When hope fails us – 8 December 2020

₁₆“Batho ba mehleng yeno nka ba swantšha le eng? Ba swana le bana ba ba dutšego mapatlelong a motse ba goelelana ba re:

₁Ka morago ga fao ka letšatši la Sabatha Jesu a putla ka mašemong a korong. Barutiwa ba gagwe ba be ba swerwe ke tlala, ka gona ba tšama ba ekga diako ba di ja. ₂Ge Bafarisei ba bona seo, ba re go Jesu: “Bona, barutiwa ba gago ba dira se se sego sa dumelelwa ka letšatši la Sabatha!”

₃Jesu a ba fetola a re: “Na ga se la bala se Dafida a kilego a se dira mohla wola yena le banna ba gagwe ba swerwe ke tlala? ₄O ile a tsena ka ngwakong wa Modimo, mme yena le banna ba gagwe ba ja dinkgwa tše di bego di abetšwe Modimo, se yena le banna ba gagwe ba bego ba se ba dumelelwa go se ja; e le fela baprista ba ba dumeletšwego. ₅Kgane ga se la bala mo melaong ya Moshe gore ka letšatši la Sabatha baprista ba tshela molao wa Sabatha ka Tempeleng, eupša ba se be le molato? ₆Ke le botša gore mo go na le sa go feta Tempele. ₇Ge le ka be le lemoga gore Mangwalo a Makgethwa a ra go reng ge a re: ‘Se ke se nyakago ke ge le ka ba le lešoko go na le gore le ntirele dihlabelo,’ ba ba se nago molato le ka be le sa ba tšwe; ₈gobane Morwamotho o na le tokelo ya go laetša ge eba melao ya Sabatha e swanetše go phethwa.”

₉Ge Jesu a tloga fao o ile a ya sinagogeng ₁₀moo a ilego a hwetša monna wa go repha letsogo. Batho ba be ba nyaka go phara Jesu ka molato, ka gona ba mmotšiša ba re: “Na go fodiša motho ka letšatši la Sabatha go dumeletšwe?”

₁₁Jesu a ba fetola a re: “Ke mang mo go lena yo e ka rego a na le nku e tee ya re go wela ka moleteng ka letšatši la Sabatha a se e ntšhe? ₁₂Ga ke re motho yena o phala nku kudu? Ka gona, go thuša motho ka letšatši la Sabatha go dumeletšwe.” ₁₃Ke moka a re go monna yola wa go repha letsogo: “Otlolla letsogo la gago.”

Monna yola a le otlolla, gomme la fola la swana le lela le lengwe. ₁₄Bafarisei ba tšwa ka sinagogeng ba lakana go bolaya Jesu.

₁₅Ge Jesu a seno tseba gore ba mo lakane a tloga fao, gomme a latelwa ke batho ba bantši. A fodiša bohle ba ba babjago, ₁₆gomme a ba laya gore ba se ke ba botša batho ka ga yena, ₁₇gore go tle go phethege se se boletšwego ke moprofeta Jesaya mola a re:

₂₂Ke moka ba tliša go Jesu monna wa sefofu wa semumu ka ge a be a na le modemone. Jesu a mo fodiša, gomme yena a kgona go bolela le go bona. ₂₃Lešaba ka moka la re: “Afa yo ga se yena Morwa wa Dafida?”

₂₄Ge Bafarisei ba ekwa batho ba realo ba re: “O fiwa ke Beeltsebulo, kgoši ya bademone, maatla a go leleka bademone bao.”

₂₅Jesu, ka go tseba se ba se gopolago, a re go bona: “Mmušo wo mongwe le wo mongwe wo o ikarolago dihlopha tše di lwago seng sa tšona, o tla wa. Le motse wo mongwe le wo mongwe goba lapa le lengwe le le lengwe leo batho ba lona ba ikarolago dihlopha tše di lwago seng sa tšona, le tla thubega. ₂₆Ka gona, ge meoya ye mebe mmušong wa Sathane e ka ikarola dihlopha tše di lwantšhanago, seo se tla laetša gore Sathane o ikarogantše dihlopha. Gomme mmušo wa gagwe o ka se we bjang? ₂₇Ge eba nna ke leleka bademone ka maatla a ke a fiwago ke Beeltsebulo, balatedi ba lena bona ba ba leleka ka a mang maatla? Ka ge ba ba leleka ka maatla a Modimo, gona ba laetša gore le mphara ka maaka. ₂₈Ka ge nna ke leleka bademone ka maatla a ke a fiwago ke Moya wa Modimo, se se laetša gore Modimo o šetše a thomile go hloma mmušo wa gagwe go lena.

₂₉“Kgane go na le motho yo a ka tsenago ka ngwakong wa monna wa senatla a tšea thoto ya gagwe a se a mo tlema pele, ya ba gona a hulago ngwako woo?

