Tšwela pele ka ntle le poifo – Letšatši la 10

[Nakong ya go feta, babadi ba mmalwa ba pakile mabapi le se Modimo a se dirilego maphelong a bona. Tše ke ditsopolwa go tšwa go diemeile tše mmalwa.]

Mmadi wa 1, Mauritz: “Mengwaga ye mehlano ya go feta, ke be ke šoma go khampani e kgolo ya boditšhabatšhaba. Lega go le bjalo, nakong ya Dibatsela go ya go Manthole, sehlopha sa rena se ile sa felelwa ke mošomo. E bile semaka se segolo go rena. Ke bile le kgetho ya go ka šomela khamphani ye nngwe gape ka dira kgopelo ya mošomo go dikhampahani tše dingwe. Ge ke be ke rapela ka sepheto, mantšu go Mateu 14:22 a nkgothatša ka pono ye e hlakilego pelong ya ka: ‘Etšwa leselawatleng (tikologo ye e bolokegilego), sepela godimo ga meetse (go sena selo se se go thekgago) o ye go Jesu, o tsepeleditše mahlo a gago go Yena. Tshepha Yena gomme o se dumele maphuto (maemo a ekonomi) goba meetse a maso (dipotšišo mabapi le gore ke tla phela bjang) a go nole moko. Se lebelele morago go leselawatle (boemo bjo bo bolokegilego bja go šomela). Tsepeletša mahlo a gago go Jesu gomme o ka se sobele.’ Ke thomile kgwebo ya ka bjalo ka moeletši wa kgwebo yo a ikemego. Lehono, mengwaga ye mehlano le seripa morago, ke sa ipereka gomme ke thwetše motho o tee mola ke gola go feta ge ke be ke le go khamphani e kgolo ya boditšhabatšhaba. Se ke boleng bja go tsepeletša mahlo a gago go Jesu letšatši le letšatši. Ke modirišani wa ka wa o mogolo wa kgwebo.”

Mmadi wa 2: “Ge ke hwetša gore monna wa ka ga a botege go nna, seo se nyakile go mpšhatlaganya. Lega go le bjalo, ke paka gore Modimo o mphile maatla a go lebalela le go lebala. Lehono ke mengwaga ye lesome morago gomme ge ke gadima morago, ke a tseba gore ka letsogo la ka le le ka gare ga la Gagwe, dilo ka moka di a kgonega. E bile selo se sebotse se ke se dirilego ka gobane lehono go na le botee ka gare ga lapa la ka gomme mmogo re ka tsebagatša gore: Jesu ke Kgoši. Ditumišo ka moka go Yena.”

Mmadi wa 3: “Morago ga go bala sengwalwa ‘Ke tla se dira ka noši’, ke ile ka lemoga gore molaetša ka nnete e be e le wa ka le monna wa ka. Re be re leka go dira dilo ka moka gomme ga bjale re itemogela mathata ka ge re sa kgopela thušo ya Modimo dithulaganyong tša rena. Re ilo fetoša seo lehono. Goba gona, re na le bana ba bannyane ba babedi – o tee o na le dikgwedi tše 21 gomme yo mongwe o na le mengwaga ye meraro le seripa. Ge ke nagana ka fao ke nyakago go ba thuša ka gona ge ba nyaka go dira dilo ka moka ka noši, ke nagana ka fao Modimo a ikwago ka gona ge A nyaka go re thuša gomme re kgetha go dira ka noši!”

Mmadi 4, Cathari-Ann: “Manthole ngwagola, ke etetše morwa wa ka Christopher kua London. Tumo ya pelo ya ka e be e le go bona lehlwa ka ge ke sa ka ka le bona. Go be go tonya kua London, eupša go sa tonye kudu gore motho a ka ya go bona lehlwa. Nna le morwa wa ka ra rulaganya “leeto ka mmila” go ya Scotland. Ka ge laesense ya gagwe e be e feletšwe ke nako gomme re rentile koloi, ke ile ka swanela ke go otlela mola yena e le mosesiši. A tlanya aterese go GPS ya sellathekeng sa gagwe gomme ra wela tsela. Karolo e kgolo ya leeto e be e le mmileng o mogolo pele GPS e re ntšha mmileng o mogolo. Le ge go be go makatša go Christopher, o ile a šišinya gore re sepele ka tsela ye e laeditšwego. Morago ga mo e ka bago dikilometara tše 50, morwa wa ka o be a befetšwe ka ge re lemogile gore GPS e re neile “mmila wa naga”. Re be re le kgauswi le go goma ge gateetee re fihla tikologong ye e bego e aparetšwe ke lehlwa. Ka ema le semeetseng, ka tšwa koloing gomme ka kitimela tšhemong, ke ipshina ka motsotso o mongwe le o mongwe wa lehlwa la ka. Pelong ya ke tsebile gore e be e le mpho ya Modimo go nna ka gobane o be a tseba tumo ya pelo ya ka. Leetong ka moka ga re a bona lehlwa gape.”

Modimo ke Tate go rena ka moka. Go Pesalome 136:1 Mopesalome o ngwetše gore: “Lebogang Morena, gobane ke yo botho, gobane lerato la gagwe ke la go ya go ile.” Gomme go Pesalome 100:5 re bala gore: “Gobane Morena ke yo botho; lerato la gagwe ke la neng le neng, potego ya gagwe ke ya go ya go ile.” Modimo o nyaka go re etela pele ge re hloka bohlale lefelong la mošomo; O nyaka go re matlafatša le go re kgontšha go lebalela ka gobane O a tseba gore re a lokollwa tshepetšong; O nyaka go re etela pele le go re thuša go sa šetšwe gore re nyaka go itirela dilo ka moka ka noši; le go nyaka go bontšha go loka ga Gagwe go rena ka go phethagatša tumo e kgolo pelong ya rena. O mo lebogile neng la mafelelo ka go loka ga Gagwe? Modimo a go šegofatše.