2 Johannes 1

₁Ek, die ouderling, skryf hierdie brief vir julle. God het julle gemeente gekies en ook almal wat aan julle gemeente behoort. Ek is lief vir julle, want julle weet wat die waarheid is wat van God kom. En dit is nie net ek wat lief is vir julle nie. Almal wat die waarheid ken wat van God kom, is ook lief vir julle, ₂want die waarheid bly in ons harte en dit sal altyd by ons wees. ₃Ek bid dat God die Vader en Jesus Christus, die Seun van die Vader, genadig sal wees vir ons en dat Hy vir ons goed sal wees wanneer ons swaarkry. En ek bid dat Hy vir ons vrede sal gee, sodat ons God se waarheid en liefde sal ken.

₄Ek was baie bly toe ek party van julle gelowiges ontmoet het, mense wat lewe soos die Vader wil hê. Ja, Hy het gesê ons moet so lewe.

₅Gemeente, ek vra nou vir julle om lief te wees vir mekaar. Dit is nie 'n nuwe wet wat ek vir julle gee nie. Ons het hierdie wet van die begin af. ₆As ons lief is vir mekaar, dan doen ons wat God vir ons sê. Dit is die wet wat julle van die begin af gehoor het. Dít is wat julle moet doen.

₇Daar is baie mense wat weggegaan het van ons en wat leuens vertel in die wêreld. Hulle sê hulle glo nie dat Jesus Christus regtig 'n mens was nie. Iemand wat so iets sê, lieg. Hy is die antichris. ₈Julle moet versigtig wees! As julle nie versigtig is nie, sal julle alles verloor waarvoor ons gewerk het. As julle versigtig is en dit nie verloor nie, dan sal God die hele beloning vir julle gee. ₉Daar is mense wat anders glo as wat Christus vir ons geleer het. Hulle het nie vir God in hulle harte nie. Maar almal wat aanhou glo wat Christus vir ons geleer het, het die Vader en die Seun in hulle harte. ₁₀As daar mense by julle aankom en hulle wil vir julle iets anders leer as wat Christus geleer het, dan moet julle sê hulle mag nie in julle huise inkom nie. Julle moenie vir hulle sê hulle is welkom nie, ₁₁want as julle sê dat hulle welkom is, dan doen julle ook slegte dinge soos hulle.

₁₂Daar is baie ander dinge wat ek ook vir julle wil sê, maar ek wil dit nie in 'n brief skryf nie. Ek hoop ek sal na julle toe kan kom. Dan kan ons met mekaar praat en dan sal ons almal baie bly wees.

₁₃God het ook ons gemeente gekies. Al die gelowiges in ons gemeente stuur groete vir julle.