Numeri 4

₁Die Here het met Moses en Aäron gepraat en gesê: ₂“Hou onder die Leviete 'n hoofdelike telling van die nageslag van Kehat, volgens hulle familiegroepe, volgens hulle families, ₃van dertig jaar en ouer, tot vyftig jaar oud, elkeen wat ingaan vir diens om 'n taak te verrig in die Tent van Ontmoeting.

₄“Die dienswerk van die nageslag van Kehat in die Tent van Ontmoeting in verband met die allerheiligste voorwerpe is soos volg: ₅Wanneer die kamp opgebreek word, moet Aäron en sy seuns ingaan en die voorhangsel wat as afskorting dien, afhaal en die ark met die Getuienis daarmee bedek. ₆Hulle moet 'n sagte leerbedekking daaroor sit en 'n doek wat heeltemal pers is, daaroor gooi. Dan moet hulle die draaghoute insteek. ₇Oor die tafel vir die vertoonbrode moet hulle ook 'n pers doek gooi. Daarop moet hulle die skottels, die bakke, die komme en die bekers vir die •drankoffers neersit. Die brood wat deurentyd op die tafel is, moet ook daar wees. ₈Daaroor moet hulle dan 'n karmosynrooi doek gooi en dit met 'n dekkleed van sagte leer toemaak. Dan moet hulle die draaghoute insteek. ₉Hulle moet 'n pers doek vat en dit gooi oor die menora wat lig moet verskaf, saam met sy lampe, die snuiters, die bakkies en al die oliehouers waarmee hulle by die menora take verrig. ₁₀Hulle moet die menora met al sy toebehore op 'n kleed van sagte leer sit en dit op die draagbaar neerlê. ₁₁Oor die goue altaar moet hulle 'n pers doek gooi en dit met 'n kleed van sagte leer toemaak. Dan moet hulle die draaghoute insteek. ₁₂Hulle moet al die gereedskap neem waarmee hulle in die heiligdom take verrig, dit op 'n pers doek sit, met 'n kleed van sagte leer toemaak en op die draagbaar neerlê. ₁₃Hulle moet die altaar skoonvee van vetterige as en 'n purperrooi doek daaroor gooi. ₁₄Hulle moet al die gereedskap waarmee hulle by die altaar take verrig, daarop neersit: die vuurpanne, die vurke, die skoppies en offerbakke – al die gereedskap vir die altaar. Dan moet hulle 'n sagte leerbedekking daaroor gooi. Daarna moet hulle die draaghoute insteek. ₁₅Aäron en sy seuns moet die heiligdom en al die heilige voorwerpe toemaak wanneer die kamp verskuif. Eers daarna kan die nageslag van Kehat kom om dit te dra. Hulle mag nie aan iets heiligs raak nie, anders sterf hulle. Dit is dan die voorwerpe in die Tent van Ontmoeting wat die nageslag van Kehat moet dra.

₁₆“Die olie vir die lig, die geurige reukwerk, die gereelde •graanoffer en die salfolie staan onder die beheer van Eleasar, seun van die priester Aäron. Hy hou ook toesig oor die hele tabernakel en alles wat daarin is, oor sowel die heiligdom as sy gereedskap.”

₁₇Die Here het met Moses en Aäron gepraat en gesê: ₁₈“Moenie toelaat dat die familiegroepe van die Kehat-tak van die Leviete afgesny word nie. ₁₉Dit is wat julle vir hulle moet doen, sodat hulle kan leef en nie sterf wanneer hulle die besonder heilige voorwerpe nader nie: Aäron en sy seuns moet in die tabernakel ingaan en hulle aanstel, elkeen oor sy taak en by sy drawerk. ₂₀Hulle mag egter nie daar ingaan om, terwyl dit toegegooi word, na die heilige voorwerpe te kyk nie, anders sterf hulle.”

₂₁Die Here het met Moses gepraat en gesê: ₂₂“Hou 'n hoofdelike telling ook van die nageslag van Gerson volgens hulle families, volgens hulle familiegroepe, ₂₃van dertig jaar en ouer, tot vyftig jaar oud. Skryf hulle in, elkeen wat ingaan om diens te doen om 'n taak te verrig in die Tent van Ontmoeting.

