To The Word – Day 76

₁Morena a re go Samuele: “O tla fela o nyamišitšwe ke Saulo go fihlela neng? Ke mo lahlile mme e ka se hlwe e le kgoši ya Israele. Fela bjale tlatša lenaka la gago makhura a mohlware mme o ye Betlelehema go monna yo mongwe yo leina la gagwe e lego Isai, ka gobane ke kgethile yo mongwe wa barwa ba gagwe gore e be kgoši.”

₂Samuele a mmotšiša a re: “A nka napa ka ya? Gape ge Saulo a ka e kwa, o tla mpolaya!”

Morena a mo fetola a re: “O gape kgomo ya sethole gomme o bolele gore o tlile moo go tlo direla Morena sehlabelo. ₃O laletše Isai moo sehlabelong, gomme ke tla go botša se o swanetšego go se dira. O tlotše monna yo ke tlago go laetša yena gore e be kgoši.”

₄Samuele a dira se Morena a mmoditšego sona gomme a ya Betlelehema, moo a ilego a gahlanetšwa ke baetapele ba motse ba thothomela mme ba mmotšiša ba re: “A o re etetše ka khutšo, mmoni?”

₅Yena a ba fetola a re: “Ee, ke tlile go direla Morena sehlabelo. Itlhwekišeng mme le yeng le nna sehlabelong.” O ile a botša le Isai le barwa ba gagwe gore ba itlhwekiše, gomme a ba laletša gore ba tle sehlabelong.

₆Ge ba fihla, Samuele a bona Eliaba, morwa wa Isai, mme a ipotša a re: “Monna yo a emego fa pele ga Morena ka nnete ke yena yo a mo kgethilego gore a tlotšwe.” ₇Eupša Morena a re go yena: “O se ke wa šetša seemo sa gagwe goba botelele bja gagwe. Ke mo nyaditše, ka gobane ga ke lebelele se se lebelelwago ke motho. Motho o lebelela sebopego, eupša nna ke lebelela pelo.”

₈Ke moo Isai a biditšego morwa wa gagwe, Abinadaba, gomme a mo tliša go Samuele. Eupša Samuele a re: “Aowa, le yena Morena ga se a mo kgetha.” ₉Ke moka Isai a tliša Shama. Samuele a re: “Aowa, le yena Morena ga se a mo kgetha.” ₁₀Ka yona tsela yeo Isai a tliša ba ba šupago ba barwa ba gagwe go Samuele. Gomme Samuele a re go yena: “Aowa, Morena ga se a kgetha motho go ba ba lego mo.” ₁₁Ke moo a botšišitšego Isai a re: “A ga o sa na le barwa ba bangwe?”

Isai a mo fetola a re: “Go sa na le wa mafelelo, eupša yena o dišitše dinku.”

Samuele a re: “Roma motho a yo mmitša. Re ka se dule ra ja a sešo a tla.” ₁₂Ka gona Isai a roma motho gore a yo mmitša. Yena e be e le lesogana le le bopegilego le le phedilego gabotse, la mahlo a mabotse. Morena a re go Samuele: “Yo ke yena – mo tlotše!” ₁₃Samuele a tšea lenaka la makhura a mohlware gomme a tlotša Dafida pele ga bomorwarragwe. Ka bjako moya wa Morena wa laola Dafida mme wa ba le yena go tloga ka letšatši leo. Ya ba gona Samuele a boelago Rama.

₁₄Moya wa Morena wa tlogela Saulo, gomme moya wo mobe wo o rometšwego ke Morena wa mo tlaiša. ₁₅Bahlanka ba gagwe ba re go yena: “Re a tseba gore moya wo mobe wo o rometšwego ke Morena o a go tlaiša. ₁₆Ka gona, mong wa rena, re laele, rena bahlanka ba gago, gore re yo nyaka monna yo a tsebago go letša harepa. Ke mo e tlago re ge moya wo mobe o go tlela, monna yoo a letša harepa ya gagwe, gomme wa ba kaone.”

₁₇Saulo a re go bona: “Nnyakeleng monna yo a tsebago go letša harepa gabotse mme le mo tlišeng go nna.”

₁₈Yo mongwe wa masogana a kgoro ya gagwe a re: “Isai, wa motse wa Betlelehema, o na le morwa yo e lego seletši. Le gona ke monna yo bogale yo a bopegilego, mohlabani wa mmakgonthe le seboledi sa paale. Morena o na le yena.”

