Numeri 4

₁Die Here het vir Moses en Aäron gesê: ₂“Jy moet die Kehat-familie tel en opskryf van wie se nageslag en van watter familie elkeen is. ₃Jy moet almal tel wat tussen 30 en 50 jaar oud is, almal wat kan werk. Hulle moet werk met die tent waar die Here aan die Israeliete verskyn. ₄Die Kehat-familie moet werk met die hoog-gewyde dinge van die tent waar die Here aan die Israeliete verskyn. ₅Wanneer die mense in die kamp moet weggaan, dan moet Aäron en sy seuns kom en hulle moet die gordyn voor die binneste kamer afhaal. Hulle moet die kis waarin die tien gebooie is, daarmee toemaak. ₆Dan moet hulle 'n seil van sagte vel bo-oor die kis sit, en daarna 'n lap van blou wol-materiaal. Daarna moet hulle die dra-houte in die ringe van die kis sit. ₇Hulle moet 'n blou lap oor die tafel gooi waarop die offer-brood is, en dan moet hulle die skottels, die panne, die bakke en die kanne daarop sit, die kanne waarmee hulle die drank-offer uitgooi. Die offer-brood moet ook daarby wees. ₈Hulle moet 'n rooi lap bo-oor gooi en alles toemaak met 'n vel-seil. Dan moet hulle die dra-houte in die ringe van die tafel sit. ₉Daarna moet hulle 'n blou lap neem en die lampstaander toemaak, saam met die lampe en die dekseltjies wat die lampe doodmaak en die olie-kanne wat daarby moet wees. ₁₀Hulle moet 'n vel-seil oor alles gooi en hulle moet dit op pale sit om dit te dra. ₁₁Hulle moet 'n blou lap oor die goue altaar gooi en hulle moet dit toemaak met 'n vel-seil. Dan moet hulle die altaar se dra-houte in die ringe sit. ₁₂Daarna moet hulle al die gereedskap neem wat hulle in die tempel-tent gebruik en hulle moet dit in 'n blou lap sit en dit toemaak met 'n vel-seil en dit op dra-pale sit. ₁₃Hulle moet die as van die altaar afvee en 'n pers lap oor die altaar gooi. ₁₄Dan moet hulle al die gereedskap wat hulle by die altaar gebruik, daarop sit: die emmers, die vurke, die grawe en die bakke, al die gereedskap van die altaar, en hulle moet dit toemaak met 'n vel-seil. Dan moet hulle die altaar se dra-houte in die ringe sit. ₁₅Wanneer die mense moet weggaan uit die kamp, dan moet Aäron en sy seuns eers die tempel-tent en al sy gereedskap toemaak. Wanneer hulle dit klaar gedoen het, dan kan die Kehat-familie dit kom dra. Hulle mag nie aan die gewyde dinge raak nie. As hulle dit doen, dan sal hulle sterf. Die Kehat-familie se werk is om die tent te dra waar die Here aan die Israeliete verskyn.

₁₆“Eleasar seun van die priester Aäron, moet sorg dat daar olyf-olie vir die lampe is, en ook wierook, koring-offers vir elke dag, en salf-olie. Hy moet kyk dat almal reg werk in die tempel-tent en dat hulle die gereedskap reg gebruik.”

₁₇Die Here het vir Moses en Aäron gesê: _18-20“Aäron en sy seuns moet kom en hulle moet vir elkeen van die Kehat-familie sê wat hy moet doen en wat hy moet dra. Die mense van die Kehat-familie moenie kyk na die hoog-gewyde dinge nie, hulle moet glad nie kyk nie. Want as een van hulle dit doen, dan sal hy sterf, en julle moenie dat die Kehat-familie sterf en ophou lewe tussen die Leviete nie. Julle moet dit vir hulle sê sodat hulle kan aanhou lewe.”