₃₀“Yo a sa emego le nna o lwa le nna, yo a sa tlišego batho go nna o a ba phatlalatša. ₃₁Ka gona ke le botša gore motho a ka lebalelwa sebe sefe le sefe goba nyefolo ye nngwe le ye nngwe; eupša yo a nyefolago Moya wo Mokgethwa, yena a ka se lebalelwe. ₃₂Yo a bolelago Morwamotho gampe a ka lebalelwa, eupša yo a bolelago Moya wo Mokgethwa gampe yena a ka se lebalelwe – mehleng yeno goba mehleng ya bophelo bjo bo sa felego.”

₃₃“Dienywa tše dibotse di kgewa mohlareng wo mobotse; tše e sego tše dibotse di kgewa mohlareng wo o sego wo mobotse. Mohlare o tsebja ka dienywa tše o di enywago. ₃₄Dinoga tenang, le ka bolela bjang dilo tše dibotse mola le le ba babe? Ga ke re se motho a se bolelago ke se se tšwago ka pelong ya gagwe? ₃₅Motho wa go loka o nagana tše di lokilego ka pelong ya gagwe, ka gona o bolela tše di lokilego. Yo mobe yena o nagana tše mpe, ka fao o bolela tše mpe.

₃₆“Ke le botša gore ka Letšatši la Kahlolo motho o tla sekišetšwa tšohle tša bošaedi tše a ilego a di bolela. ₃₇Motho o tla lokafatšwa goba a tšwiwa ka tše a di boletšego.”

₃₈Ke moka boramangwalo le Bafarisei ba bangwe ba re: “Moruti, re nyaka go bona o dira mohlolo.”

₃₉Jesu a ba fetola a re: “Ke moloko wo mobe wa bakgelogi wo o nyakago mohlolo, fela o ka se bontšhwe mohlolo wo mongwe ge e se wola wa moprofeta Jona. ₄₀Bjalo ka ge Jona a ile a fetša matšatši a mararo le mašego a ona ka mpeng ya hlapi ye kgolo, le Morwamotho o tlilo fetša matšatši a mararo le mašego a ona ka maleng a lefase. ₄₁Ka Letšatši la Kahlolo batho ba Ninibe ba tla tsoga bahung gotee le batho ba mehleng yeno mme ba ba tšwa, ka gobane bona ba ile ba sokologa dibeng tša bona ge Jona a ba lemoša gore Modimo o tlilo ba fediša; gomme mo go na le sa go feta Jona. ₄₂Ka Letšatši la Kahlolo Kgošigadi ya Borwa o tla tsoga bahung gotee le batho ba mehleng yeno mme a ba tšwa, ka gobane o ile a tla a etšwa kgolekgole go tlo kwa tša bohlale bja Kgoši Solomone; gomme tsebang – mo go na le bja go feta bja Solomone.

₄₃“Ge moya wo mobe o tšwile mo mothong, o ralala le mafelo a a se nago meetse, o nyaka mo o ka khutšago gona. Ge o sa go hwetše, ₄₄o re: ‘Ke tla boela kua ngwakong wo ke tšwago go ona.’ Ge o fihla o hwetše ngwako wola o se na modudi, o fietšwe, mme tšohle di beakantšwe gabotse. ₄₅Ke moka o ye o boe le meoya ye mengwe ye mebe ye e šupago ye e o fetago ka bobe, gomme e tle e dule ka moo. Seemo sa mafelelo sa motho yoo e be se sebe go feta sela sa pele. Se ke sona se se tlago hlagela moloko wo wo mobe.”

₄₆Ya re Jesu a sa bolela le batho, gwa fihla mmagwe le banababo. Ba ema ka ntle, ba nyaka go bolela le yena. ₄₇Motho yo mongwe a re go yena: “Mmago le banabeno šebale ba eme ka ntle, ba nyaka go bolela le wena.”

₄₈Jesu a mo fetola a re: “Mma ke mang? Banabešo bona ke bomang?” ₄₉Ke moka a šupa barutiwa ba gagwe a re: “Mma šo, le banabešo šeba! ₅₀Yo mongwe le yo mongwe yo a phethago thato ya Tate wa legodimong ke morwarre goba kgaetšedi goba mma.”

₁Ka lona tšatši leo Jesu a tloga gae a ya lebopong la letsha, a fihla a dula fase. ₂A kgobokanelwa ke lešaba le lentši, a ba a tsena ka leselawatleng a dula gona, mola lešaba lona le eme lebopong. ₃A ba botša ditaba tše dintši ka diswantšho a re:

“Monna yo mongwe o kile a tšwa a yo bjala peu. ₄Ge a dutše a e gaša, ye nngwe ya wela tseleng, gommme dinonyana tša tla tša e ja. ₅Ye nngwe ya wela lekgwareng moo go bego go se na mobu wo montši. Ya mela ka pela ka gobane mobu o be o sa iše fase. ₆Eupša ge letšatši le hlabile, la tšhuma dimelana tšela gomme tša pona, ka ge medu ya tšona e se ya tsenelela fase. ₇Ye nngwe ya wela mehlašaneng ya meetlwa, mme mehlašana ya gola ya kgama dimelana tšela. ₈Ye nngwe yona ya wela mobung wo mobotse, gomme mabele a gona a tswala; a mangwe a tšwa dithoro tše lekgolo, a mangwe a tšwa tše masome a a selelago, mme a mangwe a tšwa tše masome a mararo.”