₁₉Ka gona Saulo a roma batseta go Isai gore ba re: “Nthomele Dafida, morwa wa gago, yo a dišago dihuswane.” ₂₀Isai a romela Dafida go Saulo le putšane, le pokolo e rwele dinkgwa, le lekuka la beine. ₂₁Dafida a fihla go Saulo gomme a thoma go mo hlankela. Saulo a mo rata kudu, gomme ya ba morwaladibetša wa gagwe. ₂₂Ke moo Saulo a romilego motseta go Isai a re: “A Dafida a fele a ntlhankela, ka gobane ke a mo rata.” ₂₃Go tloga ka nako yeo, ge moya wo mobe wo o rometšwego ke Modimo o tlela Saulo, Dafida o be a tšea harepa ya gagwe a e letše. Moya wo mobe o nape o tloge, gomme Saulo a kwe a imologile mme a be kaone.

₁Bafilista ba ile ba kgobokanela ntwa kua Soko, motseng wa Juda; ba hloma mešaša lefelong le le bitšwago Efese-Damime, kgathe ga Soko le Aseka. ₂Saulo le Baisraele ba kgobokana mme ba hloma mešaša molaleng wa Ela, moo ba ilego ba ipeakanyetša go lwa le Bafilista. ₃Bafilista ba ema mmotong wo mongwe gomme Baisraele ba ema go wo mongwe, ba kgaogantšwe ke moedi.

₄Monna yo mongwe yo leina la gagwe e bego e le Goliate, wa motse wa Gathe, a tšwa mešašeng ya Bafilista. Yena e be e le mohlabani wa nkgwete. Botelele bja gagwe e be e ka ba dimetara tše tharo, ₅gomme a apere seaparo sa boitšhireletšo sa mphiri sa dikgapetla seo se bego se imela dikilokramo tše e ka bago tše masome a mahlano a metšo ye e šupago, le kefa ya mphiri. ₆Meomo ya gagwe le yona e be e šireleditšwe ka dišireletši tša mphiri, gomme a šikere letsolo la mphiri. ₇Theko ya lerumo la gagwe e be e lekana le mpheng wa mogoma, gomme bogale bja lona bja tshipi bo imela dikilokramo tše e ka bago tše di šupago. Mohlabani o be a sepela pele ga gagwe a mo swaretše kotse. ₈Goliate o ile a ema mme a goelela Baisraele a re: “A le dirang moo etšwe le foletše ntwa? Nna ke Mofilista, lena makgoba tenang a Saulo! Kgethang yo mongwe wa banna ba lena gore a theoge a tle a lwe le nna. ₉Ge a ka lwa le nna a mpolaya, re tla ba makgoba a lena; eupša ge nka lwa le yena ka mmolaya, le tla ba makgoba a rena. ₁₀Gonabjale ke hlohla lena madira a Baisraele, ke re ntšhang yo a kago lwa le nna!” ₁₁Ge Saulo le banna ba gagwe ba ekwa seo, ba boifa ba tšhoga kudu.

₁₂Dafida e be e le morwa wa Isai, yo e bego e le Moefrata wa Betlelehema kua Juda. Isai o be a na le barwa ba seswai, gomme ka nako ye Saulo e le kgoši, o be a šetše a tšofetše kudu. ₁₃Barwa ba gagwe ba bararo ba bagolo ba be ba ile le Saulo ntweng. Mogolo wa bona e be e le Eliaba, yena a hlatlangwa ke Abinadaba, mme wa boraro e le Shama. ₁₄Dafida e be e le phejane, gomme ge barwa bale ba bararo ba bagolo ba na le Saulo, ₁₅yena o be a fela a ba tlogela mme a boela Betlelehema go yo diša dihuswane tša tatagwe.

₁₆Goliate o ile a hlohla Baisraele matšatši a masome a mane mesong le mantšiboa.

₁₇Ka letšatši le lengwe Isai a re go Dafida: “Tšea tekanyo ya ntlatla ya dithuthupe tše tša mabele le dinkgwa tše lesome tše, gomme o itlhaganele o di iše go bomorwarrago kua mešašeng. ₁₈O tšee le ditšhese tše tše lesome o di iše go molaodi wa ba sekete. O bone ge bomorwarrago ba sa iketlile, mme o boe le se sengwenyana sa go laetša gore o ba bone le gore ba sa phela gabotse. ₁₉Kgoši Saulo le bomorwarrago le Baisraele ka moka ba molaleng wa Ela ba lwa le Bafilista.”

