To The Word – Day 98

₁Jonna, Jerusalema, sebešo sa Modimo, motse wo Dafida a bego a hlomile mešaša go wona! Mengwaga a e tle ka go latelana ga yona, le menyanya ya yona ya ngwaga ka ngwaga e tle bjalo, ₂eupša ka morago Modimo o tla tliša mathata motseng wo o bitšwago “Sebešo sa Modimo”. Go tla ba le dillo le mahloko, gomme motse ka moka o tla swana le sebešo se mollo o laumago go sona. ₃Modimo o tla dira gore manaba a hlome mešaša go o dikologa, a o dikanetše, a age ditora tša go o hlasela. ₄Jerusalema e tla swana le moya wa mohu yo a bolelago ka go bobola ka fase ga mobu, a sebaseba a le ka mobung.

₅Jerusalema, manaba a gago ka bontši a a tšwago dinageng di šele a tla budulwa bjalo ka lerole, gomme madira a bona a sehlogo a tšewa ke phefo bjalo ka mooko. Ka pelapela ₆Morena Ramaatlaohle o tla le hlakodiša ka medumo ye e šiišago le ditšhišinyego tša lefase, le ka madimo le ka mollo wo o laumago. ₇Ke moo madira ohle a a hlaselago motse wa Jerusalema, sebešo sa Modimo, a o tsenyago mathateng, le dibolai tša bona le ditora tša tlhaselo di tla timelelago bjalo ka toro, bjalo ka pono ya bošego. ₈Ditšhaba tšohle tše di lwago le Jerusalema di tla etša motho yo a bolawago ke tlala, yo a lorago a eja, gomme a tsoge a sa swerwe ke tlala, goba tša swana le motho yo a nyorilwego, yo a lorago a enwa meetse, gomme a tsoge a sa swerwe ke lenyora.

₉Lebelelanang le gakanegile! Iphoufatšeng le dule le foufetše! Tagwang le se la nwa beine! Thekeselang le se la nwa bjala! ₁₀Morena o le potumišitše la swarwa ke boroko kudu. Modimo o khupeditše baprofeta mahlo, bona e lego mahlo a lena; o pipile baboni dihlogo, bona e lego dihlogo tša lena. ₁₁Se pono ye nngwe le ye nngwe ya baprofeta e se šupago le ka se se tsebe; e tla swana le lengwalo le le tswaletšego. Ge motho a ka le fa yo mongwe yo a kgonago go bala, a re a mmalele lona, o tla re a ka se kgone ka gobane le tswaletšwe. ₁₂Ge a ka le fa motho yo a sa kgonego go bala a re a mmalele lona, o tla re yena ga a kgone go bala.

₁₃Morena o rile: “Setšhaba se se re se a nthapela, eupša e no ba ka molomo fela – dipelo tša bona di kgole le nna. Sedumedi sa bona ke melawana ya batho ye ba e tsebago ka hlogo. ₁₄Ka gona ke tla boeletša ka ba otla leboelela ka tše ba sa di kwešišego. Ba bohlale ba tla lahlegelwa ke bohlale bja bona, ba kwešišo ba se sa kwešiša selo.”

₁₅Ba lahlegile bao ba lekago go khutišetša Morena maano a bona gore a se ke a a tseba! Tše ba di dirago ba di dira sephiring, gomme ba gopola gore ga go yo a ba bonago goba a tsebago se ba se dirago. ₁₆Ka mehla ba phethola dilo mo nkego letsopa le ka re ke lona mmopi. Na pitša e ka re go mmopi wa yona: “Ga se wa mpopa”? Kgane se se bopilwego sona se ka re go modiri wa sona: “Ga o tsebe se o se dirago”?

₁₇Kgauswinyana sethokgwa sa Lebanone se tla fetoga tšhemo ye e nonnego, gomme tšhemo ye e nonnego ya ba selo se se tlwaelegilego go no swana le sethokgwa.

₁₈Ge letšatši leo le fihla ditholo di tla kgona go kwa ge di balelwa puku, le difofu tše go tšona e bego e le leswiswi le boso fela di tla bona. ₁₉Baikokobetši ba tla buša ba thaba ba reta Morena, mme badiidi ba tumiša Modimo yo mokgethwa wa Israele. ₂₀Bagateledi ba tla fedišwa, mme ba ba nyefolago Modimo, le badiradibe ka moka ba bolawa. ₂₁Modimo o tla fediša ba ba pharago ba bangwe ka maaka, ba ba dirago gore ba ba nego molato ba se ke ba otlwa, le ba ba bolelago maaka gore ba ba se nego molato ba se ahlolwe ka toka.