₂₄“Dit is die taak wat die familiegroepe wat van Gerson afstam, moet uitvoer by die drawerk: ₂₅Hulle moet die tabernakel se tentdoeke en die Tent van Ontmoeting dra, die dekkleed en die dekkleed van sagte leer wat bo-oor kom, die gordyn by die ingang van die •Tent van Ontmoeting, ₂₆die voorhof se seildoeke wat rondom die tabernakel en die altaar is, en die afskorting by die ingang van die poort na die voorhof, asook die toue daarvan en al die voorwerpe wat deel uitmaak van hulle taak; ja, alles wat daarmee gedoen moet word, is hulle taak. ₂₇Volgens die bevele van Aäron en sy seuns moet elke taak van die nageslag van Gerson uitgevoer word. Dit geld vir al hulle drawerk en al hulle take. Julle moet vir hulle by die naam al hulle drawerk aanwys. ₂₈Dit is die taak van die familiegroepe van die nageslag van Gerson by die Tent van Ontmoeting. Hulle verpligtinge staan onder die beheer van Itamar, seun van die priester Aäron.”

₂₉“Wat die nageslag van Merari betref – volgens hulle familiegroepe, volgens hulle families, moet jy hulle inskryf. ₃₀Van dertig jaar en ouer, tot vyftig jaar oud, elkeen wat ingaan vir diens om by die Tent van Ontmoeting 'n taak te verrig, moet jy inskryf. ₃₁Die drawerk wat hulle verplig is om te doen, al hulle take by die Tent van Ontmoeting, sluit die volgende in: die houtraamwerk van die tabernakel, sy dwarshoute, pilare en voetstukke, ₃₂die pilare rondom die voorhof, die voetstukke, penne, toue en al die bypassende gereedskap, alles wat deel uitmaak van hulle taak. Julle moet vir hulle by die naam die voorwerpe wat hulle verplig is om te dra, aanwys. ₃₃Dit is die taak van die familiegroepe uit die nageslag van Merari. Al hulle take by die Tent van Ontmoeting staan onder die beheer van Itamar, seun van die priester Aäron.”

₃₄Moses en Aäron en die leiers van die volksvergadering het die nageslag van Kehat ingeskryf volgens hulle familiegroepe en families, ₃₅van dertig jaar en ouer, tot vyftig jaar oud, elkeen wat ingaan vir 'n diens om 'n taak te verrig in die Tent van Ontmoeting. ₃₆Dié wat ingeskryf is volgens hulle familiegroepe, was 2 750. ₃₇Dit was dié wat ingeskryf is van die familiegroepe wat van Kehat afstam, elkeen wat in die Tent van Ontmoeting 'n taak verrig het. Moses en Aäron het hulle ingeskryf op bevel van die Here deur die diens van Moses.

₃₈Dié wat ingeskryf is van die nageslag van Gerson, volgens hulle familiegroepe en families, ₃₉van dertig jaar en ouer, tot vyftig jaar oud, elkeen wat ingaan vir diens om 'n taak te verrig in die Tent van Ontmoeting, ₄₀ingeskryf volgens familiegroepe en families, was 2 630. ₄₁Dit was dié wat ingeskryf is van die familiegroepe van die nageslag van Gerson, elkeen wat in die Tent van Ontmoeting 'n taak verrig het, wat Moses en Aäron in opdrag van die Here ingeskryf het.

₄₂Dié wat ingeskryf is van die familiegroepe van die nageslag van Merari, ingeskryf volgens hulle familiegroepe en families, ₄₃van dertig jaar en ouer, tot vyftig jaar oud, elkeen wat ingaan vir diens om 'n taak te verrig in die Tent van Ontmoeting – ₄₄dié wat ingeskryf is volgens familiegroepe, was 3 200. ₄₅Dit was dié wat ingeskryf is van die familiegroepe van die nageslag van Merari. Moses en Aäron het hulle ingeskryf op bevel van die Here by monde van Moses.

₄₆Al dié wat ingeskryf is, die Leviete wat Moses en Aäron en die leiers van Israel ingeskryf het volgens hulle familiegroepe en families, ₄₇van dertig jaar en ouer, tot vyftig jaar oud, elkeen wat ingaan om 'n taak te verrig en drawerk te doen in die Tent van Ontmoeting – ₄₈dié wat ingeskryf is, was 8 580. ₄₉Volgens die bevel van die Here by monde van Moses, is hulle oor hulle taak en drawerk opdragte gegee, elkeen wat Moses ingeskryf het soos die Here hom beveel het.