₉Jesu a fetša ka go re: “Yo a nago le tsebe a a kwe!”

₁₀Barutiwa ba Jesu ba tla go yena, ba mmotšisa ba re: “O reng o bolela le batho ka diswantšho?”

₁₁Jesu a ba fetola a re: “Lena le utolletšwe diphiri tša mmušo wa Modimo, fela bona ga se ba di utollelwa. ₁₂Gape yo a nago le sa gagwe o tla okeletšwa, gore a be le tše dintši le go feta; eupša yo a se nago le sa gagwe yena o tla amogwa le bonnyane bjo a nago le bjona. ₁₃Lebaka la gore ke bolele le bona ka diswantšho ke go re ba a lebelela, fela ba se ke ba bona selo; ba a theetša, fela ba se ke ba ekwa goba ba kwešiša selo. ₁₄Ka gona, mo go bona go phethega se se porofetilwego ke Jesaya mola a re:

₁₆“Ge e le lena le ba mahlatse, ka gore a lena mahlo a a bona, le ditsebe tša lena di a kwa. ₁₇Ruri, ke le botša gore baprofeta ba bantši le baloki ba bantši ba be ba duma go bona tše le di bonago, eupša ba sa di bone. Ba be ba rata go kwa tše le di kwago, eupša ba sa di kwe.”

₁₈“Ekwang se seswantšho sa mobjadi se se šupago. ₁₉Bohle ba ba kwago molaetša wa mmušo wa Modimo eupša ba sa kwešiše, ba bjalo ka peu yela ya go wela tseleng. Yomobe a tla mme a ba amoga se se bjetšwego ka dipelong tša bona. ₂₀Peu yela ya go wela lekgwareng e šupa bao e rego ge ba ekwa molaetša woo ba akgofe ba o amogele ka lethabo. ₂₁Eupša ga o dule sebaka ka dipelong tša bona, gomme ba dumela lebakanyana fela. Ge ba tlaišwa goba ba hlomarwa ka lebaka la wona, ba o lahla ka pela. ₂₂Peu yela ya go wela mehlašaneng ya meetlwa e šupa bao e rego ge ba ekwa molaetša woo, go balabala ka tša bophelo le go goketšwa ke mahumo di tsene di khupetše molaetša woo, mme o se ba tšwele mohola. ₂₃Peu ye e bjetšwego mobung wo mobotse yona e šupa bao ba rego go kwa molaetša woo ba o kwešiša; ba atlega bjalo ka mabele ao a bago le dithoro tše lekgolo; a mangwe tše masome a a selelago, a mangwe tše masome a mararo.”

₂₄Jesu a ba botša seswantšho se sengwe a re: “Mmušo wa Modimo o ka swantšhwa ka monna yo a gašitšego peu ye botse ka tšhemong ya gagwe. ₂₅Ya re mola batho ba robetše, lenaba la gagwe la tla la gaša peu ya mphoka mabeleng, la sepela. ₂₆Ge mabele e le lekgaba mme a thoma go tswala, mphoka le wona wa ipontšha gore ke mphoka. ₂₇Bahlanka ba mong wa tšhemo ba tla ba mmotšiša ba re: ‘Morena, na ga ke re o bjetše peu ye botse ka tšhemong ya gago? Bjale mphoka wo o tšwa kae?’ ₂₈Yena a ba fetola a re: ‘Woo ke modiro wa lenaba.’ Bona ba mmotšiša ba re: ‘A o nyaka gore re yo o tumola?’ ₂₉A ba fetola a re: ‘Aowa. Le ka re ge le tumola mphoka la tumola le mabele. ₃₀Lesang mabele le mphoka di gole mmogo go fihlela ge go bunwa. Ke moo ke tlago botša babuni gore ba tumule mphoka pele, ba o tleme dingata, ba o tšhume. Mabele ona ba a kgobele, ba a tšhele ka letlolong la ka.’ ”

₃₁Jesu a ba botša seswantšho se sengwe a re: “Mmušo wa Modimo o ka swantšhwa le thorwana ya lehloko ye motho a e tšeago a e bjala ka tšhemong ya gagwe. ₃₂Etse yona e fetwa ke dipeu ka moka, eupša ge e medile e a gola ya feta dimela ka moka. E ba mohlare wo dinonyana di agago dihlaga tša tšona makaleng a wona.”

