Psalms 38

₂Here, U is kwaad,

maar U moenie vir my straf nie,

U hou nie van die dinge wat ek gedoen het nie,

maar U moenie vir my laat swaarkry nie.

₃U het my geskiet met u pyle

en U het my geslaan met u hand.

₄My hele lyf is seer

omdat U vir my kwaad is,

niks in my is heel nie

omdat ek sonde gedoen het.

₅Die verkeerde dinge wat ek gedoen het,

is soos iets wat ek moet dra wat baie swaar is,

en dit is te swaar vir my.

₆Ek is 'n dwaas,

daarom is my liggaam vol seerplekke

wat stink en nog seerder word.

₇Ek is krom, ek kan nie regop loop nie,

ek loop die hele dag en huil en treur,

₈want dit voel of daar 'n vuur in my is,

my hele lyf is seer.

₉Ek is naby my einde, ek kan nie meer aanhou nie,

ek brul soos 'n leeu, want alles in my voel deurmekaar.

₁₀My Here, U weet alles wat ek wil vra,

U hoor hoe ek kla en sug.

₁₁Ek hoor my hart klop vinnig, my krag is op,

en ek kan nie meer goed sien nie.

₁₂My vriende en my maats staan nie naby my nie

omdat ek siek is,

my familie het ver gaan staan.

₁₃Die mense wat wil hê dat ek moet sterf,

wag dat ek iets moet sê of doen

waaroor hulle my kan beskuldig.

Die mense wat wil hê dat dit sleg moet gaan met my,

praat oor hoe hulle my kan laat doodmaak,

hulle dink die hele dag aan vals dinge teen my.

₁₄En ek?

Ek maak of ek doof en stom is,

ek hoor nie en ek praat nie.

₁₅Ek is soos iemand wat nie kan hoor nie

en nie kan antwoord nie,

₁₆want dit is vir U wat ek wag.

My Here, my God, dit is U wat sal antwoord,

₁₇want ek vra vir U: U moenie dat hulle bly word

oor wat met my gebeur nie,

U moenie dat hulle spog wanneer ek val nie,

₁₈want ek gaan nou val, en ek het altyd pyn.

₁₉Ek bely dat ek verkeerd gedoen het,

ek voel sleg oor my sonde.

₂₀My vyande is gesond en sterk.

Ek het niks verkeerd gedoen nie,

maar daar is baie mense wat my haat.

₂₁Ek het goed gedoen aan hulle,

maar hulle wil dit sleg laat gaan met my.

Hulle is teen my omdat ek probeer goed doen.

₂₂My God die Here, U moenie vir my los nie,

U moenie ver van my wees nie.

₂₃My Here, U moet my gou kom help,

dit is U wat my moet red.