Deuteronomium 25

₁Moses het gesê: “Partymaal stry mense en hulle gaan hof toe, en die regter in die hof sê wie is onskuldig en wie is skuldig. ₂As die regter sê dat die persoon skuldig is en dat hulle hom moet slaan, dan moet die persoon gaan lê en die regter moet kyk dat hulle die persoon slaan. Die regter sê hoeveel houe hy moet kry vir die verkeerde ding wat hy gedoen het. ₃Hy mag 40 houe kry, nie meer nie. As hy meer as 40 houe kry, dan verneder hulle hom. Hulle moenie dit doen nie, want hy is ook 'n Israeliet.”

₄“Jy mag nie 'n bees se bek toebind wanneer hy op die dorsvloer werk nie.”

₅“Wanneer broers in dieselfde huis woon, en een van hulle sterf maar hy het nie 'n seun nie, dan mag sy weduwee nie trou met 'n man wat nie familie is van hulle nie. Haar man se broer moet met haar trou en hy moet haar man word. ₆Die eerste seun wat sy kry, moet dan die naam kry van die broer wat gesterf het, sodat die Israeliete sy naam sal onthou. ₇Maar as die broer van haar oorlede man nie met haar wil trou nie, dan moet sy na die poort gaan, na die leiers toe, en sy moet vir hulle sê: ‘My swaer wil nie hê dat die Israeliete die naam van sy broer moet onthou nie, hy wil nie met my trou nie.’

₈“Dan moet die leiers van sy stad die swaer roep en met hom praat. As hy dan daar staan en hy sê: ‘Ek wil nie met haar trou nie,’ ₉dan moet sy broer se vrou nader kom waar die leiers dit sien, en sy moet sy sandaal van sy voet afhaal. Sy moet in die man se gesig spoeg en sê: ‘Dit is wat 'n mens doen met 'n man wat nie vir sy broer wil help om 'n nageslag te kry nie.’

₁₀“Al die Israeliete sal dan sê hierdie man se huisgesin is die huisgesin van die man wat sy sandaal verloor het.”

₁₁“Wanneer twee mans baklei, en die een man se vrou kom nader om haar man te help teen die man wat hom slaan, en sy gryp die ander man se geslagsorgane, ₁₂dan moet julle haar hand afsny, julle moenie jammer wees vir haar nie.”

₁₃“Jy moenie skelm wees wanneer jy iets weeg of meet nie. Jy moenie twee soorte gewigte, grotes en kleintjies, in jou sak hê nie. ₁₄Wanneer jy iets meet, dan moet jy nie twee soorte maatlyne, grotes en kleintjies, in jou huis hê nie. ₁₅As jy lank wil lewe in die land wat jou God die Here vir jou gee, dan moet jy gewigte en mate gebruik wat reg en eerlik is. ₁₆Want die Here haat dit wanneer mense oneerlik is.”

₁₇“Julle moet onthou wat die Amalekiete aan julle gedoen het toe julle uit Egipte gekom het. ₁₈Hulle was agter julle en het julle aangeval toe julle swak en moeg was, hulle het die mense aangeval wat stadig geloop het omdat hulle moeg was. Die Amalekiete was nie bang vir God nie. ₁₉Julle God die Here sal julle laat wen teen al julle vyande, oral in die land wat Hy vir julle gee om aan julle te behoort en om vir julleself te vat. Dan moet julle al die Amalekiete doodmaak, niemand op die aarde moet hulle onthou nie. Julle moenie vergeet om dit te doen nie.”