Esegiël 27

“Tirus, jy sê,

‘Ek is volmaak in skoonheid.’

₄In die hart van die seë lê jou gebied;

jou bouers het jou skoonheid vervolmaak.

₅Met sipreshout uit Senir

het hulle albei jou sykante gebou.

'n Seder uit die Libanon

het hulle geneem

om vir jou 'n mas te maak.

₆Met eikebome uit Basan het hulle

jou roeispane gemaak.

Jou dek het hulle ivoorkleurig

gemaak met dennehout

uit die eilande van die Kittiërs.

₇Van veelkleurige fyn linne

uit Egipte was jou seil,

om vir jou te dien as vaandel.

Pers en purperrooi materiaal

uit die eilande van Elisa

was jou kajuitbedekking.

₈Inwoners van Sidon en Arwad

was jou roeiers,

Jou ervare manne, Tirus,

was aan boord,

hulle was jou seemanne.

₉Veterane van Gebal

en sy ervare manne was aan boord

om jou lekplekke te kalfater.

“ ‘ “Al die skepe op see en hulle matrose

was in jou hawe

om van jou ruilware te bekom.

₁₀Persië, Lud en Put

was in jou leër as krygsmanne.

Skild en helm het hulle

in jou opgehang;

dit is hulle wat aan jou

luister verleen het.

₁₁Manne uit Arwad en Gelek

was rondom op jou mure,

en manne uit Gammad –

in jou torings was hulle.

Hulle het hulle rondeskilde rondom

teen jou mure opgehang;

dit is hulle wat jou skoonheid

vervolmaak het.

₁₂Tarsis het met jou handel gedryf

vanweë die oorvloed

van al die rykdom.

Met silwer, yster, tin en lood

het hulle betaal vir jou handelsware.

₁₃Jawan, Tubal en Meseg,

hulle was jou handelaars.

Met lewende mense en koperware

het hulle betaal vir jou ruilware.

₁₄Uit Bet-Togarma was daar perde,

trekperde en muile;

hulle het dit vir jou handelsware

aangebied.

₁₅Die mense van Dedan

was jou handelaars;

baie eilande was jou handelsvennote.

Olifanttande en ebbehout

het hulle teruggebring

as skatplig aan jou.

₁₆Edom het met jou handel gedryf

vanweë die oorvloed goedere

wat jy vervaardig.

Met •malagiet, purperrooi

en veelkleurig geweefde materiaal,

fyn linne, pêrels en •chalcedoon

het hulle vir jou handelsware betaal.

₁₇Juda en die land Israel,

hulle was jou handelaars.

Met koring uit Minnit, vye,

heuning, olyfolie en balsemgom

het hulle betaal vir jou ruilware.

₁₈Damaskus het met jou handel gedryf

vanweë die oorvloed goedere

wat jy vervaardig,

die oorvloed van al jou rykdom.

Met wyn uit Gelbon, wol uit Sagar

₁₉en wyn uit Usal het hulle

vir jou handelsware betaal.

Bewerkte yster, kassia en kalmoes

was onder jou ruilware.

₂₀Dedan het met jou handel gedryf

in saalkleedjies vir rydiere.

₂₁Arabië en al die leiers

van Kedar,

hulle was jou handelsvennote.

Met ramlammers, skaap- en bokramme,

daarmee het hulle

met jou handel gedryf.

₂₂Die handelaars van Skeba en Rama,

hulle was jou handelaars.

Met die keur van allerlei speserye,

allerlei edelstene en goud

het hulle betaal vir jou handelsware.

₂₃Haran, Kanne en Eden

handelaars van Skeba,

Assirië en Kilmad het met jou

handel gedryf.

₂₄Hulle was jou handelaars

in swierige mantels,

pers en veelkleurig geweefde

sjaals en kleurryke matte.

In gevlegte en geknoopte toue

het hulle met jou handel gedryf.

₂₅Handelskepe het jou ruilware

vir jou vervoer.

“ ‘ “Jy het vol geword,

was baie swaar belaai

daar in die hart van die seë.

₂₆In onstuimige waters

het jou roeiers jou gebring.

Die oostewind het jou gebreek

in die hart van die seë.

₂₇Jou rykdom, jou handelsware,

jou ruilware,

jou matrose, jou seemanne,

hulle wat jou lekplekke kalfater,

dié wat jou ruilware verhandel,

al die krygsmanne in jou,

ja, saam met die hele

strydmag in jou midde,

hulle sink weg in die hart van die seë

op die dag van jou val.

₂₈Van die harde hulpgeroep

van jou seemanne

bewe die weivelde.

₂₉Hulle verlaat hulle bote –

almal wat roeispane vashou;

die matrose, al die seevaarders –

op die land gaan staan hulle.

₃₀Hulle laat oor jou hulle stem hoor;

bitterlik skreeu hulle dit uit;

hulle strooi stof op hulle koppe;

in die as rol hulle.

₃₁Hulle skeer kaal kolle

op hulle koppe oor jou,

hulle bind rouklere om,

hulle huil oor jou met 'n verbitterde siel –

dit is 'n bitter rouplegtigheid.

₃₂Met hulle geweeklaag

hef hulle vir jou 'n klaaglied aan;

hulle sing 'n klaagsang oor jou,

‘Wie was soos Tirus,

wie was soos sy,

midde-in die see?’

₃₃Toe jou handelsware uitgegaan

het op die seë,

het jy baie volke versadig;

met die oorvloed van jou rykdom

en ruilware

het jy konings van die aarde

ryk gemaak.

₃₄Nou is jy gebreek deur die seë,

in die dieptes van die water.

Jou ruilware en jou hele strydmag

wat in jou was, het weggesink.

₃₅Al die bewoners van die eilande

staan verslae oor jou.

Hulle konings sidder onbedaarlik;

hulle gesigte is verwronge van angs.

₃₆Handelaars onder die volke

fluit oor jou;

jy het 'n verskrikking geword;

jy sal nooit weer bestaan nie.” ’ ”