₂₂Bjale ge, Morena yo a ntšhitšego Abrahama nageng ya gabo o re go ditlogolo tša Jakobo: “Lena setšhaba sa ka, le ka se sa lewa ke dihlong la galoga difahlego. ₂₃Ge le bona bana ba ke tlago le fa bona, le tla nkgodiša nna, Modimo yo mokgethwa wa Israele, mme la mpoifa. ₂₄Ba ba tlogetšego Modimo ba tla ithuta go kwešiša, gomme ba ba ngongoregago ba tla rutwa ba kwešiša.”

₁Morena o boletše a re: “Ba ba bušago Juda ba lahlegile, ka gobane ba itshwere bjalo ka bana ba ba tsogelago motswadi maatla. Ba phetha maano a bona ba se ba kwana le nna, le gona ba dira kwano le dinaga tše dingwe nna ke sa rate. Ka fao ba pharelela sebe godimo ga se sengwe. ₂Ba theogela Egepeta go yo nyaka thušo ba se ba nkgopela gore ke ba eletše. Ba nyaka gore Egepeta e ba šireletše, le gore kgoši ya Egepeta e be botšhabelo bja bona. ₃Eupša ka morago ba tla lewa ke dihlong tša ge ba ile ba tšhabela go yena, mme ba goboga ka ge ba ile ba re Egepeta e ba šireletše. ₄Le ge batseta ba bona ba šetše ba fihlile Egepeta motseng wa Tsoane le wa Hanese, ₅batho ba Juda ba tla lewa ke dihlong ba goboga ka ge ba botile setšhaba se se sa ba holego goba sa ba thuša ka selo.”

₆Modimo o bolela mabapi le diphoofolo tša lešoka la ka borwa o re: “Batseta ba sepela nageng ye e boifišago, moo go nago le ditau le mekopa le bommamokebe. Ba išetša setšhaba se se sa ba holego ka selo dimpho tše bohlokwa ka dipokolo le dikamela tša bona. ₇Tše Egepeta e ba thušago ka tšona ga se selo le gatee. Ka gona ke e theile leina la Mabogolaadutše.”

₈Modimo o mpoditše gore ke ngwale ditiro tše mpe tša setšhaba letlapeng ke na le bona, gore e tle e be bohlatse ka moso go ya go ile, ₉ka gobane ke setšhaba sa melala ye methata, sa go bolela maaka, sa go gana go phetha melao ya Morena. ₁₀Ba botša baboni ba re ba se ke ba bona dipono. Go baprofeta ba re: “Le se ke la re ruta gore tše di lokilego ke eng. Re botšeng tše di re kgahlago; le se ke la re botša melaetša ya mmannete ya Modimo. ₁₁Se re emeng pele, tlogang! Ga re nyake go kwa selo ka Modimo yoo wa lena yo mokgethwa wa Israele.”

₁₂Eupša yena Modimo yo mokgethwa wa Israele o re: “Tše ke le botšago tšona le a di gana, gomme le botile kgatelelo le boradia, le di tshephile. ₁₃Le ne molato. Le etša leboto le le ilego godimo, le le pharogilego mme le sekametšego ka ntle le nyaka go wa; gateetee le tla wa. ₁₄Le tla pšhatlagana bjalo ka pitša gwa ba gwa se šale le lengetana la go tšea magala sebešong, goba la go ga meetse ka sedibeng.”

₁₅Morena, Mong wa bohle, Modimo yo mokgethwa wa Israele, o botša setšhaba o re: “Ge le ka boela go nna gomme la ntshepha le ikhomoletše, le tla phološwa la tia.” Eupša lena le a gana. ₁₆Le re le ka tšhabela manaba a lena ka dipere. Ka gona le tla rakedišwa. Le gopola gore le tla namela dipere tša lebelo, eupša tša ba ba le hlomerego e tla ba tša lebelo go di feta. ₁₇Ba sekete ba lena ba tla tšhaba ge mohlabani o tee wa manaba a ba batamela, gomme bahlabani ba bahlano ba tla le tšhabiša. Go madira a lena go ka se šale motho; go tla šala fela sefoka godimo ga mmoto, goba kotana ya sefoka godimo ga thaba. ₁₈Le ge go le bjalo, Morena o letetše go tlo le gaugela. O itokišeditše go le šokela, ka gobane ka mehla o dira tše di lokilego. Ba lehlogonolo ke ba ba botilego yena!

