Job 26

₂“Het jy probeer om my te help

omdat ek nie krag het nie?

Wou jy my help omdat ek te swak is

om self iets te doen?

₃Het jy probeer om vir my te sê

wat ek moet doen

omdat ek nie wysheid het nie?

Jy het baie gepraat,

soos iemand wat die ware wysheid het.

₄Wie het vir jou gesê wat jy moet sê,

by wie het jy dit gehoor?”

₅“Die geeste bewe daar onder die water,

die geeste van die mense wat gesterf het.

₆God sien wie in die doderyk is,

niemand kan in die onderwêreld

wegkruip vir Hom nie.

₇Niemand kon op die aarde woon

toe God die hemeldak styfgetrek het nie.

Daar was niks onder die aarde

toe God die aarde opgehang het nie.

₈God maak die wolke vol reënwater,

en die wolke bars nie van al die water nie.

₉God steek sy troon weg in die hemel

agter die wolke.

₁₀Hy het die horison rondom die see gesit,

daar waar die lig ophou en die donker begin.

₁₁Wanneer God kwaai praat,

dan skud en bewe die pilare waarop

die hemeldak staan.

₁₂God is sterk, Hy het die see oorwin,

God het wysheid,

Hy het vir Rahab doodgemaak.

₁₃God laat die wind waai,

en die lug word skoon en helder.

Sy sterk hand het die slang doodgemaak

toe die slang wou vlug.

₁₄Hierdie is net 'n paar van die dinge

wat God gedoen het,

Hy het nog baie meer gedoen.

Ons weet min van Hom,

niemand kan verstaan en weet

wat God alles kan doen nie.”