To The Word – Day 93

₁Lešika la bogoši la Dafida le swana le mohlare wo o remilwego; bjalo ka ge mahlogedi a hloga kutung goba medung, le ditlogolong tša Dafida go tla tšwa kgoši ye mpsha.

₁₀Lebaka le etla leo ka lona kgoši ye mpsha ya lešika la bogoši la Dafida e tlago ba bjalo ka sefoka go ditšhaba. Ba tla mo kgobokanela, gomme mošate, ga gagwe, wa hlomphega kudu. ₁₁Ge nako yeo e fihla Morena o tla boeletša a otlolla letsogo a lokolla mašaledi a setšhaba sa gagwe Asiria, Egepeta, Patrose, Etopia, Elamo, Babilonia, Hamate, le dinageng tša lebopong la lewatle, le dihlakahlakeng. ₁₂Morena o tla emiša sefoka, a bontšha ditšhaba gore o kgoboketša batho ba ba gašanego ba Israele le ba ba phatlaletšego ba Juda, gomme o ba kgobokanya ba etšwa mafelong a kgolekgole a lefase. ₁₃Israele e ka se sa tsebafela Juda. Manaba a Juda a tla fedišwa, gomme Juda e ka se sa ba sera sa Israele. ₁₄Batho ba Juda le ba Israele ba tla ipopa ba wela Bafilista godimo metheogeng ya ka bodikela, ba šwahlela le batho ba ba dulago ka bohlabela. Ba tla tšea naga ya Edomo le ya Moaba; Baamone e tla ba batho ba bona. ₁₅Morena o tla omiša kgogometšana ya Suez, a omiša le noka ya Yufratese ka phefo ya go fiša, a šadiša fela meetšana ya yona ye e šupago, gomme motho a kgona go tshela a apere dieta. ₁₆Go tla ba le tselakgolo ya go tšwa Asiria ya mašaledi a Israele ao a sa lego nageng yeo, go swana le ya borakgolokhukhu ba bona mola ba etšwa Egepeta.

₁Ge nako yeo e fihla le tla opela la re:

₄Mehleng yeo le tla opela la re:

₁Molaetša wo Jesaya, morwa wa Amotse, a o boditšwego ke Modimo mabapi le motse wa Babilone šo:

₂Hlomang sefoka sa ntwa godimo ga thaba ye e se nago mehlare! Hlabelang bahlabani mokgoši, le ba hlaeletše gore ba tle ba hlasele dikgoro tša motse woo wa go ikgantšha. ₃Morena o rapile madira a gagwe a a ikgantšhago ka bogolo bja gagwe gore ba lwe ntwa ye kgethwa, ba otle bao a ba galefetšego.

₄Ekwang modumo dithabeng! Ke wa lešaba la batho, ke modumo wa mebušo le ditšhaba tše di kgobokanago. Morena Ramaatlaohle o rapa madira a gagwe. ₅Ba tla ba etšwa dinageng tša kgolekgole, tša magomong a lefase. Ka bona Morena o tlilo senya naga yohle a tuka bogale.

₆Bokolelang! Letšatši la Morena le kgauswi, tšatši leo ka lona Ramaatlaohle a tlago senya naga. ₇Matsogo a bohle a tla repha ka lebaka la letšhogo; yo mongwe le yo mongwe o tla nolega moko. ₈Batho ka moka ba tla tšhoga kudu, ba swarwa ke bohloko go swana le mosadi ge a šokwa. Ba tla lebelelana ba tlabegile, ba inamišitše difahlego ba nyamile. ₉Letšatši la Morena le etla – tšatši leo le lešoro la go tuka bogale le go galefa ga gagwe moo go šiišago. Lefase le tla fetošwa lešoka, gomme badiradibe bohle ba fedišwa. ₁₀Dinaledi le dihlopha tša tšona di ka se sa taga, letšatši le tla hlaba le fifetše; kgwedi e ka se be le seetša.

₁₁Morena o re: “Ke tla tliša masetlapelo lefaseng gomme ka otla bakgopo ka lebaka la dibe tša bona. Ke tla fediša boikgantšho bja ba ba ikgogomošago, ka kokobetša boikgodišo bja bagateledi. ₁₂Ke tla dira gore mašaledi a se be nene bjalo ka gauta ye e sego ya tswakwa, a hlokege bjalo ka gauta ya Ofire. ₁₃Ke tla thothomediša magodimo, lefase la šikinyega la šutha madulong a lona ka lebaka la go befelwa ga ka, nna, Morena Ramaatlaohle, mohla ke bontšha go tuka bogale ga ka.

₁₄“Bafaladi ba ba dulago Babilone ba tla tšhabela dinageng le ditšhabeng tša gabobona, ba phatlalala bjalo ka ditshephe ge di kitimišwa, bjalo ka dinku tše di se nago modiši. ₁₅Yo a ka hwetšwago o tla hlabja, yo a ka swarwago o tla bolawa ka tšhoša. ₁₆Bana ba bona ba tla pšhatlaganywa, magae a hulwa, le basadi ba bona ba katwa bona ba lebeletše.

