Esra 8

₁Dit is die familiehoofde, met hulle geslagsregisters, wat tydens die regering van koning Artasasta saam met my opgetrek het uit Babilonië:

₁₅Ek het hulle bymekaargebring by die rivier wat na Ahawa loop. Daar het ons drie dae lank kamp opgeslaan. Ek kom toe agter dat daar onder die volk en die priesters geen Leviete was nie. ₁₆Ek het toe vir Eliëser, Ariël, Semaja, Elnatan, Jarib, Elnatan, Natan, Sagaria en Mesullam, die familiehoofde, asook Jojarib en Elnatan, verstandige manne, ontbied ₁₇en hulle beveel om na Iddo, die hoof van die heilige plek by Kasifja, te gaan. Ek het aan hulle voorgesê wat hulle in Kasifja, die heilige plek, aan Iddo, sy ampsgenote en die tempeldienaars moes oordra, naamlik dat hulle vir ons dienaars vir die huis van ons God moet voorsien. ₁₈Omdat die goeie hand van ons God oor ons was, het hulle vir ons Serebja gestuur, 'n verstandige man uit die nageslag van Magli, seun van Levi, seun van Israel, asook sy seuns en ampsgenote, 18 manne; ₁₉en ook Gasabja, en saam met hom Jesaja, uit die nageslag van Merari, sy ampsgenote en hulle seuns, 20 manne; ₂₀en van die tempeldienaars wat Dawid en die •hoë amptenare gegee het om die Leviete by te staan, 220 manne, almal by die naam aangewys.

₂₁By die Ahawarivier het ek toe 'n vastyd uitgeroep. Die bedoeling was dat ons onsself voor ons God sou verootmoedig om van Hom 'n voorspoedige reis te vra vir onsself, ons afhanklikes en al ons besittings, ₂₂omdat ek te skaam was om van die koning soldate en perderuiters te vra om ons op die pad te beskerm teen vyande. Ek het immers vir die koning gesê: “Die hand van ons God is ten goede uitgestrek oor almal wat Hom raadpleeg, maar sy mag en sy toorn tref almal wat Hom verlaat.” ₂₃Ons het toe gevas en hieroor ons God se hulp gevra en Hy het ons gebede verhoor.

₂₄Daarna het ek twaalf van die leiers van die priesters afgesonder: Serebja en Gasabja, asook tien van hulle ampsgenote. ₂₅En ek het vir hulle die silwer en die goud en die voorwerpe afgeweeg, die bydraes vir die huis van ons God wat die koning, sy raadgewers en hoë amptenare en die hele Israel wat daar teenwoordig was, gemaak het. ₂₆Ek het dit op hulle hande afgeweeg: 650 kikkar silwer, 100 voorwerpe van silwer met 'n gewig van 2 kikkar, 100 kikkar goud, ₂₇asook 20 goue bakke wat 1 000 dariek werd is en 2 voorwerpe van glansende geelkoper, so waardevol soos goud. ₂₈En ek het vir hulle gesê: “Julle is gewy aan die Here, en die voorwerpe is heilig. Die silwer en die goud is 'n vrywillige gawe aan die Here, die God van julle voorouers. ₂₉Pas dit versigtig op totdat julle dit in die vertrekke van die huis van die Here in Jerusalem afweeg in die teenwoordigheid van die leiers van die priesters en die Leviete en die leiers van die families van Israel.” ₃₀Die priesters en die Leviete het toe die geweegde silwer en goud en die voorwerpe in ontvangs geneem om dit na Jerusalem, na die huis van ons God te neem.

₃₁Ons het toe op die twaalfde dag van die eerste maand vanaf die Ahawarivier na Jerusalem vertrek. Ons God het sy hand oor ons gehou en ons gered uit die greep van vyande en uit hinderlae langs die pad. ₃₂Ons het by Jerusalem aangekom en drie dae lank daar gebly. ₃₃Op die vierde dag is die silwer en die goud en die voorwerpe in die huis van ons God afgeweeg in die hand van Meremot, die priester en seun van Uria. Eleasar, die seun van Pinehas, was saam met hom, en ook die Leviete Josabad, seun van Jesua, en Noadja, seun van Binnuï. ₃₄Alles is getel en geweeg en die totale gewig is terselfdertyd opgeteken.

₃₅Die ballinge wat uit die ballingskap aangekom het, het •brandoffers gebring aan die God van Israel: twaalf bulle vir die hele Israel, ses-en-negentig ramme, sewe-en-sewentig lammers, en twaalf bokke as •reinigingsoffer, alles as 'n brandoffer vir die Here. ₃₆Daarna het hulle die koning se bevele aan die koning se satrape en aan die streekgoewerneurs van Wes-Eufraat oorgedra, en hulle het almal hulle steun gegee aan die volk en die huis van God.