Genesis 40

₁Ná verloop van tyd het die skinker van die koning van Egipte en die bakker 'n misstap begaan teenoor hulle heer, die koning van Egipte. ₂Die farao was woedend vir sy twee paleisamptenare, vir die hoof van die skinkers en die hoof van die bakkers. ₃Hy het hulle onder bewaking gestel in die huis van die hoof van die lyfwag, by die gevangenis, die plek waar Josef gevange gehou is. ₄Die hoof van die lyfwag het Josef by hulle aangestel, en hy het hulle persoonlike bediende geword. Hulle was lank onder bewaking.

₅Die skinker en die bakker van die koning van Egipte wat gevange gehou is in die gevangenis het al twee, in dieselfde nag, 'n droom gehad, elkeen sy eie droom met sy eie betekenis. ₆Toe Josef die oggend by hulle kom en hulle sien, merk hy tot sy verbasing hulle is bedruk. ₇Hy vra toe vir die farao se paleisamptenare wat saam met hom onder bewaking was in die huis van sy eienaar: “Waarom het julle vandag sulke somber gesigte?” ₈Hulle sê toe vir hom: “Ons het gedroom, en daar is niemand wat dit kan verklaar nie.” Toe sê Josef vir hulle: “Hoort verklarings nie by God nie? Vertel dit tog vir my!”

₉Die hoof van die skinkers vertel toe sy droom vir Josef. Hy het vir hom gesê: “Kyk, in my droom was daar 'n wingerdstok voor my. ₁₀Aan die wingerdstok was daar drie lote. Die wingerd het net gebot, toe ontwikkel die bloeisels al en word die klein trossies ryp druiwe. ₁₁Die farao se beker was in my hand. Ek neem toe die druiwe en pers dit uit in die farao se beker. Toe sit ek die beker in die farao se hand.”

₁₂Josef het vir hom gesê: “Dit is die verklaring daarvan: Die drie lote is drie dae. ₁₃Nog drie dae, dan sal die farao jou weer jou kop laat oplig en jou in jou amp herstel. Jy sal die farao se beker in sy hand plaas soos dit vroeër die gewoonte was toe jy nog sy skinker was. ₁₄Maar dink aan my wanneer dit met jou goed gaan. Bewys asseblief trou aan my en maak melding van my by die farao. Kry my so uit hierdie huis uit. ₁₅Want ek is inderdaad ontvoer uit die land van die Hebreërs. Ook hier het ek niks gedoen waaroor hulle my in die put moes sit nie.”

₁₆Toe die hoof van die bakkers sien dat hy dit gunstig verklaar het, sê hy vir Josef: “Ook ek was in my droom. Kyk, daar was drie mandjies met witbrood op my kop. ₁₇In die boonste mandjie was daar allerhande eetgoed wat 'n bakker voorberei het vir die farao. Maar die voëls het dit uit die mandjie op my kop geëet.”

₁₈Josef het geantwoord en gesê: “Dit is die verklaring: Die drie mandjies is drie dae. ₁₉Nog drie dae, dan lig die farao jou kop – van jou af. Hy sal jou aan 'n houtpaal hang, en die voëls sal jou vleis van jou afeet.”

₂₀Op die derde dag, op die farao se verjaarsdag, het hy 'n feesmaal aangebied vir al sy dienaars. Hy het toe daar tussen sy dienaars die hoof van die skinkers se kop en die hoof van die bakkers se kop laat lig: ₂₁Hy het die hoof van die skinkers herstel in sy amp as skinker, en hy het die beker in die farao se hand geplaas. ₂₂Die hoof van die bakkers het hy laat ophang, soos Josef dit vir hulle verklaar het.

₂₃Die hoof van die skinkers het egter nie weer aan Josef gedink nie; hy het hom vergeet.