Eksodus 37

₁Besaleël het die ark van doringhout gemaak, twee en 'n half el lank, een en 'n half el breed en een en 'n half el hoog. ₂Hy het dit met suiwer goud oorgetrek, aan die binnekant en aan die buitekant, en hy het reg rondom 'n goue rand aangebring. ₃Hy het vir die ark vier goue ringe aan die vier pote gegiet, twee ringe aan die een kant en twee aan die ander kant. ₄Hy het draaghoute van doringhout gemaak en dit met goud oorgetrek. ₅Hy het die draaghoute deur die ringe aan die kante van die ark gesteek om die ark daarmee te dra. ₆Hy het 'n versoendeksel van suiwer goud gemaak, twee en 'n half el lank en een en 'n half el breed. ₇Hy het twee gerubs van goud gemaak; met pletwerk het hy hulle gemaak, op die twee punte van die versoendeksel, ₈een gerub op die een punt en een gerub op die ander punt. As 'n deel van die versoendeksel het hy die gerubs op die twee punte gemaak. ₉Die gerubs is so gemaak dat hulle, met hulle vlerke oopgesprei na bo, die versoendeksel met hulle vlerke beskut het. Met hulle gesigte na mekaar, het die gerubs na die versoendeksel gekyk.

₁₀Hy het ook die tafel van doringhout gemaak, twee el lank, een el breed en een en 'n half el hoog. ₁₁Hy het dit met suiwer goud oorgetrek en reg rondom 'n goue rand aangebring. ₁₂Hy het 'n strook van een handbreedte reg rondom gemaak en 'n goue randversiering reg rondom op die strook aangebring. ₁₃Hy het vier goue ringe daarvoor gegiet en die ringe toe aan die vier hoeke van die vier pote vasgesit. ₁₄Die ringe was naby die strook, as houers vir die draaghoute om die tafel mee te dra. ₁₅Hy het die draaghoute om die tafel mee te dra, van doringhout gemaak en dit met goud oorgetrek. ₁₆Hy het die toebehore wat op die tafel moet wees, gemaak: die skottels, bakke, komme en bekers waarmee •drankoffers uitgegiet word. Dit was van suiwer goud.

₁₇Hy het die menora van suiwer goud gemaak. Met pletwerk het hy die menora – dit is sy voetstuk en sy staander – gemaak. Die kelke, blomknoppe en blomme was deel daarvan. ₁₈Ses arms het uit die kante vertak – drie arms van die menora uit die een kant en drie arms van die menora uit die ander kant. ₁₉Daar was drie kelke, gevorm soos amandelbloeisels, met 'n blomknop en blom op een arm, en drie kelke, gevorm soos amandelbloeisels, met 'n blomknop en blom op elke volgende arm. So was daar kelke aan die ses arms wat uit die menora vertak. ₂₀Op die menora self was daar vier kelke, gevorm soos amandelbloeisels, met hulle blomknoppe en blomme. ₂₁Vir die ses arms wat uit die staander vertak, was daar 'n blomknop onder aan die eerste twee arms, 'n blomknop onder aan die tweede twee arms, en 'n blomknop onder aan die derde twee arms. ₂₂Die blomknoppe en arms was 'n deel van die staander, in sy geheel geplet uit suiwer goud. ₂₃Hy het sewe lampe daarvoor gemaak. Die snuiters en bakkies daarvan was van suiwer goud. ₂₄Van 'n kikkar suiwer goud het hy dit, en ook al die toebehore daarvan, gemaak.

₂₅Hy het die altaar vir die reukwerk van doringhout gemaak. Dit was 'n el lank en 'n el breed. Dit was vierkantig, en twee el hoog. Die horings was deel daarvan. ₂₆Hy het dit met suiwer goud oorgetrek – die bokant, die kante reg rondom, en die horings. Hy het reg rondom 'n goue rand daarvoor gemaak. ₂₇Twee goue ringe het hy daarvoor gemaak, onder die rand, weerskante aan die twee sykante, as houers vir die draaghoute, om dit daarmee te dra. ₂₈Hy het draaghoute van doringhout gemaak en dit met goud oorgetrek.

₂₉Hy het ook die heilige salfolie en die suiwer geurige reukwerk gemaak – met die kundigheid van 'n salfmenger.