₂₀Dafida a tsoga e sa le bošego ka letšatši le le latelago, a tlogela dihuswane le modiši, a tšea dijo tšela, gomme a tloga bjalo ka ge Isai a mo laetše. A fihla mešašeng ka nako ye Baisraele ba bego ba etšwa ba eya mo ba bego ba folela ntwa gona, ba hlaba mokgoši wa ntwa. ₂₁Madira a Bafilista le a Baisraele a ile a ema maemong a ona a ntwa a lebane. ₂₂Dafida a tlogela dijo tšela le mohlokomedi wa dithoto, a kganyelela madireng a gabo, a ya go bomorwarragwe, gomme a ba botšiša gore ba phela bjang. ₂₃Ya re a sa bolela le bona, Goliate a tšwa madireng a Bafilista mme a hlohla Baisraele bjalo ka ge a be a tlwaetše. Gomme Dafida a mo kwa. ₂₄Ge Baisraele ba bona Goliate, ba tšhaba ba tšhogile. ₂₅Ba botšana ba re: “Nke le mmoneng! Kwaang mahlapa a gagwe! Kgoši Saulo o tla fa monna yo a kago mmolaya moputso wo mogolo; kgoši o tla ba a fa monna yoo morwedi wa gagwe gore e be mosadi wa gagwe, le gona o tla ntšha ba lapa la tatagwe metšhelong.”

₂₆Dafida a botšiša banna ba ba bego ba le kgauswi le yena a re: “A monna yo a ka bolayago Mofilista yo mme a lokolla Israele tabeng ye ya dihlong le re o tla putswa ka eng? Gabotsebotse, Mofilista yo wa go se bolle ke yena mang yo a ka nyatšago madira a Modimo yo a phelago?” ₂₇Bona ba mmotša ka mo monna yo a ka bolayago Goliate a tlago putswa ka gona.

₂₈Morwarrago Dafida yo mogolo, Eliaba, a mo kwa a bolela le banna bao. A befelelwa Dafida gomme a re: “O nyakang mo? Ke mang a šetšego le dihuswanyana tšela kua lešokeng? Ke tseba makokwana le mahlajana a gago, mošaa! O tlile fela go tlo bogela ntwa!”

₂₉Dafida a mmotšiša a re: “A bjale ke dirile eng? Ke be ke no botšiša fela.” ₃₀O ile a retologela go monna yo mongwe mme a mmotšiša yona potšišo yela, gomme ge a botšiša ba bangwe, o be a fetolwa ka wona mokgwa wola.

₃₁Banna ba bangwe ba kwa se Dafida a se bolelago, gomme ba botša Saulo, yo a ilego laela gore a bitšwe. ₃₂Dafida a re go Saulo: “Mong wa ka, go se ke gwa ba le yo a boifago Mofilista yo! Nna ke tla ya ka lwa naye.”

₃₃Saulo a mo fetola a re: “Aowa. O ka lwa naye bjang? Wena o no ba mošemanyana, mme yena e bile mohlabani bophelo bja gagwe ka moka!”

₃₄Dafida a re: “Nna, mohlanka wa gago, ke diša dihuswane tša tate. Nako efe le efe ge tau goba bere e swere kwanyana goba putšane, ₃₅ke e šala morago, ka lwa nayo, ka phološa seruiwa seo ganong la yona. Gomme ge tau goba bere yeo e ntlhasela ke e swara ka megolo, ka e betha ka e bolaya. ₃₆Ke bolaile ditau le dibere, gomme Mofilista yo wa go se bolle, yo a nyaditšego madira a Modimo yo a phelago, le yena ke tla mo dira sona seo. ₃₇Morena yo a mphološitšego ditaung le dibereng, o tla mphološa le go Mofilista yo.”

Saulo a mo fetola a re: “Go lokile. Sepela, mme Morena a be le wena.” ₃₈Saulo a apeša Dafida diaparo tša gagwe tša ntwa: a mo rweša kefa ya mphiri, a mo apeša seaparo sa boitšhireletšo. ₃₉Dafida a kgokelela tšhoša ya Saulo seaparong sa boitšhireletšo, eupša a se ke a kgona go sepela ka tšona, ka gobane o be a se a di tlwaela. A re go Saulo: “Ga ke kgone go sepela ke apere dilo tše. Ga se ka di tlwaela.” Ka gona a di apola ka moka. ₄₀A tšea molamo wa gagwe wa go diša, a topa maswika a a fetšago seatla a boreledi ka molapong mme a a lokela ka mokotlaneng wa gagwe wa go ya madišong. A tšwa a batamela Goliate a swere seragamabje sa gagwe ka seatla.

₄₁Mofilista yola a thoma go sepela a lebile Dafida, moswari wa kotse ya gagwe a sepela pele ga gagwe. O ile a fela a batamela, ₄₂gomme ge a bona Dafida gabotse, a mo nyatša ka gobane e be e no ba mošemanyana yo mmotsana yo boletiana. ₄₃A re go Dafida: “O swaretše mang molamo woo? A o gopola gore ke nna mpša?” Gomme a rogaka Dafida ka medimo ya gagwe. ₄₄A ba a re: “Tlaa, mme ke tla fa manong le dibata setopo sa gago.”