₃₃Jesu a ba botša seswantšho se sengwe gape a re: “Mmušo wa Modimo o ka swantšhwa ka komelo ye mosadi a e tšeago a e tswakanya le bupi bjo bo tletšego seroto go fihlela hlama yohle e omelega.”

₃₄Ditaba tše ka moka Jesu o be a di botša mašaba ka diswantšho; o be a sa bolele le bona selo ge e se ka diswantšho, ₃₅gore go phethege se se boletšwego ke moprofeta mola a re:

₃₆Ge Jesu a seno botša batho gore ba ye magae, le yena a ya gae. Barutiwa ba gagwe ba tla go yena ba re: “Re hlalošetše seswantšho sela sa mphoka ka tšhemong.”

₃₇Jesu a ba hlalošetša sona a re: “Mobjadi wa peu ye botse ke Morwamotho; ₃₈tšhemo ke lefase, peu ye botse ke batho ba mmušo wa Modimo, mphoka ke batho ba Yomobe, ₃₉mme lenaba le le gašitšego mphoka ke Diabolose. Puno ke bofelo bja lefase, gomme babuni ke barongwa. ₄₀Bjalo ka ge mphoka o kgobokanywa mme wa tšhungwa ka mollo, le bofelong bja lefase go tla ba ka tsela yeo. ₄₁Morwamotho o tla roma barongwa ba gagwe mmušong wa gagwe gore ba yo kgobokanya bohle bao ba dirišago batho dibe, le bohle bao ba dirago tše kgopo, ₄₂ba ba lahlele moubelong wo o laumago mollo, moo ba tlago lla ba lomanya meno. ₄₃Baloki bona ba tla taga bjalo ka letšatši mmušong wa Tatagobona. Yo a nago le tsebe a a kwe!”

₄₄“Mmušo wa Modimo o ka swantšhwa ka lehumo le le utilwego ka tšhemong, le e rego ge motho a le hweditše a le uta gape, mme ka go le thabela a rekiša tšohle tše a nago le tšona, gomme a reka tšhemo yeo.

₄₅“Le gona mmušo wa Modimo o ka swantšhwa ka mmapatši yo a nyakago magakabje a bohlokwa, ₄₆gomme ge a hwetša le bohlokwahlokwa, a tloga a yo rekiša tšohle tše a nago le tšona, gomme a le reka.”

₄₇“Le gona mmušo wa Modimo o ka swantšhwa ka lelokwa le le lahlelwago ka lewatleng, la tanya dihlapi tša mehutahuta. ₄₈Ge le tletše, barei ba le gogela lebopong, ba dula fase ba lokela tše di loketšego go jewa ka dibjaneng tša bona, mme tše di sego tša lokela go jewa ba di lahla. ₄₉Mafelelong a lefase go tla ba ka mokgwa wo: Barongwa ba tla yo kgetholla batho ba babe go ba ba lokilego, ₅₀gomme ba ba lahlela moubelong wo o laumago mollo, moo ba tlago lla ba lomanya meno.”

₅₁Jesu a ba botšiša a re: “Na tšohle tšeo le a di kwešiša?”

Ba mo fetola ba re: “Ee.”

₅₂Yena a re go bona: “Gona ke go re ramangwalo yo mongwe le yo mongwe yo e lego morutiwa mmušong wa Modimo o swana le mong wa ngwako yo a tšeago phahla ye tala le ye mpsha ka phapošing ya gagwe ya go bolokela.”

₅₃Ge Jesu a fetša go bolela ka diswantšho tšeo, a tloga fao, ₅₄a boela motseng wa gabo. A ruta batho ka sinagogeng, gomme ba ba mo kwago ba makala. Ba botšišana ba re: “Bohlale bjo bokaaka le maatla a go dira mehlolo o di tšere kae? ₅₅Na kgane ga se yena morwa wa mmetli? Mmagwe yena ga se Maria? A banababo ga se Jakobose le Josefa le Simone le Judase? ₅₆Ga ke re dikgaetšedi tša gagwe ka moka di dula le rena? Bjale tše ka moka o tšo di tšea kae?” ₅₇Gomme ba mo gana.

Jesu a re go bona: “Moprofeta o hlomphiwa gohle ge e se motseng wa gabo le lapeng labo.” ₅₈Ka ge ba be ba sa dumele go yena, o ile a se ke a dira mehlolo ye mentši fao.

₁Ka nako yeo Kgoši Heroda a kwa ka ga Jesu. ₂A botša bahlankedi ba gagwe a re: “Ruri, yo ke Johanese Mokolobetši, o tsogile bahung. Ke ka lebaka leo a nago le maatla a go dira mehlolo.”

