Psalms 46

₂God is vir ons 'n skuilplek

en 'n bron van krag;

as hulp in benoudheid

is Hy altyd te vinde.

₃Daarom sal ons nie bang wees

wanneer die aarde skud,

en berge wankel in die hart

van die see nie.

₄Sy waters kan maar woed,

kan maar skuim,

berge kan maar bewe

in sy dreuning. •Sela

₅Daar is 'n rivier –

sy watervore verskaf vreugde

aan die stad van God,

die heiligste woonplek

van die Allerhoogste.

₆God is in haar midde,

sy sal nie wankel nie.

God sal haar help

wanneer die oggend aanbreek.

₇Nasies was onstuimig,

koninkryke het gewankel,

Hy het sy stem laat hoor;

die aarde sidder.

₈Die Here, Heerser oor alle magte,

is met ons,

'n toevlugsoord is die God

van Jakob vir ons. Sela

₉Kom kyk na die dade van die Here,

Hy wat skrikwekkende dinge

op aarde doen,

₁₀wat oorloë laat ophou

tot aan die einde van die aarde.

Boë breek Hy stukkend

en Hy verpletter spiese;

waens verbrand Hy in die vuur.

₁₁“Bedaar en erken dat Ek God is,

Ek is verhewe bo die nasies,

Ek is verhewe bo die aarde.”

₁₂Die Here, Heerser oor alle magte, is met ons,

'n toevlugsoord is die God

van Jakob vir ons. Sela