₄₅Dafida a mo fetola a re: “O tla go nna ka tšhoša le lerumo le letsolo, eupša nna ke tla go wena ka leina la Morena Ramaatlaohle, Modimo wa Baisraele, yo o mo nyaditšego. ₄₆Lehono le Morena o tla go gafela diatleng tša ka; ke tla go fenya mme ka go ripa hlogo. Gomme ke tla fa manong le dibata ditopo tša bahlabani ba Bafilista. Ke mo lefase ka moka le tlago tseba gore Baisraele ba na le Modimo, ₄₇mme yo mongwe le yo mongwe fa o tla bona gore Morena ga a iše felo ka ditšhoša le marumo go phološa setšhaba sa gagwe. Ke mofenyi ntweng, gomme o tla le gafela diatleng tša rena.”

₄₈Goliate a thoma go batamela Dafida gape, gomme ka bjako Dafida a kitimela moo ntwa e bego e tla lwelwa gona. ₄₉A tsenya seatla ka mokotlaneng wa gagwe a ntšha leswika, a betša Goliate ka lona ka seragamabje. Leswika la mo tia phatla, la mo pšhatla lešapo la hlogo, gomme Goliate a wela fase ka sefahlego. ₅₀Ka gona Dafida a fenya Goliate, a mmolaya ka seragamabje le leswika a se a swara tšhoša. ₅₁A kganyelela go yena, a mo emelela a hwanyolla tšhoša ya Goliate segatleng sa yona, gomme a mo ripa hlogo a mmolaya.

Ge Bafilista ba bona gore mogale wa bona o hwile, ba tšhaba. ₅₂Banna ba Israele le ba Juda ba hlahlamologa, ba goa mme ba ba kitimiša go ba go yo fihla Gathe le dikgorong tša Ekrone. Ditopo tša Bafilista tša rapalala tseleng ka moka ye e yago Shaharaime, go ba go yo fihla Gathe le Ekrone. ₅₃Ge Baisraele ba boa ba tšo leleka Bafilista o šoro, ba thopa thoto ka moka mešašeng ya bona. ₅₄Dafida a tšea hlogo ya Goliate a e iša Jerusalema, eupša dihlabani tša Goliate a di bea ka go wa gagwe mošaša.

₅₅E ile ya re mola Saulo a bona Dafida a etšwa a yo lwa le Goliate, Saulo a botšiša Abnere, molaodi wa madira a gagwe, a re: “Abnere, a lesogana le ke morwa wa mang?”

Abnere a mo fetola a re: “Ruri, ga ke tsebe, kgoši.”

₅₆Saulo a re: “Gona sepela o yo botšiša.”

₅₇Ka gona ge Dafida a boa a tšo bolaya Goliate, Abnere a mo iša go Saulo. Dafida o be a sa swere hlogo ya Goliate. ₅₈Saulo a mmotšiša a re: “Lesogana, a o morwa wa mang?”

Dafida a mo fetola a re: “Ke nna morwa wa mohlanka wa gago, Isai, wa Betlelehema.”

₁Ge Dafida a feditše go bolela le Saulo, o ile a thopa pelo ya Jonathane, morwa wa Saulo, gomme Jonathane a thoma go mo rata bjalo ka ge a ithata. ₂Saulo a tšea Dafida a dula le yena go tloga letšatši leo gomme a se ke a mo lesa a boela ga gabo. ₃Jonathane a enela Dafida gore e tla ba mogwera wa gagwe wa go ya go ile ka lebaka la gore o be a mo rata kudu. ₄A apola seaparo se a bego a se apere a se fa Dafida, gotee le seaparo sa gagwe sa boitšhireletšo le yona tšhoša ya gagwe le bora le lepanta. ₅Dafida o ile a fenya dintweng tšohle tše Saulo a bego a mo romela go tšona, ka gona Saulo a mo dira yo mongwe wa balaodi ba madira a gagwe. Taba yeo ya kgahla setšhaba ka moka le bahlankedi ba Saulo.

₆Ge Dafida a boa a tšo bolaya Goliate, bahlabani le bona ba boela gae, basadi ba motse wo mongwe le wo mongwe wa Israele ba tšwa go tlo gahlanetša Kgoši Saulo. Ba be ba opela ba hlaba mekgolokwane, ba bina, ba letša meropa le diharepa. ₇Ge ba bina ba be ba opela ka go hlatlolana ba re: “Saulo o bolaile dikete, eupša Dafida o bolaile dikete tše masomesome.” ₈Saulo o ile a se ke a rata taba yeo, gomme a befelwa kudu. A re: “Dafida ba re o bolaile dikete tše masomesome, eupša ge e le nna ba re ke bolaile dikete fela. Morago ga mo ba tla mmea kgoši!” ₉Ka fao go tloga ka letšatši leo a tsebafela Dafida mme a mo lebelela ka leihlo le lebe.