₃Gape Heroda o be a ile a laela gore Johanese a swarwe, a tlengwe, a lahlelwe kgolegong. Taba yeo o be a e dirile ka lebaka la Herodiase, mosadi wa Filipi, morwarragwe, ₄ka ge Johanese a be a mo kgadile a re: “Ga se tshwanelo gore o tšee Herodiase!” ₅Le ge Heroda a be a rata go bolaya Johanese o be a boifa Bajuda, ka ge ba be ba re ke moprofeta.

₆Fela mohla go binwa monyanya wa matswalo a Heroda, morwedi wa Herodiase a bina pele ga baeng. A kgahla Heroda ₇moo Heroda a ilego a mo enela gore o tla mo fa se a ka mo kgopelago sona.

₈Ngwanenyana, ka ge a be a hlohleleditšwe ke mmagwe, a re: “Ntlišetše hlogo ya Johanese Mokolobetši ka sebjana gonabjale.”

₉Kgoši a nyama, eupša ka lebaka la ge a be a enne pele ga baeng, a laela gore go phethwe ka moo ngwanenyana a kgopelago ka gona. ₁₀Ka fao a roma motho a yo kgaola Johanese hlogo ka kgolegong. ₁₁Hlogo yeo ya gagwe ya tlišwa go ngwanenyana ka sebjana. Yena a e tšea a e iša go mmagwe. ₁₂Barutiwa ba Johanese ba tla ba tšea setopo sa gagwe, ba yo se boloka; ke moka ba tloga ba yo botša Jesu se se diregilego.

₁₃Ge Jesu a ekwa tše di hlagetšego Johanese, a tloga fao ka leselawatle a nnoši a ikela felo mo gongwenyana mo go se nago batho. Batho ba kwa gore o ile kae, mme ba tloga metseng ya bona ba mo latela ba sepela ka maoto. ₁₄Jesu ge a etšwa ka leselawatleng a bona lešaba le legolo, a le šokela, gomme a fodiša balwetši ba bona.

₁₅Mantšiboeng ao barutiwa ba gagwe ba tla go yena ba re: “Felo mo go kgole le metse, le gona nako e šetše e ile. Botša batho gore ba ye metseng ba ithekele dijo.”

₁₆Jesu a ba fetola a re: “Ga ba swanela go tloga. Lena ba feng tša go ja.”

₁₇Bona ba mo fetola ba re: “Rena mo re swere fela dinkgwa tše tlhano le dihlapi tše pedi.”

₁₈Jesu a re: “Di tlišeng mo.” ₁₉A laela batho gore ba dule fase bjanyeng; ke moka a tšea dinkgwa tšela tše tlhano le dihlapi tšela tše pedi, a lebelela legodimong, a reta Modimo, a mo leboga. A ngwathaganya dinkgwa tšela, a di neela barutiwa ba gagwe, gomme barutiwa ba di fa batho. ₂₀Bohle ba ja ba khora. Ba kgoboketša marathana a a šetšego, mme a tlala diroto tše lesome le metšo ye mebedi. ₂₁Ba ba llego e be e ka ba banna ba dikete tše tlhano, go sa balwe basadi le bana.

₂₂E sa le semeetseng Jesu a laela barutiwa ba gagwe gore ba namele leselawatle, ba mo ete pele ba tshelele ka mošola wa letsha, mola yena a sa botša batho gore ba boele magae. ₂₃Ge a seno ba phatlalatša, a namela thaba a nnoši gore a yo rapela. Ya ba ya ba mantšiboa a le moo a nnoši; ₂₄gomme ka nako yeo leselawatle le be le šetše le le garegare ka letsheng, le akgaakgwa ke maphoto ka gobane ba be ba lebane le phefo ye e tšubutlago.

₂₅Ya re letšatši le sešo la hlaba Jesu a tla go barutiwa ba gagwe a sepela godimo ga meetse a letsha. ₂₆Ge ba mmona a sepela godimo ga meetse ba tšhoga kudu ba re: “Ke seriti!” Gomme ba hlaba mokgoši.

₂₇Jesu a akgofa a bolela le bona a re: “Betang dipelo! Ke nna – le se ke la boifa!”

₂₈Petrose a re: “Morena, ge eba ke wena, ntaele gore ke tle go wena ke sepela godimo ga meetse.”

₂₉Jesu a mo fetola a re: “Tlaa!” Ka gona Petrose a tšwa ka leselawatleng a sepela godimo ga meetse a lebile Jesu. ₃₀Eupša ya re ge a bona gore phefo e tšubutla kudu, a boifa, gomme a thoma go sobela ka meetseng. A goa a re: “Morena, mphološe!”

₃₁Gateetee Jesu a obeletša letsogo, a mo swara, a re go yena: “Wena wa tumelo ye nnyane, o reng o belaela?”

₃₂Ya re ge ba tsene ka leselawatleng phefo ya homola. ₃₃Ke moka barutiwa bale ba ka leselawatleng ba khunamela Jesu ba re: “Ruri, ke wena Morwa wa Modimo!”

