Eksodus 22

₁“As 'n man 'n bees of 'n skaap steel en hy slag of verkoop die dier, dan moet hy vir die eienaar van die beeste vyf beeste gee. As hy 'n skaap gesteel het, dan moet hy vir die eienaar van die skaap vier skape gee. _2-4As julle die dief vang en die dier wat hy gesteel het, lewe nog, dan moet die dief vir die eienaar van die diere twee diere gee vir elke dier wat hy gesteel het. Dit maak nie saak of dit 'n bees of 'n donkie of 'n skaap is nie. Die dief moet vir alles betaal. As hy niks het nie, dan moet julle die dief verkoop om te betaal vir die diere wat hy gesteel het. As iemand 'n dief vang terwyl hy in die nag inbreek, en hy slaan die dief dood, dan moet julle nie die man doodmaak wat hom geslaan het nie. Maar as dit in die dag gebeur, dan moet julle die man wat die dief doodgeslaan het, ook doodmaak.”

₅“Wanneer 'n man sy diere in sy veld of wingerd laat loop om te wei, dan moet hy hulle oppas. As hy sy diere vry laat loop en hulle gaan vreet ook in 'n ander man se veld, dan moet die eienaar van die diere die ander man betaal. Hy moet die beste koring en die beste druiwe vir die ander man gee.”

₆“Wanneer 'n man 'n vuur maak en die vuur verbrand ook 'n ander man se koring wat hy klaar afgesny en opmekaar gepak het, of dit verbrand sy koring wat nog groei of sy gras, dan moet die man wat die brand begin het, alles terugbetaal.”

₇“Wanneer iemand vir 'n ander man geld of goed gee om op te pas, en iemand anders steel dit uit die man se huis, en hulle vang die dief, dan moet die dief vir die eienaar twee maal soveel gee. ₈As hulle nie die dief kan vang nie, dan moet die eienaar van die huis sê dat hy nie die ander man se goed gesteel het nie. God moet die getuie wees.

₉“Mense stry partymaal oor 'n bees of 'n donkie of 'n skaap, of oor klere of oor enige iets wat weggeraak het, en iemand sê: ‘Dit is myne.’ Dan moet hulle vir God gaan vra wie is reg. God sal sê wie is skuldig, en dan moet die man wat skuldig is, vir die ander man twee maal soveel gee. ₁₀Partymaal gee iemand vir 'n ander man 'n donkie of 'n bees of 'n skaap of 'n ander dier om op te pas. As die dier vrek, of 'n ander dier byt dit dood of iemand steel dit wanneer niemand die diere oppas nie, ₁₁dan moet die man wat die dier moes oppas, sê hy het nie self die dier doodgemaak of gesteel nie. God moet die getuie wees. Dan moet die eienaar hom glo, en die ander man moenie hom betaal nie. ₁₂Maar as iemand die dier gesteel het en dit is seker, dan moet die man wat die dier moes oppas, die eienaar betaal vir die dier. ₁₃As 'n wilde dier dit doodgebyt het, en die man kan wys wat oorgebly het van die dooie dier, dan moet hy nie die eienaar betaal nie.”

₁₄“Wanneer iemand 'n ander man se dier leen en 'n wilde dier byt dit dood of dit vrek, en die eienaar is nie daar wanneer dit gebeur nie, dan moet die man wat dit geleen het, 'n ander dier gee in die plek van die dier wat dood is. ₁₅As die eienaar daar is wanneer dit gebeur, dan moet die man niks betaal nie. As hy die dier gehuur het, dan sal sy huurgeld genoeg wees om dit te betaal.”

₁₆“Wanneer 'n man 'n meisie verlei wat nie verloof is nie en hy slaap by haar, dan moet hy vir haar pa die bruidsprys gee en hy moet met die meisie trou. ₁₇As haar pa haar glad nie vir hom wil gee nie, dan moet hy ook betaal. Hy moet vir haar pa die bruidsprys gee.”

₁₈“Julle moet 'n vrou doodmaak wat toor.

₁₉“Julle moet iemand doodmaak wat seks het met 'n dier.

₂₀“Julle moet iemand doodmaak wat offers bring vir 'n ander god. Julle mag net vir die Here offer.”

₂₁“Julle mag nie slegte dinge doen aan 'n vreemdeling nie. Julle mag hom nie laat swaarkry nie. Julle moet onthou julle was ook vreemdelinge in Egipte. ₂₂Julle mag nie slegte dinge doen aan 'n weduwee of weeskind nie. ₂₃As julle dit doen, en hulle vra My om hulle te help, dan sal Ek na hulle luister. ₂₄Ek sal baie kwaad word en Ek sal julle doodmaak. Dan sal júlle vroue weduwees word en júlle kinders sal weeskinders word.”

₂₅“Wanneer julle geld leen vir arm mense by julle, dan moet julle nie wees soos die mense wat gewoonlik vir ander mense geld leen nie. Julle moenie die arm mense ook rente laat betaal nie. ₂₆Wanneer julle 'n ander man se klere vat omdat hy nie geld het om te betaal nie, dan moet julle dit vir hom teruggee wanneer die son ondergaan, ₂₇want hy moet hom daarmee toemaak. Dit is sy klere, hy moet daarin slaap. As hy My vra om hom te help, dan sal Ek luister, want Ek is jammer vir hom.”

₂₈“Julle mag nie vir God of 'n leier van julle volk vervloek nie.”

₂₉“Julle moenie al die koring wat julle afsny en die wyn wat julle maak, vir julleself hou nie. Julle moet julle oudste seuns vir My gee. ₃₀Julle moet ook die oudste bul-kalwers en die oudste ram-lammers vir My gee. Die kalf of lam moet sewe dae by sy ma bly, en op die agste dag moet julle hom vir My gee. ₃₁Julle moet gewyde mense vir My wees. Wanneer 'n wilde dier 'n mak dier doodgebyt het, dan mag julle nie die dooie dier se vleis eet nie. Julle moet daardie vleis vir die honde gooi.”