₁₀Ka letšatši le le latelago moya wo mobe wo o tšwago go Morena wa laola Saulo, gomme a goelela ka ngwakong wa gagwe bjalo ka segafa. Dafida o be a letša harepa, bjalo ka mehleng, gomme Saulo a swere lerumo. ₁₁Saulo a re ka pelong: “Ke tla mo phuleletša ka mo pataganya le leboto,” gomme a mmetša gabedi ka lerumo, eupša Dafida a le phema makga ao a mabedi.

₁₂Saulo o be a boifa Dafida ka gobane Morena o be a na le Dafida, fela yena Morena a mo tlogetše. ₁₃Ka gona Saulo a mo tloša go yena mme a mo dira molaodi wa banna ba sekete. Dafida o be a eta banna ba gagwe pele ntweng, ₁₄gomme a atlega go tšohle tše a di dirago, ka gobane Morena o be a na le yena. ₁₅Saulo a bona go atlega ga Dafida gomme a thoma go mmoifa go fetišiša. ₁₆Eupša yo mongwe le yo mongwe mo Israele le Juda o be a rata Dafida, ka gobane e be e le moetapele yo a atlegago kudu.

₁₇Saulo a re go Dafida: “Morwedi wa ka yo mogolo, Merabe, šo. Ke tla go fa yena gore e be mosadi wa gago ge o ka ntlhankela o le mohlabani yo bogale yo a botegago, gomme wa lwa dintwa tša Morena.” Saulo o be a gopola gore ka tsela yeo Bafilista ba tla bolaya Dafida, mme gwa se hlwe go nyakega gore a mmolaye ka boyena.

₁₈Dafida a mo fetola a re: “Ke nna mang? Gona kgorwana ya gešo le lapa lešo ke eng mo nka bago mokgonyana wa kgoši?” ₁₉Eupša ge nako e fihla ya gore Merabe a fiwe Dafida, o ile a fiwa monna yo mongwe yo leina la gagwe e bego e le Adriele wa kua Mehola.

₂₀Migale, morwedi yo mongwe wa Saulo, yena o be a rata Dafida, gomme ya re ge Saulo a ekwa taba yeo, a thaba. ₂₁A re ka pelong: “Ke tla fa Dafida Migale; ke tla mo thea ka yena mme a bolawa ke Bafilista.” Ka gona lekga la bobedi Saulo a re go Dafida: “O tla ba mokgonyana wa ka.” ₂₂A laela bahlankedi ba gagwe gore ba botše Dafida thopeng ba re: “O kgahla kgoši gomme bahlankedi ba gagwe ka moka ba a go rata; bjale ke nako ye botse ya gore o nyale morwedi wa gagwe.”

₂₃Ka gona ba botša Dafida taba yeo, gomme yena a ba fetola a re: “Ga se selo se sennyane go ba mokgonyana wa kgoši, gomme nna ke no ba modiitšana le motho yo e sego wa selo.”

₂₄Bahlankedi ba botša Saulo se Dafida a se boletšego, ₂₅gomme Saulo a ba laela gore ba botše Dafida ba re: “Kgoši ga a go nyake magadi ge e se fela dintlhana tša merotwana ya Bafilista ba o ba bolailego ba lekgolo, gore a itefeletše manabeng a gagwe.” Ke ka moo Saulo a bego a rerile gore Dafida a bolawe ke Bafilista ka gona. ₂₆Bahlankedi ba Saulo ba begela Dafida se Saulo a se boletšego, gomme Dafida a kgahlwa ke go ba mokgonyana wa kgoši. Pele ga ge letšatši le le beetšwego monyanya le fihla, ₂₇Dafida le banna ba gagwe ba ya ba bolaya Bafilista ba makgolo a mabedi. A iša dintlhana tša merotwana ya bona go kgoši a mo fa tšona ka moka, gore e tle e be mokgonyana wa gagwe. Ka gona Saulo a tlemega go neela Dafida morwedi wa gagwe, Migale, gore e be mosadi wa gagwe.

₂₈Saulo a bona gabotsebotse gore Morena o na le Dafida, le gore Migale, morwedi wa gagwe, o rata Dafida. ₂₉Ka gona a boifa Dafida kudukudu gomme ya ba lenaba la gagwe bophelong bja gagwe ka moka.

