Tšwela pele ka ntle le poifo – Letšatši la 18

Ka dinako tše dingwe re ithuta dithuto tše bohlokwa ka khitšhining – le ge o, bjalo ka nna, se moapei wa bokgoni. Nakong e fetilego ke ile ka reka kgogo ye e bego e marineitilwe, e ntšhitšwe marapo. E be e bonala e le matute ka gare ga sephuthelwa gomme go ya ka ditaelo ka morago (go bohlokwa go nna), go be go kwagala o ka re e tla ba dijo tše monate go di apeela baratiwa ba gago nakong ya metsotso e mmalwa.

Ke latetše ditaelo ka tlhokomelo. Dilo di sepetše go ya ka leano – go fihla ge ke boela ka khitšhining metsotso e lesome morago ga ge ke beile kgogo ka ontong. Ka lemoga le semeetseng gore go na le selo se se swago. Ka bula lemati la onto gomme ka swanela ke go efoga muši wo o bego o etšwa ka ontong. Ekaba ga ke a latela ditaelo gabotse? Ekaba kgogo e be e eswa? Goba onto ebe e le kgauswi le go thuthupa?

Morago ga go tima setofo, ke butše mabati le mafestere gore muši o kgone go tšwa, gomme ka boela morago setofong ka tlhokomelo. Fao ke hweditše sebaki sa muši: matšatši a mabedi pele, re gadikile dikgopo ka ontong. Marineite o rothetše ka fase go sebjana sa onto. Ke se phumotše, eupša ka palela ke go phumola ka tlase le go dikologa sebjana. A ke a nagana go dira seo. Phišo ya onto e bakile marothodi a mareneite go swa gomme a baka muši!

Morago ga go hlatswa onto ka moka gape, ke beile kgogo go tšhimelwa gomme nakong ye e butšwile ka pela ka ntle le bothata.

Tiragalo ye e nkgopoditše boemo maphelong a rena ge re botša Modimo dibe tša rena le go kgopela Yena go re lebalela. Ge re lewa ke dihlong kudu go ka bolela le Yena ka maemo a itšego go tšwa nakong ye e fetilego, go ba bjalo ka marothodi a mareneite ka ontong. Mathomong re nagana gore re ka bo uta go bao ba lego kgauswi le rena. Bothata, lega go le bjalo, ke gore ge kgatelelo maphelong a rena e oketšega, ge onto e fišwa, muši o tla tšwela ntle – mang le mang o tla o bona.

Go Sefela sa Difela 2:15 re bala gore ke dilo tše di nyenyane maphelong a rena tšeo ka dinako tše dingwe di kago baka tshenyo e kgolo ge re palela ke go di šetša: “Re tanyetšeng diphukubje, diphukubjana tšela di re senyetšago dirapa tša merara, gobane merara ya rena e thuntše.” Gomme go 1 Johanese 1:5-7 re bala gore: “… Modimo ke seetša, gomme mo go yena ga go na leswiswi le gatee. Bjale ge re re re ba tee le yena etšwe re dutše leswiswing, re a aketša, ga re phethe thato ya Modimo. Eupša ge re phela seetšeng bjalo ka yena ge a le seetšeng, gona re ba tee seng sa rena, gomme madi a Jesu, Morwagwe, a re hlatswa dibe tšohle.”

Ke eng seo o se beilego leswiswing bophelong bja gago? Mohlomongwe ke selo se se diregilego mengwaga ya go feta, eupša se sa go ama. Gopola, ge re sa na le mafelo a leswiswi maphelong a rena, lenaba le ka re hlasela ka go re gopotša ka mehla ka seo. Ga se re dire fela gore re ikwe re na le molato, eupša se baka gape gore re phele ka poifo ya gore batho ba bangwe ba tla utolla sephiri sa rena gomme seo se re tima lethabo. Ke ge feela re botša Modimo dibe tša rena mo re folago ka nnete le go itemogela tokologo go tšwa go sona.

O se letele gore marothodi a mareneiti a thome muši. A re a išeng go Modimo, re tseba gore A ka kgona go tloša dibe tša rena bjalo ka ge bohlabela bo le kgole le bodikela le go re hlwekiša go re re be ba bašweu bjalo ka lehlwa. O ka makatšwa ke ka fao o kago ikwa bokaone ge o ema seetšeng, go se na leswiswi bophelong bja gago! Modimo a go šegofatše.