Tšwela pele ka ntle le poifo – Letšatši la 17

Mengwaga e mmalwa ya go feta ya go ba mmegi wa ditaba, ke dirile dipoledišano tše ntši gomme sa go kgahliša, ke kwele sekafoko sa go swana makga a mmalwa: “Ke gotše tate e le setagwa. Ke be ke hloile boitshwaro bjo gomme ka ikana gore nka se swane le yena. Gomme, lehono ke setagwa le nna.” Goba: “Ke be ke hloile ge mme a seba batho gomme a tsena-tsena ka mehla maphelong a rena. Lehono ke ipotšiša gore bana ba ka ka dinako tše dingwe le bona ga ba ikwe ka tsela e e swango ka nna.” Goba: “Setho se sengwe le se sengwe sa ka se be se hloile bootswa bo bontši bja tatemogolo. Eupša lehono ke ikhwetša ke rata batho ba babedi.”

Ke karolo efe ya bophelo bja gago ye o ka rego ke senatla se buša moya molaleng wa gago, ka ge o boifa gore e tla ba nnete ka gobane o e hloile kudu? Ekaba o a tšhoga gore o tla tsebja bjalo ka motho yo ka mehla a nago le bothata bja ditšhelete? Goba motho yo a palelago ke go ba le mošomo nako e telele goba go atlega lenyalong? Goba mohlomongwe o a boifa gore o tla tsebja, go swana le o tee wa batswadi ba gago, bjalo ka motswadi yo a sego gona bophelong bja ngwana wa gago goba go mo swaya diphošo kudu, wa dira gore a go boife?

Poifo ya gore re ba bjalo ka diketapele maphelong a rena e ka ba tlhobaboroko gabonolo. Ge ka mehla re bolela ka matšhogo a rena, ka go se tsebe re bulela lenaba lemati go ka re hlasela ka go lebanya karolong yeo. Gomme go bohlokwa go lemoga dipoifo tša rena le go diahlaahla le Modimo. O holofetša go re fa maatla a go thala mothaladi lešabašabeng le go sepela re lebile go bokamoso le Yena.

In Doiteronomio 30:19 Modimo o bolela le Baisraele pele ba tsena Nageng ye e Holofeditšwego. O ba nea kgetho ye: “Bjale ke le fa go ikgethela bophelo goba lehu, tšhegofatšo ya Modimo goba thogako ya gagwe, gomme ke bitša legodimo le lefase go tlo hlatsela gore le kgetha eng. Kgethang bophelo, gore lena le ditlogolo tša lena le tle le phele.”

O ka ba o dirile dipheto tše fošagetšego nakong ya go feta go ka šogana le maswao a phedišo bophelong bja gago, eupša gopola, ka Modimo go na le menyetla ya bobedi. Go Johanese 8 re bala ka batho ba ba tlišago mosadi yo a hweditšwego a otswa go Jesu. Ba be ba nyaka go mo kgatla ka maswika. Jesu lega go le bjalo a re yo a se nago sebe mo go bona a e be yena a thomago go mo foša ka leswika. Ka moka ba tloga gomme ge yena le mosadi ba le noši, a mmotša gore: “Sepela, fela o se sa dira sebe” (Johanese 8:11).

Ge o fetoga ka nnete mabapi le tša nako ya go feta goba o hwetša karolo ya poifo le go e ahlaahla le Modimo, O tla go matlafatša ka kgaugelo go sehla se sengwe le se sengwe sa bophelo bja gago. A re kgethe bophelo lehono le go dumelela Modimo go dira dilo ka moka. Modimo a go šegofatše.