₁₇“Ke hlohleletša Bamidiane gore ba hlasele Babilone. Ga ba ne taba le silibera, le gauta ga e ba lake. ₁₈Ba tla fediša masogana ka mesebe. Ba ka se kwele bana bohloko, le masea a go nkga mekgato ba ka se a šokele. ₁₉Babilonia ke sethakga sa mebušo, ke boikgantšho bja Bakaldea. Eupša nna, Morena, ke tla pšhatlaganya motse wa Babilone go swana le mola ke pšhatlaganya Sodoma le Gomora! ₂₀Ga go yo a tlago tsoga a dutše gona gape; le ka morago ga meloko ye mentši go tla be go sa dule motho. Ga go Moarabia yo a ka hlwago a sa hloma mošaša wa gagwe gona, goba modiši yo a ka tsogago a fudišitše mohlape wa gagwe fao. ₂₁E tla ba felo mo go phelago diphoofolo tša lešoka le moo maribiši a agago dihlaga tša ona. Dimpšhe di tla dula gona, le meoya ye mebe ye nkego ke dipudi tša naga e tla tlolatlola le marope. ₂₂Diphiri di tla lla dibong tša motse le diphukubje mešate mo go bego go ketekwa. Nako ya Babilone e fihlile! Matšatši a yona ga a sa tlo diega.”

₁Morena o tla boeletša a šokela ditlogolo tša Jakobo, a ikgethela setšhaba seo sa Israele. O tla ba dudiša nageng ya bona gape, gomme bafaladi ba tla tla ba dula le bona, ba ikopanya nabo. ₂Ditšhaba di tla thuša setšhaba sa Israele go boela nageng ya sona, gomme gona moo nageng ye Morena a ba filego yona ditšhaba di tla hlankela Baisraele e le makgoba. Bale ba kilego ba thopa Baisraele bjale ba tla thopša ke bona, gomme setšhaba sa buša bale ba kilego ba se gatelela.

₃Morena o tla imolla lena setšhaba sa Israele matshwenyegong le mahlokong a lena, le modirong wo boima wo le bego le gapeletšwa go o dira. ₄Ge a dira bjalo lena le tla gegea kgoši ya Babilonia ka koša la re:

“Agaa, yeo ke yona pheletšo ya mogateledi! Kgatelelo e fedile! ₅Morena o fedišitše maatla a babuši ba babe ₆ba ba bego ba dula ba gateletše ditšhaba ka bogale; ba di hlakiša ba befetšwe, gomme ba sa lese go hlomara ba ba ba fentšego. ₇Bjale lefase lohle le hlomotšwe mootlwa, le iketlile, bohle ba letša mekgolokwane. ₈Mephaene le mesedere ya Lebanone e thabetše se se hlagetšego kgoši, e re: ‘Ka ge kgoši a se sa le gona ga go sa tlo ba le yo a re remago!’

₉“Bodulabahu bo ferehlegile, bo itokišetša go amogela kgoši ya Babilonia. Meoya ya bale ba bego ba na le maatla lefaseng e a huduega. Meoya ya dikgoši e emelela ditulong tša yona tša bogoši. ₁₀Yohle e a mo dumediša e re: ‘Ea, kganthe le wena o fokotše bjalo ka rena! O swana le rena! ₁₁O be o hlompšha ka modumo wa diharepa, eupša bjale o theošeditšwe mono bodulabahu. Bolao le kobo ya gago ke diboko.’

₁₂“Hee, kgoši ya Babilonia! Wena mphatlalatšane, naledi ya masa, o napile o wele o etšwa legodimong! Bjale o pšhatlagane fase, wena mafenyaditšhaba. ₁₃O be o ipotša o re o namelela legodimong, o yo bea setulo sa gago sa bogoši ka godimo ga dinaledi tša godimodimo. O re o tla dula o le kgoši godimo ga thaba yela medimo e kgobokanago go yona ka leboa. ₁₄O be o re o tla namelela ka godimo ga maru wa swana le Ramaatlaohle. ₁₅Eupša o kgoromeleditšwe mono fasefase bodulabahu.

