Hooglied 5

₁Ek kom na my tuin,

my suster, my bruid.

Ek pluk my mirre met my speserye,

ek eet my heuningkoek

met my heuning,

ek drink my wyn met my melk.

Eet, vriende!

Drink, en word van liefde dronk!

₂Ek was aan die slaap,

maar my hart was wakker.

Hoor daar! My liefste klop!

“Maak vir my oop,

my suster, my liefling,

my duif, my volmaakte;

my kop is nat van dou,

my lokke deurdrenk

van die nag se dou.”

₃Ek het my oorkleed al uitgetrek,

moet ek dit weer aantrek?

Ek het my voete al gewas,

moet ek dit weer laat vuil word?

₄My liefste het sy hand

deur die opening gesteek

en my hart het onstuimig geklop

oor hom.

₅Ek het opgestaan

om vir my liefste oop te maak.

My hande het gedrup van mirre,

my vingers van vloeiende mirre,

op die handvatsels van die grendel.

₆Ek het oopgemaak vir my liefste,

maar my liefste het omgedraai

en weggegaan.

Toe hy wegdraai,

het dit geduisel in my.

Ek het na hom gesoek,

maar hom nie gevind nie;

na hom geroep,

maar hy het my nie geantwoord nie.

₇Die wagte, op hulle rondtes

deur die stad, het my gevind.

Hulle het my geslaan,

hulle het my verwond,

hulle het my sjaal afgeruk,

die wagte by die stadsmure.

₈Meisies van Jerusalem,

ek besweer julle:

As julle my liefste vind,

wat moet julle vir hom sê?

Dat ek siek is van liefde.

₉Wat maak jou liefste beter as ander,

mooiste onder die vroue,

wat maak jou liefste beter as ander,

dat jy ons so besweer?

₁₀My liefste is stralend en bloesend;

hy troon bo tienduisende uit.

₁₁Sy kop is suiwer fyngoud,

sy hare raafswart dadeltrosse.

₁₂Sy oë is soos duiwe langs waterstrome,

wat bad in melk,

wat sit langs 'n vol poel.

₁₃Sy wange is soos beddings balsemkruid

wat geurige kruie laat uitspruit.

Sy lippe is narsings

wat drup van vloeiende mirre.

₁₄Sy voorarms is ronde stawe goud

met •chrisoliet versier.

Sy buik is gepoleerde ivoor,

oortrek met •lasuursteen.

₁₅Sy bene is marmerpilare

wat rus op voetstukke van fyngoud.

Sy gestalte is soos die Libanon,

uitsonderlik soos die seders.

₁₆Sy mond is pure soetigheid,

hy is die begeerlikheid self.

So lyk my liefste, so lyk my vriend,

meisies van Jerusalem!