Tšwela pele ka ntle le poifo – Letšatši la 20

Mesong ya letšatši la Labohlano ka Ngwatobošego 5, 2015, tau e tšhabile go tšwa go Serapa sa Bosetšhaba sa Diphoofolo sa Karoo ka ntle ga Beaufort West. Tau mohlomongwe e tšwile legoreng morago ga ge meetse a phudile lešoba ka tlase ga legora. Ka ge serapa se dikologile ke dipolase tša praebete, ofisi ya tša temo ya selete ya botša balemi gore ba hlokomele le go se dumelele bašomedi ba bona go ya mašemong go fihlela tau e swarwa.

O ka nagana ka fao borapolase le bašomedi seleteng seo ba bego ba ikwa ka gona ge ba eya go šoma letšatši le letšatši? Ke na le nnete ya gore ba be ba ekwa modumo ofe goba ofe – kudukudu bošego – o mohlomongwe o ka bego o kwagetše o le kgole bjalo ka wa tau. Ka gobane go be go se na yo a tsebago fao tau e lego gona, e be e ka ba e le kgole goba kgauswi kudu. Se ke ka lebaka leo poifo e ka bego e tsene gabonolo megopolong ya batho. Ke ra gore, nagana o le gare o anega diaparo terateng goba o ipshina ka go beša nama le ba lapa mathuding gomme gateetee go na le go rora ga go thiba ditsebe kgauswi le wena – meno a yona a go popoduma!

Ge re palela ke go ahlaahla matshwenyego le dipoifo tša rena le Modimo, go ba bjalo ka tau ye e timetšego. E ba ka kelelong ya rena mola ka mehla re theeletša go rora – manyalong a rena, mošomong, ditšheleteng goba gaešita ka tša maphelo a rena. Se re se lebalago, lega go le bjalo, ke gore ge ka mehla re letela tše mpe le go tshwenyega ka tšona, go ba bjalo ka meetse a phula lešoba legoreng gore tau e tšwe le go re tlaiša. Re gogela go rena se ka mehla re naganago ka sona. Go Jobo 3:25 Jobo o re: “Tše ke di boifago ke tšona tše di ntlhagelago; tše ke di tšhabago di a ntlela.”

Ka gobane Modimo o tsebile gore re ka šwahlela ke ditau nako le nako maphelong a rena, Yena pele ga nako o re file sedirišwa sa go di tswalelela ka hokong. Go Baheberu 4:12 re bala gore: “Lentšu la Modimo le a phela, le mafolofolo ebile le bogale go feta tšhoša ya magale a mabedi.” Dikholofetšo tša Modimo ke therešo gomme Ga a fetoge. Lentšu la Gagwe ke tšhoša ya rena ye re e šomišago go lwantšha ditau ka sebopego sa poifo, pelaelo le go se dumele. Gomme ge go rora ga tau go re boifiša, re ka ikgopotša ka mantšu a Mopesalome go Pesalome 56:3-4: “Ge ke ikwa ke boifa, ke bota wena. Ke botile Modimo yo ke mo tumišago ka lebaka la tše a nkholofeditšego tšona, gomme ga ke boife selo.”

A re bolele le Modimo ka ditau maphelong a rena mola re ithekga ka Lentšu la Gagwe. Ka tsela ye, re paka maswika pele ga legora go thibela meetse go ka phula lešoba legoreng gore tau e se šwahle. A re thibeleng ditau ge re eya pele ka ntle le poifo le Modimo ka lehlakoreng la rena! Modimo a go šegofatše.