Psalms 80

₂O Herder van Israel, U moet luister.

U wat die nageslag van Josef lei

soos 'n herder sy skape en bokke lei,

u troon is bokant die gerubs,

U moet wys wie U is.

₃U moet dit wys vir die stamme

Efraim, Benjamin en Manasse.

U moet wys dat U sterk is, U moet ons kom red.

₄O God, U moet dit weer goed laat gaan met ons,

U moet genadig wees en ons red.

₅Here, God wat oor alles regeer,

hoe lank sal U kwaad bly

en nie luister wanneer u volk bid nie?

₆U het ons baie swaar laat kry.

Ons huil en treur die hele dag,

ons trane hou nie op om te val nie.

₇U laat ons bure met mekaar stry

oor wie ons land moet vat,

ons vyande lag oor wat met ons gebeur.

₈O God, U wat oor alles regeer,

U moet dit weer goed laat gaan met ons,

U moet genadig wees en U moet ons red.

₉U het 'n wingerdstok uit Egipte geneem,

U het volke uit hulle woonplek gejaag

en U het die wingerdstok daar geplant.

₁₀U het 'n plek gereedgemaak vir die wingerdstok

en dit het gegroei, oor die hele land tot by die see.

₁₁Die berge was in die wingerdstok se skaduwee,

sy ranke was bo-oor die hoë sederbome.

₁₂Sy ranke het gegaan tot by die see,

tot by die Eufraat-rivier.

₁₃Hoekom het U die muur afgebreek

wat rondom die wingerdstok was?

Elkeen wat op die pad verbykom,

kon toe van sy druiwe pluk.

₁₄Die bosvarke trap die wingerdstok plat,

die diere vreet dit op.

₁₅O God, U wat oor alles regeer,

U moet asseblief afkyk uit die hemel

en weer goed wees vir hierdie wingerdstok.

₁₆U self het die wingerdstok geplant,

U het hom sterk laat word.

₁₇Die vyande het die wingerdstok verbrand,

hulle het dit afgekap.

U moet vir hulle wys dat U kwaad is,

U moet hulle laat verdwyn.

₁₈Maar U moet die volk beskerm

wat U vir Uself gekies het,

hulle is die wingerdstok,

en U het die wingerdstok sterk laat word.

₁₉Dan sal ons nie weer van U weggaan nie.

As U ons laat lewe, dan sal ons U aanhou prys.

₂₀Here, God wat oor alles regeer,

U moet weer goed wees vir ons,

U moet genadig wees en ons red.