₁₉Lena setšhaba seo Modimo wa sona a dulago Sione, lena le agilego Jerusalema, le ka se sa lla. Ruri, Morena o tla le šokela ge le mo llela; ge a le kwa o tla le araba. ₂₀Morena o tla le sepetša mathateng, eupša yena ka sebele o tla le ruta, a ka se sa iphihla, mme le tla mmona ka mahlo a lena. ₂₁Ge le phamoga tsela le eya ka thoko efe le efe, le tla kwa lentšu ka morago ga lena le re: “Tsela ke ye. Tšeang ka yona.” ₂₂Le tla tšhilafatša diswantšhobetlwa le diswantšhobopša tša lena tša tshipi ka go di golla gauta le silibera ye di ritetšwego ka yona. ₂₃Le tla e šila, la e lahla bjalo ka matšhila la re: “Ga ke sa le nyaka!” Ge le bjetše dipeu Morena o tla le nešetša pula, gomme tše le di bunago e tla ba tše dintši tše di nonnego, le diruiwa tša lena di tla ba le phulo ye ntši. ₂₄Dipholo le dipokolo tše le lemago ka tšona di tla fiwa mabele a a feferilwego mme a tšhetšwego letswai. ₂₅Mohla dibo tša manaba a lena di thopšago mme bahlabani ba ona ka moka ba bolawago, dithabeng le mebotong ka moka go tla ba le meela ya meetse. ₂₆Ngwedi o tla taga bjalo ka letšatši, gomme letšatši le tla taga gašupa go feta mehleng, la swana le seetša sa matšatši a a šupago. Tše ka moka di tla direga ge Morena a bofa dintho tše a di ntšhitšego setšhaba sa gagwe gomme a di alafa.

₂₇Letago la Morena le bonala le etla le sa le kgole. Mollo le maru a maso di šupa gore o galefile. O bolela a befetšwe kudu, gomme mantšu a gagwe a tšhuma bjalo ka mollo. ₂₈O romela phefo ya go senya bjalo ka noka ye e falalago e gomago batho ka megolo. Phefo yeo e tšea ditšhaba bjalo ka mooko ka leselong. Morena o kgoka ditšhaba ka thapo melaleng a di timetša. ₂₉Eupša lena, setšhaba sa Modimo, le tla opela go swana le bošegong bja monyanya wo mokgethwa. Le tla ipshina bjalo ka ba ba yago Tempeleng ya Morena, setšhabelo sa Israele, gotee le ba ba letšago dinaka.

₃₀Morena o tla kwagatša lentšu la gagwe la bogoši, a ba a bonagatša ka moo a fedišago manaba a gagwe ka gona a galefile. Go tla ba le mollo wo o laumago le dipula tša matlorotloro le tša ditladi le difako. ₃₁Baasiria ba tla tšhoga kudu ge ba ekwa lentšu la Morena, le ge a ba otla. ₃₂Ge Morena a ba otla leboelela, setšhaba sa gagwe sona se tla letša meropa le dikgapa. Modimo o tla lwa le Baasiria a ba fediša taa. ₃₃Ke kgale felo mo go tlago gotšwa mollo wo mogolo gwa tšhumelwa kgoši ya Asiria go lokišitšwe. Ke molete wo o išago, wa go ahlama, gomme mollo o goditšwe ka dikgong tše dintši. Morena o goteditše dikgong tšeo ka moya wa gagwe wo o tukago mollo.

₁Ba lahlegile ba ba yago Egepeta go nyaka thušo! Ba botile maatla a Egepeta – dipere, dikoloi tše dintši tša ntwa, le banamedi ba dipere ba bantšintši. Ga se ba bota Morena, Modimo yo mokgethwa wa Israele, goba ba nyaka thušo go yena. ₂Le ge go le bjalo yena o tseba se a se dirago! O tliša masetlapelo. O phetha se a ikemišeditšego sona, a otla bakgopo le bathuši ba bona. ₃Baegepeta ga se medimo – ke batho ba nama. Dipere tša bona ke dipere bjalo ka tše dingwe – ga se meoya. Ge Morena a emiša letsogo gore a otle, setšhaba sa Egepeta se se thekgilego sa Israele se tla thetšwa, gomme sa Israele sa wa, tša fedišwa mmogo.

