1 Makkabeërs 2

₁In daardie dae het Mattatias, seun van Johannes, seun van Simeon, 'n priester van die seuns van Joarib afkomstig uit Jerusalem, op die toneel verskyn en in Modeïn gaan woon. ₂Hy het vyf seuns gehad: Johannes, wat genoem word Gaddi; ₃Simon, wat genoem word Thassi; ₄Judas, wat genoem word Makkabeus; ₅Eleasar, wat genoem word Avaran; en Jonatan, wat genoem word Apfus. ₆Hy het die godslasterlike dinge gesien wat in Juda en in Jerusalem plaasgevind het ₇en gesê:

₁₅In die stad Modeïn het die koning se gesante aangekom wat die inwoners gedwing het om afstand te doen van hulle geloof, sodat hulle kon offer. ₁₆Baie uit Israel het na hulle gekom, en Mattatias en sy seuns het ook daar byeengekom. ₁₇Die koning se gesante het Mattatias geantwoord en gesê: “U is 'n hoë amptenaar, 'n man van hoë aansien, en belangrik in hierdie stad, en word deur seuns en broers ondersteun. ₁₈Gaan nou heel eerste en voer die opdrag van die koning uit, soos al die heidennasies en die mans van Juda en dié wat in Jerusalem agtergebly het, gedoen het. Dan sal u en u seuns as •Vriende van die Koning gereken word; u en u seuns sal vereer word met silwer en goud en baie geskenke.” ₁₉Maar Mattatias het geantwoord en in 'n luide stem gesê: “Al luister al die heidennasies wat in die koning se ryksgebied is, na hom, sodat elkeen die godsdiens van sy vaders verlaat en die koning se gebooie verkies, ₂₀sal ek en my seuns en my broers optree volgens die verbond van ons vaders. ₂₁Mag God dit verhoed dat ons die Wet en die voorskrifte agterweë laat! ₂₂Ons sal nie na die woorde van die koning luister en sodoende regs of links van ons godsdiens afwyk nie.” ₂₃Net nadat hy hierdie woorde klaar gesê het, het 'n Judeër voor almal se oë vorentoe gekom om volgens die opdrag van die koning op die altaar in Modeïn te offer. ₂₄Mattatias het dit gesien; hy was vol ywer en het van verontwaardiging gebewe, en in 'n vlaag van regmatige woede het hy nader gehardloop en die man op die altaar doodgeslaan. ₂₅Hy het terselfdertyd die koningsgesant, wat mense gedwing het om te offer, doodgemaak, en die altaar afgebreek. ₂₆Hy was net so ywerig vir die Wet en het gedoen soos wat Pinehas aan Sambri, seun van Salom, gedoen het. ₂₇Mattatias het met 'n luide stem in die stad uitgeroep: “Elkeen wat vol ywer is vir die Wet en die verbond onderhou – laat hom agter my aan uittrek!” ₂₈Toe het hy en sy seuns die berge in gevlug. Hulle het alles wat hulle gehad het, in die stad agtergelaat.

₂₉Toe het baie wat geregtigheid en reg gesoek het, afgegaan na die woestyn om daar te woon – ₃₀hulle, hulle seuns, hulle vroue en hulle veekuddes, want die booshede het swaar op hulle gerus. ₃₁Dit is aan die koning se manskappe vertel, asook aan die leërmagte in Jerusalem, die Stad van Dawid, dat sekere mans wat die bevel van die koning verwerp het, na skuilplekke in die woestyn gegaan het. ₃₂Baie het hulle agternagesit, en toe hulle hulle ingehaal het, het hulle regoor hulle kamp opgeslaan en hulle gereedgemaak vir oorlog teen hulle op die Sabbatdag. ₃₃Toe het die koning se manskappe vir hulle gesê: “Tot hiertoe en nie verder nie! Kom uit en voer die bevel van die koning uit, en julle sal lewe.” ₃₄Maar hulle het gesê: “Ons sal nie uitkom nie, en ook nie die bevel van die koning uitvoer om sodoende die Sabbatdag te ontheilig nie.” ₃₅Die koning se manskappe het hulle toe sonder aarseling aangeval, ₃₆maar hulle het nie op hulle gereageer nie, nóg 'n klip na hulle gegooi, nóg hulle skuilplekke versper, ₃₇want hulle het gesê: “Laat ons almal sterf in ons onskuld! Die hemel en die aarde getuig oor ons dat julle ons onregverdig vernietig.” ₃₈Hulle het hulle op die Sabbatdag aangeval en hulle, sowel as hulle vroue, kinders en veekuddes, het omgekom, ongeveer 'n duisend siele.

