1 Samuel 31

₁Intussen het die Filistyne teen Israel geveg en die manne van Israel het voor die Filistyne uit gevlug; die gesneuweldes het op die berg van Gilboa gelê. ₂Die Filistyne het op Saul en sy seuns se hakke gebly en hulle het Jonatan, Abinadab en Malkisua, Saul se seuns, neergevel.

₃Die geveg het verhewig teen Saul, en toe die skutters, die manne met die boog, op hom afkom, het hy onbedaarlik gebewe vir die boogskutters.

₄Saul sê toe vir sy wapendraer: “Trek jou swaard en deurboor my daarmee, anders kom hierdie onbesnedenes, en deurboor my en martel my.” Maar sy wapendraer wou nie, want hy was angsbevange. Toe vat Saul sy swaard en val daarin. ₅Toe sy wapendraer sien dat Saul dood is, val ook hy in sy swaard en sterf saam met hom. ₆So het Saul, sy drie seuns en sy wapendraer, asook al sy manne, op daardie dag saam gesterf.

₇Toe die manne van Israel wat oorkant die vallei was, en dié wat oorkant die Jordaan was, sien dat die manne van Israel gevlug het, en dat Saul en sy seuns dood is, het hulle die dorpe verlaat en gevlug. Die Filistyne het toe gekom en daar gaan woon.

₈Die volgende dag, toe die Filistyne kom om die gesneuweldes te plunder, kry hulle Saul en sy drie seuns waar hulle op die berg van Gilboa lê. ₉Hulle het sy kop afgekap en hom van sy wapens gestroop. Hulle het boodskappers in die land van die Filistyne rondgestuur om in die tempels van hulle afgode en aan die volk die goeie nuus te bring. ₁₀Hulle het sy wapens in die tempel van die Astartes neergesit, maar sy lyk het hulle teen die muur van Bet-San vasgeslaan. ₁₁Toe die inwoners van Jabes in Gilead dit hoor – wat die Filistyne Saul aangedoen het – ₁₂het al die bekwame manne gereedgemaak en die hele nag lank geloop. Hulle het die lyk van Saul en die lyke van sy seuns van die muur van Bet-San verwyder, na Jabes gegaan en hulle daar verbrand. ₁₃Toe het hulle hulle beendere geneem en dit onder die tamarisk by Jabes begrawe. Hulle het sewe dae lank gevas.