₄Morena o mpoditše a re: “Bjalo ka ge tau e bopa ge e swere phoofolo ye e e bolailego, e sa tšhabe mašata le mekgoši ya badiša ba bantši, le nna, Morena Ramaatlaohle, ga go se se tlago nthibela gore ke theoge ke tle ke šireletše thaba ya ka ya Sione. ₅Bjalo ka ge nonyana e fofafofa go dikologa sehlaga sa yona, le nna, Morena Ramaatlaohle, ke tla šireletša Jerusalema ka e lwela, ka e phološa.”

₆Morena o rile: “Lena setšhaba sa Israele, le ntsogetše maatla kudu, fela bjale boelang go nna! ₇Nako e etla yeo ka yona yo mongwe le yo mongwe wa lena a tlago lahla medimo ye e mo dirišago dibe ye a e dirilego ka silibera le gauta. ₈Asiria e tla thopša ka ntwa, fela e sego ya batho – ke Modimo yo a tlago e hlasela. Baasiria ba tla tšhaba ntweng gomme masogana a bona a thopša a dirwa makgoba. ₉Kgoši ya bona e tla tšhaba e tšhogile kudu, bakgomana ba tla tšhoga ba ba ba tlogela difoka tša bona.” O realo Morena yo mollo wa gagwe wa dihlabelo o tukago thabeng ya Sione, motseng wa Jerusalema.

₁Ka moso go tla buša kgoši ya toka, le bakgomana ba go buša ka molao. ₂Mongwe le mongwe wa bona o tla etša boširelo phefong le botšhabelo dipuleng tša magadima. Ba tla ba bjalo ka dinokana nageng ye e omilego, bjalo ka moriti wa letlapa le legolo leganateng. ₃Batho ba tla bona mediro ya Modimo, ba kwešiša le melaetša ya gagwe. ₄Ba ba welago dilo godimo ba tla thoma go nagana gabotse pele ba di dira. Ba ba sa kgonego go itlhaloša gabotse, ba tla kgona go bolela ba kwešišega. ₅Setlaela se ka se sa sengwa mohlomphegi, goba moradia a tšewa gore ke motho wa maemo. ₆Lešilo le bolela tša bošilo gomme le nagana go dira tše mpe, mme la di dira. Le bolela tše di selekago Morena. Ga le ke le efa ba ba swerwego ke tlala dijo, goba ba ba nyorilwego meetse. ₇Sehwirihwiri se šoma ka mathaithai; se loga maano a go tsenya bahloki mathateng ka maaka, le ge ba le tshekong. ₈Mothomotho yena o nagana merero ye mebotse fela, gomme o emela tše di lokilego.

₉Lena basadi le phelago bophelo bja go se šetše bja go hloka mathata, theeletšang se ke se bolelago! ₁₀Išago ka nako tše le tla be le gakanegile, ka gobane go tla be go se diterebe goba dikenywa tše dingwe tše le ka di fulago. ₁₁Le be le phela bophelo bja go se šetše bja go hloka mathata, eupša bjale thothomelang le tetemele ka poifo! Hlobolang le apareng diaparo tša go ilela. ₁₂Itshetleng dihuba le llele mašemo a a nonnego le merara ye e enywago, ₁₃ka gobane naga ya setšhaba sa gešo e mela mehlašana ya meetlwa le ditshehlo. Llelang malapa ka moka mo batho ba bego ba dula ba thabile, le motse wo o bego o tlala mekgolokwane. ₁₄Ešita le lapa la mošate le šetše le tlogetšwe, mme motse wo o bego o na le batho ba bantši ga o sa na le motho. Le seripa sa motse se se bego se bitšwa Ofele le tora ya tlhapetšo ya moo e tla ba marope go ya go ile. Dipitsi di tabogataboga moo, le diruiwa di fula gona.