₃₄Ba tshela letsha ba fihla Genesarete ₃₅moo batho ba gona ba ilego ba lemoga gore ke Jesu. Ka gona ba roma batseta tikologong ka moka ya moo go yo botša batho gore ba tliše balwetši go Jesu. ₃₆Ba mo kgopela gore balwetši ba upše ba no kgwatha morumo wa seaparo sa gagwe, gomme bohle ba ba o kgwathago ba fola.

₁Bafarisei ba bangwe le boramangwalo ba tla go Jesu ba etšwa Jerusalema, gomme ba mmotšiša ba re: ₂“Barutiwa ba gago ba reng ba tshela ditlwaedi tša borakgolokhukhu ba rena? Gobane ge ba eja ga ba hlape diatla.”

₃Jesu a ba fetola a re: “Lena le reng le tshela taelo ya Modimo le gabile tša lena ditlwaedi? ₄Gobane Modimo o itše: ‘Hlompha tatago le mmago’; a buša a re: ‘Yo a ka rogago tatagwe le mmagwe a bolawe thoo’. ₅Eupša lena le botša batho gore ge motho a ka re go tatagwe goba mmagwe: ‘Se nka bego ke go thuša ka sona ke se abela Modimo,’ ₆le gatee ga a sa tlemegile go thuša tatagwe ka selo seo. Ka tsela yeo le nyatša molao wa Modimo, le gabile tša lena ditlwaedi. ₇Baikaketši tenang, Jesaya o porofetile gabotse ka lena mola a re:

₁₀Jesu a bitša lešaba a re go lona: “Ekwang le kwešišeng! ₁₁Tše di tšhilafatšago motho ga se tše a di jago ka molomo, eupša ke tše a di bolelago ka wona.”

₁₂Ke ge barutiwa ba gagwe ba etla go yena ba re: “Afa o a tseba gore tše o di boletšego di hlabile Bafarisei?”

₁₃Jesu a ba fetola a re: “Semela sefe le sefe se se sego sa bjalwa ke Tate wa legodimong se tla tumulwa. ₁₄Ba leseng. Ke dihlahladifofu tše di foufetšego, gomme ge sefofu se hlahla se sengwe, bobedi bja bona ba tla wela ka moleteng.”

₁₅Petrose a re go yena: “Re hlalošetše taba ye o e bolelago ye.”

₁₆Jesu a re go bona: “Na le lena le swana le bona ka go hloka kwešišo? ₁₇Kgane ga le lemoge gore se sengwe le se sengwe se se tsenago ka molomong wa motho se fetela ka mpeng gomme sa yo tšwa e le mantle? ₁₈Eupša dilo tše di tšwago ka molomong wa motho tšona ke tše di tšwago ka pelong ya gagwe, gomme tšeo ke tšona tše di tšhilafatšago motho. ₁₉Gobane ka pelong ya motho ke mo go tšwago megopolo ye mebe, e lego dipolao, bohlotlolo, bootswa, bohodu, bohlatse bja maaka, le lesebo. ₂₀Tšeo ke tšona dilo tša go tšhilafatša motho. Eupša go ja o se wa hlapa diatla ga go tšhilafatše motho.”

₂₁Jesu a tloga fao a ya tikologong ya motse wa Tirose le wa Sidone. ₂₂Mosadi yo mongwe wa Mokanana yo a bego a dula seleteng seo a tla go yena, a goa a re: “Ntšhokele, Morena, Morwa wa Dafida! Morwedi wa ka o tsenwe ke modemone gomme o mo tshwenya kudu.”

₂₃Eupša Jesu a se mo fetole. Barutiwa ba gagwe ba tla go yena, ba mo kgopela ba re: “Mmotše a sepele, ka gobane šo o goa a re šetše morago.”

₂₄Jesu a fetola a re: “Ke romilwe fela go ba setšhaba sa Israele ba ba lego bjalo ka dinku tše di timetšego.”

₂₅Mosadi yola ge a ekwa mantšu ao a tla a itahlela maotong a Jesu a re: “Morena, nthuše hle!”

₂₆Jesu a mo fetola a re: “Ga se gwa loka go tšea dijo tša bana wa di lahlela dimpša.”

₂₇Mosadi a mo fetola a re: “Gona go bjalo, Morena. Fela le tšona dimpša di ja marathana ao a wago tafoleng ya beng ba tšona.”

₂₈Ya ba Jesu o a mo fetola o re: “Mmagobatho, tumelo ya gago ke ye kgolo! A go direge ka mo o kgopelago ka gona.” Gomme ka yona nako yeo morwedi wa gagwe a fola.

