3 Johannes 1

₁Die Oudste

aan die geliefde Gaius, wat ek in die waarheid liefhet.

₂Geliefde, ek bid dat jy gesond mag wees, en dat dit in alle opsigte met jou goed mag gaan, soos dit met jou siel goed gaan. ₃Want ek was baie bly toe hier broers kom, en oor jou waarheid getuig, hoe jy die pad van waarheid loop. ₄Groter blydskap as dit het ek nie, dat ek hoor dat my kinders die pad van waarheid loop.

₅Geliefde, jy tree getrou op in wat jy ook al vir die broers doen, en dit terwyl hulle vir jou vreemdelinge is. ₆Hulle het voor die •gemeente van jou liefde getuig. Jy sal goed doen as jy hulle voorthelp op 'n manier wat God waardig ag. ₇Want ter wille van die Naam, het hulle uitgegaan, sonder om iets van die heidene te ontvang. ₈Ons behoort sulke mense daarom goed te ontvang, sodat ons medewerkers van die waarheid kan wees.

₉Ek het hieroor aan die gemeente geskryf, maar Diotrefes, wat graag die belangrikste onder hulle wil wees, gee nie aan ons erkenning nie. ₁₀Daarom sal ek, wanneer ek kom, julle herinner aan die dade wat hy doen. Hy versprei slegte stories oor ons, en asof dit vir hom nie genoeg is nie, ontvang hy self die broers nie goed nie. Boonop verhinder hy ook nog diegene wat dit wil doen, en dryf hulle uit die gemeente uit.

₁₁Geliefde, moenie die kwaad navolg nie, maar die goeie. Wie goed doen, is uit God; wie kwaad doen, het God nie gesien nie. ₁₂Oor Demetrius is deur almal positief getuig, ook deur die waarheid self. Ook ons getuig, en jy weet dat ons getuienis waar is.

₁₃Ek het baie dinge gehad om aan jou te skryf, maar wil dit nie met rietpen en ink vir jou skryf nie. ₁₄Ek hoop egter om jou gou te sien, en ons sal van aangesig tot aangesig praat.

₁₅Vrede vir jou! Jou vriende stuur vir jou groete. Groet die vriende by die naam.