₃₀Balaodi ba Bafilista ba be ba fela ba etšwa dira, eupša ntweng ye nngwe le ye nngwe Dafida o be a atlega kudu go feta balaodi ka moka ba madira ba Saulo. Ka lebaka la taba yeo Dafida o ile a tuma kudu.

₁Saulo o ile a botša morwa wa gagwe, Jonathane, le bahlankedi ba gagwe ka moka gore o ikemišeditše go bolaya Dafida. Eupša Jonathane o be a rata Dafida kudu, ₂ka gona a re go yena: “Tate o leka go go bolaya. Hle, ka moswane e sa le bošego o hlokomele; o ye lefelwaneng la go utama mme o dule fao. ₃Ke tla tla ka ema le tate kua nageng mo o utamilego gona, gomme ka bolela le yena mabapi le wena. Ge a ka mpotša se sengwe, ke tla go tsebiša.”

₄Jonathane a bolela tše botse ka Dafida go Saulo a re: “A kgoši a se ke a dira mohlanka wa gagwe, Dafida, bobe. Ga se a ka a go phošetša le gatee; bakeng sa seo, se sengwe le se sengwe se a kilego a se dira se go hotše kudu. ₅O ile a ipea kotsing ya lehu a bolaya Goliate, mme Morena a dira gore Baisraele ba fenye o šoro. O ile wa thaba ge o bona seo. Bjale o reng o nyaka go phošetša motho yo a se nago molato a etša Dafida ka go mmolaya ntle le lebaka?”

₆Saulo a kgotsofatšwa ke seo Jonathane a se boletšego, gomme a ena ka leina la Morena gore a ka se bolaye Dafida. ₇Ka gona Jonathane a bitša Dafida a mmotša tšohle; a mo iša go Saulo, gomme Dafida a hlankela kgoši bjalo ka pele.

₈Go ile gwa tsoga ntwa le Bafilista gape. Dafida a ba hlasela mme a ba fenya o šoro mo e lego gore ba ile ba tšhaba.

₉Ka letšatši le lengwe moya wo mobe wo o romilwego ke Morena wa tlela Saulo. O be a dutše ka ngwakong wa gagwe a swere lerumo la gagwe ka seatla, gomme Dafida a le fao a letša harepa. ₁₀Saulo a leka go phuleletša le go pataganya Dafida le leboto ka lerumo, fela Dafida a phema, gomme lerumo la tsenelela lebotong. Dafida a tšhaba le bjona bošego bjoo.

₁₁Saulo a romela banna gore ba yo leta ngwako wa Dafida le gore ba mmolaye mosong wo o latelago. Migale, mosadi wa Dafida, a re go yena: “Ge o ka se tšhabe bošego bjo, ka moswane o tla be o hwile.” ₁₂A mo theoša ka lefasetere, gomme a hlanola direthe a tšhaba. ₁₃Ke moo Migale a tšerego modimo wa seswantšho wa lapa, a o robadiša malaong, a o apeša hlogo ka tuku ya boya bja pudi, mme a o pipa ka kobo. ₁₄Ge banna ba Saulo ba etla go tšea Dafida, Migale a ba botša gore o a babja. ₁₅Eupša Saulo a re ba boele morago ba yo bona Dafida ka bobona. A ba laela a re: “Le mo rwaleng ka malao a gagwe le mo tliše mo gore ke mmolaye.” ₁₆Ba tsena ka gare gomme ba hwetša modimo wola wa seswantšho wa lapa malaong o apešitšwe tuku hlogong. ₁₇Saulo a botšiša Migale a re: “Ke ka lebaka lang o nthadiile ka mokgwa wo ka go thuša lenaba la ka gore le tšhabe?”

Migale a mo fetola a re: “O ile a re o tla mpolaya ge nka se mo thuše gore a tšhabe.”

₁₈Dafida o ile a tšhaba a ya go Samuele kua Rama, gomme a mmotša tšohle tše Saulo a mo dirilego tšona. Ke moo yena le Samuele ba ilego Nayote mme ba dula fao. ₁₉Saulo a botšwa gore Dafida o Nayote kua Rama, ₂₀ka gona a romela banna gore ba yo mo swara. Ba bona sehlopha sa baprofeta se bina se goa, Samuele e le moetapele wa sona. Ke moo moya wa Modimo o tlilego go banna ba Saulo, gomme le bona ba thoma go bina le go goa. ₂₁Ge Saulo a ekwa taba yeo, a romela batseta ba bangwe, gomme le bona ba thoma go bina le go goa. A romela batseta la boraro, gomme le bona ba dira bjalo. ₂₂Ke moo yena ka boyena a ilego Rama. Ge a fihla sedibeng se segolo kua Seku, a botšiša gore Samuele le Dafida ba kae, gomme a botšwa gore ba kua Nayote. ₂₃Ge a le tseleng a eya gona, moya wa Modimo le yena wa mo laola, gomme a bina a goa go ba go yo fihla Nayote. ₂₄A apola diaparo mme a bina a goa pele ga Samuele, gomme a rapalala a se a apara selo letšatši leo le bošego bjoo ka moka. Ke ka moo go hlolegilego polelo ye e rego: “Kgane Saulo le yena o fetogile moprofeta?”

