2 Timoteus 4

₁Ek vermaan jou ernstig voor God en •Christus Jesus, wat die lewendes en die dooies gaan oordeel, en ook met die oog op sy verskyning en sy koninkryk: ₂Verkondig die woord, hou tydig en ontydig aan, weerlê, bestraf, bemoedig in alle geduld en deur lering. ₃Want daar kom 'n tyd wanneer hulle die gesonde leer nie sal verdra nie, maar omdat hulle ore gestreel wil word deur wat hulle hoor, sal hulle vir hulleself leermeesters na eie begeerte uitsoek. ₄Hulle sal hulle doof hou vir die waarheid, en hulle tot versinsels wend.

₅Maar bly jy in alles nugter, verduur jou lyding, doen jou werk as verkondiger van die evangelie, beoefen jou bediening voluit. ₆Want ek word reeds as •drankoffer uitgegiet, en die tyd van my dood is naby. ₇Ek het die goeie stryd gestry, ek het die wedloop voltooi, ek het die geloof behou. ₈Nou wag die oorwinningskrans van •geregtigheid op my, wat die Here, die regverdige Regter, op daardie dag vir my sal gee – en nie net vir my nie, maar ook vir almal wat sy koms liefhet.

₉Doen jou bes om gou na my toe te kom, ₁₀want Demas het my verlaat: Hy het die huidige wêreld liefgekry, en na Thessalonika vertrek, Kressens na Galasië, en Titus na Dalmasië. ₁₁Net Lukas is nog by my. Gaan haal vir Markus, en bring hom saam met jou, want hy is vir my baie nuttig in die bediening. ₁₂Tigikus het ek na Efese gestuur. ₁₃Wanneer jy kom, bring die mantel saam wat ek in Troas by Karpus agtergelaat het, en ook die •boekrolle, veral die perkamente. ₁₄Aleksander, die kopersmid, het my baie kwaad aangedoen. Die Here sal hom volgens sy dade vergeld. ₁₅Wees ook jy op jou hoede vir hom, want hy het ons woorde heftig teengestaan. ₁₆Tydens my eerste verdediging het niemand my bygestaan nie; inteendeel, almal het my in die steek gelaat. Mag dit hulle nie toegereken word nie! ₁₇Die Here het my egter ondersteun en my versterk, sodat ek die verkondiging kon voltooi, en al die heidene dit kon hoor; en ek is uit die bek van die leeu gered. ₁₈Die Here sal my van elke bose daad red, en Hy sal my verlos, met die oog op sy hemelse koninkryk. Aan Hom die heerlikheid vir ewig en ewig! •Amen.

₁₉Stuur groete vir Priska en Akwila, en Onesiforus se huisgesin. ₂₀Erastus het in Korinthe gebly, Trofimus het ek siek in Milete agtergelaat. ₂₁Doen jou bes om nog voor die winter te kom. Eubulus en Pudens en Linos en Claudia en al die broers stuur vir jou groete.

₂₂Die Here bly met jou gees! Die genade bly met julle!