Jakobus 1

₁Jakobus, 'n dienskneg van God en die Here Jesus •Christus,

aan die twaalf stamme in die Diaspora:

Gegroet!

₂Beskou dit as 'n groot vreugde, my broers, wanneer allerhande versoekings julle oorval, ₃omdat julle weet dat, as julle geloof getoets word, dit volharding meebring. ₄Maar julle volharding moet tot volledige ontwikkeling kom, sodat julle volmaak en sonder gebrek kan wees, en in geen opsig tekort skiet nie.

₅As enigiemand van julle wysheid kortkom, laat hy dit vra van God, wat aan almal gee, sonder voorbehoud en sonder verwyt, en dit sal aan hom gegee word. ₆Maar hy moet in die geloof vra, sonder om enigsins te twyfel, want wie twyfel, is soos 'n golf van die see wat deur die wind rondgeruk en voortgesleep word. ₇Want so 'n mens moenie dink dat hy enigiets van die Here sal ontvang nie. ₈Hy is 'n dubbelhartige mens, onstandvastig in alles wat hy doen.

₉Laat die broer wat gering is, hom op sy hoë aansien beroem, ₁₀en die ryke in sy geringheid, want soos 'n veldblom sal hy vergaan. ₁₁Want die son met sy hitte kom op en verdor die veld, en die blom val af, en sy skoonheid gaan tot niet. Net so sal die ryke verwelk in alles wat hy doen.

₁₂Gelukkig is die man wat versoeking deurstaan, want as hy die toets slaag, sal hy die oorwinningskrans van die lewe ontvang, wat God beloof het aan hulle wat Hom liefhet. ₁₃Laat niemand wat versoek word, sê: “Ek word deur God versoek” nie, want God kan nie deur kwaad versoek word nie, en self versoek Hy niemand nie. ₁₄Elkeen word versoek wanneer hy deur sy eie begeerte meegevoer en verlei word. ₁₅Dan, wanneer die begeerte bevrug is, gee dit geboorte aan die sonde, en wanneer die sonde volgroei is, gee dit geboorte aan die dood.

₁₆Moenie mislei word nie, my geliefde broers. ₁₇Elke goeie geskenk en elke volmaakte gawe kom van bo af, van die Vader van die hemelligte, by wie daar geen afwyking of skadu van verandering is nie. ₁₈Volgens sy wil het Hy ons verwek deur die woord van die waarheid, sodat ons eerstelinge van sy skepsels kan wees.

₁₉Let op, my geliefde broers, elke mens moet flink wees om te luister, stadig om te praat, stadig om kwaad te word. ₂₀Want die woede van 'n mens bewerk nie •geregtigheid voor God nie. ₂₁Doen daarom in sagmoedigheid afstand van alle morele besoedeling en die kwaad wat gedy, en ontvang die woord wat in julle geplant is, en daartoe in staat is om julle •siele te verlos. ₂₂Wees doeners van die woord, en nie slegs hoorders wat julleself mislei nie. ₂₃Want wie 'n hoorder van die woord is en nie 'n doener nie, is soos iemand wat sy eie gesig in 'n spieël sien. ₂₄Hy sien homself, gaan weg en vergeet onmiddellik hoe hy gelyk het. ₂₅Maar wie diep in die volmaakte wet van vryheid inkyk en daaraan hou, sal gelukkig wees in wat hy doen, omdat hy nie 'n vergeetagtige hoorder is nie, maar 'n doener. ₂₆As iemand dink dat hy godsdienstig is en nie sy tong kan beheer nie, mislei hy homself; so 'n mens se godsdiens is vergeefs. ₂₇Dít is suiwer en onbesmette godsdiens voor ons God en Vader: om na weeskinders en weduwees om te sien in hulle ellende, en jouself onbesmet van die wêreld te hou.