₁Dafida a tšhaba Nayote kua Rama gomme a ya go Jonathane. A mmotšiša a re: “A ke dirile eng? Ke molato ofe wo ke o obilego? Ke phošo efe ye ke e dirilego tatago gore a nyake go mpolaya?”

₂Jonathane a mo fetola a re: “Aowaowaa, a ka se tsoge a go bolaile! Tate o mpotša tšohle tše a di dirago, tše kgolo le tše nnyane, gomme a ka se nkutele taba ye. Ga se therešo!”

₃Dafida a mo fetola a re: “Tatago o tseba gabotse gore wena o a nthata, gomme o ikemišeditše gore a se ke a go tsebiša se a nyakago go se dira, ka gobane o ka kwa bohloko kudu. Ke ena ka Morena yo a phelago le ka wena gore ke kgauswikgauswi le lehu!”

₄Jonathane a re: “Ke tla dira se sengwe le se sengwe se o se nyakago.”

₅Dafida a mo fetola a re: “Ka moswane ke Monyanya wa Lebalana, gomme ke tlemegile go yo ja le kgoši. Eupša ntumelele gore ke yo utama kua nageng go fihlela mantšiboa a letšatši la go hlwa gosasa. ₆Ge tatago a ka lemoga gore ga ke gona, o mmotše gore ke kgopetše tumelelo go wena gore ke itlhaganele ke ye gae Betlelehema, ka gobane kua ke nako ya sehlabelo sa ngwaga ka ngwaga sa lapa lešo ka moka. ₇Ge a ka re: ‘Go lokile,’ nna, mohlanka wa gago, ke tla phologa; eupša ge a ka befelwa kudu, o tsebe gore o ikemišeditše go mpolaya. ₈Hle, o nthuše ka mokgwa woo, ka gobane re enne pele ga Morena. Eupša ge eba ke na le molato, mpolaye ka bowena! Ke go reng go hlwa o re o nkiša go tatago gore ke yo bolawa?”

₉Jonathane a mo fetola a re: “O se ke wa bolela taba ya mohuta woo! Ge nkabe ke tseba gabotsebotse gore tate o ikemišeditše go go bolaya, a o ra gore ke be nka se go botše?”

₁₀Ke moo Dafida a mmotšišitšego a re: “Ke tla botšwa ke mang ge tatago a go fetotše a befetšwe?”

₁₁Jonathane a mo fetola a re: “A re tšwe re ye kua nageng.” Ka gona ba ya, ₁₂gomme Jonathane a re go Dafida: “A Morena Modimo wa Israele e be hlatse ya rena! Ka nako ye bosasa le ka letšatši le le latelago leo ke tla botšiša tate. Ge e le yo botho go wena, ke tla roma motho go wena a tlo go tsebiša. ₁₃Ge a ikemišeditše go go bolaya, a Morena a mpolaye thoo ge nka se go tsebiše taba yeo gomme ka go tšhabiša o bolokegile. A Morena a be le wena bjalo ka ge a be a na le tate! ₁₄Ge ke sa phela o nthate bjalo ka ge Morena a re rata; eupša ge ke hwile, ₁₅o rate ba lapa la ka go ya go ile ka wona mokgwa woo, le ge Morena a šetše a fedišitše manaba a gago ka moka.” ₁₆Ke ka mo Jonathane a tiišitšego kgwerano le ba lapa la Dafida. A ba a re: “Morena a otle manaba a Dafida.”

