Bible Society of South Africa

Ntwa le khutšo – Letšatši la 1

Kholofelo le khomotšo

(Di)temana ya Bibele

Pesalome 91

Modimo ke Mošireletši wa rena

1Yo a lego ka lehwafeng la Ramadulagodimo,

a dulago a šireleditšwe ke Ramaatlaohle,

2a ka re go yena:

“Ke wena setšhabelo sa ka le sebo sa ka;

o Modimo yo ke mmotilego.”

3Gobane ke yena a go phefišago mereo ya barei le malwetši a mašoro.

4O go šireletša ka diphego tša gagwe;

o bolokega ge o hlokometšwe ke yena.

O botegela go go šireletša le go go phemela.

5O ka se boife dikotsi tša bošego,

goba go hlaselwa mosegare,

6le ge e le mauba a a welago batho bošego,

goba malwetši a a bolayago mosegare.

7Le ge ba sekete ba ka bolawa kgauswi le wena,

ba dikete tše lesome ka mathoko ohle a gago,

wena o ka se kgwathwe ke selo.

8O tla no lebelela ka mahlo,

wa bona ka moo bakgopo ba otlwago ka gona,

9ka gobane Morena ke setšhabelo sa gago,

Yogodimodimo o mo dirile sebo sa gago.

10O ka se welwe ke kotsi, goba lapa la gago la welwa ke leuba.

11Modimo o tla laela barongwa ba gagwe gore ba go hlokomele,

ba go šireletše gohle mo o yago gona.

12Ba tla go kuka gore o se thetšwe ke maswika.

13O tla gata ditau le dinoga,

wa gataka ditawana le dipeetla.

14Modimo o re:

“Ke tla phološa yo a nthatago,

ka šireletša yo a ntlhomphago.

15Ge a nthapela ke tla mo kwa;

ge a le mathateng ke tla ba le yena.

Ke tla mo hlakodiša, ka mo hlompha.

16Ke tla mo kgotsofatša ka bophelo bjo botelele;

ke tla mo thabiša ka go mo phološa.”

Pesalome 91:1-16NSO00Bula go Mmadi wa Bibele

Pesalome 91 e ka ba mothopo wa kholofelo. Go pesalome ye, Modimo o hlalošwa bjalo ka mošireletši yo mogolo yo a go šireletšago go tšwa go bobe bjo bongwe le bjo bongwe. Eupša ga a go šireletše fela, gape o go lokolla go tšwa go bobe. Go batho goba mašole a lego ntweng, lenaba le emela bobe. Goba o ka e lebelela gape ka ge ntwa ka boyona e le bobe. Le ge go le bjalo, Modimo o a go šireletša le go go phološa go bobe bja ntwa le dikgaruru. Modimo ka mehla o na le wena. Se se go dumelela go ikwa o homotšegile e le ruri dinakong tša leswiswi.

Bible Society of South Africav.4.28.1
RE HWETŠE GO