Tobias se huwelik met Sara
1Toe hulle in Ekbatana aankom, sê Tobias: “Asarja, broer, vat my reguit na Raguel, ons broer.” Hy het hom na Raguel se huis geneem. Hulle kry hom waar hy by die hek van sy binnehof sit. Hulle het hom eerste gegroet. Raguel sê vir hulle: “Baie welkom, broers! Julle het veilig en in goeie gesondheid gereis.” Toe het hy hulle in sy huis ingeneem. 2Hy het vir sy vrou, Edna, gesê: “Hoe baie lyk hierdie jong man nie na my broer Tobit nie!” 3Toe vra Edna vir hulle: “Waar kom julle vandaan, broers?” Hulle het haar geantwoord: “Ons is van die nageslag van Naftali, gevangenes in Nineve.” 4Sy vra hulle toe: “Ken julle ons broer Tobit?” Hulle het vir haar gesê: “Ons ken hom.” 5Toe vra sy hulle: “Is hy gesond?” Hulle het vir haar gesê: “Hy is gesond en leef nog.” Tobias het bygevoeg: “Dis my pa.” 6Toe spring Raguel op en soen hom en begin huil. Raguel het vir hom gesê: “Mag daar seën vir jou wees, kind. Jy is die seun van 'n edel en goeie pa. Dat so 'n regverdige man wat soveel aalmoese uitgedeel het, blind moes word, is 'n verskriklike ramp.” Hy het Tobias, sy broer, om die nek geval en gehuil. 7Edna, sy vrou, het ook oor Tobit gehuil; ook Sara, hulle dogter, het gehuil. 8Raguel het 'n ram uit sy kudde laat slag en hulle gul onthaal.
9Toe hulle gebad en hande gewas het, en aanleun om te eet, sê Tobias vir Rafael: “Asarja, broer, sê vir Raguel hy moet Sara, my suster, vir my as vrou gee.” 10Raguel het sy woorde gehoor en vir die seun gesê: “Eet, drink en geniet hierdie nag, want daar is geen ander man wat meer daarop geregtig is om my dogter Sara te kry as jy nie, broer. Ja, ek het geen reg om haar aan 'n ander man as jy te gee nie, omdat jy naaste aan my is, maar ek moet jou die waarheid vertel, kind. 11Ek het haar al vir sewe mans gegee, almal ons broers, en elkeen het die nag gesterf toe hy na haar ingegaan het. En nou, kind, eet en drink. Die Here sal vir julle sorg.” 12Maar Tobias het geantwoord: “Ek sal beslis nie hier eet of beslis nie drink voordat u hierdie saak met my gereël het nie.” Raguel het vir hom gesê: “Ek maak so. Sy is aan jou gegee volgens die bepaling van Die Boek van Moses, want dit is uit die hemel bestem dat sy aan jou gegee word. Neem jou suster. Van nou af is jy haar broer en sy jou suster. Sy is aan jou gegee, van vandag af en vir altyd. Mag die Here van die hemel julle vannag voorspoedig maak, kind, en julle ontferming en vrede gee.” 13Raguel het sy dogter Sara geroep en sy het na hom gekom. Hy het haar hand gevat en haar vir Tobias gegee. Hy het vir hom gesê: “Neem haar as vrou volgens die wet en die bepaling wat geskryf staan in die Die Boek van Moses. Neem haar en neem haar veilig na jou vader toe. Mag die God van die hemel vir julle 'n voorspoedige reis en vrede gee.” 14Raguel het haar moeder geroep en haar gevra om 'n •boekrol te bring. Hy het die huwelikskontrak in die boekrol geskryf: dat hy Sara vir Tobias as vrou gee volgens die bepaling van die Wet van Moses. Daarna het hulle begin eet en drink.
15Toe roep Raguel sy vrou, Edna, en sê vir haar: “Suster, maak die ander kamer gereed en neem haar soontoe.” 16Edna het 'n bed in die kamer gereed gaan maak soos hy vir haar gesê het en Sara daarheen geneem. Edna het oor haar begin huil, maar haar trane afgedroog en vir Sara gesê: 17“Hou moed, dogter. Mag die Here van die hemel vir jou vreugde gee in plaas van jou verdriet. Hou moed, dogter.” Toe het sy uitgegaan.
