Job 36

₂“Job, jy moet nog 'n bietjie wag,

ek wil nóg met jou praat,

ek wil nóg dinge sê oor God.

₃Ek sal vir jou wys hoe baie ek weet,

ek wil wys dat God regverdig is,

God wat my gemaak het.

₄Jy kan glo wat ek sê,

ek praat net die waarheid.

₅Jy moet onthou, God is sterk,

Hy dink nie dat party mense

minder belangrik is nie.

Hy het baie krag en wysheid.

₆Hy laat nie die mense aanhou lewe

wat verkeerd doen nie.

Hy doen reg aan die mense

wat hulleself nie kan help nie.

₇Hy beskerm altyd die mense wat reg doen,

Hy laat hulle vir altyd soos konings

op trone sit,

hulle word belangrike mense.

₈As hulle gevangenes in kettings word

en baie swaar kry,

₉dan is dit omdat God vir hulle laat voel

dat hulle verkeerd gedoen het

toe hulle hoogmoedig geword het.

₁₀Hy maak hulle gehoorsaam

aan alles wat Hy vir hulle wil leer,

Hy sê vir hulle dat hulle moet ophou

om verkeerde dinge te doen.

₁₁As hulle luister en Hom dien,

dan gaan dit goed,

hulle is gelukkig,

hulle hele lewe lank.

₁₂As hulle nie luister nie, dan sterf hulle,

hulle sterf omdat hulle nie wou weet

wat hulle moet doen nie.

₁₃God word nog meer kwaad vir mense

wat nie vir Hom wil dien nie,

vir mense wat nie tot Hom bid

wanneer hulle gevangenes word nie.

₁₄Hierdie mense sterf gou,

want hulle doen slegte dinge.

₁₅God laat mense swaarkry

sodat Hy hulle kan red.

Hy laat dit sleg gaan met hulle

sodat hulle gehoorsaam kan word.

₁₆Job, God sal jou help,

jy sal nie meer swaarkry nie,

dit sal weer baie goed gaan met jou,

daar sal weer lekker kos op jou tafel wees.

₁₇Maar God straf jou swaar soos Hy

mense moet straf wat verkeerd doen,

en jy moet tevrede wees wanneer Hy

jou straf.

₁₈Jy is kwaad, maar jy moenie

daarom kies om verkeerd te doen nie.

Jy moenie verkeerde dinge doen

wanneer jy omkoopgeld kry nie.

₁₉Dit sal nie help om te skree

wanneer dit sleg gaan met jou

en jy vra dat iemand jou moet help nie.

Dit sal nie help as jy sterk is nie.

₂₀Jy moenie verlang na die donker,

na die tyd wanneer God mense

wegneem nie.

₂₁Jy moet oppas en jy moenie weer

sonde doen nie,

want jy het gekies om sonde te doen,

dit was vir jou beter as om swaar te kry.

₂₂Onthou, God is sterk, Hy regeer.

Niemand kan vir mense leer

soos Hy dit doen nie.

₂₃Niemand kan vir Hom sê

wat Hy moet doen nie,

niemand kan vir Hom sê

dat Hy verkeerd doen nie.

₂₄Jy moenie vergeet om die dinge

wat Hy doen, te prys nie.

Mense het altyd gesing

oor die dinge wat Hy doen.

₂₅Al die mense sien wat Hy doen,

maar hulle sien dit nie naby hulle nie.

₂₆Onthou, God is groot,

ons kan nie weet hoe groot Hy is nie,

ons kan nie weet hoe oud Hy is nie.

₂₇Hy trek die druppels water op

en Hy verander die druppels in reën.

₂₈Die wolke laat dit reën,

die reën val op al die baie mense.

₂₉Niemand verstaan hoe die wolke

bymekaarkom, en hoe die donderweer

raas en dreun daar waar God woon nie.

₃₀God laat die weerlig oral slaan,

maar Hy laat die see donker bly.

₃₁Hy regeer, Hy gee die reën,

en almal het kos om te eet,

meer as genoeg kos.

₃₂Hy vat die weerlig in sy hand

en Hy stuur dit waar dit moet wees.

₃₃Die beeste hoor ook hoe

die donderweer raas en dreun,

en hulle wys dat daar 'n storm kom.