1 Kronieke 14

₁Huram, die koning van Tirus, het gesante na Dawid gestuur, asook sederhout, klipmesselaars en skrynwerkers om vir hom 'n paleis te bou. ₂Dawid het besef dat die Here hom as koning oor Israel gevestig het, want sy koningskap het hoë aansien geniet om sy volk Israel se onthalwe.

₃Dawid het in Jerusalem nog vroue geneem, en hy het nog seuns en dogters verwek. ₄Dit is die name van die kinders wat in Jerusalem vir hom gebore is:

₈Toe die Filistyne hoor dat Dawid as koning gesalf is oor die hele Israel, het al die Filistyne opgetrek om Dawid te soek; maar Dawid het daarvan te hore gekom en teen hulle uitgetrek. ₉Die Filistyne het gekom en in die vallei van Refaïm stelling ingeneem. ₁₀Dawid het by God raad gesoek: “Moet ek teen die Filistyne optrek? Sal U hulle in my hand gee?” Die Here het vir hom gesê: “Trek op! Ek gee hulle in jou hand.”

₁₁Hulle het toe opgetrek na Baäl-Perasim, en daar het Dawid hulle verslaan. Dawid het gesê: “God het deur my hand deur my vyande gebreek soos water deurbreek.” Daarom noem hulle daardie plek Baäl-Perasim. ₁₂Die Filistyne het hulle gode daar agtergelaat. Dawid het die opdrag gegee, en dit is verbrand.

₁₃Daarna het die Filistyne weer in die vallei stelling ingeneem. ₁₄Dawid het God weer geraadpleeg, en God het vir hom gesê: “Moenie agter hulle aan optrek nie. Draai van hulle af weg en oorval hulle voor die balsempopuliere. ₁₅Sodra jy die geluid van 'n opmars in die toppe van die balsempopuliere hoor, ruk op vir die geveg; want dan het God voor jou uit getrek om die leër van die Filistyne te verslaan.” ₁₆Dawid het gemaak soos God hom beveel het, en hulle het die leër van die Filistyne verslaan, van Gibeon tot by Geser. ₁₇Dawid se roem het uitgekring na al die lande, en die Here het by al die nasies 'n vrees vir hom laat posvat.