Psalms 98

Julle moet vir die Here 'n nuwe lied sing,

want Hy het wonderwerke gedoen.

Hy is sterk, Hy het self oorwin,

niemand het Hom gehelp nie.

₂Die Here het gewys dat Hy oorwin het,

Hy het die volke laat sien dat Hy reg doen.

₃Hy het weer gedoen wat Hy belowe het,

Hy het dieselfde gebly vir die volk Israel.

Die mense oral op die aarde het gesien

dat ons God oorwin het.

₄Al die mense op die aarde,

julle moet juig vir die Here,

julle moet begin, julle moet sing,

julle moet musiek maak.

₅Julle moet vir die Here musiek maak

met liere, met liere en ander musiek,

₆met trompette en met ramshorings.

Julle moet juig vir die Koning, die Here.

₇Die see en alles in die see moet raas,

ook die wêreld en almal wat in die wêreld woon.

₈Die riviere moet hande klap,

en al die berge moet sing

₉vir die Here, want Hy kom

om te regeer oor die aarde.

Hy sal reg doen

wanneer Hy oor die wêreld regeer,

Hy sal reg doen aan almal

wanneer Hy oor die volke regeer.