Numeri 3

₁Hier volg die geslagsregisters van Aäron en Moses. Die tyd toe die Here met Moses op die berg Sinai gepraat het, ₂was dit die name van Aäron se seuns: Nadab, die eersgeborene, Abihu, Eleasar en Itamar. ₃Dit was die name van Aäron se seuns, die priesters wat gesalf is, wat Moses gewy het om as priesters te dien. ₄Maar Nadab en Abihu het voor die Here gesterf, toe hulle in die Sinaiwoestyn ongeoorloofde vuur voor die Here nadergebring het. Hulle het geen seuns gehad nie, en Eleasar en Itamar het onder toesig van hulle vader, Aäron, as priesters opgetree.

₅Die Here het met Moses gepraat en gesê: ₆“Laat die stam van Levi nader kom, laat hulle plek inneem voor die priester Aäron. Hulle moet hom bystaan; ₇hulle moet sy verpligtinge en die verpligtinge van die hele volksvergadering voor die Tent van Ontmoeting help nakom deur diens te doen in die tabernakel. ₈Hulle moet toesig hou oor al die toerusting van die Tent van Ontmoeting, en die verpligtinge van die Israeliete help nakom deur diens te doen in die tabernakel.

₉“Jy moet die Leviete tot beskikking stel van Aäron en sy seuns. Hulle is volledig tot sy beskikking namens die Israeliete. ₁₀Net aan Aäron en sy seuns moet jy dit opdra om die priesterdiens waar te neem. 'n Onbevoegde persoon wat daar indring, moet doodgemaak word.”

₁₁Die Here het met Moses gepraat: ₁₂“Wat My betref, kyk, Ek het die Leviete tussen die Israeliete uitgehaal in die plek van al die eersgeborenes, die eerstelinge van die moederskoot, onder die Israeliete. Die Leviete behoort aan My ₁₃omdat al die eersgeborenes aan My behoort. Toe Ek al die eersgeborenes in Egipteland getref het, het Ek al die eersgeborenes in Israel vir My geheilig: Die eersgeborenes van mense sowel as diere behoort aan My. Ek is die Here.”

₁₄Die Here het in die Sinaiwoestyn met Moses gepraat en gesê: ₁₅“Skryf die Leviete in volgens hulle families, volgens hulle familiegroepe. Al die manlike persone van een maand en ouer moet jy inskryf.”

₁₆Moses het hulle op bevel van die Here ingeskryf, soos hy beveel is.

₁₇Dit was die nageslag van Levi met hulle name, Gerson, Kehat en Merari:

₂₁By Gerson hoort die familiegroep wat van Libni afstam en die familiegroep wat van Simi afstam. Hulle was die familiegroepe wat van Gerson afstam. ₂₂Wat betref dié wat ingeskryf is: Die volle getal van almal wat manlik was, van 'n maand en ouer, dié wat ingeskryf is, was 7 500. ₂₃Die familiegroepe wat van Gerson afstam, het agter die tabernakel kamp opgeslaan, aan die westekant. ₂₄Die leier van die Gerson-familie was Eljasaf, seun van Lael. ₂₅Die verpligtinge van die nageslag van Gerson by die Tent van Ontmoeting was die tabernakel en die boseil, sy dekkleed en die gordyn by die ingang van die •Tent van Ontmoeting, ₂₆die voorhof se seildoeke wat rondom die tabernakel en die altaar is, saam met die voorhof se afskorting en sy toue – al die werk daaraan.

₂₇By Kehat hoort die familiegroep wat van Amram afstam, die familiegroep wat van Jishar afstam, die familiegroep wat van Hebron afstam en die familiegroep wat van Ussiël afstam. Hulle was die familiegroepe wat van Kehat afstam. ₂₈Die volle getal van al die manlike persone van 'n maand en ouer was 8 600. Hulle moes die verpligtinge in die heiligdom nakom. ₂₉Die familiegroepe van die nageslag van Kehat het kamp opgeslaan langs die tabernakel, aan die suidekant. ₃₀Die leier van die familiegroepe wat van Kehat afstam, was Elisafan, seun van Ussiël. ₃₁Hulle verpligtinge was al die werk verbonde aan die ark, die tafel, die menora, die altare en die toebehore van die heiligdom waarmee hulle take verrig, asook die afskorting. ₃₂Die hoofleier van die Leviete was Eleasar, seun van die priester Aäron. Hy was in bevel van dié wat die verpligtinge in die heiligdom moes nakom.

₃₃By Merari hoort die familiegroep wat van Magli afstam en die familiegroep wat van Musi afstam. Hulle was die familiegroepe wat van Merari afgestam het. ₃₄Wat betref dié wat ingeskryf is: Die volle getal van al die manlike persone van 'n maand en ouer was 6 200. ₃₅Die leier van die familiegroepe wat van Merari afstam, was Suriël, seun van Abigajil. Hulle het langs die tabernakel tent opgeslaan, aan die noordekant. ₃₆Die verantwoordelikheid wat aan die nageslag van Merari opgedra is, was die tabernakel se houtraamwerk, die dwarshoute, tentpale en voetstukke, en al die toebehore, al die werk daaraan verbonde, ₃₇ook die tentpale van die voorhof rondom, hulle voetstukke, penne en toue.

₃₈Die groep wat voor die tabernakel, aan die oostekant, waar die son opkom, voor die Tent van Ontmoeting, moes kamp opslaan, was Moses, Aäron en sy nageslag. Hulle moes die verpligtinge in die heiligdom nakom, die verpligtinge van die Israeliete. 'n Onbevoegde persoon wat daar indring, moes doodgemaak word. ₃₉Al die ingeskrewe Leviete, wat Moses en Aäron op bevel van die Here ingeskryf het, volgens hulle familiegroepe, elke manlike persoon van 'n maand en ouer, was 22 000.

₄₀Die Here het vir Moses gesê: “Skryf elke manlike eersgeborene van die Israeliete van 'n maand en ouer in. Neem hulle volle name op in die lys. ₄₁Neem die Leviete vir My – Ek is die Here – in die plek van al die eersgeborenes van die Israeliete; en neem die diere van die Leviete in die plek van al die eersgeborenes onder die diere van die Israeliete.”

₄₂Moses het toe, soos die Here hom beveel het, al die eersgeborenes onder die Israeliete ingeskryf. ₄₃Al die manlike eersgeborenes, met volle name, van 'n maand en ouer, was volgens hulle inskrywing 22 273.

₄₄Die Here het met Moses gepraat en gesê: ₄₅“Neem die Leviete in die plek van al die eersgeborenes onder die Israeliete, en ook die Leviete se vee in die plek van hulle vee. Die Leviete behoort aan My. Ek is die Here. ₄₆Vir die loskoop van 273 van Israelitiese eersgeborenes, wat meer as die Leviete is, ₄₇moet jy vyf sikkel per kop invorder en dit bereken volgens die standaardgewig wat in die heiligdom geld. Die sikkel is twintig gera werd. ₄₈Jy moet die geld vir Aäron en sy seuns gee as losprys vir die eersgeborenes wat meer is as hulle.”

₄₉Moses het die geld vir die losprys van die Israelitiese eersgeborenes, wat meer was as dié wat deur die Leviete losgekoop is, in ontvangs geneem. ₅₀Namens die eersgeborenes van die Israeliete het hy die geld ontvang. Dit was 1 365 sikkel volgens die standaardgewig wat in die heiligdom geld. ₅₁Moses het die losprys vir Aäron en sy seuns gegee in opdrag van die Here, soos die Here Moses beveel het.