Jeremia 45

₁Die woord wat die profeet Jeremia vir Barug, seun van Nerija, gesê het toe hy hierdie woorde uit die mond van Jeremia in 'n •boekrol geskryf het in die vierde regeringsjaar van Jojakim, seun van Josia, koning van Juda: ₂“So sê die Here, die God van Israel oor jou, Barug, ₃‘Jy sê: “Wee my! Want die Here het droefheid by my smart gevoeg. Ek is moeg van my gesug, en ek kry geen rus nie.” ’

₄“So moet jy vir hom sê, ‘So sê die Here: “Kyk, wat Ek gebou het, gaan Ek afbreek, en wat Ek geplant het, gaan Ek uitruk – hierdie hele land. ₅En jy, soek jy vir jouself groot dinge? Moet dit nie soek nie, want kyk, Ek gaan onheil bring oor alle mense,” is die uitspraak van die Here. “Maar Ek sal jou lewe vir jou gee as buit, op al die plekke waarheen jy sal gaan.” ’ ”