₁₆“Bahu ba tla go tomolela mahlo, ba go lebeledišiša ba re: ‘Afa yo ke yena yola wa go šikinya lefase, a thothomediša le mebušo? ₁₇A ga se yena yola wa go pšhatlaganya metse gomme a fetoša lefase lešoka? Afa ke yena yola a bego a sa lokolle dibofša tša gagwe, a di lesa tša ikela gae?’ ₁₈Magoši ohle a lefase – yo mongwe le yo mongwe wa bona – o ithobaletše ka lebitleng la gagwe la segoši, ₁₉eupša wena ga se wa bolokwa, setopo sa gago se lahlilwe gore se bole. Se khupeditšwe ke ditopo tša bahlabani ba ba bolailwego ka tšhoša ba lahlelwa ka moleteng wa maswika, gomme se a gatakelwa. ₂₀Ka gobane o sentše naga ya gago gomme wa bolaya le setšhaba sa gago, o ka se bolokwe bjalo ka magoši a mangwe. Ga go na le o tee wa ba lapa leno le lebe yo a tlago šala. ₂₁Thomang go bolaya barwa ba kgoši ye; ba swanetše go hwa ka lebaka la dibe tša borakgolokhukhu ba bona. Ga go na le o tee wa bona yo a tlago emelela a thopa lefase goba a le tlatša metse.”

₂₂Morena Ramaatlaohle o re: “Ke tla hlasela motse wa Babilone ka o pšhatlaganya. Nka se tlogele selo – bana goba ditlogolo goba mašaledi afe le afe. Go bolela nna, Morena. ₂₃Babilone ke tla e fetoša mohlaka mo go tlago dula bomašianoke. Ke tla swiela Babilone ka leswielo la go gogola se sengwe le se sengwe. Go bolela nna, Morena Ramaatlaohle.”

₂₄Morena Ramaatlaohle o enne a re: “Tše ke di gopotšego di tla direga. Tše ke ikemišeditšego go di dira di tla phethagala. ₂₅Ke tla fediša Baasiria nageng ya ka ya Israele, gomme ka ba gatakela godimo ga dithaba tša ka. Ke tla rola setšhaba sa ka joko ya Baasiria le merwalo ye ba bego ba e rwele magetleng. ₂₆Tšeo ke tše ke ikemišeditšego go di dira lefase, gomme letsogo la ka ke le emišeditše go otla ditšhaba.” ₂₇Morena Ramaatlaohle o ikemišeditše go dira tšeo – ke mang yo a ka mo thibelago? O emišeditše letsogo la gagwe go otla – ke mang a ka le išago fase?

₂₈Molaetša wo o ilego wa begwa ka ngwaga wo Kgoši Ahase a hwilego ka wona šo:

₂₉Lena batho ka moka ba Filistia, patla yela le bego le bethwa ka yona e robegile, eupša le se ke la thaba. Noga e tswala mokopa bjalo ka ge semela se hloga modung, gomme leeng la wona go thwathwašwa mmamokebe. ₃₀Morena e tla ba modiši wa badiididiidi gare ga setšhaba sa gagwe, gomme bahloki o tla dira gore ba dule ba bolokegile. Eupša lena Bafilista o tla le fediša ka tlala, gomme go ka se šale motho gare ga lena.

₃₁Gololang le lle, lena metse ya Bafilista! Nolegang moko bohle! Lerole le tla le etšwa ka leboa – ke madira a a tlago ka lekoko.

₃₂Na batseta ba go tšwa Filistia re tla ba botša eng? Re tla ba botša gore Morena o hlomile Sione, le gore bahlaki gare ga setšhaba sa gagwe ba tla tšhabela gona.

₁Molaetša mabapi le Moaba šo: Motse wa Are le wa Kire e fedišwa bošego bo tee, ke setu fela nageng ya Moaba. ₂Batho ba Dibone ba pharile mmoto go yo lla tempeleng ya bona. Bamoaba ba llela motse wa Nebo le wa Medeba. Bohle ba bootše meriri le maledu ka manyami. ₃Ba apere diaparo tša go ilela mekgotheng; godimo ga ditlhaka tša dintlo le mapatlelong a motse batho ba a golola, ba lla gabohloko. ₄Batho ba Heshbone le ba Elale ba ithwele megono, sello sa bona se kwagala le kua Jahatse. Le bahlabani ba a bokolela, ba a thothomela. ₅Pelo ya ka e llela Moaba! Batho ba tšhabetše motseng wa Tsoare le go wa Eglathe-Shelishia. Bangwe ba tšama ba lla le morotoga wa Luhite; bangwe ba tšhabela Horonaime ba ntše ba kgitla sello. ₆Nokana ya Nimrime e pšhele, bjang bja thoko ga yona bo ponne, le mabjanyana a mafsa a omeletše, ga go botalanyana bjo bo sa šetšego. ₇Batho ba tshela Nokana ya Mepopoliri, ba tšhaba ba rwele dithoto tše ba di hlakodišitšego le tše ba bego ba ipoloketše tšona. ₈Gohle mellwaneng ya Moaba ke sello fela, se kwagala le motseng wa Eglaime le go wa Beere-Elime. ₉Motseng wa Dibone noka e re hwibii ka madi; le ge go le bjalo Modimo o sa tlilo o tlišetša mahlomola a mangwe. Mašaledi a Moaba a tla fedišwa bjalo ka phoofolo e roboketšwa ke tau.