₁₅Go tla ba bjalo go fihlela Modimo a re tšhollela moya wa gagwe. Lešoka le tla fetoga tšhemo ye e nonnego, gomme tšhemo ye e nonnego ya ba selo se se tlwaelegilego go no swana le sethokgwa. ₁₆Nageng ka moka go tla ahlolwa ka nnete le ka toka. ₁₇Ka ge mang le mang a tla dira tše di lokilego, go tla ba le khutšo le phomolo le polokego go ya go ile. ₁₈Setšhaba sa Modimo se tla dula nageng ye e letšego, gomme magae a tla bolokega a iketla. ₁₉Eupša sefako se tla hlohlora dithokgwa, le motse wa thubega. ₂₀Mehleng yeo batho ba tla thaba kudu ge ba na le meetse a mantši a dibjalo, ba fudiša dikgomo le dipokolo tša bona mo ba ratago.

₁Ka morago ga moo Jesu a išwa ke Moya lešokeng gore a yo lekwa ke Diabolose. ₂Ge a feditše matšatši a masome a mane le mašego a ona a sa je selo, a swarwa ke tlala. ₃Moleki yoo a tla go yena a re: “Ge o le Morwa wa Modimo, laela maswika a gore a fetoge bogobe.”

₄Jesu a mo fetola a re: “Mangwalo a Makgethwa a re: ‘Motho ga a phele ka bogobe fela, eupša o phela le ka se sengwe le se sengwe se Modimo a se bolelago.’ ”

₅Ke moka Diabolose a mo iša Motseng wo Mokgethwa, a fihla a mo nametša ntlhohlong ya Tempele, ₆gomme a re go yena: “Ge o le Morwa wa Modimo, ikušetše fase, gobane Mangwalo a Makgethwa a re:

₇Jesu a mo fetola a re: “Le gona Mangwalo a Makgethwa a re: ‘O se ke wa leka Morena Modimo wa gago.’ ”

₈Diabolose a tšea Jesu gape a mo iša thabeng ye teleletelele, a mo laetša dinaga ka moka tša lefase le mahumo a tšona ₉a re: “Tše ka moka ke tla go fa tšona ge o ka wa ka matolo wa nkhunamela.”

₁₀Jesu a mo fetola a re: “Sathane, ntlogele, gobane Mangwalo a Makgethwa a re: ‘O khunamele Morena Modimo wa gago, o direle yena a nnoši!’ ”

₁₁Ke moo Diabolose a mo tlogetšego, gomme barongwa ba tla ba hlankela Jesu.

₁₂Ge Jesu a ekwa gore Johanese o išitšwe kgolegong, a ya Galilea. ₁₃A se ke a boela Nasaretha, eupša a yo dula Kapernaume, e lego motse wa kgauswi le letsha la Galilea, nageng ya Sebulone le ya Naftali, ₁₄gore go phethege se se boletšwego ke moprofeta Jesaya mola a re:

₁₇Go tloga ka nako yeo Jesu a thoma go ruta batho a re: “Sokologang, ka gobane mmušo wa Modimo o batametše!”

₁₈Ya re ge Jesu a sepela lebopong la letsha la Galilea, a bona banna ba babedi, barwa ba motho, bao e bego e le barei ba dihlapi. Bona e be e le Simone, yo a bego a bitšwa Petrose, le Andrease, ngwanabo. Ba be ba rea dihlapi ka letsheng ka malokwa. ₁₉Jesu a re go bona: “Ntateleng, gomme ke tla le dira barei ba batho.” ₂₀Ba akgofa ba tlogela malokwa a bona, ba mo latela.

₂₁Ge a tloga moo a bona ba bangwe ba babedi le bona e le barwa ba motho. Bona e be e le Jakobose le Johanese, barwa ba Sebediose. Ba be ba le ka leselawatleng le Sebediose, tatagobona, ba lokiša malokwa a bona. Jesu a ba bitša. ₂₂Le bona ba akgofa ba tlogela leselawatle le tatagobona, ba mo latela.

₂₃Jesu a sepela le naga ya Galilea ka moka, a ruta ka disinagogeng, a bega Taba ye Botse ya mmušo wa Modimo, a fodiša batho malwetši le mafokodi a bona. ₂₄Taba ya gagwe ya kwagala nageng ya Siria ka moka, gomme batho ba mo tlišetša ba ba babjago ba swerwe ke malwetši a mehutahuta le dihlabi, le ba ba tsenwego ke bademone, le ba malwetši a go wa, le ba go repha ditho, gomme Jesu a ba fodiša ka moka. ₂₅A latelwa ke mašaba a mantši a go tšwa Galilea, le Metseng ye Lesome, le Jerusalema, le Judea, le nageng ya ka mošola wa noka ya Jordane.