Filemon 1

₁Paulus, die gevangene van •Christus Jesus, en ons broer Timoteus,

aan ons geliefde medewerker Filemon, ₂en ook aan ons suster Affia en ons medestryder Argippus, en die •gemeente wat in jou huis saamkom:

₃Genade vir julle, en vrede van God, ons Vader, en die Here Jesus Christus.

₄Ek dank my God altyd wanneer ek aan jou dink in my gebede, ₅omdat ek gehoor het van jou liefde vir al die heiliges, en van jou geloof in die Here Jesus. ₆Ek bid dat jou deelname aan die geloof daadkragtig mag wees, deur jou kennis van elke goeie saak wat daar onder ons is, tot eer van •Christus. ₇Ek is inderdaad baie bly en bemoedig oor jou liefde, broer, omdat die hart van die heiliges deur jou verkwik is.

₈Daarom, al het ek in •Christus groot vrymoedigheid om jou te beveel wat jy behoort te doen, ₉rig ek, Paulus, op grond van die liefde eerder 'n versoek aan jou, juis omdat ek so 'n ou man is, en nou ook nog 'n gevangene ter wille van Christus Jesus. ₁₀Ek pleit by jou vir my geestelike kind, Onesimus, wat ek tydens my gevangenskap verwek het. ₁₁Hy het destyds vir jou geen voordeel ingehou nie, maar nou hou hy vir jou en vir my groot voordeel in. ₁₂Ek het hom na jou teruggestuur, hy wat my eie hart is! ₁₃Ek wou hom graag by my hou, sodat hy my in jou plek kon dien, terwyl ek ter wille van die evangelie in boeie is. ₁₄Maar sonder jou instemming wou ek niks doen nie, sodat jy jou goeie daad nie uit dwang nie, maar vrywillig sal doen. ₁₅Dalk was hy juis om hierdie rede 'n rukkie lank van jou af weg, sodat jy hom vir altyd kan terugkry, ₁₆nie langer as 'n slaaf nie, maar meer as 'n slaaf, as 'n geliefde broer – in die besonder vir my, hoeveel te meer dan vir jou – liggaamlik, sowel as in die Here.

₁₇Indien jy my as deelgenoot beskou, verwelkom hom asof dit ek is. ₁₈En as hy jou enige skade berokken het of jou iets skuld, sit dit op my rekening. ₁₉Ek, Paulus, skryf hier met my eie hand: “Ek sal betaal.” En dan praat ek nie eers daarvan dat jy jouself aan my verskuldig is nie. ₂₀Ja, broer, mag ek tog in die Here van jou hierdie voordeel geniet; verkwik my hart in Christus.

₂₁Met volle vertroue in jou gehoorsaamheid skryf ek vir jou, in die wete dat jy selfs meer sal doen as wat ek vra. ₂₂Maak terselfdertyd ook die gastekamer vir my gereed, want ek verwag om deur julle gebede aan julle geskenk te word.

₂₃Epafras, my medegevangene in •Christus Jesus groet jou. ₂₄So ook my medewerkers Markus, Aristargus, Demas en Lukas.

₂₅Die genade van die Here Jesus •Christus bly met julle gees!