Levitikus 18

₁Die Here het vir Moses gesê: ₂“Jy moet vir die Israeliete sê: Ek is julle God die Here. ₃Julle het voorheen in die land Egipte gewoon, maar julle mag nie die dinge doen wat die mense van daardie land gedoen het nie. Ek bring julle nou na die land Kanaän, maar julle mag ook nie die dinge doen wat die mense van daardie land doen nie. Julle mag nie lewe soos hulle nie. ₄Julle moet doen wat Ek sê, julle moet lewe soos Ek besluit. Ek is julle God die Here. ₅Julle moet aanhou om te doen wat Ek sê en besluit. Die mens wat dit doen, sal aanhou lewe. Ek is die Here.

₆“Niemand van julle mag seks hê met iemand wat naby familie is nie. Ek is die Here. ₇Jy mag nie seks hê met jou ma nie, want jy sal skande bring oor jou pa se naam. Sy is jou ma, jy mag nie seks hê met haar nie. ₈Jy mag nie seks hê met 'n ander vrou van jou pa nie, jy sal skande bring oor jou pa se naam. ₉Jy mag nie seks hê met jou suster nie, ook nie met jou stiefsuster wat in die huis of op 'n ander plek gebore is nie. ₁₀Jy mag nie seks hê met jou kleindogter nie, want dit sal skande bring oor jou naam. ₁₁Jy mag nie seks hê met jou halwe suster nie, sy is jou suster. _12-13Jy mag nie seks hê met jou tannie nie, sy is jou pa of jou ma se suster. ₁₄Jy mag nie seks hê met jou oom se vrou nie, sy is jou tante. Jy sal skande bring oor jou oom se naam. ₁₅Jy mag nie seks hê met jou skoondogter nie, sy is jou seun se vrou, jy mag nie seks hê met haar nie. ₁₆Jy mag nie seks hê met jou skoonsuster nie, jy sal skande bring oor jou broer se naam. ₁₇Jy mag nie seks hê met 'n vrou én met haar dogter nie. Jy mag ook nie trou met 'n kleindogter van daardie vrou nie, jy sal skande bring oor die vrou se naam. Dit is haar kleindogter, dit sal sleg wees as jy met haar kleindogter trou. ₁₈Jy mag nie trou met jou vrou se suster terwyl jou vrou lewe nie. Hulle sal vyande word as jy seks het met die suster. ₁₉Jy mag nie seks hê met 'n vrou wat menstrueer nie, sy is onrein. ₂₀Jy mag nie seks hê met 'n ander man se vrou nie, jy sal onrein word. ₂₁Jy mag nie 'n kind of 'n kleinkind van jou offer vir Molek nie, jy mag nie die Naam van jou God ontwy nie. Ek is die Here. ₂₂'n Man mag nie seks hê met 'n man nie. Die Here haat dit. ₂₃'n Man mag nie seks hê met 'n dier nie. 'n Vrou mag ook nie seks hê met 'n dier nie, die Here haat dit. ₂₄Jy moenie enige een van hierdie dinge doen nie, want dan sal jy jouself onrein laat word. Die ander volke het dit gedoen en so het hulle onrein geword, die volke wat Ek wegjaag om plek te maak vir julle. ₂₅Die land het ook onrein geword, daarom sal Ek die land straf sodat die land die mense sal wegjaag. ₂₆Julle moet aanhou om te doen wat Ek sê en wat Ek besluit, julle moenie een van hierdie dinge doen wat Ek haat nie, die Israeliete moenie dit doen nie, en ook nie die vreemdelinge nie. ₂₇Want die mense van die land wat vóór julle hier was, het al hierdie dinge gedoen wat Ek haat, en die land het toe onrein geword. ₂₈Die land sal julle ook wegjaag as julle die land onrein laat word, soos die land die volk weggejaag het wat vóór julle hier was. ₂₉Julle moet die persoon wat een van al hierdie dinge doen, afsny van die volk. ₃₀Julle moet aanhou om te doen wat Ek gesê het, julle moenie een van die dinge doen wat die mense gedoen het wat voorheen hier gewoon het nie. Julle moenie julleself onrein laat word nie. Ek is julle God die Here.”