₂₉Jesu a tloga fao a tla lebopong la letsha la Galilea. A namela thaba a dula fase. ₃₀Mašaba a mantši a tla go yena ba tliša digole, difofu, dihlotša, dimumu le balwetši ba bangwe ba bantši ba ba bea pele ga Jesu, gomme yena a ba fodiša. ₃₁Batho ba makala ge ba bona dimumu di bolela, dihlotša di sepela gabotse, digole di fodišitšwe, le difofu di bona, gomme ba reta Modimo wa Israele.

₃₂Jesu a bitša barutiwa ba gagwe, gomme ge ba fihla go yena a re go bona: “Batho ba ba ntlhomola pelo ka gobane e šetše e le matšatši a mararo ba na le nna, gomme ga ba sa na le se ba ka se jago. Nka se re ba sepele ba swerwe ke tlala, ka gobane ba ka tla ba lapa tseleng.”

₃₃Barutiwa ba gagwe ba mmotšiša ba re: “Mo lešokeng le re ka hwetša kae dinkgwa tša go khoriša lešaba le lekaaka?”

₃₄Jesu a ba botšiša a re: “Na le na le dinkgwa tše kae?”

Bona ba mo fetola ba re: “Re na le dinkgwa tše di šupago le dihlatswana di se kae.”

₃₅Ke mo Jesu a laetšego lešaba gore le dule fase. ₃₆Ke moka a tšea dinkgwa tšela di šupago le dihlapi tšela, a leboga Modimo, a di ngwathaganya, a di fa barutiwa; bona ba di fa batho bale. ₃₇Bohle ba ja ba khora. Barutiwa ba kgoboketša marathana a a šetšego, mme a tlala diroto tše di šupago. ₃₈Ba ba llego e be e le ba dikete tše nne, go sa balwe basadi le bana.

₃₉Ke moka Jesu a botša batho gore ba boele magae; yena a namela leselawatle a ya nageng ya Magadane.

₁Bafarisei ba bangwe le Basadusei ba kile ba tla go Jesu gore ba mo leke, mme ba mo kgopela gore a ba bontšhe mohlolo go laetša gore o romilwe ke Modimo. ₂Eupša Jesu a ba fetola a re: “Mantšiboa le re: ‘Ka moswane le tla hlaba gabotse, ka gobane leratadima le hwibitše.’ ₃Gomme ge go esa le re: ‘Lehono go tla na pula ya ledimo, ka gobane leratadima le hwibitše ebile le na le maru.’ Le kgona go tseba seemo sa moso ka go lebelela leratadima, fela ga le kgone go kwešiša gore ditiragalo tša mehla yeno di šupa eng. ₄Ke moloko wo mobe wa bakgelogi wo o nyakago mohlolo, eupša o ka se bontšhwe mohlolo wo mongwe ge e se mohlolo wa moprofeta Jona.”

Ke moka a ba tlogela a sepela.

₅Ge barutiwa ba tshelela ka mošola wa letsha ba ile ba lebala go tšea mphago wa dinkgwa. ₆Jesu a re go bona: “Le itoteng, le tšhabe komelo ya Bafarisei le ya Basadusei.”

₇Ba thoma go boledišana ba re: “O bolela ka tsela ye ka gobane ga se ra tla le dinkgwa.”

₈Jesu a tseba se ba se bolelago, ka gona a ba botšiša a re: “Ke ka lebaka lang le boledišana ka go hloka dinkgwa, lena ba tumelo ye nnyane? ₉Na ga sešo la kwešiša? Kgane ga le sa gopola mola ke ngwathaganya dinkgwa tše tlhano ke di fa banna ba dikete tše tlhano? Le ile la tlatša diroto tše kae ka marathana a go šala? ₁₀Ka dinkgwa tše di šupago tšela ke ilego ka di fa banna ba dikete tše nne gona le gopolang? Le ile la tlatša diroto tše kae ka marathana a go šala? ₁₁Bjale le reng le sa kwešiše gore ke be ke sa bolele ka dinkgwa? Le tšhabe komelo ya Bafarisei le ya Basadusei!”

₁₂Ke moka barutiwa ba lemoga gore o be a sa ba botše gore ba tšhabe komelo ya dinkgwa, eupša o be a era gore ba itlhokomele dithutong tša Bafarisei le tša Basadusei.

₁₃E rile ge Jesu a fihla tikologong ya motse wa Kesarea-Filipi a botšiša barutiwa ba gagwe a re: “Na batho ba re Morwamotho ke mang?”

₁₄Bona ba mo fetola ba re: “Ba bangwe ba re ke wena Johanese Mokolobetši, bangwe ba re o Eliya, mola bangwe ba re o Jeremia goba yo mongwe wa baprofeta.”

₁₅Jesu a ba botšiša a re: “Lena le re ke nna mang?”

₁₆Gwa fetola Simone Petrose a re: “Ke wena Mesia, Morwa wa Modimo yo a phelago.”