₃₉Mattatias en sy vriende het dit te wete gekom, en hulle het baie oor hulle getreur. ₄₀Hulle het vir mekaar gesê: “As ons almal maak soos ons broers gemaak het en nie ter wille van ons lewe en ons voorskrifte teen die heidennasies oorlog maak nie, sal hulle ons binnekort van die aarde af verdelg.” ₄₁Hulle het op daardie dag besluit: “Elke mens wat op die Sabbatdag teen ons oorlog voer, laat ons teen hom oorlog voer. Ons sal sekerlik nie almal doodgaan soos ons broers in hulle skuilplekke omgekom het nie.”

₄₂Toe het 'n groep Gasideërs by hulle aangesluit; sterk, magtige manne uit Israel, elkeen wat homself vrywillig aan die Wet onderwerp het. ₄₃Elkeen wat van die booshede weggevlug het, is by hulle gevoeg, en het hulle so versterk. ₄₄Hulle het 'n leërmag op die been gebring wat in hulle woede die sondaars en in hulle toorn die wettelose mans verslaan het. Die res het na die heidennasies gevlug om gered te word. ₄₅Mattatias en sy vriende het ook rondgegaan en altare afgebreek. ₄₆Hulle het die onbesnede seuns wat hulle in die gebied van Israel gevind het, met mening besny. ₄₇Hulle het die hoogmoediges vervolg, en die werk van hulle hande was voorspoedig. ₄₈Hulle het die Wet uit die hande van die heidennasies en uit die hande van konings teruggeneem, en hulle het vir die sondaar geen mag gegee nie.

₄₉Die tyd wat Mattatias moes sterf, het nader gekom, en hy het aan sy seuns gesê: “Nou het hoogmoed en teregwysing, asook die tyd van omverwerping en rasende woede, gevestig geraak. ₅₀En nou, kinders, beywer julle vir die Wet, en gee julle lewens ter wille van die verbond van ons vaders. ₅₁Onthou die dade van ons vaders wat hulle deur die geslagte verrig het, en mag julle groot eer en 'n ewige naam ontvang!

₆₁“Leer en verstaan dan uit geslag ná geslag dat almal wat op Hom hoop, nie swak sal wees nie. ₆₂Moenie bang wees vir die woorde van 'n sondige man nie, want sy heerlikheid verander in mis en wurms. ₆₃Vandag mag hy geëer word, maar môre sal hy nie meer gevind word nie, omdat hy tot sy stof teruggekeer het, en sy gedagtes sal vergaan. ₆₄Kinders, wees manhaftig en staan vas in die Wet, want daardeur sal julle eer verkry. ₆₅Kyk, ek weet dat julle broer Simeon 'n wyse raadsman is. Luister altyd na hom. Hy sal vir julle 'n vader wees. ₆₆Trouens, Judas Makkabeus was van jongs af buitengewoon magtig. Hy sal vir julle 'n bevelvoerder wees en hy sal die geveg veg teen die volke. ₆₇En julle, versamel al dié wat die Wet onderhou by julle en wreek die wraak van julle volk. ₆₈Vergeld die vergelding teenoor die heidennasies en hou vas aan die opdragte van die Wet.”

₆₉Hy het hulle geseën en is by sy vaders neergelê. ₇₀Hy het in die honderd-ses-en-veertigste jaar gesterf en hy is in die graf van sy vaders in Modeïn begrawe, en die hele Israel het met 'n diepe rou oor hom gerou.