₂₁Die Here het vir Moses gesê: ₂₂“Jy moet die Gerson-familie ook tel, jy moet skryf aan watter familie elkeen behoort en van wie se nageslag hy is. ₂₃Jy moet almal tel wat tussen 30 en 50 jaar oud is, almal wat kan werk. Hulle moet werk met die tent waar die Here aan die Israeliete verskyn. ₂₄Hierdie is die dinge wat die Gerson-familie moet doen en wat hulle moet dra: ₂₅Hulle moet die stukke materiaal van die tempel-tent dra, die tent waar die Here aan die Israeliete verskyn, en die seil en die vel-seil wat daaroor is, en die gordyn by die ingang van die tent, ₂₆en die gordyne om die oop stuk grond, en die gordyn by die ingang van die poort van die oop stuk grond rondom die tempel-tent en die altaar, en die toue en al die ander goed wat daarby moet wees. Die Gerson-familie moet alles doen wat nodig is by die altaar. ₂₇Hulle moet alles doen wat Aäron en sy seuns vir hulle sê. Hulle moet die goed dra en die werk doen wat hulle moet doen. ₂₈Dit is die werk van die Gerson-familie by die tent waar die Here aan die Israeliete verskyn. Itamar seun van die priester Aäron moet kyk dat hulle die werk doen.”

₂₉“Jy moet die Merari-familie ook tel, jy moet opskryf van wie se nageslag elkeen is en aan watter familie hy behoort. ₃₀Jy moet almal tel wat tussen 30 en 50 jaar oud is, almal wat kan werk. Hulle moet werk met die tent waar die Here aan die Israeliete verskyn. ₃₁Hierdie is die dinge wat die Merari-familie moet dra en wat hulle alles moet doen: Hulle moet die rame van die tempel-tent dra, die dwarspale en die pale en die voetstukke van die tempel-tent, ₃₂die pale van die oop stuk grond rondom die tempel-tent, en die voetstukke en die penne en toue, en alles wat daarby moet wees. Jy moet sê watter goed elkeen moet dra. ₃₃Dit is die werk van die Merari-familie met die tent waar die Here aan die Israeliete verskyn. Itamar seun van die priester Aäron moet kyk dat hulle die werk doen.”

₃₄Moses en Aäron en die leiers van die volksvergadering het die Kehat-familie getel en hulle het opgeskryf van wie se nageslag elkeen is en aan watter familie hy behoort. ₃₅Hulle het almal getel wat tussen 30 en 50 jaar oud was, en hulle het opgeskryf van wie se nageslag elkeen is en aan watter familie hy behoort. ₃₆Die Kehat-familie was almal saam 2 750. ₃₇Dit is die hele nageslag van Kehat wat gewerk het met die tent waar die Here aan die Israeliete verskyn het. Die Here het vir Moses gesê hy en Aäron en die leiers moet die Kehat-familie tel, en hulle het dit gedoen.

₃₈Moses en Aäron het ook die Gerson-familie getel. Hulle het opgeskryf van wie se nageslag elkeen is en aan watter familie hy behoort. ₃₉Hulle het almal getel wat tussen 30 en 50 jaar oud is, almal wat die werk kon doen met die tent waar die Here aan die Israeliete verskyn het. ₄₀Die Gerson-familie was almal saam 2 630. ₄₁Dit is die hele nageslag van Gerson wat gewerk het by die tent waar die Here aan die Israeliete verskyn het. Die Here het vir Moses gesê hy en Aäron en die leiers moet die Gerson-familie tel, en hulle het dit gedoen.

₄₂Moses en Aäron het ook die Merari-familie getel. Hulle het opgeskryf van wie se nageslag elkeen is en aan watter familie hy behoort. ₄₃Hulle het almal getel wat tussen 30 en 50 jaar oud is, almal wat die werk kon doen met die tent waar die Here aan die Israeliete verskyn het. ₄₄Die Merari-familie was almal saam 3 200. ₄₅Dit is die hele nageslag van Merari wat gewerk het by die tent waar die Here aan die Israeliete verskyn het. Die Here het vir Moses gesê hy en Aäron en die leiers moet die Merari-familie tel, en hulle het dit gedoen.

₄₆Moses en Aäron en die leiers van Israel het al die Leviete getel, hulle het opgeskryf van wie se nageslag elkeen is en aan watter familie hy behoort. ₄₇Hulle het almal getel wat tussen 30 en 50 jaar oud was, almal wat die werk kon doen met die tent waar die Here aan die Israeliete verskyn het. ₄₈Die Leviete was almal saam 8 580. ₄₉Die Here het vir Moses gesê hy en die ander leiers moet die Leviete tel en hulle moet vir elke familie sê watter werk die familie moet doen met die tent waar die Here aan die Israeliete verskyn het en wat elkeen moet dra.