo! ₈Re hwile la pitšana! Ke mang yo a kago re phološa go medimo yeo ye maatla? Ke yona medimo yela e ilego ya bolaya Baegepeta kua lešokeng! ₉Tiang maatla, Bafilista, le lweng senna, gore re se tlo ba makgoba a Baheberu, bjalo ka ge le bona e be e le makgoba a rena. Ka gona lwaang senna!”

₁₀Bafilista ba ile ba lwa ka bogale, ba fenya Baisraele, mme bona ba tšhabela magaeng a bona. Go ile gwa bolawa batho ba bantši – bahlabani ba Baisraele ba ba sepelago ka maoto ba dikete tše makgolo a mararo. ₁₁Polokelo ya Kgwerano ya Morena ya thopša, le barwa ba Eli, Hofni le Finease, ba bolawa ka babedi ga bona.

₁₂Monna yo mongwe wa kgoro ya Benjamene o ile a kganyela go tloga moo go bego go lwelwa gona go ba go yo fihla Shilo le lona letšatši leo. Go laetša manyami a gagwe, o be a gagotše diaparo tša gagwe, a itšhetše hlogo ka mobu. ₁₃Eli, yo a bego a swere pelo ka seatla mabapi le Polokelo ya Kgwerano, o be a dutše setulong ka thoko ga tsela, a beile mokganya phatleng. Monna yoo a gaša taba tšeo motseng, gomme yo mongwe le yo mongwe a lla a nyamile. ₁₄Eli a kwa sello seo gomme a botšiša a re: “A lešata le ke la eng?” Monna yoo a kitimela go Eli go yo mmotša. ₁₅Eli bjale o be a na le mengwaga ye masome a senyane a metšo ye seswai, mme a tomogile mahlo, a šetše a foufala. ₁₆Monna yoo a re: “Ke nna motho yo a tšhabilego ntweng mme ke kitimile go ba go tlo fihla mo le lehono.”

Eli a mmotšiša a re: “Go diregile eng, ngwanaka?”

₁₇Mmegi yoo a mo fetola a re: “Baisraele ba fentšwe ke Bafilista mme ba tšhaba; re fentšwe o šoro! Ntle le moo, barwa ba gago, Hofni le Finease, ba bolailwe, gomme le Polokelo ya Kgwerano ya Modimo e thopilwe!”

₁₈Ge monna yoo a bolela ka Polokelo ya Kgwerano, Eli a wa ka sa morago setulong sa gagwe ka thoko ga lesoro la kgoro. O be a tšofetše a bile a nonne mo a ilego a re ge a ewa a thokgega molala, mme a hwa. O be a bile moetapele wa Baisraele mengwaga ye masome a mane.

₁₉Ngwetši ya Eli, mosadi wa Finease, o be a imile, gomme nako ya gore a belege e batametše. Ge mosadi yoo a ekwa gore Polokelo ya Kgwerano ya Modimo e thopilwe, le gore ratswalagwe le monna wa gagwe ba hwile, ka bjako a swarwa ke lešoko, mme a belega. ₂₀Ge a ehwa, basadi ba ba bego ba mmelegiša ba re go yena: “Tia maatla! O belege morwa!” Eupša a se ke a ba šetša, le gona a se ba fetole. ₂₁A rea mošemane yoo leina la Ikabode, a hlatholla a re: “Letago la Modimo le tlogetše Baisraele;” o be a šupa go thopša ga Polokelo ya Kgwerano le lehu la ratswalagwe le monna wa gagwe. ₂₂O ile a re: “Letago la Modimo le tlogetše Baisraele, ka gobane Polokelo ya Kgwerano ya Morena e thopilwe.”

₁Ka morago ga ge Bafilista ba thopile Polokelo ya Kgwerano, ba ile ba e rwala go tloga Ebenesere ba e iša motseng wa bona wa Ashdode, ₂ba e tsenya ka tempeleng ya modimo wa bona, Dagone, ba e bea ka thoko ga seswantšhobopša seo. ₃Ya re e sa le bošego mosong wo o latelago batho ba Ashdode ba hwetša seswantšhobopša sela sa Dagone se wele fase ka sefahlego pele ga Polokelo ya Kgwerano ya Morena. Ka gona ba se emiša ba se boetša madulong a sona. ₄E sa le bošego mosong wo o latelago ba hwetša seswantšhobopša sela se wele gape pele ga Polokelo ya Kgwerano. Ka lekga le hlogo ya sona le matsogo ka mabedi di be di konogile di le kua mojako; go šetše sebelebele fela. ₅Ke ka lebaka leo le lehono baprista ba Dagone le barapedi ba gagwe ka moka ba ba tsenago ka tempeleng ya gagwe kua Ashdode, ba tabogago felo fao, ba sa go gate.

₆Morena o ile a otla batho ba Ashdode o šoro mme a ba tšhoša. A otla bona le batho ba tikologo yeo ka go ba dira gore ba tšwe dikutu. ₇Ge ba bona se se diregago ba re: “Modimo wa Israele o a re otla, o otla le modimo wa rena, Dagone. Re ka se lese Polokelo ya Kgwerano gore e hlwe e dutše mo.” ₈Ka fao ba roma batseta ba kgobokanya magoši ka moka a Bafilista, mme ba ba botšiša ba re: “Na re dire eng ka Polokelo ya Kgwerano ya Modimo wa Israele?”

Magoši a ba fetola a re: “E išeng kua Gathe.” Ka gona ba e iša Gathe. ₉Ge e seno fihla fao motse woo le wona Morena a o otla, gomme a tsoša kgakanego ye kgolokgolo. A ba otla ka dikutu tše di ilego tša aparela batho ka moka motseng, ba bagolo le ba bannyane. ₁₀Ka gona ba romela Polokelo ya Kgwerano Ekrone; eupša ge e fihla moo, batho ba lla ba re: “Ba tlišitše Polokelo ya Kgwerano ya Modimo wa Israele mo go tlo re bolaya ka moka!” ₁₁Ka gona magoši ka moka a Bafilista a bitšwa gape gomme batho ba re go ona: “Boetšang Polokelo ya Kgwerano ya Israele ga gaboyona, gore e se ke ya re bolaya ya bolaya le ba malapa a rena.” Go ile gwa ba le tlalelo ye kgolokgolo motseng ka moka ka gobane Modimo o be a ba otla o šoro. ₁₂Le bao ba ilego ba se ke ba hwa ba ile ba tšwa dikutu, mme ba llela medimo ya bona gore e ba thuše.