₁₇Jesu a re go yena: “O lehlogonolo, wena Simone, morwa wa Johanese, ka gobane se ga se wa se utollelwa ke motho, eupša o se utolletšwe ke Tate wa legodimong. ₁₈Etse ke wena Petrose. Bjale godimo ga lona leswika le ke tla aga kereke ya ka, gomme le ona maatla a lehu a ka se e fenye. ₁₉Ke tla go fa dikgonyo tša legodimo; se o se iletšago lefaseng, le legodimong se tla iletšwa; le se o se dumelelago lefaseng, le legodimong se tla dumelelwa.”

₂₀Ke moka Jesu a laya barutiwa ba gagwe gore ba se ke ba botša motho gore ke yena Mesia.

₂₁Go tloga ka nako yeo Jesu a thoma go botša barutiwa ba gagwe phatlalatša gore o swanetše go ya Jerusalema, a yo tlaišwa kudu ke bagolo ba setšhaba, le baprista ba bagolo, le boramangwalo, a be a bolawe, eupša ka letšatši la boraro a tsošwe ke Modimo bahung.

₂₂Petrose a mmiletša thoko gomme a mo kgala a re: “Modimo a go lote, Morena! Taba yeo e se ke ya go hlagela.”

₂₃Jesu a furalela Petrose a re: “Sathane, tloga ka morago ga ka! O a nkgopiša, ka gobane ga o nagane tša Modimo, o nagana tša batho.”

₂₄Ke moka Jesu a re go barutiwa ba gagwe: “Ge motho a nyaka go ba molatedi wa ka, a ikone, a ikemišetše go tlaišwa bjalo ka nna, gomme a ntatele. ₂₅Gobane yo a ipabalelago o tla lahlega, eupša yo a itatolago ka lebaka la ka o tla phelela sa ruri. ₂₆Etse motho go tla mo holang go rua lefase lohle, eupša a loba sebaka sa go hwetša bophelo bjo bo sa felego? Goba ke eng se motho a ka rekago bophelo bjo bo sa felego ka sona? ₂₇Gobane Morwamotho o tlilo tla ka letago la Tatagwe le barongwa ba gagwe, a putsa yo mongwe le yo mongwe go ya ka mediro ya gagwe. ₂₈Ruri, ke a le botša, go na le ba bangwe mo ba ba ka se kego ba hwa ba sešo ba bona Morwamotho a etla e le Kgoši.”

₁Ka morago ga matšatši a a selelago Jesu a tloga le Petrose le Jakobose le Johanese, ngwanabo, a ba iša thabeng ye telele, mme fao ba ba noši. ₂A fetoga sebopego pele ga bona: sefahlego sa gagwe sa taga bjalo ka letšatši, le diaparo tša gagwe tša šweufala tša re twaa! ₃Ke moka ba bona Moshe le Eliya ba bolela le Jesu. ₄Ya ba Petrose o re go Jesu: “Morena, ke mo gobotse bjang ge re le mo! Ge o nyaka, nka aga mešaša ye meraro fa – wo mongwe ya ba wa gago, wo mongwe ya ba wa Moshe, mme wo mongwe ya ba wa Eliya.”

₅Ya re a sa bolela, leru le le tagago la ba pipetša, mme lentšu la kwagala le etšwa lerung leo la re: “Yo ke yena Morwa wa ka yo ke mo ratago, o nkgahla kudu; le mo theeletšeng!”

₆Ge barutiwa bale ba ekwa lentšu leo ba tšhoga kudu mo ba ilego ba ba ba itahlela fase ka difahlego. ₇Jesu a tla go bona, a ba kgwatha a re: “Tsogang, le se ke la boifa!” ₈Ge ba lebelela ba se bone motho, ge e se Jesu fela.

₉Ya re ge ba theoga moo thabeng Jesu a ba laya a re: “Le se ke la botša motho ka pono ye le e bonego, go fihlela Morwamotho a tsošwa bahung.”

₁₀Ke moo barutiwa bale ba botšišitšego Jesu ba re: “Na ke ka lebaka lang boramangwalo ba re pele go swanetše go tla Eliya?”

₁₁Jesu a ba fetola a re: “Ee, Eliya o tla tla mme a bušetša dilo sekeng sa tšona. ₁₂Eupša nna ke le botša gore Eliya o be a tlile, fela batho ba se ke ba mo tseba, eupša ba mo swara ka moo ba ratago ka gona. Morwamotho le yena ba tla mo tlaiša ka yona tsela yeo.”

₁₃Ke mo barutiwa ba lemogilego gore o ra Johanese Mokolobetši.

₁₄Ge ba seno boela lešabeng, monna yo mongwe a tla go Jesu, a khunama pele ga gagwe ₁₅a re: “Morena, hle, šokela morwa wa ka! O swerwe ke bolwetši bja go wa, mme bo mo tsogela kudu mo e lego gore gantši o wela mollong goba ka meetseng. ₁₆Ke ile ka mo iša go barutiwa ba gago, eupša ba palelwa ke go mo fodiša.”