₁₇Gapegape Jonathane a kgopela Dafida gore a ene gore o a mo rata, gobane yena o be a rata Dafida bjalo ka ge a ithata. ₁₈A re go yena: “Ka gore ka moswane ke Monyanya wa Lebalana, go tla lemogwa gore ga o gona dijong, ka gobane madulong a gago go tla be go se na motho. ₁₉Ka la go latela la ka moswane o theoge o ye lefelong lela wa go ka wa utama go lona ka nako yela, gomme o utame kgauswi le leswika la gona. ₂₀Ke moka nna ke tla thunyetša mesebe ye meraro ka thoko ga leswika leo mo nkego go na le se ke se thunyago. ₂₁Ke moka ka botša mohlanka wa ka gore a ye a e nyake. Gomme ge nka re go yena: ‘Bona, mesebe yela e ka mono ga gago; e tope,’ ke go re o bolokegile gomme o ka tšwa. Ke ena ka Morena yo a phelago gore o ka se hlagelwe ke kotsi. ₂₂Eupša ge nka re go yena: ‘Mesebe yela e ka kua ga gago,’ gona o tloge, ka gobane Morena o tla be a re o sepele. ₂₃Ge e le keno yela ya ka le wena, hlatse ya yona ya go ya go ile ke Morena.”

₂₄Ka gona Dafida a utama kua nageng. Monyanyeng wa Lebalana Kgoši Saulo a tla dijong ₂₅gomme a dula madulong a gagwe a ka mehla go ipata le leboto. Abnere a dula kgauswi le yena, gomme Jonathane a dula go lebana le yena. Madulong a Dafida gwa se ke gwa ba le motho, ₂₆eupša Saulo a se ke a bolela selo ka letšatši leo, ka gobane o be a gopola a re: “Mohlomongwe o hlakane le seila, mme o tloga a tšhilafetše.” ₂₇Ka letšatši le le latelago, letšatši la ka morago ga la Monyanya wa Lebalana, madulong a Dafida go be go se na motho gape, gomme Saulo a botšiša Jonathane a re: “Ke ka lebaka lang Dafida a se a tla dijong maabane le lehono?”

₂₈Jonathane a mo fetola a re: “O nkgopetše gore ke mo dumelele a ye Betlelehema. ₂₉O rile: ‘Hle, ntumelele ke ye, ka gobane lapa lešo le dira sehlabelo kua gae, gomme morwarre o ntaetše gore ke be gona. Ka gona, ge eba o mogwera wa ka, ntese ke yo bona meloko yešo.’ Lebaka ke lona leo ge o bona a se madulong a gagwe dijong.”

₃₀Saulo a tukela Jonathane bogale gomme a re go yena: “Ngwana yo mobe wa mosadi wa senganga! Bjale ke a tseba gore o ema le Dafida mme o a ikgoboša gotee le yena yola mmago! ₃₁Na ga o bone gore ge morwanyana yola wa Isai a sa phela mo lefaseng o ka se tsoge o bile kgoši ya naga ye? Napa o ntšhe banna ba mo late gomme wena o mo tliše mo – yena o swanetše go bolawa!”

₃₂Jonathane a mo fetola a re: “Ke ka lebaka lang a swanetše go hwa? O dirile eng?”

₃₃Saulo ge a ekwa tšeo a mmetša ka lerumo a re o a mo hlaba, gomme Jonathane a bona gore tatagwe o tloga a ikemišeditše go bolaya Dafida. ₃₄Jonathane a emelela a tloga dijong a tuka bogale, gomme a se ke a ja selo letšatši leo – letšatši la bobedi la Monyanya wa Lebalana. O be a nyamile kudu ka lebaka la Dafida, ka gobane Saulo o be a mo rogile. ₃₅Mosong wa le le latelago Jonathane a ya kua nageng go yo gahlana le Dafida, bjalo ka ge ba be ba kwane. A tloga le mošemane yo monnyane, ₃₆gomme a re go yena: “Kitima o ye o tope mesebe ye ke tlago e thunya gonabjale.” Mošemanyana yoo a kitima, gomme Jonathane a thunyetša mosebe ka kua pele ga gagwe. ₃₇Ge mošemanyana yola a fihla felo fa mosebe o wetšego gona, Jonathane a mo goeletša a re: “Mosebe o kua pele! ₃₈Kitima kudu o itlhaganele!” Mošemane a topa mosebe wola gomme a gomela go mong wa gagwe ₃₉a sa tsebe gore taba yeo e šupa eng; go be go tseba Jonathane le Dafida fela. ₄₀Ke moo Jonathane a neetšego mošemane yola dibetša tša gagwe mme a mmotša gore a di boetše motseng.

₄₁Ge mošemane a sepetše, Dafida a emelela kgauswi le leswika, a obama a itahlela fase ka sefahlego gararo. Bobedi bja bona, yena le Jonathane, ba be ba lla ge ba atlana; manyami a Dafida a be a bile a feta a Jonathane. ₄₂Ke moo Jonathane a itšego go Dafida: “Modimo a be le wena. Morena o tla dira gore nna le wena le ditlogolo tša ka le tša gago re boloke keno ye nna le wena re e enetšego sa ruri ka leina la Morena.” Ke gona Dafida a tlogilego, gomme Jonathane a boela motseng.